ប្រទេសថៃ Archives - Millions times

ថៃ បានបង្កើតព័ត៌មានក្លែងក្លាយជាច្រើន ក្នុងនោះក៏ប្រើបច្ចេកវិទ្យា AI ដើម្បីប្រឌិតជុំវិញស្ថានភាពបច្ចុប្បន្ន

Virak វីរៈ — Tue, 23 Dec 2025 12:17:37 +0000

ថៃ បានបន្តបង្កើតព័ត៌មានក្លែងក្លាយជាច្រើន ក្នុងនោះថៃក៏បានប្រើបច្ចេកវិទ្យា AI ដើម្បីប្រឌិត កាឡៃការពិតជុំវិញស្ថានភាពជម្លោះបច្ចុប្បន្ន និងថ្មីៗនេះ បានបង្កើតរូបភាពអវិជ្ជមានប៉ះពាល់ធ្ងន់ធ្ងរ ដល់អង្គព្រះមហាក្សត្រ ថ្នាក់ដឹកនាំជាតិ រាជរដ្ឋាភិបាល កងទ័ព និងពលរដ្ឋកម្ពុជា។ នេះបើតាមការឱ្យដឹងពីឯកឧត្តម ទេព អស្នារិទ្ធ អនុរដ្ឋលេខាធិការ និងអ្នកនាំពាក្យក្រសួងព័ត៌មាន នៅថ្ងៃទី២៣ ខែធ្នូនេះ។

តាមដានជាមួយយើង៖ Million Times

ឯកឧត្ដម បានឱ្យដឹងបន្តថា រាជរដ្ឋាភិបាលកម្ពុជា ជាពិសេសក្រសួងព័ត៌មាន បាននិងកំពុងចាត់វិធាននានា ដើម្បីទប់ស្កាត់ព័ត៌មានក្លែងក្លាយ និងការផ្សាយព័ត៌មានបែបបំពុលផ្សេងៗ មិនឱ្យរីកសាយភាយ ធ្វើឱ្យប៉ះពាល់ដល់ការគ្រប់គ្រងស្ថានភាពបច្ចុប្បន្ន និងការទទួលព័ត៌មានរបស់ប្រជាពលរដ្ឋឡើយ។ ដូច្នេះសូមសាធារណជនបន្តរក្សាភាពនឹងនរ ដោយបន្តតាមដានព័ត៌មាន ពីប្រភពផ្លូវការ, សូមកុំចែកចាយព័ត៌មានប្រភេទដូចបានរៀបរាប់ជូនខាងលើ ពិសេសព័ត៌មានអវិជ្ជមាន និងរូបភាពប្រឌិតដែលប៉ះពាល់ដល់ អង្គព្រះមហាក្សត្រ ថ្នាក់ដឹកនាំជាតិ រាជរដ្ឋាភិបាល កងទ័ព និងប្រជាជន។

អ្នកនាំពាក្យក្រសួងព័ត៌មាន បានលើកឡើងថា ទន្ទឹមនឹងទង្វើឈ្លានពានដោយប្រដាប់អាវុធគ្រប់ធុនមកលើកម្ពុជាហើយនោះ ថៃ ក៏បានប្រើសង្គ្រាមសតិអារម្មណ៍តាមរយៈការបង្កើតព័ត៌មានក្លែងក្លាយ បំភ្លៃ ប្រឌិតរឿងឡើងខុសពីការពិត, គឺការបង្កើតផ្សាយ Disinformation និង Malinformation, ដើម្បីបំពុលបរិយាកាសព័ត៌មាន បង្កភាពច្របូកច្របល់ និងការភាន់ច្រឡំក្នុងសាធារណមតិកម្ពុជា និងអន្តរជាតិ ជុំវិញស្ថានការណ៍ពិតដែលបាននិងកំពុងកើតមានឡើង ទាក់ទងនឹង ជម្លោះព្រំដែននេះ។

ឯកឧត្តម ទេព អស្នារិទ្ធ បានគូសបញ្ជាក់ថា ព័ត៌មានក្លែងក្លាយទាំងនេះ មានចំនួនជាង ២៦០ករណី គិតចាប់តាំងពីថ្ងៃ ដែលថៃបានបើកការវាយប្រហារជាថ្មីមកលើកម្ពុជា គឺចាប់ពីថ្ងៃទី៧ មកដល់ថ្ងៃទី២២ ខែធ្នូ ឆ្នាំ២០២៥ ដែលក្រសួងព័ត៌មានបានអនុវត្តវិធានការ ជាក់លាក់ជាបន្តបន្ទាប់ដើម្បីគ្រប់គ្រង ដោយសហការយ៉ាងជាប់លាប់ ក្នុងក្របខណ្ឌយន្តការសាធារណមតិរបស់រាជរដ្ឋាភិបាល ក្រសួង ស្ថាប័ន សមត្ថកិច្ចជំនាញលើវិស័យ ព្រមទាំងជាមួយរដ្ឋបាលនិងអាជ្ញាធរ ក្នុងខេត្តពាក់ព័ន្ធ។

ឯកឧត្តម ទេព អស្នារិទ្ធ បានបញ្ជាក់បន្ថែមថា ភាគច្រើននៃព័ត៌មានក្លែងក្លាយ ទាំងនោះមានប្រភពចេញមកពីថៃ និងក្រុមអគតិក្រៅប្រទេស ហើយព័ត៌មានក្លែងក្លាយបានចរាចរយ៉ាងឆាប់រហ័សលើបណ្តាញសង្គម ដែលក្នុងចំណោមនោះ មានព័ត៌មានបែបប្រឌិតផ្ទុយពីស្ថានភាពពិតជាក់ស្តែង ការផ្សាយបំភ្លៃខុសពីការពិត ដើម្បីញុះញង់ មួលបង្កាច់ថ្នាក់ដឹកនាំជាតិ និងរាជរដ្ឋាភិបាល ក្នុងចេតនាធ្វើឱ្យប៉ះពាល់ដល់ការរក្សាសាមគ្គីភាពផ្ទៃក្នុង និងជំនឿចិត្តរបស់សាធារណជនលើការដឹកនាំ។

ជាមួយគ្នានេះ ឯកឧត្តមអ្នកនាំពាក្យក្រសួងព័ត៌មាន បានបន្តអំពាវនាវឱ្យប្រជាពលរដ្ឋទាំងអស់បន្តចូលរួមជាមួយរាជរដ្ឋាភិបាល និងក្រសួងព័ត៌មាន ក្នុងការបង្ការទប់ស្កាត់ការសាយភាពព័ត៌មានក្លែងក្លាយ ពិសេសប្រភពពីក្រៅប្រទេស និងសូមចូលរួម «Report» ការផុសព័ត៌មានបំភ្លៃ ការផ្សាយបែបបំពុល និងគណនីដែលផ្សាយព័ត៌មានក្លែងក្លាយ ដើម្បីរួមចំណែករក្សាសុវត្ថិភាពព័ត៌មាននៅទូទាំងប្រទេស៕

អត្ថបទ៖ វីរៈ រូបភាព៖ ឯកឧត្តម ទេព អស្នារិទ្ធ

The post ថៃ បានបង្កើតព័ត៌មានក្លែងក្លាយជាច្រើន ក្នុងនោះក៏ប្រើបច្ចេកវិទ្យា AI ដើម្បីប្រឌិតជុំវិញស្ថានភាពបច្ចុប្បន្ន appeared first on Millions times.

ថៃកំពុងសិក្សាគម្រោងសាងរបងព្រំដែនកម្ពុជា-ថៃ ប្រវែង ១៦៥ គីឡូម៉ែត្រ ដើម្បីទប់ស្កាត់បទល្មើសឆ្លងដែន

Vin Chang — Thu, 13 Feb 2025 05:56:40 +0000

ដើម្បីទប់ស្កាត់បទល្មើសឆ្លងដែន ប្រទេសថៃបានកំពុងសិក្សាពីគម្រោងសាងសង់របងតាមព្រំដែនកម្ពុជា-ថៃ ដែលមានប្រវែង ១៦៥ គីឡូម៉ែត្រ។ នេះបើយោងតាមសារព័ត៌មានថៃបានចេញផ្សាយនៅថ្ងៃនេះ។ ក្នុងសារព័ត៌មានបានប្រកាសខាងថៃត្រៀមផ្អាកអគ្គិសនី ប្រេង អ៊ីនធឺណិត នៅព្រំដែនកម្ពុជា-ថៃ ក្នុង៣ស្រុក ១ កោះ ៤ខេត្ត នៅព្រំដែនស្រះកែវ សម្រាប់សាងសង់របងប្រវែង ១៦៥ គីឡូម៉ែត្រ ដើម្បីបង្ក្រាបបទល្មើសឆ្លងដែន។

តាមដានជាមួយយើង៖ Million Times

កាលពីថ្ងៃ១២ ខែកុម្ភៈ ឆ្នាំ ២០២៥ លោកឧត្ដមសេនីយ៍ឯក Thanathip Sawangsaeng អ្នកនាំពាក្យក្រសួងការពារជាតិ បានបង្ហើបថា លោក Phumtham Wechayachai ឧបនាយករដ្ឋមន្ត្រី និងរដ្ឋមន្ត្រីក្រសួងការពារជាតិ, លោក Prasert Chantaruangthong ឧបនាយករដ្ឋមន្ត្រី និងរដ្ឋមន្ត្រីក្រសួងសេដ្ឋកិច្ច និងសង្គមឌីជីថល និងលោក Surawong Thienthong រដ្ឋមន្ត្រីក្រសួងទេសចរណ៍ និងកីឡា បានទៅធ្វើទស្សនកិច្ចនៅស្រុក Aranyaprathet ខេត្តស្រះកែវ ដើម្បីតាមដានស្ថានភាពព្រំដែន និងជំរុញវិធានការពង្រឹងសន្តិសុខ និងសេដ្ឋកិច្ចតាមព្រំដែន។

រដ្ឋាភិបាលថៃបានឈានទៅមុខជាមួយនឹងការគិតគូរសាងសង់របងព្រំដែនប្រវែង ១៦៥ គីឡូម៉ែត្ររវាងប្រទេសថៃ និងកម្ពុជា ក្នុងខេត្តស្រះកែវ ដើម្បីគ្រប់គ្រងការចូល និងចេញ ទប់ស្កាត់អន្តោប្រវេសន៍ខុសច្បាប់ និងកាត់បន្ថយបញ្ហានៃតំបន់ត្រួតស៊ីគ្នាជាង ៥៥ គីឡូម៉ែត្រដោយចំណាយថវិកាប្រមាណ ២៨៦ លានបាត សម្រាប់ប្រតិបត្តិការនោះ។

លើសពីនេះ នគរបាលភូមិភាគទី២ បានបង្កើនភាពម៉ឺងម៉ាត់ក្នុងការបង្ក្រាបបទល្មើសឆ្លងដែន ក្រោមគោលនយោបាយ «បិទសុវត្ថិភាព» ដោយបង្កើតប៉ុស្តិ៍ត្រួតពិនិត្យ ស្វែងរកមនុស្ស និងយានយន្ត និងត្រៀមរួចរាល់ក្នុងការដំឡើងកាមេរ៉ា CCTV ឥតខ្សែ និងបង្គោលថាមពលពន្លឺព្រះអាទិត្យ ដើម្បីបង្កើនប្រសិទ្ធភាពក្នុងការឃ្លាំមើល។

ទាក់ទងនឹងឧក្រិដ្ឋកម្មតាមអ៊ីនធឺណិត Cyber Police (CyberCopTH) នឹងប្រើប្រាស់ប្រព័ន្ធ AI ដើម្បីវិភាគសំឡេង និងដំឡើងប៉ម ដើម្បីស្ទាក់ចាប់មុខសញ្ញា ព្រមទាំងបង្កើតមជ្ឈមណ្ឌលត្រួតពិនិត្យប្រតិបត្តិការពិសេស ក្នុងពេលជាមួយគ្នានោះ NBTC បានគ្រប់គ្រងសញ្ញាទូរគមនាគមន៍នៅតំបន់ព្រំដែន ដើម្បីទប់ស្កាត់ការប្រើប្រាស់ខុសច្បាប់នៃបណ្ដាញទូរស័ព្ទចល័តឆ្លងដែន។

ខាងភាគីថៃបានត្រៀមបច្ចេកទេសជាច្រើនក្នុងការទប់ស្កាត់រាល់បទល្មើសនានា ក្នុងនោះមានទាំងផ្នែកសេវាទូរស័ព្ទ និងផ្នែកធនាគារក៏រៀបចំរួចរាល់ ដើម្បីប្រមាញ់អ្នកប្រព្រឹត្តិខុសច្បាប់។ មិនទាន់អស់ឡើយអាជ្ញាធរថៃក៏បានទៅទស្សនាផ្សារ Benchawan ផងដែរ ដែលជាប់ផ្សាររោងក្លឿ ដើម្បីពិនិត្យមើលលទ្ធផលនៃវិធានការ ដកបង្គោលទូរស័ព្ទ និងកាត់ខ្សែអ៊ីនធឺណិតខុសច្បាប់។ នោះជាផ្នែកមួយនៃយុទ្ធសាស្ត្រ “បំបែកវដ្តនៃក្រុមក្មេងទំនើង Call Center” «បិទចន្លោះប្រហោងក្នុងឧក្រិដ្ឋកម្មឆ្លងដែន»។

ការចុះត្រួតពិនិត្យបានរកឃើញថា បង្គោលសញ្ញាទូរស័ព្ទទាំងអស់ដែលប្រើសម្រាប់បញ្ជូនសញ្ញាមកកម្ពុជាត្រូវបានរុះរើ។ បន្ទាប់ពីរកឃើញថាវាអាចនឹងត្រូវបានប្រើជាឆានែលដើម្បីគាំទ្របណ្ដាញក្លែងបន្លំ និងខ្សែអ៊ីនធឺណិតដែលមិនមានអាជ្ញាប័ណ្ណត្រឹមត្រូវ។ ដែលប្រឈមនឹងហានិភ័យនៃការប្រើជាឧបករណ៍ សម្រាប់អ្នកបោកប្រាស់ថៃ ត្រូវបានកាត់ផ្ដាច់សញ្ញាទាំងអស់ ក៏ដើម្បីទប់ស្កាត់ការភ្ជាប់បណ្ដាញខុសច្បាប់ផងដែរ។

នៅមានវិធានការដ៏តឹងរ៉ឹងជាច្រើនទៀត ដែលខាងប្រទេសថៃបានដាក់បទបញ្ជាទៅដល់អាជ្ញាធរពាក់ព័ន្ធ ក៏ដូចជាអាជ្ញាធរមូលដ្ឋានអនុវត្តតាម៕

អត្ថបទ៖ មេរ៉ា, រូបភាព៖ amarintv

The post ថៃកំពុងសិក្សាគម្រោងសាងរបងព្រំដែនកម្ពុជា-ថៃ ប្រវែង ១៦៥ គីឡូម៉ែត្រ ដើម្បីទប់ស្កាត់បទល្មើសឆ្លងដែន appeared first on Millions times.

ថៃសុំជំនួយពីប៉ូលិសអន្តរប៉ូល តាមចាប់ខ្លួនអ្នកជំនួញជើងចាស់រត់ចោលស្រុក

ទីន Tin — Tue, 26 Nov 2024 05:19:34 +0000

កាលពីថ្ងៃទី២៥ ខែវិច្ឆិកា សារព័ត៌មាន CNA បានរាយការណ៍ថា ប៉ូលិសថៃកំពុងសុំជំនួយពីប៉ូលិសអន្តរប៉ូល ដើម្បីយកដីកាតាមចាប់ខ្លួនអ្នកជំនួញចាស់វស្សាម្នាក់ ដែលបានរត់គេចខ្លួនទៅក្រៅប្រទេស ក្រោយជាប់ពាក់ព័ន្ធករណីឆបោកទំហំលុយរាប់រយលានដុល្លារ។

តាមដានជាមួយយើង៖ Million Times

ប៉ូលិសថៃកំពុងតាមចាប់ខ្លួនលោក Boon Vanasin វ័យ ៨៦ឆ្នាំ និងជាអតីតប្រធានក្រុមហ៊ុន Thonburi Healthcare Group (THG) ដែលត្រូវបានជឿថា បានរត់គេចចេញពីប្រទេសថៃ តាំងពីខែកញ្ញាមកម៉្លេះ។

លោក Boon បានទទួលការប្ដឹងពីមនុស្សចំនួន ២៥០នាក់កាលពីឆ្នាំទៅមិញ ពីបទឆបោកតាមរយៈអូសទាញឲ្យមានការបណ្ដាក់ទុន លើគម្រោងវេជ្ជសាស្ត្ររបស់ខ្លួននៅក្នុងប្រទេសថៃ ឡាវ និងវៀតណាម និងបានធ្វើឲ្យម្ចាស់បណ្ដឹងបាត់បង់ប្រាក់រហូតដល់ ២១៩លានដុល្លារ។

លោក Boon កំពុងរត់គេចខ្លួននៅក្រៅប្រទេស ដោយសារព័ត៌មាននៅក្នុងស្រុកបានផ្សាយថា លោកកំពុងសំងំលាក់ខ្លួននៅប្រទេសចិន ហើយប៉ូលិសថៃត្រូវការជំនួយពីប៉ូលិសអន្តរប៉ូល ដើម្បីតាមចាប់ខ្លួនអ្នកជំនួយវ័យចំណាស់ម្នាក់នេះ។

សូមជម្រាបដែរថា ប្រពន្ធ និងកូនស្រីរបស់លោក Boon ក៏ដូចជាមនុស្សចំនួន ៦នាក់ទៀត ត្រូវបានប៉ូលិសចាប់ខ្លួន និងបានចោទប្រកាន់ពីបទឆបោកសាធារណៈ និងការលាងលុយកខ្វក់ ខណៈគ្រួសារលោក Boon បដិសេធ មិនជាប់ពាក់ព័ន្ធនឹងករណីឆបោកលុយជាង ២០០លានដុល្លារនោះឡើយ៕

អត្ថបទ៖ Luffy រូបភាព៖ Thaiger

The post ថៃសុំជំនួយពីប៉ូលិសអន្តរប៉ូល តាមចាប់ខ្លួនអ្នកជំនួញជើងចាស់រត់ចោលស្រុក appeared first on Millions times.

៣ឆ្នាំបិទទ្វារ ៦០០ ០០០កន្លែង ឧស្សាហកម្មភោជនីយដ្ឋានថៃ ប្រឈមហានិភ័យធ្ងន់ធ្ងរ

ទីន Tin — Wed, 23 Oct 2024 04:19:00 +0000

ឧស្សាហកម្មភោជនីយដ្ឋាននៅប្រទេសថៃ កំពុងប្រឈមជាមួយហានិភ័យធ្ងន់ធ្ងរបំផុតមិនធ្លាប់មាន បន្ទាប់ពីអាជីវកម្មប្រមាណ ៦០០ ០០០កន្លែង បានបិទទ្វារជាបន្តបន្ទាប់រយៈពេល ៣ឆ្នាំកន្លងមកនេះ។

តាមដានជាមួយយើង៖ Million Times

របាយការណ៍ពីក្រសួងពាណិជ្ជកម្មថៃបានបង្ហាញថា រយៈពេល ៧ខែដំបូងនៅក្នុងឆ្នាំ២០២៤ ការបង្កើត និងបិទទ្វារភោជនីយដ្ឋានថ្មីៗ មានកំណើនដល់ ១១,២៧% បើធៀបនឹងឆ្នាំទៅ ពោលហាងថ្មីៗប្រហែល ១០០ ០០០ បានបើកអាជីវកម្ម ក៏ប៉ុន្តែបើកបានតែ ៦ខែប៉ុណ្ណោះ ៥០%នៃចំនួនហាងទាំងនោះ បានសម្រេចបញ្ចប់អាជីកម្ម ក្រោមហេតុផលលក់ខាតចុងខាតដើម។

សូម្បីតែភោជនីយដ្ឋានធំៗ ធ្លាប់ទទួលបានពានរង្វាន់ផ្សេងៗដូចជា Michelin Star ជាដើមនោះ ក៏រអ៊ូរទាំពីភាពលំបាក នៅក្នុងវិស័យមួយនេះដូចគ្នា ដោយពួកគេអះអាងថា ប្រាក់ចំណូលប៉ុន្មានឆ្នាំចុងក្រោយ បានធ្លាក់ចុះយ៉ាងតិច ៤០% ហើយបើសិនជាគ្មានវិធានការជ្រោមជ្រែងពីរដ្ឋាភិបាលឆាប់ៗ ពួកគេប្រាកដជាបិទហាងជាក់ជាមិនខាន។

សារព័ត៌មានថៃ NationThailand បានរាយការណ៍ថា ការបិទភោជនីយដ្ឋានដ៏ច្រើនបែបនេះ គឺមកពីកត្តាជាច្រើនយ៉ាងរួមមាន កំណើនសេដ្ឋកិច្ចយឺត ការប្រកួតប្រជែងខ្លាំងពេក ការចំណាយដើមទុនច្រើន ស្របពេលប្រជាជនរារែកក្នុងការចាយវាយ។

លោកស្រី ថានីវ៉ាន់ គុលមង្គល ប្រធានសមាគមភោជនីយដ្ឋានថៃ បានប្រាប់ទៅកាន់សារព័ត៌មានថា ម្ចាស់ភោជនីយដ្ឋានទាំងអស់ គួរតែព្យាយាមស្វែងយល់ពីបច្ចេកវិទ្យាថ្មីៗ ដើម្បីផ្ដល់ភាពងាយស្រួលដល់ការធ្វើអាជីវកម្មរបស់ខ្លួន ដូចជាការធ្វើទីផ្សារអនឡាញ ការបញ្ជាទិញអនឡាញ និងការគ្រប់គ្រងឲ្យបានល្អ។

លោកស្រីបន្ថែមថា ភោជនីយដ្ឋាននីមួយៗ គួរតែមានអ្វីដែលជាខ្លួនឯង ខុសប្លែកទីអ្នកដទៃ ទើបជាចំណុចទាក់ទាញ និងចាប់អារម្មណ៍ពីអតិថិជន ហើយការធ្វើដូច្នេះទើបអាជីវកម្មរបស់ខ្លួន អាចឈរជើងបានយូរលើទីផ្សារ។

សូមជម្រាបដែរថា ក្រសួងពាណិជ្ជកម្មថៃ បានបង្ហាញពីចំនួនភោជនីយដ្ឋានសរុបនៅក្នុងឆ្នាំ២០២៤ មានចំនួន ៦៨០ ១៩០កន្លែង ហើយបើទោះជាមានទីផ្សារចង្អៀតក៏ពិតមែន តែឧស្សាហកម្មមួយនេះ នៅតែមានតម្លៃប្រមាណ ៦៦៩ពាន់លានបាត និងជាចំណុចទាក់ទាញពេញបំផុតមួយ សម្រាប់អូសទាញភ្ញៀវទេសចរណ៍បរទេស៕

អត្ថបទ៖ Luffy រូបភាព៖ NationThailand

The post ៣ឆ្នាំបិទទ្វារ ៦០០ ០០០កន្លែង ឧស្សាហកម្មភោជនីយដ្ឋានថៃ ប្រឈមហានិភ័យធ្ងន់ធ្ងរ appeared first on Millions times.

Breaking News! អតីតបក្សឈ្នះឆ្នោតថៃត្រូវតុលាការធម្មនុញ្ញចេញសាលក្រមរំលាយចោល

ទីន Tin — Wed, 07 Aug 2024 09:42:25 +0000

តុលាការធម្មនុញ្ញរបស់ប្រទេសថៃនៅថ្ងៃពុធនេះបានចេញសាលក្រមបញ្ជាឱ្យរំលាយគណបក្សចលនាឆ្ពោះទៅមុខ ដែលជាអតីតបក្សឈ្នះឆ្នោតរបស់លោក ភិថា លីមចារើនរ៉ាត់ ពាក់ព័ន្ធនឹងគោលនយោបាយធ្វើវិសោធនកម្មច្បាប់ប្រមាថព្រះមហាក្សត្រ ។

ការសម្រេចរបស់តុលាការធម្មនុញ្ញធ្វើឡើងរយៈពេល ៦ ខែតាមសំណើរបស់គណៈកម្មការរៀបចំការបោះឆ្នោតថៃ ដែលស្នើឱ្យរំលាយបក្សចលនាឆ្ពោះទៅមុខ ក្រោមហេតុផលថា វិសោធនកម្មច្បាប់នេះធ្វើឱ្យប៉ះពាល់ដល់ប្រព័ន្ធប្រជាធិបតេយ្យថៃ ដែលមានព្រះមហាក្សត្រជាប្រមុខរដ្ឋ ជាពិសេសគឺមានបំណងបំផ្លាញស្ថាប័នព្រះមហាក្សត្រដ៏មានឥទ្ធិពលនៅក្នុងប្រទេសអាស៊ានមួយនេះ ។

ទន្ទឹមនោះ តុលាការក៏បានដកហូតសិទ្ធិសមាជិកក្រុមប្រឹក្សាប្រតិបត្តិរបស់គណបក្សមិនឱ្យឈរឈ្មោះបោះឆ្នោតរយៈពេល ១០ ឆ្នាំ រាប់ចាប់ពីការចុះឈ្មោះបង្កើតគណបក្សថ្មី ជាពិសេសហាមមិនឲ្យចូលរួមក្នុងសកម្មភាពនយោបាយជាមួយគណបក្សណាមួយរយៈពេល ១០ ឆ្នាំផងដែរ ។

សូមជម្រាបថា គណបក្សចលនាឆ្ពោះទៅមុខដែលកាលណោះដឹកនាំដោយលោក ភិថា លីមចារើនរ៉ាត់ បានឈ្នះការបោះឆ្នោតសកលភ្លូកទឹកភ្លូកដីកាលពីឆ្នាំ ២០២៣ ដោយសារតែគោលនយោបាយស្តីពីការការពារប្រឆាំងការប្រមាថព្រះមហាក្សត្រនេះឯង ៕

បកប្រែ ៖ ទីន

The post Breaking News! អតីតបក្សឈ្នះឆ្នោតថៃត្រូវតុលាការធម្មនុញ្ញចេញសាលក្រមរំលាយចោល appeared first on Millions times.

វិនិយោគិនចិនសម្រុកទៅទិញខុនដូរនៅថៃ

ទីន Tin — Tue, 06 Aug 2024 08:32:29 +0000

វិនិយោគិនចិនកំពុងសម្រុកទិញខុនដូរ និងលំនៅដ្ឋាននៅក្នុងប្រទេសថៃដើម្បីត្រៀមទុកលក់បន្តទៅឱ្យអ្នកផ្សេងទៀត ក្រោយរដ្ឋាភិបាលបានដាក់ចេញគោលនយោបាយអចលនទ្រព្យថ្មី ។ នេះបើយោងតាមក្រុមហ៊ុនប្រឹក្សាយោបល់ផ្នែកអចលនទ្រព្យថៃ DNA ។

លោក Surachet Kongcheep នាយកគ្រប់គ្រងរបស់ក្រុមហ៊ុន DNA បាននិយាយថា “ទីផ្សារទិញអចលនទ្រព្យសម្រាប់ជួល និងលក់ពីសំណាក់វិនិយោគិនចិននៅក្នុងទីក្រុងសេដ្ឋកិច្ចសំខាន់ៗរបស់ថៃកំពុងត្រូវប៉ាន់ ដោយសារតែរដ្ឋាភិបាលដាក់ចេញផែនការបង្កើនរយៈពេលជួលសម្រាប់ជនបរទេសពី ៥០ ទៅ ៩៩ ឆ្នាំ” ។

លោក Surachet បានបន្ថែមថា “វិនិយោគិនទាំងនោះមានគោលបំណងលក់ ឬជួលអចលនទ្រព្យដែលពួកគេទិញហើយទាំងនេះទៅឱ្យជនជាតិថៃដែលមានទ្រព្យសម្បត្តិ ឬជនបរទេសនៅពេលក្រោយ ជាពិសេសអ្នកដែលស្វែងរកលំនៅដ្ឋានក្នុងទីក្រុងបាងកក ប៉ាតាយ៉ា និងភូកេត” ។

តាមដានជាមួយយើង៖ Million Times

ក្នុងរយៈពេល ១៥ ឆ្នាំចុងក្រោយនេះ វិនិយោគិនចិនបានជះលុយប្រមាណ ២.៨ ពាន់លានដុល្លារបណ្ដាក់ទុនលើវិស័យអចលនទ្រព្យនៅក្នុងទីក្រុងសេដ្ឋកិច្ចរបស់ប្រទេសថៃ ខណៈនៅទូទាំងប្រទេសវិញ ក្រសួងពាណិជ្ជកម្មបានរាយការណ៍ថា នៅក្នុងឆមាសទីមួយនៃឆ្នាំ ២០២៤ ក្រុមហ៊ុនចិនបានវិនិយោគជាង ១០.៧ ពាន់លានដ ឬស្មើនឹង ៩.៤៨ ភាគរយនៃការវិនិយោគផ្ទាល់ពីបរទេសទាំងអស់ ។

កត្តានេះបានធ្វើឲ្យប្រទេសចិនស្ថិតក្នុងលំដាប់ទី ៣ នៃប្រទេសដែលវិនិយោគច្រើនជាងគេក្នុងប្រទេសថៃ បន្ទាប់ពីប្រទេសជប៉ុនមានប្រមាណ ២៨ ពាន់លានដុល្លារ ស្មើ ២៤.៦៥ ភាគរយ និងប្រទេសសិង្ហបុរីវិនិយោគជាង ១៣ ពាន់លានដុល្លារ ស្មើ ១១.៧៥ ភាគរយ ៕

បកប្រែ ៖ ទីន

The post វិនិយោគិនចិនសម្រុកទៅទិញខុនដូរនៅថៃ appeared first on Millions times.

ទីផ្សារផលិត និងលក់រថយន្តនៅថៃធ្លាក់ចុះយ៉ាងគំហុក ដោយសារប្រជាជនជាប់បំណុលច្រើន

ទីន Tin — Thu, 25 Jul 2024 08:31:10 +0000

សហព័ន្ធឧស្សាហកម្មថៃ (FTI) បាននិយាយថា ទីផ្សារផលិត និងលក់រថយន្តនៅថៃក្នុងខែមិថុនាបានធ្លាក់ចុះ ២០.១១ ភាគរយ បើប្រៀបធៀបនឹងឆ្នាំមុន ដោយសារតែច្បាប់ហិរញ្ញវត្ថុដ៏តឹងរ៉ឹង និងបំណុលអ្នកប្រើប្រាស់កើនឡើងខ្ពស់ ។

ចំណែកបើប្រៀបធៀបជាមួយនឹងខែឧសភាវិញ ការផលិតរថយន្តនៅក្នុងប្រទេសថៃធ្លាក់ចុះដល់ទៅ ១៦.១៩ ភាគរយ ខណៈក្ដីរំពឹងចំពោះការផលិតពេញមួយឆ្នាំ ២០២៤ នេះនឹងទាបជាងក្នុងឆ្នាំ ២០២៣ ទៅទៀត ។

សម្រាប់ក្នុងមួយឆមាសវិញ ពោលអំឡុងខែមករាដល់ខែមិថុនា ការផលិតរថយន្តបានធ្លាក់ចុះប្រមាណ ១៧.៣៩ ភាគរយ បើប្រៀបធៀបនឹងរយៈពេលដូចគ្នាកាលពីឆ្នាំមុន មានត្រឹម ៧៦១,២៤០ គ្រឿងប៉ុណ្ណោះ ។

តាមដានជាមួយយើង៖ Million Times

ដោយសារតែបញ្ហានេះ សហព័ន្ធឧស្សាហកម្មផលិតរថយន្តថៃបានកាត់បន្ថយគោលដៅផលិតកម្មរបស់ខ្លួនមកត្រឹម ១.៧ លានគ្រឿងសម្រាប់ឆ្នាំនេះ ខណៈកាលពីឆ្នាំមុនថៃបានផលិតរថយន្តចំនួន ១.៨៤ លានគ្រឿង ។ ទោះយ៉ាងណា ការនាំចេញរថយន្តនៅតែត្រូវបានគេមើលឃើញថាមានចំនួន ១.១៥ លានគ្រឿងនៅឆ្នាំនេះ ។

សូមជម្រាបថា ប្រទេសថៃគឺជាមជ្ឈមណ្ឌលផលិតរថយន្តដ៏ធំបំផុតរបស់អាស៊ាន និងជាប្រទេសបណ្ដុំទៅដោយរោងចក្រនាំចេញរបស់ក្រុមហ៊ុនផលិតរថយន្តកំពូលៗមួយចំនួនរបស់ពិភពលោក រួមទាំង Toyota និង Honda ផងដែរ ៕

បកប្រែ ៖ ទីន

The post ទីផ្សារផលិត និងលក់រថយន្តនៅថៃធ្លាក់ចុះយ៉ាងគំហុក ដោយសារប្រជាជនជាប់បំណុលច្រើន appeared first on Millions times.

វៀតណាម និងថៃជាប្រទេសមានសន្ទុះទីផ្សារពាណិជ្ជកម្មអេឡិចត្រូនិកលឿនបំផុតនៅអាស៊ាន

ទីន Tin — Wed, 24 Jul 2024 03:37:53 +0000

យោងតាមរបាយការណ៍ថ្មីមួយចេញផ្សាយដោយវេទិកា OpenGov Asia បានឱ្យដឹងថា វៀតណាម និងថៃក្លាយខ្លួនជាប្រទេសមានសន្ទុះទីផ្សារពាណិជ្ជកម្មអេឡិចត្រូនិករីកចម្រើនលឿនបំផុតនៅក្នុងតំបន់អាស៊ាន ។

តម្លៃទំនិញសរុប (GMV) ក្នុងទីផ្សារពាណិជ្ជកម្មអេឡិចត្រូនិករបស់ប្រទេសវៀតណាមកើនឡើង ៥២.៩ ភាគរយ ខណៈថៃហក់ឡើង ៣៤.១ ភាគរយ បើប្រៀបធៀបនឹងរយៈពេលដូចគ្នាកាលពីឆ្នាំមុន ។ ចំពោះវៀតណា នេះជាការកើនឡើងមិនធ្លាប់មានក្នុងរយៈពេល ៤ ឆ្នាំ ។

ទន្ទឹមនោះ គ្រាន់តែកម្មវិធី TikTok Shop, វៀតណាមកាន់កាប់ចំណែកទីផ្សាររហូតដល់ទៅ ២៤ ភាគរយ ដែលធ្វើឱ្យវាក្លាយជាវេទិកាពាណិជ្ជកម្មអេឡិចត្រូនិចធំទី ២ នៅក្នុងប្រទេស ។

តាមដានជាមួយយើង៖ Million Times

ក្នុងរយៈពេល ៥ ឆ្នាំកន្លងមកនេះ អាជីវកម្មវៀតណាមបានពង្រីកវិសាលភាពយ៉ាងគំហុក ពោលចំនួនផលិតផលនាំចេញតាមរយៈវេទិកាពាណិជ្ជកម្មអេឡិចត្រូនិកអន្តរជាតិកើនឡើង ៣០០ ភាគរយ ហើយសហគ្រាសធុនតូច និងមធ្យម (SME) ជាច្រើនសម្រេចបានប្រាក់ចំណូលប្រចាំឆ្នាំលើសពី ១ លានដុល្លារ ។

ចំណែកនៅក្នុងតំបន់អាស៊ាន វេទិកាទំនិញតាមអនឡាញ Shopee គ្របដណ្តប់ប្រាក់ចំណូលនៃតម្លៃទំនិញសរុប (GMV) ចំនួន ៥៥.១ ពាន់លានដុល្លារកាលពីឆ្នាំមុន ក្នុងនោះដណ្តើមបាន ៤៨ ភាគរយនៃចំណែកទីផ្សារនៅក្នុងតំបន់ ៕

បកប្រែ ៖ ទីន

The post វៀតណាម និងថៃជាប្រទេសមានសន្ទុះទីផ្សារពាណិជ្ជកម្មអេឡិចត្រូនិកលឿនបំផុតនៅអាស៊ាន appeared first on Millions times.

សេដ្ឋកិច្ចថៃជួបរឿងក្រពុលមុខខ្លាំង ខណៈរោងចក្របិទទ្វារជាបន្តកន្ទុយគ្នា

ទីន Tin — Tue, 16 Jul 2024 07:06:38 +0000

សេដ្ឋកិច្ចរបស់ប្រទេសថៃកំពុងជួបរឿងក្រពុលមុខយ៉ាងខ្លាំង បន្ទាប់ពីរោងចក្រដល់ទៅជិត ២,០០០ រោងចក្របានបិទទ្វារជាបន្តកន្ទុយគ្នាកាលពីឆ្នាំមុន ។

ក្រុមហ៊ុនផលិតរថយន្តដ៏ធំបំផុតរបស់ជប៉ុនគឺ Suzuki Motor បានប្រកាសកាលពីប៉ុន្មានសប្ដាហ៍មុននេះថា នឹងបិទរោងចក្រដែលមានសមត្ថភាពផលិតរថយន្តបានរហូតដល់ ៦០,០០០ គ្រឿងក្នុងមួយឆ្នាំនៅប្រទេសថៃ ។

ព័ត៌មានបិទរោងចក្រក្រុមហ៊ុនផលិតរថយន្តជប៉ុនមួយនេះឆ្លុះបញ្ចាំងពីការសម្រេចចិត្តស្រដៀងគ្នារបស់ក្រុមហ៊ុនជាច្រើនផ្សេងទៀតនៅក្នុងប្រទេសខ្លាសេដ្ឋកិច្ចលំដាប់ទី ២ របស់អាស៊ាន ដែលកំពុងជួបរឿងក្រពុលមុខជាច្រើន រួមទាំងលំហូរនៃការនាំចូលរបស់របរថោកៗពីប្រទេសចិន ។

តាមដានជាមួយយើង៖ Million Times

លំហូរទាំងនេះកំពុងជំរុញឲ្យមានការឡើងថ្លៃតម្លៃថាមពល និងកង្វះពលកម្ម ខណៈកម្មករជាង ៥១,៥០០ នាក់កំពុងគ្មានការងារធ្វើ ។ ទន្ទឹមនោះ វាក៏ជាមុខព្រួញទាញដៃឲ្យប្រទេសថៃ ធ្លាក់ចុះក្នុងការប្រកួតប្រជែងផ្នែកឧស្សាហកម្មផងដែរ ។

សូមជម្រាបថា ក្រៅពីផលប៉ះពាល់ខាងលើ ការបិទរោងចក្រដល់ទៅជិត ២,០០០ រោងចក្រនៅថៃក៏បង្កឲ្យប្រទេសនេះទន់ដៃទន់ជើងលើវិស័យផលិតកម្មផងដែរ ខណៈវិស័យមួយនេះរួមចំណែកជិត ១ ភាគ ៤ នៃផលិតផលក្នុងស្រុកសរុប (GDP) ៕

បកប្រែ ៖ ទីន

The post សេដ្ឋកិច្ចថៃជួបរឿងក្រពុលមុខខ្លាំង ខណៈរោងចក្របិទទ្វារជាបន្តកន្ទុយគ្នា appeared first on Millions times.

៤ ឆ្នាំមកហើយ ខុនដូមួយចំនួននៅថៃចាល់លក់មិនដាច់

ទីន Tin — Mon, 08 Jul 2024 08:39:02 +0000

ខុនដូមួយចំនួនរបស់ក្រុមហ៊ុនអភិវឌ្ឍន៍អចលនទ្រព្យថៃ LPN Development នៅតែចាល់មិនទាន់លក់ដាច់ បើទោះបីជាសាងសង់រួចរាល់អស់រយៈកាល ៤ ឆ្នាំហើយក៏ដោយ ។

លោក Apichart Kasemkulsiri នាយកប្រតិបត្តិក្រុមហ៊ុន LPN Development បានលើកឡើងថា “មូលហេតុដែលនាំឱ្យខុនដូរបស់ខ្លួនលក់មិនដាច់ គឺដោយសារតែវិបត្តិសេដ្ឋកិច្ចទន់ខ្សោយស្ទុះងើបឡើងវិញ បូករួមជាមួយបំណុលគ្រួសារកើនឡើង” ។

តាមដានជាមួយយើង៖ Million Times

គិតចាប់តាំងពីឆ្នាំមុនមក សន្ទស្សន៍ទីផ្សារអចលនទ្រព្យរបស់ប្រទេសថៃបានធ្លាក់ចុះ ៦ ត្រីមាសជាប់ៗគ្នា ដោយសារតម្លៃនៃការផ្ទេរប្រាក់បានធ្លាក់ចុះ ១៣.៤ ភាគរយ ខណៈក្រុមហ៊ុនអភិវឌ្ឍន៍អចលនទ្រព្យជាច្រើនកំពុងបោះចោលភាគហ៊ុនរបស់ពួកគេ ដើម្បីជំរុញលំហូរសាច់ប្រាក់ ។

ដោយសារតែបញ្ហានេះ ធនាគារពិភពលោកបានកាត់បន្ថយការព្យាករណ៍កំណើនផលិតផលក្នុងស្រុកសរុប(GDP) ឆ្នាំ ២០២៤ សម្រាប់ថៃពី ២.៨ ភាគរយមកត្រឹម ២.៤ ភាគរយ ។

សូមជម្រាបជូនថា បច្ចុប្បន្ន វិបត្តិបំណុលគ្រួសារក្នុងប្រទេសថៃនៅតែស្ថិតក្នុងចំណោមបំណុលខ្ពស់បំផុតនៅអាស៊ី ពោលមានប្រហែល ៩១ ភាគរយនៃ GDP ៕

បកប្រែ ៖ ទីន

The post ៤ ឆ្នាំមកហើយ ខុនដូមួយចំនួននៅថៃចាល់លក់មិនដាច់ appeared first on Millions times.