ក្រុមហ៊ុនចម្រាញ់រ៉ែមាសនៅមណ្ឌលគិរី គ្រោងបន្ថែមការវិនិយោគទៅត្បូងឃ្មុំ១ខេត្តទៀត ដែលអាចផលិតបាន ៣តោនក្នុង១ឆ្នាំ

Vin Chang — Sat, 15 Feb 2025 03:35:23 +0000

ក្រុមហ៊ុនអូស្ត្រាលី Renaissance Minerals គ្រោងនឹងធ្វើអាជីវកម្មរ៉ែមាសមួយកន្លែងបន្ថែមទៀតនៅខេត្តត្បូងឃ្មុំ ដែលអាចផលិតមាសប្រមាណ ៣ តោនក្នុង១ឆ្នាំ។ នេះបើតាមការលោក Bernie Cleary នាយកគ្រប់គ្រងក្រុមហ៊ុន ផ្ដល់បទសម្ភាសន៍ដល់សារព័ត៌មានក្នុងស្រុកកាលពីពេលកន្លងទៅ។

តាមដានជាមួយយើង៖ Million Times

លោក Bernie Cleary បានឲ្យដឹងថានាពេលខាងមុខ ក្រុមហ៊ុនគ្រោងនឹងអភិវឌ្ឍន៍អាជីវកម្មរ៉ែមាសមួយគម្រោងបន្ថែមទៀតនៅស្រុកមេមត់ ខេត្តត្បូងឃ្មុំ ដែលអាចផលិតមាសប្រមាណ ៣តោនក្នុង១ឆ្នាំ បន្ទាប់ពីក្រុមហ៊ុនលោក បានបើកការដ្ឋានអាជីវកម្ម និងរោងចក្រចម្រាញ់រ៉ែមាស ជាលក្ខណៈឧស្សាហកម្មនៅខេត្តមណ្ឌលគិរី។

នាយកគ្រប់គ្រងក្រុមហ៊ុនរូបនេះ បានបន្តថា ក្រុមហ៊ុនបានចុះពិនិត្យទីតាំងនៃដែនអាជ្ញាប័ណ្ណរបស់ខ្លួន ដោយក្រុមការងារស្វែងរុករក និងក្រុមការងារបរិស្ថាន ព្រមទាំងបានជួបប្រជុំពិភាក្សាជាមួយអាជ្ញាធរមូលដ្ឋាន ដើម្បីណែនាំខ្លួន និងផ្សព្វផ្សាយពីផែនការ សម្រាប់ការងារស្វែងរុករកនៅក្នុងតំបន់សំពៅលូន ក្នុងឃុំជាំតាម៉ៅ ស្រុកមេមត់ ខេត្តត្បូងឃ្មុំ ខណៈក្រសួងបានធ្វើការវាយតម្លៃពីទំហំបរិមាណរ៉ែមាស ដែលក្រុមហ៊ុនអាចធ្វើការទាញយកបាន។

គួរបញ្ជាក់ថាក្នុងតំបន់អូខ្វាវ ខេត្តមណ្ឌលគិរីនេះ ក្រុមហ៊ុនអាចចម្រាញ់រ៉ែមាស បាន ៣០០ ទៅ ៤០០ គីឡូក្រាមក្នុង១ខែ តាមស្ថានភាពជាក់ស្តែង ស្របពេលដែលក្រុមហ៊ុនបានធ្វើអាជីវកម្មនៅក្នុងរណ្ដៅរ៉ែមាសសរុប ៧ រណ្ដៅ និងគ្រោងនឹងបន្តរណ្តៅទី៨ បន្ថែមទៀត។ គម្រោងនៅតំបន់អូរខ្វាវ គ្រោងនឹងបន្ថែមអាយុអាជីវកម្មពី ៨ ឆ្នាំ ទៅ ២០ឆ្នាំ ដោយគ្រោងប្រើប្រាស់អណ្តូងរ៉ែក្រោមដី៕

អត្ថបទ៖ មេរ៉ា, រូបភាព៖ ទទក

The post ក្រុមហ៊ុនចម្រាញ់រ៉ែមាសនៅមណ្ឌលគិរី គ្រោងបន្ថែមការវិនិយោគទៅត្បូងឃ្មុំ១ខេត្តទៀត ដែលអាចផលិតបាន ៣តោនក្នុង១ឆ្នាំ appeared first on Millions times.

ជនជាតិដើមភាគតិចនៅមណ្ឌលគិរី ប្រមូលផលស្រូវបូតដោយដៃ តាមប្រពៃណីបុរាណ

Vin Chang — Thu, 28 Nov 2024 07:03:44 +0000

នារដូវលំហើយប្រជាកសិករខ្មែរចាប់ផ្ដើមប្រមូលផលស្រូវហើយ ក្នុងនោះជនជាតិដើមភាគតិចនៅមណ្ឌលគិរី ក៏ដូចកសិករទូទៅផងដែរ។ តែមានភាពខុសប្លែកគ្នាត្រង់ប្រជាកសិករទូទៅតំបន់ទំនាបកណ្ដាល ប្រមូលផលស្រូវរដូវវស្សាដោយការច្រូតកាត់ ហើយខាងជនជាតិដើមភាគតិច ធ្វើឡើងដោយដៃផ្ទាល់។ នេះបើតាមការចុះផ្សាយមន្ទីរព័ត៌មានខេត្តមណ្ឌលគិរីផ្ទាល់។

តាមដានជាមួយយើង៖ Million Times

ជនជាតិដើមភាគតិចរស់នៅតំបន់ខ្ពង់រាប មានរបៀបប្រមូលផលស្រូវបូតដោយដៃ រួចបុកនិងត្បាល់អង្រែធំៗតាមវិធីសាស្ត្របុរាណ។ លោក ភី ងូក ជាជនជាតិដើមភាគតិចព្នង និងជាចៅសង្កាត់រមនា ក្រុងសែនមនោរម្យ ក៏ជាម្ចាស់ចម្ការផ្ទាល់ មានផ្ទៃដីជិត ១ ហិកតា នៅភូមិពូតាំង បានឲ្យដឹងថា ការប្រមូលផលស្រូវ បូតដោយដៃនេះ គឺជាប្រពៃណីទំនៀមទម្លាប់តាំងពីបុរាណ ហើយស្រូវប្រភេទនេះ ជនជាតិដើមភាគតិច តែងតែធ្វើការដាំដុះនៅតាមចង្កេះភ្នំ ឬចម្ការជម្រាលមាត់អូរ ត្រង់នេះមួយដុំ ត្រង់នោះមួយដុំ នៅតំបន់មួយចំនួនក្នុងខេត្តមណ្ឌលគិរី។

ស្រូវអង្ករដែលជនជាតិដើមភាគតិចព្នង បង្កបង្កើនផលតាមចម្ការមានលក្ខណៈខុសពីស្រូវប្រជាកសិករទូទៅ ហើយមានរសជាតិឆ្ងាញ់ និងមិនប្រើសារធាតុគីមីនោះទេ។ សម្រាប់ការដាំដុះស្រូវនេះ ចាប់ពីចន្លោះខែឧសភា មិថុនា រហូតដល់ស្រូវទុំចាប់ពីខែវិច្ឆិកា និងខែធ្នូ ចាប់ផ្ដើមប្រមូលផល ប្រវាស់ដៃគ្នានៅក្នុងភូមិ ដើម្បីជួយគ្នាទៅវិញទៅមក។

ចៅសង្កាត់បានបន្តថា ប្រជាពលរដ្ឋនៅសង្កាត់រមនានេះភាគច្រើនប្រកបមុខរបរ កសិកម្មប្រមាណ ៩៥ %។ លោកក៏សំណូមពរប្រជាពលរដ្ឋ ជាពិសេសជនជាតិដើមភាគតិច នៅក្នុងខេត្ត ត្រូវចូលរួមថែរក្សាប្រពៃណី ទំនៀមទម្លាប់ សាសនា កុំឲ្យបាត់បង់ ហើយត្រូវបន្តខិតខំដាំដុះដំណាំយូរអង្វែង និងដំណាំរួមផ្សំផ្សេងៗទៀត ដើម្បីធ្វើយ៉ាងណា ឲ្យប្រជាពលរដ្ឋកាន់តែមានជីវភាពល្អប្រសើរ។

លោក សុង ឃាង ប្រធានមន្ទីរកសិកម្ម រុក្ខាប្រមាញ់ និងនេសាទខេត្តមណ្ឌលគិរី បានឲ្យដឹងថា នៅទូទាំងខេត្ត មានផ្ទៃដីប្រមូលផលស្រូវចម្ការសរុប ២១៤ ហិកតា ស្មើនឹង ២០,៨៤% លើផ្ទៃដីអនុវត្តបានទិន្នផលមធ្យម ១,០៦៨តោន/ហិកតា បរិមាណផលសរុប ២២៨តោន៕

អត្ថបទ៖ មេរ៉ា, រូបភាព៖ មន្ទីរព័ត៌មានខេត្តមណ្ឌលគិរី

The post ជនជាតិដើមភាគតិចនៅមណ្ឌលគិរី ប្រមូលផលស្រូវបូតដោយដៃ តាមប្រពៃណីបុរាណ appeared first on Millions times.

ខេត្តមណ្ឌលគិរី Archives - Millions times

ជនជាតិដើមភាគតិចនៅមណ្ឌលគិរី ប្រមូលផលស្រូវបូតដោយដៃ តាមប្រពៃណីបុរាណ