តាមដានជាមួយយើង៖ Million Times

នេះជាលើកទី២ហើយ ដែលធនាគារ អេស៊ីលីដា​ បានចុះបញ្ជីលក់សញ្ញាបណ្ណបន្ទាប់បន្សំជាផ្លូវការ នៅផ្សារមូលបត្រកម្ពុជា តាមរយៈការធ្វើបរិវិសកម្មរបស់វិនិយោគិនគុណវុឌ្ឍិ កាលពីថ្ងៃទី ៨ ដល់ថ្ងៃទី ១១ ខែកញ្ញា ឆ្នាំ ២០២៥ ដោយធនាគារ អេស៊ីលីដា បានធ្វើបរិវិសកម្មប្រកបដោយភាពជោគជ័យ ដែលមានវិនិយោគិនគុណវុឌ្ឍិចំនួន ៧៧នាក់។

ក្នុងនោះ បានបញ្ជាទិញសញ្ញាបណ្ណបន្ទាប់បន្សំ ដែលបានបោះផ្សាយទាំងអស់ រហូតដល់ ៤០០ ពាន់លានរៀល ប្រមាណជា ១០០លានដុល្លារ ជាមួយនឹងអត្រាគូប៉ុងប្រមាណ ៧.៥% ក្នុងមួយឆ្នាំ ដែលជួយផ្តល់ឱកាសដល់វិនិយោគិន និងជួយធនាគារក្នុងការប្រមូលប្រភពទុន សម្រាប់គាំទ្រប្រតិបត្តិការធនាគារ រួមចំណែកក្នុងការអភិវឌ្ឍន៍ សេដ្ឋកិច្ចក្នុងស្រុក និងសង្គមជាតិ។ ជាពិសេស សញ្ញាបណ្ណនេះមានទំហំធំ ដែលជាលទ្ធផលធនាគារ អេស៊ីលីដា ទទួលបានទំនុកចិត្ត និងការជឿជាក់ពីវិនិយោគិន លើសពីការរំពឹងទុក។

លោកបណ្ឌិត អ៊ិន ចាន់នី ប្រធាននាយកប្រតិបត្តិធនាគារ អេស៊ីលីដា ភីអិលស៊ី បាននិយាយថា លោក ថ្លែងអំណរគុណយ៉ាងជ្រាលជ្រៅដល់ ធនាគារជាតិនៃកម្ពុជា និងនិយ័តករមូលបត្រកម្ពុជា ដែលអនុញ្ញាតឱ្យធនាគារ អេស៊ីលីដា បោះផ្សាយសញ្ញាបណ្ណបន្ទាប់បន្សំ ដែលមានទំហំទឹកប្រាក់រហូតដល់ ៤០០ពាន់លានរៀល ប្រមាណជា ១០០លានដុល្លារអាមេរិក។

លោកក៏សូមថ្លែងអំណរគុណយ៉ាងជ្រាលជ្រៅ ដល់ផ្សារមូលបត្រកម្ពុជាដែលអនុញ្ញាតឱ្យធនាគារ អេស៊ីលីដា ចុះបញ្ជីជាផ្លូវការចំពោះមូលបត្របំណុល សម្រាប់វិនិយោគិនគុណវុឌ្ឍិដែលជាប្រភេទសញ្ញាបណ្ណបន្ទាប់បន្សំរបស់ធនាគារ អេស៊ីលីដា ក្នុងទំហំដូចបានរៀបរាប់ខាងលើ ចាប់ពីថ្ងៃទី ៨ ខែតុលា ឆ្នាំ ២០២៥ នេះតទៅ។ លោកបណ្ឌិត អ៊ិន ចាន់នី ជឿជាក់ថា ការបោះផ្សាយសញ្ញាបណ្ណបន្ទាប់បន្សំនេះ នឹងផ្តល់ឱ្យវិនិយោគិន និងអតិថិជនរបស់ធនាគារ នូវជម្រើសវិនិយោគមួយបន្ថែមទៀតជាមួយធនាគារ អេស៊ីលីដា។

គួរឱ្យដឹងថា សញ្ញាបណ្ណបន្ទាប់បន្សំនេះ គឺជាឧបករណ៍ហិរញ្ញវត្ថុទូទៅ ដែលធនាគារជុំវិញពិភពលោក រួមទាំងធនាគារ អេស៊ីលីដា បាននិងកំពុងប្រើប្រាស់ ព្រមទាំងបានចូលរួមចំណែកក្នុងការពង្រឹង និងការពង្រីកវិសាលភាព ព្រមទាំងការបង្កើនសក្តានុពលអាជីវកម្មរបស់ធនាគារ ឱ្យកាន់តែរីកចម្រើនប្រកប​ដោយចីរភាព និងប្រសិទ្ធភាពប្រកបដោយទំនុកចិត្តពីអតិថិជន និងសាធារណជន៕

អត្ថបទ៖ វីរៈ រូបភាព៖ ធនាគារ អេស៊ីលីដា

The post អេស៊ីលីដា បោះផ្សាយសញ្ញាបណ្ណបន្ទាប់បន្សំ ១០០លានដុល្លារ ផ្តល់ឱកាសដល់វិនិយោគិន និងធនាគារប្រមូលប្រភពទុន appeared first on Millions times.

នៅ​វេទិកាផ្សព្វផ្សាយចំណេះដឹងទាក់ទង​នឹង​វិស័យ​ហិរញ្ញវត្ថុ ពេលថ្មីៗនេះ​ ប្រធាន​នាយក​ប្រតិបត្តិធនាគារអេ​ស៊ី​លី​ដា លោក អ៊ិន ចាន់នី បាន​បញ្ជាក់​ថា ធនាគារអេ​ស៊ី​លី​ដា ក្នុង​នាម​ជា​ធនាគារ​ដែល​បម្រើ​ក្នុង​វិស័យ​ហិរញ្ញវត្ថុ​នៅ​កម្ពុជា​ជាច្រើន​ឆ្នាំ​កន្លង​មក មិនទាន់​មាន​ការ​ប្រើប្រាស់​ប្រតិបត្តិការ​ក្នុង​ធនាគារ​ទៅ​លើ​ការ​ឆ​បោក ឬ​ការ​ផ្ទេរ​ទូទាត់​ប្រាក់​ដែល​មានការសង្ស័យឡើយ ហើយ​កន្លង​មក​ធនាគារ​ភាគច្រើន​នឹង​រាយការណ៍​ទៅ​ដល់​អាជ្ញាធរ​ផ្នែក​ហិរញ្ញវត្ថុ ដើម្បី​ស៊ើប​អង្កេត​ទៅ​លើ​បញ្ហា​ចាំបាច់ ឬ​សង្ស័យ​ណា​មួយ​ជាក់​ជា​មិន​ខាន​។

លោកបាន​សង្កត់​ធ្ងន់​ថា ខាង​ធនាគារ​អេស៊ីលីដា មិន​អនុញ្ញាត​ឲ្យ​មូលនិធិ បើក​បញ្ជី​ធនាគារ​ជា​ឯកត្តជន។ ខាង​ធនាគារ​តាម​សង្កេត​មើល​មិន​ឲ្យ​មាន​ប្រតិបត្តិការ​ណា​ដែល​គ្មាន​ចុះ​បញ្ជី​អាជីវកម្ម​ គឺ​ត្រូវ​ការ​រាយការណ៍​ទៅ​អង្គភាព​អាណាព្យាបាល គឺ​អង្គភាព​ប្រឆាំង​សម្អាត​សាច់​ប្រាក់ និង​ហិរញ្ញប្បទាន​ភេរវកម្ម ដោយ​សុំ​ការ​អនុញ្ញាត​ទប់​ស្កាត់​បិទ​មិន​ឲ្យ​គណនី​នោះ​មាន​ប្រតិបត្តិការ ឬ​ឃាត់​មូលនិធិ​នោះ​ទុក ដើម្បី​ឲ្យ​មាន​ការ​អនុញ្ញាត​ពី​សមត្ថកិច្ច ឬ​អាជ្ញាធរ​ពាក់ព័ន្ធ​ជាមុនសិន។

ក្នុង​វេទិកាផ្សព្វផ្សាយចំណេះដឹងហិរញ្ញវត្ថុ នាយកប្រតិបត្តិរូបនេះបាន​បញ្ជាក់​យ៉ាង​ច្បាស់​ថា ខាង​ធនាគារ​អេស៊ីលីដា តាម​មើល​ល្អិតល្អន់​លើ​បញ្ជី​ណា​ដែល​ខុស​ប្រក្រតី ហើយរាយការណ៍ទៅកាន់សមត្ថកិច្ចផ្នែកហិរញ្ញវត្ថុ។

យោងតាមរបាយការណ៍ហិរញ្ញវត្ថុត្រីមាសទី៣ ឆ្នាំ២០២៤ បានបង្ហាញថា ធនាគារអេស៊ីលីដា រកប្រាក់ចំណូលបានប្រមាណ ២១៩លានដុល្លារកើនឡើងចំនួន ៣.៤៨% បើធៀបនឹងរយៈពេលដូចគ្នានៃឆ្នាំ២០២៣ ក្នុងនោះប្រាក់ចំណេញប្រតិបត្តិការបានថយចុះចំនួន ១៨.៤១%។ ចំណែកប្រាក់ចំណេញបានថយចុះរហូតដល់ទៅ ៥៤.០៦% ដោយត្រឹមត្រីមាសទី៣នេះ​ អេស៊ីលីដាសម្រេចបានប្រាក់ចំណេញចំនួន ១៨.៥៤ដុល្លារពោលគឺប្រាក់ចំណេញថយចុះរហូតដល់ទៅ២១លានដុល្លារ។

បើយោងតាមរបាយការណ៍ដដែលនេះ មូលហេតុដែលធ្វើឲ្យធនាគារ អេស៊ីលីដា បានធ្លាក់ចុះនៃប្រាក់ចំណេញគឺដោយសារធនាគារអនុវត្តតាមបទប្បញ្ញត្តិទាក់ទងនឹងការធ្វើចំណាត់ថ្នាក់ឥណទាន និងដើម្បីភាពរឹងមាំ និងការទប់ទល់រាល់ហានិភ័យ ដែលអាចជះឥទ្ធិពលដល់ឥណទាន និងបុរេប្រទានដល់អតិថិជន។ ធនាគារបានបង្កើននូវសំវិធានធននៃការខាតបង់ឱនភាពនៃតម្លៃចំនួន ២៩,៩២ លានដុល្លារអាមេរិក ធៀបនឹងត្រីមាសទី៣ ឆ្នាំ២០២៣។ ជាលទ្ធផលប្រាក់ចំណេញដែលផ្តល់ជូនដល់ភាគហ៊ុនិករបស់ធនាគារ នៅក្នុងត្រីមាសទី៣ ឆ្នាំ២០២៤ សម្រេចបាន ១៨,៥៤ លានដុល្លារអាមេរិក (ឬ ៧៥,៨១ ប៊ីលានរៀល)៕

អត្ថបទ៖ មេរ៉ា រូបភាព៖ បណ្តាញសង្គម

The post លោក អ៊ិន ចាន់នី អះអាងថាធនាគារអេស៊ីលីដា មិនធ្លាប់ឆបោក ឬការផ្ទេរទូទាត់ប្រាក់ដែលសង្ស័យឡើយ appeared first on Millions times.

បើតាមគេហទំព័រ Fortune ធនាគារ អេស៊ីលីដា ឈរលើលេខរៀងទី ៣១៥ រកចំណូលបាន ៨២៦.១លានដុល្លារ ចំណេញចំនួន ១៤៨.៤លានដុល្លារ មានទ្រព្យសកម្មចំនួន ៩.៨ពាន់លានដុល្លារ និងផ្តល់ឪកាសការងារបានចំនួន ១៣៥០០នាក់។ អេស៊ីលីដា គឺជាគ្រឹះស្ថានធនាគារខ្មែរដែលជោគជ័យបំផុតក្នុងវិស័យរបស់ខ្លួន ដោយធនាគារនេះបានពង្រីកអាជីវកម្មជាបន្តបន្ទាប់ និងបានបោះជំហានពង្រីកអាជីវកម្មនៅបណ្តាប្រទេសក្នុងតំបន់អាស៊ានផងដែរ ដូចមាននៅប្រទេសឡាវ និងប្រទេសមីយ៉ាន់ម៉ា ​ជាដើម។

ចំណែក កាស៊ីណូ ណាហ្គាវើល ឈរលេខរៀងទី ៤៤៩ រកចំណូលបានចំនួន ៥៣៣.៣លានដុល្លារ ហើយចំណេញ ១៧៨លានដុល្លារ ជាមួយនឹងទ្រព្យសកម្មសរុបចំនួន ២,៧៥ពាន់លានដុល្លារ និងផ្តល់ការងារបានចំនួន ៦០៣៨នាក់។ កាស៊ីណូណាហ្គាវើលនៅពេលនេះត្រូវបានគេដឹងថា គឺជាកាស៊ីណូ និងរីសតស្របច្បាប់តែមួយគត់ដែលមាននៅរាជធានីភ្នំពេញ ដែលជាមជ្ឈមណ្ឌល សេដ្ឋកិច្ច នយោបាយ វប្បធម៌ និងប្រវត្តិសាស្រ្ត។

របាយការណ៍ប្រចាំត្រីមាស ដែលកាស៊ីណូណាហ្គាវើលបានប្រកាសនៅផ្សារហ៊ុននៅកោះហុងកុង បង្ហាញឲ្យឃើញថា នៅត្រីមាសទី១នៃឆ្នាំ២០២៤ កាស៊ីណូណាហ្គារកប្រាក់ចំណូលបានសរុបជាង១៤៥លានដុល្លារ កើនឡើងជិត២៤% បើធៀបនឹងរយៈដូចគ្នាកាលពីឆ្នាំមុន។ ជាមួយនឹងប្រាក់ចំណូលនេះ បានជួយឱ្យកាស៊ីណូនេះទទួលបានប្រាក់ចំណេញមិនទាន់បង់ពន្ធសរុបជាង៨០លានដុល្លារ កើនឡើងជិត៣៣% បើធៀបនឹងរយៈពេលដូចគ្នាកាលពីឆ្នាំ២០២៣កន្លងទៅ។

សូមជម្រាបថា តួលេខខាងលើត្រូវបាន Fortune រាប់បញ្ចូលតែក្រុមហ៊ុនដែលបានប្រកាសរបាយការណ៍ជាសាធារណៈ និងរាយការណ៍ទៅរដ្ឋាភិបាលប៉ុណ្ណោះ៕

អត្ថបទ៖ សេដ្ឋានី រូបភាព៖​ ធនាគារអេស៊ីលីដា

The post ក្រុមហ៊ុនខ្មែរ២ប៉ុណ្ណោះជាប់ក្នុងបញ្ជីក្រុមហ៊ុនទាំង ៥០០ រកចំណូលបានច្រើនបំផុតក្នុងឆ្នាំ២០២៣ appeared first on Millions times.