តាមដានជាមួយយើង៖ Million Times

ការលើកទឹកចិត្តនេះ ស្របពេលដែលឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានទទួលជួបតំណាងក្រុមហ៊ុន អង្គរ ឌែរី ប្រូដាក នៅថ្ងៃទី១១ ខែកុម្ភៈនេះ។

នៅក្នុងឱកាសនោះ ឯកឧត្តមរដ្ឋមន្ត្រី បានកោតសរសើរក្រុមហ៊ុនដែលបានពង្រីកខ្លួន ជាក្រុមហ៊ុនក្នុងស្រុកដ៏សំខាន់​មួយ សម្រាប់ផលិតផលទឹកដោះគោ ដែលបម្រើដល់ការប្រើប្រាស់ និងរួមចំណែកដល់ចំណូលពន្ធ។

ឯកឧត្តម បានបន្ថែមថា ទឹកដោះគោគឺជាទំនិញយុទ្ធសាស្ត្រ ហើយក្រសួងលើកទឹកចិត្តឱ្យក្រុមហ៊ុន ពិចារណាពង្រីកខ្សែច្រវាក់ផលិតកម្មរបស់ខ្លួន ដើម្បីពង្រឹងភាពម្ចាស់ការរបស់កម្ពុជា លើទំនិញយុទ្ធសាស្ត្រ ទាំងនេះ ដោយក្រសួងត្រៀមផ្តល់ការគាំទ្រចាំបាច់នានា។

ចំណែកលោក កុយ សុវណ្ណ តំណាងផ្នែកលក់ និងទីផ្សារ បានលើកឡើងថា ក្រុមហ៊ុន អង្គរ ឌែរី ប្រូដាក ត្រូវបាន បង្កើតឡើងក្នុងឆ្នាំ២០១៥ ជាមួយទុនវិនិយោគដំបូង ១៥លានដុល្លារអាមេរិក។ បច្ចុប្បន្ន ក្រុមហ៊ុនបានបង្កើនទុនវិនិយោគរហូតដល់ ៧៥លានដុល្លារអាមេរិក។

លោកបន្តថា ក្រុមហ៊ុនមានបុគ្គលិកជាង ៦០០នាក់ ដែលកំពុងផលិត និងផ្គត់ផ្គង់ផលិតផលទឹកដោះគោសម្រាប់អតិថិជននៅទូទាំងប្រទេស ជាមួយបណ្តាញលក់រាយប្រមាណ ៥០,០០០កន្លែង និងបណ្តាញលក់អាជីវកម្មជាង ៦០០ទីតាំង។

តំណាងក្រុមហ៊ុនរូបនេះ ក៏បានបង្ហាញផែនការនាំយកខ្សែច្រវាក់ផលិតកម្ម សម្រាប់ផលិតទឹកដោះគោស្រស់ថ្មី ព្រមទាំងពង្រីកការចិញ្ចឹមគោយកទឹកដោះ និងកសិកម្មតាមកិច្ចសន្យា ជាមួយប្រជាពលរដ្ឋចិញ្ចឹមគោ ដែលរំពឹងថា នឹងបង្កើតការងារប្រមាណ ២០០កន្លែងបន្ថែមទៀត។

ក្នុងឱកាសនោះដែរ ឯកឧត្តម ហែម វណ្ណឌី ក៏បានលើកទឹកចិត្តឱ្យក្រុមហ៊ុនពង្រីកការប្រើប្រាស់វត្ថុធាតុដើមក្នុងស្រុក នៅក្នុងខ្សែច្រវាក់ផ្គត់ផ្គង់ និងពង្រឹងកិច្ចសហការជាមួយក្រសួងលើការស្រាវជ្រាវ និងអភិវឌ្ឍន៍ ពិសេសផ្នែកវិទ្យាសាស្ត្រអាហារ ការអភិវឌ្ឍការវេចខ្ចប់ និងការគ្រប់គ្រងកាកសំណល់ឧស្សាហកម្ម៕

អត្ថបទ៖ វីរៈ រូបភាព៖ ក្រសួងឧស្សាហកម្ម​

The post រដ្ឋមន្ត្រីឧស្សាហកម្ម លើកទឹកចិត្តឱ្យក្រុមហ៊ុន អង្គរ ឌែរី ប្រូដាក ពង្រីកការប្រើប្រាស់វត្ថុធាតុដើមក្នុងស្រុក appeared first on Millions times.

តាមដានជាមួយយើង៖ Million Times

ពិធីបើកដំណើរការលក់ទឹកដោះគោកាលីហ្វ័រញ៉ា បានប្រព្រឹត្តទៅនៅផ្សារទំនើប AEON Mall Phnom Penh នាថ្ងៃទី៣ ខែវិច្ឆិកានេះ ដោយមានការអញ្ជើញចូលរួមពីឯកឧត្តមទេសរដ្ឋមន្រ្តី លី ធុជ, លោកស្រី Janet Arellano តំណាងក្រុមប្រឹក្សាភិបាលទឹកដោះគោកាលីហ្វ័រញ៉ា (California Milk Advisory Board) និងលោក Tomokazu Furuki តំណាងផ្សារទំនើប AEON Mall។

តាងនាមឱ្យរាជរដ្ឋាភិបាលកម្ពុជា ឯកឧត្តមទេសរដ្ឋមន្រ្តី លី ធុជ បានចូលរួមអបអរសាទរចំពោះកិច្ចសហការនេះ ដែលភាពជាដៃគូនេះ បានបង្ហាញពីការជឿជាក់កាន់តែខ្លាំងរបស់វិនិយោគិនអន្តរជាតិ ចំពោះសក្តានុពលទីផ្សាររបស់ប្រទេសកម្ពុជា។

ឯកឧត្ដម បានបន្ថែមថា ការលក់ទឹកដោះគោនាំចូលពីសហរដ្ឋអាមេរិក គឺស្របនឹងគោលនយោបាយរបស់កម្ពុជា ចំពោះការលើកលែងពន្ធនាំចូល ១០០ភាគរយ ពីទំនិញឧហ្សាហកម្ម និងកសិកម្មរបស់សហរដ្ឋអាមេរិក ដែលសមិទ្ធផលនេះ មិនមែនត្រឹមតែជាការពង្រឹងភាពជោគជ័យ នៃផ្នែកពាណិជ្ជកម្មប៉ុណ្ណោះទេ។ ប៉ុន្តែជាការចាប់ផ្តើមនៃសេដ្ឋកិច្ចបើកចំហររបស់កម្ពុជា និងផ្តល់អនុភាពសម្រាប់សហគ្រិនបរទេស ដែលចង់វិនិយោគក្នុងរយៈពេលវែងនៅកម្ពុជា។

ឯកឧត្តម លី ធុជ ជឿជាក់ថា ការលើកលែងយកពន្ធលើទំនិញឧហ្សាហកម្ម និងកសិកម្មពីសហរដ្ឋអាមេរិក  នឹងបន្តជំរុញឱ្យមានការទំនាក់ទំនងពាណិជ្ជកម្ម និងវិនិយោគកាន់តែខ្លាំងរវាងកម្ពុជា និងសហរដ្ឋអាមេរិក ជាពិសេសទៅលើវិស័យពានិជ្ជកម្មអាហារ និងកសិកម្ម។

ក្នុងនោះដែរ តាងនាមឱ្យរាជរដ្ឋាភិបាលកម្ពុជា ឯកឧត្តមទេសរដ្ឋមន្រ្តី លី ធុជ បានគូសបញ្ជាក់ពីការដឹកនាំប្រកបដោយចក្ខុវិស័យរបស់សម្តេចមហាបវរធិបតី ហ៊ុន ម៉ាណែត នាយរដ្ឋមន្ត្រី ក្នុងការប្តេជ្ញាធ្វើទំនើបកម្មសេដ្ឋកិច្ច និងប្រែក្លាយកម្ពុជាទៅជាតួអង្គសំខាន់នៅក្នុងតំបន់ និងទូទាំងពិភពលោក តាមរយៈសេដ្ឋកិច្ចបើកចំហររបស់កម្ពុជា។ ការដឹកនាំរបស់សម្តេចធិបតី បានបើកផ្លូវសម្រាប់ភាពជាដៃគូ ដែលលើកកម្ពស់ស្តង់ដា និងកសាងវិបុលភាពយូរអង្វែង៕

អត្ថបទ៖ វីរៈ រូបភាព៖ ហ្វេសប៊ុកឯកឧត្តម លី ធុជ

The post ទឹកដោះគោមកពីរដ្ឋកាលីហ្វ័រញ៉ា ចាប់ផ្ដើមដំណើរការលក់នៅកម្ពុជា appeared first on Millions times.

ការរកឃើញនេះ គឺមានគេហទំព័រមួយ ដែលបានផ្សាយពណិជ្ជកម្មដោយ អះអាងគួរឲ្យសង្ស័យអំពីផលិតផលម្សៅទឹកដោះគោបង្ហាញពីអត្ថប្រយោជន៍ហួសហេតុ និងបានណែនាំថា ផលិតផលទាំងនោះ គឺលក់ដាច់ជាងគេលេខ ១ នៅក្នុងប្រទេសណូវ៉ែលហ្សេឡង់ ហើយត្រូវបានចែករំលែកយ៉ាងច្រើន។

អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប.) នៃក្រសួងពាណិជ្ជកម្ម បានឲ្យដឹងនៅថ្ងៃទី ២២ ខែមិថុនានេះថា ក្រោយពីបានទទួលការណែនាំពីរដ្ឋមន្ត្រីក្រសួងពាណិជ្ជកម្ម ពាក់ព័ន្ធនឹងព័ត៌មាននេះ អគ្គនាយកដ្ឋាន បានស្រាវជ្រាវលម្អិតបន្ថែមលើខ្លឹមសារដែលបានកើតឡើង និងបានចាត់វិធានការអង្កេតទីផ្សារ គោលដៅ ម៉ាត ផ្សារទំនើប និងទីតាំងលក់ម្សៅទឹកដោះគោ ក្នុងរយៈពេល ៣ថ្ងៃ ចាប់ពីថ្ងៃទី ១៥ ដល់ថ្ងៃទី ១៧ ខែមិថុនា ឆ្នាំ ២០២៤ ដើម្បីស្វែងរកផលិតផលជាមុខសញ្ញា តាមដានដូចក្នុងព័ត៌មានដែលបានផ្សព្វផ្សាយ។

តែយ៉ាងណាក៏ដោយ ជាលទ្ធផលនៃការចុះអង្កេតបឋម គឺមន្ត្រីស៊ើបអង្កេតនៃអគ្គនាយកដ្ឋាន ក.ប.ប. មិនបានរកឃើញវត្តមាន នៃផលិតផលជាមុខសញ្ញាតាមដានដូច ក្នុងព័ត៌មានដែលបានផ្សព្វផ្សាយនោះទេ។

អគ្គនាយកដ្ឋាន ក.ប.ប. ដែលជាសេនាធិការ នៃក្រសួងពាណិជ្ជកម្ម និងគណៈកម្មាធិការជាតិការពារ អ្នកប្រើប្រាស់ នឹងបន្តតាមដានលើករណីនេះយ៉ាងយកចិត្តទុកដាក់ ដើម្បីការពារសុខភាពប្រជាពលរដ្ឋ ដែលជាអ្នកប្រើប្រាស់។

ស្ថាប័នជំនាញមួយនេះ ក៏បានអំពាវនាវដល់សាធារណជនទាំងអស់ ពិសេសមាតាបិតា ឬអាណាព្យាបាល ដែលតែងតែទិញផលិតផលម្សៅទឹកដោះគោ និងផលិតផលអាហារបំប៉ននានា ប្រសិនបើបានជួបប្រទះលើផលិតផលជា មុខសញ្ញាតាមដានទាំងនេះ សូមមេត្តាផ្តល់កិច្ចសហការ ឬផ្តល់ព័ត៌មានមកអគ្គនាយកដ្ឋាន ក.ប.ប.៕

អត្ថបទ៖ វីរៈ រូបភាព៖ អគ្គនាយកដ្ឋានការពារអ្នកប្រើប្រាស់

តាមដានជាមួយយើង៖ Million Times

The post ផលិតផលម្ស៉ៅទឹកដោះគោដែលសង្ស័យក្លែងក្លាយម៉ាក Sica និងម៉ាក HIUP មិនមានលក់នៅកម្ពុជានោះទេ appeared first on Millions times.