ដំណាំម្រេច Archives - Millions times

សហគមន៍កសិកម្មចំនួន២ ក្នុងខេត្តត្បូងឃ្មុំ ចុះកិច្ចសន្យាលក់ម្រេចខ្មៅ៤៥តោនជាមួយសហគ្រាសសេកពីរ

Virak វីរៈ — Wed, 25 Feb 2026 14:08:14 +0000

សហគមន៍កសិកម្មចំនួន២ គឺសហគមន៍កសិកម្មដំណាំម្រេចធម្មជាតិទ្រៀកមេមត់ និង សហគមន៍កសិកម្មអភិរក្សពញាក្រែកតំបែរ ក្នុងខេត្តត្បូងឃ្មុំ បានចុះកិច្ចសន្យាផលិតកម្មកសិកម្ម (ទិញ-លក់) ម្រេចខ្មៅ ជាមួយសហគ្រាសសេកពីរ ចំនួន ៤៥តោន និងគិតជាទឹកប្រាក់ប្រមាណ ២៧ម៉ឺនដុល្លារអាមេរិក។

តាមដានជាមួយយើង៖ Million Times

ពិធីចុះហត្ថលេខាលើកិច្ចសន្យាផលិតកម្មកសិកម្ម (ទិញ-លក់) ម្រេចខ្មៅនេះ បានធ្វើឡើងកាលពីថ្ងៃទី២៤ ខែកុម្ភៈ ដោយមានការសម្របសម្រួលពីមន្ទីរកសិកម្ម រុក្ខាប្រមាញ់ និងនេសាទខេត្តត្បូងឃ្មុំ។

លោក ហេង ពិសិដ្ឋ ប្រធានមន្ទីរកសិកម្ម រុក្ខាប្រមាញ់ និងនេសាទ បានផ្តល់អនុសាសន៍តម្រង់ទិសណែនាំដល់ភាគីទាំងពីរត្រូវមានភាពស្មោះត្រង់នឹងគ្នា ដោយអនុវត្តឱ្យបានត្រឹមត្រូវតាមលក្ខខណ្ឌទាំងឡាយ ហើយបើមានបញ្ហាត្រង់ណា ត្រូវពិភាក្សាគ្នាដោះស្រាយភ្លាម។

លោកថា ចំពោះសហគមន៍កសិកម្ម ត្រូវដើរតួជាតួអង្គអ្នកផលិតផង និងជាអ្នកលក់ផង។ ដូច្នេះត្រូវធ្វើយ៉ាងពង្រឹងសមត្ថភាពផលិត ឱ្យបានផលិតផលដែលឆ្លើយតបតាមតម្រូវការរបស់អ្នកទិញ ទាំងគុណភាពនិងបរិមាណ។

ចំណែកភាគីអ្នកទិញ ក៏ត្រូវបន្តសហការជាមួយសហគមន៍កសិកម្មឱ្យបានជាប្រចាំ ដើម្បីតម្រង់ទិសផលិតកម្មឱ្យបានតាមការចង់បានរបស់ខ្លួន និងបន្តពង្រីកទំហំការទិញ និងជួយស្វែងរកដៃគូអ្នកទិញផ្សេងៗទៀត ព្រោះថា ម្រេចក្នុងខេត្តត្បូងឃ្មុំ ក្នុងមួយឆ្នាំលើសពី ៥,០០០តោនឯណោះ។

គួរឱ្យដឹងថា សហគមន៍កសិកម្មទាំង ២ខាងលើនេះ មានកសិករដាំម្រេចចូលរួមអនុវត្តកិច្ចសន្យាចំនួន ១១៨គ្រួសារ ដោយមានការគាំទ្រថវិកាពីអង្គការ CAPRED អូស្ត្រាលី៕

អត្ថបទ៖ វីរៈ រូបភាព៖ មន្ទីរកសិកម្មខេត្តត្បូងឃ្មុំ

The post សហគមន៍កសិកម្មចំនួន២ ក្នុងខេត្តត្បូងឃ្មុំ ចុះកិច្ចសន្យាលក់ម្រេចខ្មៅ៤៥តោនជាមួយសហគ្រាសសេកពីរ appeared first on Millions times.

សហគមន៍កសិកម្មទំនើប «ម្រេចមេមត់ត្បូងឃ្មុំ» នឹងមានប្រព័ន្ធ សូឡាបូមទឹកជំនួសការប្រើម៉ាស៊ូត ហើយអស់ថ្លៃដើមតិចបំផុត

Vin Chang — Mon, 23 Dec 2024 03:13:45 +0000

ជាព័ត៌មានដ៏រីករាយបំផុតមួយ សម្រាប់កសិករដែលជាសមាជិកគ្រួសារសហគមន៍កសិកម្មទំនើប «ម្រេចមេមត់ត្បូងឃ្មុំ» ក្រោយមានការជួយជ្រោមជ្រែងពីខាងក្រសួងកសិកម្ម រុក្ខាប្រមាញ់ និងនេសាទ ដើម្បីសិក្សាការកាត់បន្ថយថ្លៃដើមរបស់កសិករ។

តាមដានជាមួយយើង៖ Million Times

តាមការបង្ហោះលើពីលោក ឃឹម ហ្វីណង់ អនុរដ្ឋលេខាធិការក្រសួងកសិកម្ម បានឲ្យដឹងថា ក្រសួងគ្រោងនឹងវិនិយោគលើប្រព័ន្ធសូឡាបូមទឹក ជូនដល់សមាជិកទាំង ៦៥ គ្រួសារនៃសហគមន៍កសិកម្មទំនើប «ម្រេចមេមត់ត្បូងឃ្មុំ» ជំនួសឲ្យការប្រើប្រាស់ម៉ាស៊ីនបូមទឹកដើរដោយប្រេងម៉ាស៊ូត ដើម្បីកាត់បន្ថយចំណាយប្រតិបត្តិការប្រចាំថ្ងៃរបស់សហគមន៍។

អនុរដ្ឋលេខាធិការក្រសួងកសិកម្មរូបនេះបានឲ្យដឹងទៀតថា ក្រុមការងារជំនាញមកពីនាយកដ្ឋានគ្រឿងយន្តកសិកម្មកំពុងសិក្សាលម្អិតលើតម្រូវការបច្ចេកទេសចាំបាច់ ដើម្បីរៀបចំប្រព័ន្ធស្រោចស្រពដើរដោយសូឡាមួយដែលមានប្រសិទ្ធភាពបំផុត សម្រាប់គ្រប់ដណ្ដប់លើផ្ទៃដីផលិតកម្មម្រេចជិត ១០០ ហិកតារបស់សហគមន៍។

តាមការប៉ាន់ស្មានបឋម សម្រាប់ប្រព័ន្ធស្រោចស្រពប្រភេទនេះ ការវិនិយោគអាចមានទំហំជិត ២០ ម៉ឺនដុល្លារ តែអាចប្រើប្រាស់បានរយៈពេល ១០ ឆ្នាំ ប្រហាក់ប្រហែលគ្នានឹងទំហំចំណាយ ១ ឆ្នាំកន្លះ បើធៀបនឹងប្រព័ន្ធចាស់ដើរដោយម៉ាស៊ូត ឬនិយាយមួយបែបទៀតថា ១ ឆ្នាំកន្លះអាចរួចខ្លួនបានដើមមកវិញ ហើយចំណេញជាង ១ លានដុល្លារ សម្រាប់រយៈពេល ១០ ឆ្នាំ។

លោក ឃឹម ហ្វីណង់ បានបញ្ជាក់ថា ទាំងនោះគឺជាអត្ថប្រយោជន៍មួយបែបទៀត ដែលកសិករអាចទទួលបាន ពីការចូលរួមជាសមាជិកនៃសហគមន៍កសិកម្មទំនើប៕

អត្ថបទ៖ មេរ៉ា, រូបភាព៖ ឃឹម ហ្វីណង់

The post សហគមន៍កសិកម្មទំនើប «ម្រេចមេមត់ត្បូងឃ្មុំ» នឹងមានប្រព័ន្ធ សូឡាបូមទឹកជំនួសការប្រើម៉ាស៊ូត ហើយអស់ថ្លៃដើមតិចបំផុត appeared first on Millions times.