តាមដានជាមួយយើង៖ Million Times

ក្រសួងបរិស្ថាន បានឱ្យដឹងនៅថ្ងៃទី២៧ ខែមករានេះថា ទីតាំងអាជីវកម្មខ្សាច់បក ១កន្លែង ដែលបានដំណើរការដោយមានក្រុមហ៊ុនចំនួន២ លើដីទំហំជិត ២ហិកតា នៅភូមិបាក់អង្រុត ឃុំដងពែង ស្រុកស្រែអំបិល ខេត្តកោះកុង ត្រូវបានពិនិត្យឃើញថា អាចបង្កហានិភ័យដល់ធនធានធម្មជាតិ នៃស្ទឹងព្រែកកំពង់សោម។

ក្រសួងបរិស្ថាន បានសម្រេចការអនុវត្តនូវវិធានការច្បាប់ ដើម្បីទប់ស្កាត់ការបំពុលបរិស្ថាន ធានាភាពស្អាតនៅក្នុងទឹក ដោយតម្រូវឱ្យផ្អាកអាជីវកម្មខ្សាច់ជាបណ្តោះអាសន្នចាប់ពីពេលនេះទៅ រហូតដល់មានការសម្រេចជាថ្មីរបស់អង្គភាពជំនាញពាក់ព័ន្ធ និងតម្រូវឱ្យម្ចាស់អាជីវកម្មរៀបចំរបាយការណ៍វាយតម្លៃហេតុប៉ះពាល់បរិស្ថានដំបូង ដោយអនុលោមតាមលិខិតបទដ្ឋានគតិយុត្តពាក់ព័ន្ធឱ្យបានរួចរាល់ជាមុន ទើបអាចធ្វើអាជីវកម្មបន្តបាន។

ក្រុមការងារអធិការកិច្ចនៃអគ្គនាយកដ្ឋានគាំពារបរិស្ថាន និងនាយកដ្ឋានវាយតម្លៃហេតុប៉ះពាល់បរិស្ថាន ដឹកនាំដោយលោក ចាប យុធី អនុប្រធាននាយកដ្ឋានអធិការកិច្ច និងមានការចូលរួមពី អាជ្ញាធរឃុំដងពែង និងប្រជាសហគមន៍មូលដ្ឋាន កាលពីថ្ងៃទី២៥ ខែមករា បានចុះពិនិត្យទីតាំងផ្ទាល់ និងបានរកឃើញថា ក្រុមហ៊ុន ត្រូវធ្វើការសិក្សាវាយតម្លៃពីការបង្កហានិភ័យ ដល់បរិស្ថានឱ្យបានត្រឹមត្រូវ មុននឹងអនុញ្ញាតឱ្យធ្វើអាជីវកម្មរ៉ែខ្សាច់។

យោងតាមស្ថានភាពភូមិសាស្រ្តជាក់ស្តែង ក្រុមការងាររបស់ក្រសួងបរិស្ថាន បានចុះទៅពិនិត្យផ្ទាល់ទីតាំង ការដ្ឋានអាជីវកម្មខ្សាច់បក គឺស្ថិតនៅក្បែរមាត់ស្ទឹងព្រែកកំពង់សោម និងតំបន់ដែនជម្រកសត្វអណ្តើកហ្លួងផងដែរ។

គួរឱ្យដឹងថា អាជីវកម្មខ្សាច់ខាងលើនេះ បានបើកដំណើរការនៅថ្ងៃទី១៥ ខែវិច្ឆិកា ឆ្នាំ២០២៥ និងបានជីកកាយ និងបូមខ្សាច់ទៅចាក់គរទុក ដោយមានរណ្តៅដីទំហំប្រហែល ១ហិកតា និងជំរៅ ៣,៥ម។ ទឹកហូរចេញពីគំនរខ្សាច់ ត្រូវបានបង្ហូរចូលក្នុងរណ្តៅដីវិញ ពុំមានទឹកហូរចូលក្នុងស្ទឹងទេ៕

អត្ថបទ៖ វីរៈ​ រូបភាព៖ ក្រសួងបរិស្ថាន

The post ផ្អាកបណ្ដោះអាសន្នអាជីវកម្មខ្សាច់ ១កន្លែង ដែលអាចបង្កហានិភ័យដល់ធនធានធម្មជាតិ appeared first on Millions times.

តាមដានជាមួយយើង៖ Million Times

ការណែនាំរបស់សម្តេច ហ៊ុន ម៉ាណែត ធ្វើឡើងក្នុងពិធីសម្ពោធបើកឱ្យដំណើរជាផ្លូវការ «រោងចក្រផលិតស៊ីម៉ង់ត៍ របស់ក្រុមហ៊ុន ខនស៍ ខេធី ស៊ីមេន (ភ្នំពេញ) ឯ.ក» ស្ថិតនៅខេត្តកំពង់ស្ពឺ នាព្រឹកថ្ងៃអង្គារ ទី២០ ខែឧសភា ឆ្នាំ២០២៥។ សម្តេចថ្លែងថា ខ្សាច់នៅទន្លេមេគង្គលើដុះច្រើន ការដុះនេះ បើដុះតែវាមិនអីទេ ប៉ុន្តែវាធ្វើឱ្យប្រែប្រួលចរន្ទទឹក ដូច្នេះវាមកធ្វើឱ្យច្រាំងបាក់នៅផ្នែកខាងក្រោម។

ជាមួយគ្នានេះ សម្តេចក៏បានប្រាប់ឲ្យគ្រប់ភាគីពាក់ព័ន្ធត្រូវពិនិត្យ និងសិក្សាឱ្យបានច្បាស់លាស់ ជៀសវាងការបូមខ្សាច់ ខុសកន្លែង ឬខុសបច្ចេកទេសដែលធ្វើឱ្យបាក់ដី ឬបាក់ច្រាំងទន្លេជាដើម។ សម្តេចក៏បានណែនាំក្រសួងរ៉ែ និងថាមពល និងក្រសួងធនធានទឹក និងឧតុនិយម និងអ្នកពាក់ព័ន្ធមួយចំនួន ត្រូវពិនិត្យមើលការគ្រប់គ្រងការបូមខ្សាច់ ខណៈនាពេលបច្ចុប្បន្ននេះ ការបូមខ្សាច់បានគ្រប់គ្រងបានច្រើន។

សម្តេចមានប្រសាសន៍ថា «ត្រូវពិនិត្យមើលឱ្យស្រួល សិក្សាឱ្យបានច្បាស់លាស់ អនុវត្ត ជៀសវាងការបូម (បូមខ្សាច់) ខុសកន្លែង ឬមួយខុសបច្ចេកទេស ធ្វើឱ្យបាក់ដីផ្សេងៗ»៕

អត្ថបទ៖ ពិសិដ្ឋ រូបភាព៖ បណ្តាញសង្គម

The post នាយករដ្ឋមន្រ្តីណែនាំឲ្យក្រុមហ៊ុនរកស៊ីខ្សាច់ បូមនៅផ្នែកខាងលើនៃទន្លេមេគង្គ appeared first on Millions times.

លោក អ៊ាង សុផល្លែត មានប្រសាសន៍ថា «ជាការពិតមានការយឺតយ៉ាង និងមានការលឿន។ ខ្ញុំបានដាក់គោលការណ៍ចេញថ្មីៗនេះហើយ ប្រហែលជាខែមុន។ ការចុះកិច្ចសន្យា ខ្ញុំមិនឱ្យលើសពី១សប្តាហ៍ទេ។ កិច្ចសន្យាហ្នឹង១សប្តាហ៍ចេញជូន ប៉ុន្តែក្រុមហ៊ុនត្រូវអនុវត្តតាមគោលការណ៍ដែលដាក់ចេញដោយក្រសួងបរិស្ថាន។ កិច្ចសន្យាយើងមានគោលការណ៍របស់យើង គឺត្រូវធ្វើនេះ ធ្វើនេះខ្ញុំស៊ីញ៉េជូនក្រុមហ៊ុនត្រូវធ្វើតាម»។

តាមដានជាមួយយើង៖ Million Times

លោកបានពន្យល់ថា ការវាយតម្លៃហេតុ ប៉ះពាល់បរិស្ថានមាន ៣ កម្រិត គឺទី១៖ ការចុះកិច្ចសន្យាជាមួយគ្នា ទី២៖ ការ វាយតម្លៃ ហេតុប៉ះពាល់បរិស្ថាន «បឋម» និងទី៣៖ ការវាយតម្លៃហេតុប៉ះពាល់បរិស្ថាន «ពេញលេញ»។ ការលើកឡើងពន្យល់ពីលោក អ៊ាង សុផល្លែត ក្នុងសិក្ខាសាលាពិគ្រោះយោបល់លើសេចក្តីព្រាងស្តីពី «គោលការណ៍ណែនាំទូទៅ ការវាយតម្លៃបរិស្ថានជាយុទ្ធសាស្ត្រ» និង «ការវាយតម្លៃបរិស្ថានជាយុទ្ធសាស្ត្រ សម្រាប់ការវិនិយោគអាជីវកម្មខ្សាច់ តាមដងទន្លេមេគង្គកម្ពុជា» នាថ្ងៃទី២៥ ខែកុម្ភៈ ឆ្នាំ២០២៥។

លោកថ្លែងបញ្ជាក់ថា៖ «ការយឺតយ៉ាវ ជូនកាលក្នុង១សប្តាហ៍ ក្រុមហ៊ុនគ្រាន់តែគាត់ផ្ញើឯកសារពីប្រទេសគាត់មកខ្មែរ វាមិនទាន់ទេ។ អញ្ជឹងការយឺតយ៉ាវហ្នឹងសួរថា មកពីក្រសួងបរិស្ថាន ឬមកពីគាត់? វាមានទាំង២ ដៃទះ ដៃទាំង២បានឮ។ អ៊ឹចឹងងទេ ចំពោះក្រសួងបរិស្ថាន តាមគោលការណ៍ថ្មីរបស់យើង គឺ១សប្តាហ៍ បើមានឯកសារគ្រប់គ្រាន់មក ត្រូវតែចេញ។ បើមិនគ្រប់គ្រាន់ទេសុំទោស ខ្ញុំធ្វើវាមិនកើត»។

លោកបានបន្ថែមថា ចំពោះការវាយតម្លៃហេតុប៉ះពាល់បរិស្ថានបឋម នឹងត្រូវចេញជូនក្រុមហ៊ុនក្នុងរយៈពេលយ៉ាងយូរបំផុត ៣ខែ ប្រសិនបើមានឯកសារគ្រប់គ្រាន់ និងគោរពតាមគោលការណ៍ណែនាំរបស់ក្រសួង។

លោកបានគូសបញ្ជាក់ថា ការវាយតម្លៃហេតុប៉ះពាល់បរិស្ថានសំខាន់ណាស់។ បើសិនណាយើងធ្វើអ្វីមួយ ដោយមិនបានវាយតម្លៃផលប៉ះពាល់បរិស្ថានទេ យើងមិនដឹងថាតើ អ្វីដែលយើងធ្វើនឹងប៉ះពាល់ដល់បរិស្ថានបែបណានោះទេ។ ក្រោយពេលដែលសិក្សាឃើញហើយ នោះក្រសួងនឹងណែនាំឱ្យក្រុមហ៊ុនវិនិយោគនោះ ធ្វើយ៉ាងណា ដើម្បីបញ្ចៀសឱ្យខាងតែបានលើផលប៉ះពាល់ទាំងនោះ ដើម្បីកុំឱ្យផលប៉ះពាល់ទាំងនោះនាំទៅដល់ផលវិបាកដល់សង្គមផង និងដល់សុខភាពប្រជាពលរដ្ឋផង។

លោកថ្លែងបញ្ជាក់បន្ថែមថា «អ្វីដែលសំខាន់ជាងហ្នឹងទៀតនោះ គឺចង់ធានាឱ្យបាននូវការវិនិយោគមួយ ដែលនាំមកនូវចីរភាពទាំងការវិនិយោគ ទាំងការងារដែលប្រជាជនទទួលបានពីការវិនិយោគហ្នឹងផង។ យើងអត់ចង់បានទេ នូវការវិនិយោគមួយ ដែលនាំឱ្យបំពុលបរិស្ថានហើយគ្មានចីរភាព សម្រាប់សង្គមយើង សម្រាប់សេដ្ឋកិច្ចកម្ពុជាយើង»៕

អត្ថបទ៖ សាងតេជៈ រូបភាព៖ ក្រសួងបរិស្ថាន

The post រដ្ឋមន្ត្រី អ៊ាង សុផល្លែត បញ្ជាក់ជំហរពន្លឿនការវាយតម្លៃហេតុប៉ះពាល់បរិស្ថានត្រឹម ១សប្តាហ៍របស់ក្រុមហ៊ុនអាជីវកម្មខ្សាច់ appeared first on Millions times.