តាមដានជាមួយយើង៖ Million Times

សេចក្ដីប្រកាសព័ត៌មានរបស់ក្រសួងរៀបចំដែនដី ផ្សព្វផ្សាយថ្ងៃទី៣ ខែមីនានេះ បានឱ្យដឹងថា យោងតាមលទ្ធផលរបស់ក្រុមការងារជំនាញនៃអគ្គនាយកដ្ឋានសំណង់ និងមន្ទីរពិសោធន៍ជាតិសំណង់ ក្រសួង ដ.ន.ស. បានធ្វើការវិភាគគ្រឿងផ្គុំសំណង់អគារខាងលើឡើងវិញ។

ជាលទ្ធផល ពិនិត្យឃើញថា គុណភាពសំណង់អគារនេះមានការធ្លាក់ចុះខ្សោយយ៉ាងខ្លាំង ក្នុងនោះ ស្រទាប់បេតុងនិងសរសៃ ដែកភាគច្រើនបំផុតនៃឆ្នើម កម្រាលខណ្ឌ និងសសរ បានផ្ទាត់ចេញ និងមានស្នាមក្រែធ្ងន់ធ្ងរ ដែលធ្វើឱ្យបាត់បង់ គុណភាពនិងលទ្ធភាពទ្រទ្រង់អគារទាំងមូល ប្រឈមនឹងហានិភ័យបាក់រលំដែលអាចកើតមានឡើងជាយថាហេតុ និងបានចាត់ថ្នាក់អគារនេះថា ជា “សំណង់ដែលមានសភាពគ្រោះថ្នាក់ដែលអាចកើតមានឡើងភ្លាមៗ” ។

ក្នុងន័យនេះ ដើម្បីបង្ការ និងបញ្ចៀសគ្រោះថ្នាក់ដល់រាងកាយ និងអាយុជីវិតរបស់ប្រជាពលរដ្ឋកំពុង រស់នៅ ប្រើប្រាស់ និងអាស្រ័យផលក្នុងអគារ និងដីកម្មសិទ្ធិរបស់អគារអតីតសាលាបឋមសិក្សាខេមរបុត្រ សំណង់ជិតខាង អ្នកជិតខាង និងសាធារណជន ក្រសួងរៀបចំដែនដី នគរូបនីយកម្ម និងសំណង់ បានអំពាវនាវឱ្យប្រជាពលរដ្ឋដែលកំពុងរស់នៅ ប្រើប្រាស់ និងអាស្រ័យផលក្នុងអគារ និងដីកម្មសិទ្ធរបស់អគារខាងលើនេះ ស្វែងរកទីកន្លែងស្នាក់នៅថ្មីដែលមានសុវត្ថិភាពជាបន្ទាន់ គិតចាប់ពីថ្ងៃចេញសេចក្តីប្រកាសព័ត៌មាននេះតទៅ ដើម្បីក្រុមការងារចាប់ផ្តើមអនុវត្តការងារតម្លើង “ផ្ទាំងសេចក្តីប្រកាសព័ត៌មាន ស្តីពី ការចាត់វិធានការបញ្ចៀសគ្រោះថ្នាក់ចំពោះអគារអតីតសាលាខេមរបុត្រ” នៅទីតាំងអគារ ផ្លូវលេខ៩៣ កែងផ្លូវលេខ២៨២ ភូមិ៣ សង្កាត់បឹង កេងកង១ ខណ្ឌបឹងកេងកង រាជធានីភ្នំពេញ នៅថ្ងៃទី៣ ខែមីនា ឆ្នាំ២០២៦ ខាងមុខនេះ។

ក្នុងរយៈពេលយ៉ាងយូរ ៣០ (សាមសិប) ថ្ងៃ គិតចាប់ពីថ្ងៃចេញសេចក្តីប្រកាសព័ត៌មាននេះ ក្រសួងរៀបចំដែនដី នគរូបនីយកម្ម និងសំណង់ និងរដ្ឋបាលរាជធានីភ្នំពេញ នឹងចាត់វិធានការដូចជា៖ មិនអនុញ្ញាតឱ្យមានការបន្តស្នាក់នៅ ឬប្រើប្រាស់អគារនេះទៀតឡើយ, ធ្វើការហ៊ុមព័ទ្ធ និងហាមឃាត់ការចូលទីតាំងអគារនេះ៕

អត្ថបទ៖ វីរៈ រូបភាព៖ ក្រសួងរៀបចំដែនដី

The post ក្រសួងអំពាវនាវពលរដ្ឋរស់នៅអគារអតីតសាលាបឋមសិក្សាខេមរបុត្រ ស្វែងរកទីកន្លែងស្នាក់នៅថ្មី ព្រោះគុណភាពសំណង់ធ្លាក់ចុះខ្លាំង appeared first on Millions times.

តាមដានជាមួយយើង៖ Million Times

សេចក្ដីប្រកាសព័ត៌មានរបស់ក្រសួងរៀបចំដែនដី ផ្សព្វផ្សាយនៅថ្ងៃទី២៤ ខែកុម្ភៈនេះ បានឱ្យដឹងថា បន្ទាប់ពីបានទទួលពាក្យ និងផ្ទៀងផ្ទាត់ឯកសារសម្រាប់បន្តនីតិវិធី ចុះបញ្ជីផ្ទេរបណ្ណកម្មសិទ្ធិរបស់អតិថិជន ដែលបានទិញផ្ទះពីគម្រោងអភិវឌ្ឍន៍បុរី ផ្ទះល្វែង និងដីឡូត៍ ក្នុងភូមិសាស្ត្ររាជធានីភ្នំពេញ, ក្រុមការងារក្រសួងរៀបចំដែនដី បានសម្រេចចេញបណ្ណកម្មសិទ្ធិចំនួន ៤ ២៤៨បណ្ណជូនអតិថិជនដែលបានបង់ប្រាក់គ្រប់ ១០០% បានបំពេញគ្រប់លក្ខខណ្ឌ និងមិនជាប់ពាក់ព័ន្ធជាមួយតតិយជន។

គម្រោងទាំងនោះ រួមមាន៖ ១. បុរីសន្តិភាព២ ភូមិដំណាក់ត្រយឹង សង្កាត់ចោមចៅទី២ ខណ្ឌពោធិ៍សែនជ័យ ចំនួន ២ ៧០៥បណ្ណ, ២. បុរីរុងរឿងទួលពង្រ ភូមិទួលពង្រ សង្កាត់ចោមចៅទី១ ខណ្ឌពោធិ៍សែនជ័យចំនួន ៥៦០បណ្ណ, ៣. បុរីម៉ន ដានី គម្រោងទី ១០, ១៤, ១៦, ១៧, ១៨, ១៩, ២០, ២១, ២២, ២៤, ២៥ និងគម្រោងទី២៦ ក្នុងភូមិសាស្ត្រខណ្ឌកំបូល និងខណ្ឌពោធិ៍សែនជ័យចំនួន ៤៦៨បណ្ណ, ៤. បុរីនាគរាជសិទ្ធី ភូមិទួលពឡាំង សង្កាត់ពន្សោង ខណ្ឌព្រែកព្នៅ ចំនួន ១១៦បណ្ណ។

៥. បុរីចាវ សុជាតិ គម្រោង៦ ភូមិត្នោតខ្ពស់ សង្កាត់ពន្សោង ខណ្ឌព្រែកព្នៅ ចំនួន ៩៩បណ្ណ, ៦. បុរីចាន់ នន់វិទ្យា ភូមិត្រពាំងក្រសាំង សង្កាត់ត្រពាំងក្រសាំង ខណ្ឌពោធិ៍សែនជ័យ ចំនួន ១០៩បណ្ណ, ៧. គម្រោងផ្ទះល្វែងវេង ឡុង ភូមិព្រែកតាពៅ សង្កាត់ព្រែកប្រា ខណ្ឌច្បារអំពៅ ចំនួន ៩៦បណ្ណ, ៨. បុរីវី អាយ ភី ភូមិម៉ឺនត្រា, ភូមិគោកឪឡឹក និងភូមិហារ សង្កាត់ស្ពានថ្ម ខណ្ឌដង្កោចំនួន ៦៧បណ្ណ និង៩. បុរីសុខ សាន្ត ភូមិព្រៃព្រីងត្បូង២ សង្កាត់ចោមចៅទី៣ ខណ្ឌពោធិ៍សែនជ័យ ចំនួន ២៨បណ្ណ។

តាមរយៈសេចក្ដីប្រកាសព័ត៌មាននេះ ក្រសួងរៀបចំដែនដី នគរូបនីយកម្ម និងសំណង់ បានអញ្ជើញអតិថិជនរបស់គម្រោងអភិវឌ្ឍន៍បុរី ផ្ទះល្វែង និងដីឡូត៍ទាំង ៩ក្រុមហ៊ុនខាងលើ ទៅទទួលយកបណ្ណកម្មសិទ្ធិ នៅសាលសន្និបាត២០២១ ជាន់ទី២ នាទីស្តីការក្រសួង ដ.ន.ស. ចាប់ថ្ងៃទី២ ដល់ទី៦ ខែមីនា ឆ្នាំ២០២៦ នៅរៀងរាល់ម៉ោងធ្វើការ។

ដោយឡែក សម្រាប់អតិថិជនដែលខកខានមិនបានមកទទួលយកបណ្ណកម្មសិទ្ធិ តាមកាលបរិច្ឆេទកំណត់ខាងលើ អាចទាក់ទងទៅកាន់ការិយាល័យរៀបចំដែនដី នគរូបនីយកម្ម សំណង់ និងភូមិបាលតាមបណ្តាខណ្ឌ នៃទីតាំងដី។ រីឯអតិថិជនដែលមិនទាន់បានបំពេញគ្រប់លក្ខខណ្ឌ ក្រសួងរៀបចំដែនដី នឹងបន្តជួបពិភាក្សាដោះស្រាយបញ្ចប់ ដើម្បីរៀបចំនីតិវិធីចុះបញ្ជីផ្ទេរកម្មសិទ្ធិជូន ជាបន្តបន្ទាប់ទៀត៕

អត្ថបទ៖ វីរៈ រូបភាព៖ ក្រសួងរៀបចំដែនដី

The post ក្រសួងរៀបចំដែនដី សម្រេចចេញបណ្ណកម្មសិទ្ធិជាង ៤ពាន់បណ្ណ​ ជូនអតិថិជនទិញពីគម្រោងអភិវឌ្ឍន៍ចំនួន ៩ក្រុមហ៊ុន   appeared first on Millions times.

តាមដានជាមួយយើង៖ Million Times

យោងតាមសេចក្ដីប្រកាសព័ត៌មាន របស់ក្រសួងរៀបចំដែនដី នគរូបនីយកម្ម និងសំណង់ បាន​ឱ្យដឹងថាយោងតាមលទ្ធផល របស់ក្រុមការងារជំនាញនៃអគ្គនាយកដ្ឋានសំណង់ និងមន្ទីរពិសោធន៍ជាតិសំណង់ នៃក្រសួងរៀបចំដែនដី នគរូបនីយកម្ម និងសំណង់ បានធ្វើការវិភាគគ្រឿងផ្លុំសំណង់អគារខាងលើឡើងវិញ។

ជាលទ្ធផល បានពិនិត្យឃើញថា គុណភាពសំណង់អគារនេះ មានការធ្លាក់ចុះខ្សោយយ៉ាងខ្លាំង ក្នុងនោះ ស្រទាប់ បេតុងនិងសរសៃដែកភាគច្រើនបំផុតនៃធ្នឹម កម្រាលខណ្ឌ និងសសរ បានផ្ទាត់ចេញ និងមានស្នាមចេះធ្ងន់ធ្ងរ ដែលធ្វើឱ្យបាត់បង់គុណភាព និងលទ្ធភាពទ្រទ្រង់អគារទាំងមូល ប្រឈមនឹងហានិភ័យបាក់រលំដែលអាចកើតមានឡើងជាយថាហេតុ និងបានចាត់ថ្នាក់អគារនេះថា ជា “សំណង់ដែលមានសភាពគ្រោះថ្នាក់ដែលអាចកើត មានឡើងភ្លាមៗ”។

ក្នុងន័យនេះ ដើម្បីបង្ការ និងបញ្ចៀសគ្រោះថ្នាក់ដល់អាយុជីវិតរាងកាយ របស់ប្រជាពលរដ្ឋកំពុងរស់នៅ ប្រើប្រាស់ និងអាស្រ័យផលក្នុងអគារ និងដីកម្មសិទ្ធរបស់អគារអតីតសាលាបឋមសិក្សាបដិវត្តន៍ សំណង់ជិតខាង អ្នកជិតខាង និងសាធារណជន ក្រសួងរៀបចំដែនដី នគរូបនីយកម្ម និងសំណង់ បានអំពាវនាវឱ្យប្រជាពលរដ្ឋ ដែលកំពុងរស់នៅ ប្រើប្រាស់ និងអាស្រ័យផលក្នុងអគារ និងដីកម្មសិទ្ធរបស់អគារខាងលើនេះ ស្វែងរកទីកន្លែងស្នាក់នៅថ្មីដែលមានសុវត្ថិភាពជាបន្ទាន់ គិតចាប់ពីថ្ងៃចេញសេចក្តីប្រកាសព័ត៌មាននេះតទៅ ដើម្បីក្រុមការងារ ចាប់ផ្តើមអនុវត្តការងារតម្លើង “ផ្ទាំងសេចក្តីប្រកាសព័ត៌មាន ស្តីពី ការចាត់វិធានការបញ្ចៀសគ្រោះថ្នាក់ ចំពោះអគារអតីតសាលាបឋមសិក្សាបដិវត្តន៍” នៅទីតាំងអគារស្ថិតនៅផ្លូវលេខ១៤៤ កែងផ្លូវលេខ៤៩ សង្កាត់ផ្សារថ្មី ទី៣ ខណ្ឌដូនពេញ រាជធានីភ្នំពេញ នៅថ្ងៃទី២ ខែកុម្ភៈ ឆ្នាំ២០២៦ ខាងមុខនេះ។

សេចក្ដីប្រកាសព័ត៌មាននេះ បានឱ្យដឹងថា ក្នុងរយៈពេលយ៉ាងយូរ ៣០ (សាមសិប) ថ្ងៃ គិតចាប់ពីថ្ងៃចេញសេចក្តីប្រកាសព័ត៌មាននេះ ក្រសួង រៀបចំដែនដី នគរូបនីយកម្ម និងសំណង់ និងរដ្ឋបាលរាជធានីភ្នំពេញ នឹងចាត់វិធានការដូចជាដ៖ ១. មិនអនុញ្ញាតឱ្យមានការបន្តស្នាក់នៅ ឬប្រើប្រាស់អគារនេះទៀតឡើយ និង២. ធ្វើការហ៊ុំព័ទ្ធ និងហាមចូលសំណង់អគារនេះ។

ក្រសួងរៀបចំដែនដី នគរូបនីយកម្ម និងសំណង់ បានសង្ឃឹមថា ប្រជាពលរដ្ឋដែលកំពុងរស់នៅ ប្រើប្រាស់ និងអាស្រ័យផលក្នុងសំណង់អគារខាងលើ និងសាធារណជនជ្រាបជាព័ត៌មាន និងចូលរួមសហការអនុវត្ត ប្រកបដោយស្មារតីប្រុងប្រយ័ត្ន និងទទួលខុសត្រូវខ្ពស់៕

អត្ថបទ៖ វីរៈ រូបភាព៖ ក្រសួងរៀបចំដែនដី  

The post ក្រសួង អំពាវនាវឱ្យពលរដ្ឋរស់នៅសំណង់អគារអតីតសាលាបឋមសិក្សាបដិវត្តន៍ ស្វែងរកទីកន្លែងស្នាក់នៅថ្មី appeared first on Millions times.

តាមដានជាមួយយើង៖ Million Times

សេចក្ដីជូនដំណឹងរបស់ក្រសួងរៀបចំដែនដី នគរូបនីយកម្ម និងសំណង់ ផ្សព្វផ្សាយនៅថ្ងៃទី១៩ ខែមករានេះ ដោយជម្រាបជូនប្រជាពលរដ្ឋដែលកំពុងកាន់កាប់ សំណង់មិនរៀបរយក្នុងបរិវេណដីគម្រោងអភិវឌ្ឍន៍កំពង់ផែស្វយ័តក្រុងព្រះសីហនុ មានទីតាំងស្ថិតនៅភូមិ៣ សង្កាត់លេខ៣ ក្រុងព្រះសីហនុ ខេត្តព្រះសីហនុ ឱ្យបានជ្រាបថា រាជរដ្ឋាភិបាលកម្ពុជា បានសម្រេចរៀបចំអភិវឌ្ឍន៍ និងសាងសង់ចំណតផែកុងតឺន័រទឹកជ្រៅរបស់កំពង់ផែស្វយ័តក្រុងព្រះសីហនុ ជា ៣ជំហាន គិតចាប់ពី ឆ្នាំ២០២៣ ដល់ឆ្នាំ២០៣០ ដោយប្រើប្រាស់ថវិកាកម្ចីសម្បទានពីរដ្ឋាភិបាលជប៉ុន។

ក្រសួងរៀបចំដែនដី បានឱ្យដឹងបន្តថា គម្រោងអភិវឌ្ឍន៍នេះ មានគោលបំណងដើម្បីបង្កើនសមត្ថភាពផែកុងតឺន័រ ដែលអនុញ្ញាតឱ្យនាវាដឹកកុងតឺន័រមានចំណុះផ្ទុករហូតដល់ ១៦០.០០០ DWT (១៥.០០០ TEUs) ចេញ-ចូលដឹកជញ្ជូនពីកំពង់ផែស្វយ័តក្រុងព្រះសីហនុ ទៅកាន់ពិភពលោកដោយផ្ទាល់ និងគ្មានឧបសគ្គជម្រៅទឹកទៀតឡើយ។

កន្លងមក ក្រសួងរៀបចំដែនដី នគរូបនីយកម្ម និងសំណង់ បានចាត់តាំងក្រុមការងារសហការជាមួយរដ្ឋបាលខេត្តព្រះសីហនុ ចុះពិនិត្យ វាស់វែង និងកំណត់អត្តសញ្ញាណប្រជាពលរដ្ឋដែលបានកាន់កាប់ដី និងផ្ទះ ស្ថិតក្នុងតំបន់គម្រោងអភិវឌ្ឍន៍ចំណតផែកុងតឺន័រ រួចហើយ។

ទន្ទឹមនេះ ដើម្បីឱ្យផែនការអភិវឌ្ឍន៍គម្រោងសាងសង់ចំណតផែកុងតឺន័រទឹកជ្រៅថ្មី អាចដំណើរការទៅបានសម្រេចតាមផែនការដែលបានគ្រោងទុក ក្រសួងរៀបចំដែនដី នគរូបនីយកម្ម និងសំណង់ បានរៀបចំក្រុមការងារសហការជាមួយរដ្ឋបាលខេត្តព្រះសីហនុ ដើម្បីចុះពិនិត្យដោះស្រាយផលប៉ះពាល់នានាជាមួយប្រជាពលរដ្ឋដោយផ្ទាល់ ដើម្បីយកទីតាំងដីនេះធ្វើការអភិវឌ្ឍទៅតាមផែនការរបស់រាជរដ្ឋាភិបាល។

ក្នុងន័យនេះ ក្រសួងរៀបចំដែនដី នគរូបនីយកម្ម និងសំណង់ បានអំពាវនាវដល់ប្រជាពលរដ្ឋ ដែលពាក់ព័ន្ធទាំងអស់ចូលរួមសហការជាមួយក្រុមការងារខាងលើ ប្រកបដោយស្មារតីទទួល ខុសត្រូវខ្ពស់ ដើម្បីរួមចំណែកកសាង និងអភិវឌ្ឍប្រទេសជាតិ ឱ្យកាន់តែមានការរីកចម្រើន៕

អត្ថបទ៖ វីរៈ រូបភាព៖ ក្រសួងរៀបចំដែនដី

The post ក្រសួង អំពាវនាវពលរដ្ឋកាន់កាប់សំណង់មិនរៀបរយ ក្នុងគម្រោងអភិវឌ្ឍន៍កំពង់ផែក្រុងព្រះសីហនុ ចូលរួមសហការដោះស្រាយផលប៉ះពាល់ appeared first on Millions times.

តាមដានជាមួយយើង៖ Million Times

សេចក្ដីប្រកាសព័ត៌មានរបស់ក្រសួងរៀបចំដែនដី នគរូបនីយកម្ម និងសំណង់ នៅថ្ងៃទី១៧ ខែវិច្ឆិកា បានឱ្យដឹងថា គិតត្រឹមថ្ងៃទី១៤ ខែវិច្ឆិកា ឆ្នាំ២០២៥ ក្រសួង បានទទួលសំណើសុំអន្តរាគមន៍ពីប្រជាពលរដ្ឋដែលជាអតិថិជន របស់គម្រោងអភិវឌ្ឍន៍បុរី ដីឡូត៍ ខុនដូ និងផ្សារ នៅទូទាំងប្រទេសសរុបចំនួន ១៧៦គម្រោង។

ប្រភពដដែល បានឱ្យដឹងថា បន្ទាប់ពីបានទទួលសំណើទាំងនេះ ក្រសួងរៀបចំដែនដី នគរូបនីយកម្ម និងសំណង់ បានធ្វើការសិក្សា ប្រមូលព័ត៌មាន និងទិន្នន័យក្បាលដី ធ្វើបច្ចុប្បន្នកម្មទិន្នន័យអតិថិជន ស្រាវជ្រាវ និងប្រមូលឯកសារពាក់ព័ន្ធ ព្រមទាំងអញ្ជើញភាគីអតិថិជន, ម្ចាស់គម្រោង, ម្ចាស់ដី, ម្ចាស់បំណុល និងភាគីពាក់ព័ន្ធផ្សេងទៀត មកប្រជុំសម្របសម្រួលដោះស្រាយ។

សេចក្ដីប្រកាសព័ត៌មាន បានបញ្ជាក់ថា កិច្ចប្រជុំសម្របសម្រួលដោះស្រាយនេះ គឺឈរលើស្មារតីយោគយល់ អនុគ្រោះគ្នា និងគោលការណ៍ឈ្នះឈ្នះ ប៉ុន្តែធានា បាននូវសមធម៌ គុណធម៌ និងយុត្តិធម៌សម្រាប់គ្រប់ភាគីពាក់ព័ន្ធ។

បើតាមក្រសួងរៀបចំដែនដី នគរូបនីយកម្ម និងសំណង់ គិតត្រឹមពាក់កណ្ដាលខែវិច្ឆិកា ឆ្នាំ២០២៥នេះ ក្រសួង បានសម្របសម្រួលដោះស្រាយបញ្ចប់ ១១៥គម្រោង ហើយបញ្ជូនទៅស្ថាប័នតុលាការចំនួន ៤គម្រោង។ ចំណែកគម្រោងចំនួន ៥៧ផ្សេងទៀត កំពុងបន្តសម្របសម្រួលដោះស្រាយ៕

អត្ថបទ៖ វីរៈ រូបភាព៖ ក្រសួងរៀបចំដែនដី

The post ក្រសួង សម្របសម្រួលបញ្ចប់វិវាទរវាងអតិថិជនជាមួយគម្រោងបុរី ដីឡូត៍ ខុនដូ និងផ្សារបាន ១១៥គម្រោង appeared first on Millions times.

តាមដានជាមួយយើង៖ Million Times

ការចាប់ផ្ដើមនេះ គឺបន្ទាប់ពីឯកឧត្តម សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងឯកឧត្តម ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ដែលជាជាសហប្រធានគណៈកម្មាធិការរៀបចំដែនដី និងនគរូបនីយកម្មថ្នាក់ជាតិ បានអញ្ជើញជាសហអធិបតីក្នុងកិច្ចប្រជុំគណៈកម្មាធិការរៀបចំដែនដី និងនគរូបនីយកម្មថ្នាក់ជាតិ នៅក្រសួងរៀបចំដែនដី នគរូបនីយកម្មនិងសំណង់ កាលពីព្រឹកថ្ងៃទី ៦ ខែតុលា ឆ្នាំ ២០២៥នេះ។

កិច្ចប្រជុំនាពេលនេះ មានការអញ្ជើញចូលរួមពីថ្នាក់ដឹកនាំក្រសួងរៀបចំដែនដី នគរូបនីយកម្ម និងសំណង់ ក្រសួងមហាផ្ទៃ ក្រសួងព្រះបរមរាជវាំង ក្រសួងសាធារណៈការ និងដឹកជញ្ជូន ថ្នាក់ដឹកនាំមកពីក្រសួង ស្ថាប័ន ដែលជាសមាជិកគណៈកម្មាធិការរៀបចំដែនដី និងនគរូបនីយកម្មថ្នាក់ជាតិ រដ្ឋបាលខេត្ត មន្ទីរ និងអាជ្ញាធរមូលដ្ឋានពាក់ព័ន្ធ នាទីស្តីការក្រសួង។

បើតាមក្រសួងរៀបចំដែនដី នគរូបនីយកម្ម និងសំណង់ ផ្តើមចេញពីកិច្ចប្រជុំនាពេលនេះ ក្រសួងទាំងពីរ នឹងប្រែក្លាយទីប្រជុំជនទាំងអស់ ឱ្យទៅជាបុរីជនបទ ភូមិឋានក្សេមក្សាន្ត ទ្រនំសុភមង្គល ដោយមានការឯកភាពគ្នាធ្វើការរៀបចំប្លង់គោលនៃការប្រើប្រាស់ដី កំណត់តំបន់ពាណិជ្ជកម្ម តំបន់កសិកម្ម តំបន់ឧស្សាហកម្ម តំបន់សេដ្ឋកិច្ចពិសេស ការរៀបចំព្រំប្រទល់រដ្ឋបាលទូទាំងប្រទេស អាសយដ្ឋាន បង្គោលប្រតិភាគដែលជាខឿនសន្តិសុខជាតិ ការរៀបចំរបៀង និងប៉ូលសេដ្ឋកិច្ច ទៅតាមសក្តានុពលតំបន់នីមួយៗ ដោយប្រើប្រាស់អ្វីដែលមាន។

ម្យ៉ាងទៀត​ ក្រសួងទាំងពីរ ក៏នឹងរៀបចំលំហសាធារណៈ ដោះស្រាយសំណង់មិនរៀបរយ និងអគារចាស់ទ្រុឌទ្រោម ដែលទាំងនេះ គឺជាស្នូលនៃយុទ្ធសាស្រ្តបញ្ចកោណ ដំណាក់កាលទី ១ របស់រាជរដ្ឋាភិបាលកម្ពុជា ព្រមទាំងឆ្លើយតបទៅនឹងដំណើរដ៏ជាក់លាក់របស់សង្គម និងសេដ្ឋកិច្ចកម្ពុជា ធ្វើឱ្យប្រជាជនមានជីវិតកាន់តែប្រសើរឡើង និងដើម្បីកម្ពុជាអាចរស់ដោយខ្លួនឯង ប្រកបដោយភាពឯករាជ្យម្ចាស់ការ៕

អត្ថបទ៖ វីរៈ រូបភាព៖ ក្រសួងរៀបចំដែនដី

The post ក្រសួងពីរ ចាប់ផ្ដើមគិតគូរលើការងាររៀបចំដែនដី និងនគរូបនីយកម្ម ដែលជាការបើកទំព័រថ្មីសម្រាប់សង្គមជាតិ appeared first on Millions times.

តាមដានជាមួយយើង៖ Million Times

ដោយផ្អែកតាមការចុះត្រួតពិនិត្យ និងវាយតម្លៃគុណភាពសំណង់ ការវិភាគលើ​គុណភាព​និងសុវត្ថិភាព គ្រឿងផ្គុំសំណង់ និងលទ្ធផលនៃការពីសោធន៍លើសម្ភារៈ​សំណង់អគាររបស់មន្ទីរពិសោធន៍ជាតិសំណង់ បានពិនិត្យឃើញថា  សំណង់អាគារមានសភាចាស់ទ្រុឌទ្រោមខ្លាំង បាត់បង់តុល្យភាពលំនឹង អាចប្រឈមនិងការបាក់រលំជាយថាហេតុ ដោយមិនផ្តល់សញ្ញាជាមុន អាចបង្កគ្រោះថ្នាក់ដល់អាយុជីវិតទៀតផង។ ដូចនេះដើម្បីបញ្ចៀសគ្រោះថ្នាក់ដល់អាយុជិវិត ក្រសួងដែនដីបានចេញសេចក្តីជូនដំណឹង៖

១ ប្រជាពលរដ្ឋ ៤ គ្រួសារ ដែលកំពុងស្នាក់នៅ​ត្រូវបញ្ឈប់ការរស់នៅ និងត្រូវធ្វើការចាកចេញពីអគារនេះក្នុងរយៈពេល ១៥ ថ្ងៃ គិតចាប់ពីថ្ងៃជូនដំណឹងនេះតទៅ។ 

២ រដ្ឋបាលរាជធានីភ្នំពេញ ត្រូវចាត់វិធានការបន្ទាន់ជាអាទិ៍ ហ៊ុំព័ទ្ធ ហាមចូល និងហាមប្រើប្រាស់អគារនេះ ចាប់ពីថ្ងៃជូនដំណឹងនេះតទៅ។

៣ ក្រសួងនឹងសហការជាមួយរដ្ឋបាលរាជធានីភ្នំពេញ ដើម្បីវាយរំលំសំណង់អគារចាស់ទ្រុឌទ្រោមនេះ ក្រោយផុតពេលកំណត់នៃការចាកចេញរបស់គ្រួសារប្រជាពលរដ្ឋចុងក្រោយចំនួន ៤ គ្រួសារ ខាងលើ។

គួររំលឹកថា ​អគារ​សហកម្មសិទ្ធិ (អតីតសណ្ឋាគារអង្គរមានជ័យ) បានសាងសង់ឡើងអំឡុងឆ្នាំ១៩៥០ រហូតមកដល់បច្ចុប្បន្ននេះមានអាយុកាល ៧៥ឆ្នាំមកហើយ ដែលមានទំហំសរុប ៥៩០ម៉ែត្រការ៉េ មានកម្ពស់៦ជាន់ ស្មើនឹង ១០៧បន្ទប់ និងមានប្រជាពលរដ្ឋរស់នៅ សរុបចំនូន ៦៥គ្រួសារ៕

The post ក្រសួងដែនដីដាក់ឱសានវាទ១៥ថ្ងៃ ដល់អ្នករស់នៅអាគារសហកម្មសិទ្ធ ត្រូវបញ្ឈប់ការរស់នៅ ដើម្បីបញ្ចៀសគ្រោះថ្នាក់ជាយថាហេតុ appeared first on Millions times.

តាមដានជាមួយយើង៖ Million Times

រដ្ឋ​មន្ត្រី​ក្រសួង​ដែនដី នគរូបនីយកម្ម និង​សំណង់ បាន​លើក​ឡើង​រឿង​នេះ នៅ​​​ក្នុង​ពិធី​បិទ​សន្និបាត​សមាគម​អ្នក​វិនិយោគ អ្នក​សាងសង់ និង​ស្ថាបត្យករ​កម្ពុជា (សវសសក) និង​ការ​ចុះ​អនុស្សរណៈ និង​ជំនួប​ធុរកិច្ច កាលពី​ថ្ងៃ​១៧ ខែ​កុម្ភៈ ឆ្នាំ ២០២៥ នៅ​សណ្ឋាគារ ហ៉ីម៉ាវ៉ារី។

លោក សាយ សំអាល់ បាន​បញ្ជាក់​បន្ត​ទៀត​ថា «បើយើង ៣ ឬ៤នាក់ យើង​ជា​ដៃ​គូ​យុទ្ធសាស្ត្រ​គ្រប់​ជ្រុងជ្រោយ ជួយគ្នាទៅវិញទៅមក ហើយ​ជួយ Formulate policy (បង្កើត​គោល​នយោបាយ)។ ខ្ញុំ អនុវត្ត​គោល​នយោបាយ ​របស់​សម្ដេច​ធិបតី។ សម្ដេច​ធិបតី មានប្រសាសន៍ថា ឥឡូវ​ធ្វើ​ម៉េច​ឲ្យ​ប្រជាជន​ខ្មែរ​គ្រប់​រូប មាន​ផ្ទះ​សម្បែង​នៅ​ស្រួលបួល ជីវភាព​សមរម្យ។

រដ្ឋមន្ត្រី​ក្រសួង​រៀបចំ​ដែនដី នគរូបនីយកម្ម និង​សំណង់ អបអរសាទរ ដែលសមាគម​​ សវសសក បាន​ប្ដូរ​អនុស្សរណៈ​នៃ​ការ​យោគយល់​គ្នា ជាមួយ​សមាគម​អតីត​និស្សិត​ខ្មែរ​ផ្នែក​វិស្វកម្ម និង​ស្ថាបត្យកម្ម​ពី​ចិន, សមាគម​អតីត​និស្សិត​ខ្មែរ​មកពី​សិង្ហបុរី, សភា​មុខរបរ និង​មីក្រូ​សហគ្រាស​កម្ពុជា, សមាគម​អភិវឌ្ឍ​ឧស្សាហកម្ម​រ៉ូបូត​កម្ពុជា និង​សហគមន៍ INNEX។

គួរ​បញ្ជាក់​ផង​ដែរ​ថា អនុស្សរណៈ​នៃ​ការ​យោគយល់​គ្នា​ទាំង ៦ស្ថាប័ន ត្រូវ​បាន​បង្កើត​ឡើង​ក្នុង​គោលបំណង៖

– សហការ និង​គាំទ្រ​គ្នា​លើ​ការ​រៀបចំ​វគ្គ​បណ្ដុះបណ្ដាល សិក្ខាសាលា​អប់រំ កម្មវិធី​ពិព័រណ៍ ការ​ប្រកួតប្រជែង​ស្នាដៃ ការងារ​សង្គម មនុស្សធម៌ និង​សប្បុរសធម៌
– គាំទ្រ​គ្នា​លើ​ការ​ផ្សារភ្ជាប់​អ្នក​វិនិយោគ និង​អ្នក​អភិវឌ្ឍ​ទាំង​ក្នុង និង​ក្រៅ​ប្រទេស ដោយ​ធ្វើ​ការ​ជាមួយ​គ្នា
– ការ​ទទួល​សិស្ស​និស្សិត​ចុះ​កម្ម​សិក្សា​ផ្ទាល់​ដល់​រោងចក្រ សហគ្រាស ក្រុមហ៊ុន ព្រម​ទាំង​ផ្ដល់​ឱកាស​ហាត់​ការ និង​ការងារ
– ផ្ដល់​ឱកាស​អាជីវកម្ម និង​គម្រោង​ពាក់ព័ន្ធ​ឲ្យ​គ្នា​ទៅវិញទៅមក
– ជួយ​ប្រឹក្សា​យោបល់​គ្នា​ទៅវិញ​ទៅមក លើ​ជំនាញ​វិជ្ជាជីវៈ​របស់​សមាគម៕

អត្ថបទ៖ មេរ៉ា, រូបភាព៖ ក្រសួងរៀបចំដែនដី នគរូបនីយកម្ម និងសំណង់ និង cpp

The post លោក សាយ សំអាល់ អំពាវនាវអ្នកអភិវឌ្ឍន៍លំនៅឋាន អនុវត្តតាមថ្នាក់ដឹកនាំ ធ្វើឲ្យប្រជាជនខ្មែរមានផ្ទះរស់នៅសមរម្យ appeared first on Millions times.

សេចក្តីប្រកាសព័ត៌មានក្រសួងការបរទេស និងសហប្រតិបត្តិការអន្តរជាតិ បានឲ្យដឹងថា ឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេសកម្ពុជា និងលោក UENO Atsushi ឯកអគ្គរាជទូតជប៉ុនប្រចាំកម្ពុជា នឹងចុះហត្ថលេខាលើលិខិតប្តូរសារ និងឯកសារពាក់ព័ន្ធ ស្តីពីការផ្តល់ហិរញ្ញប្បទានឥតសំណងរបស់ជប៉ុន ដែលមានទឹកប្រាក់ចំនួន ១,០០២ លានយ៉េន សម្រាប់អនុវត្តគម្រោង «កម្មវិធីអភិវឌ្ឍន៍សេដ្ឋកិច្ច និងសង្គម» គឺ គម្រោងលើវិស័យនគរូបនីយកម្ម នៅថ្ងៃទី២៦ ខែធ្នូ ឆ្នាំ២០២៤។

ក្រសួងការបរទេសបញ្ជាក់ថា ហិរញ្ញប្បទានឥតសំណងនេះ គូសបញ្ជាក់ពីការគាំទ្រឥតងាករេរបស់ជប៉ុន ចំពោះកិច្ចខិតខំ ប្រឹងប្រែងរបស់រាជរដ្ឋាភិបាលកម្ពុជា ដើម្បីលើកកម្ពស់ការអភិវឌ្ឍសេដ្ឋកិច្ច-សង្គម។ ក្រសួងបន្តថា ជំនួយនេះក៏នឹងរួមចំណែកក្នុងការពង្រឹង និងធ្វើឱ្យកាន់តែស៊ីជម្រៅបន្ថែមទៀត នូវភាពជាដៃគូយុទ្ធសាស្ត្រគ្រប់ ជ្រុងជ្រោយរវាងប្រទេសទាំងពីរ។

គួរឲ្យដឹងដែរថា ការអភិវឌ្ឍនគរូបនីយកម្ម គឺផ្តោតទៅលើការអភិវឌ្ឍអចនទ្រព្យ និងការអភិវឌ្ឍសំណង់លំនៅឋាន ពាណិជ្ជកម្ម សេវាកម្ម ឧស្សាហកម្ម ហេដ្ឋារចនាសម្ព័ន្ធរូបវ័ន្ធ និងបរិស្ថានទីក្រុង ដែលកំពុងមានកំណើននៅក្នុងប្រទេសកម្ពុជា។ កាលពីដើមខែធ្នូក្នុងឆ្នាំនេះ ក្រសួងរៀបចំដែនដី នគរូបនីយកម្ម និងសំណង់កម្ពុជា និងក្រសួងដីធ្លី ហេដ្ឋារចនាសម្ព័ន្ធ ដឹកជញ្ជូន និងទេសចរណ៍ជប៉ុន រួមគ្នាបង្កើតវេទិការដ្ឋ-ឯកជន កម្ពុជា ជប៉ុន លើកទី៥ ស្តីពីការអភិវឌ្ឍនគរូបនីយកម្ម ក្រោមប្រធានបទ “ទីក្រុងឆ្លាតប្រកបដោយសុខដុមរមនា” ដែលមានក្រសួង ស្ថាប័ន និងវិស័យឯកសរុបចំនួន ៦០០នាក់។

ក្នុងវេទិកាបានពិភាក្សា និងចែករំលែកចំណេះដឹង បទពិសោធន៍ អំពីការរៀបចំដែនដី នគរូបនីយកម្ម សំណង់ លំនៅឋាន ការអភិវឌ្ឍទីក្រុង និងការអភិវឌ្ឍអចលនទ្រព្យ ដោយផ្តោតលើ ប្រធានបទ “ទីក្រុងឆ្លាតប្រកបដោយសុខដុមរមនា”។ តាមរយៈវេទិកានេះ អ្នកចូលរួមមកពីវិស័យ ឯកជន និងអ្នកជំនាញវិជ្ជាជីវៈនៃប្រទេសទាំងពីរ នឹងមានឱកាសបន្ថែមទៀតសម្រាប់ជំនួបធុរៈកិច្ច ដើម្បីពិភាក្សាជំរុញការវិនិយោគនៅកម្ពុជា ជាពិសេសការជំរុញឱកាស ធុរៈកិច្ច និងវិនិយោគពីប្រទេសជប៉ុនមក ប្រទេសកម្ពុជាលើការអភិវឌ្ឍន គរូបនីយកម្ម ដោយផ្តោតលើការអភិវឌ្ឍទីក្រុងឆ្លាតនិងការអភិវឌ្ឍ អចលនទ្រព្យ៕

អត្ថបទ៖ សាងតេជៈ រូបភាព៖ បណ្តាញសង្គម

The post ជប៉ុនផ្តល់កញ្ចប់លុយឥតសំណង ៧.២លានដុល្លារឲ្យកម្ពុជាអភិវឌ្ឍន៍វិស័យនគរូបនីយកម្ម appeared first on Millions times.

តាមដានជាមួយយើង៖ Million Times

ក្រសួងរៀបចំដែនដី នគរូបនីយកម្ម និងសំណង់ បាន​រៀបចំកិច្ចប្រជុំនេះ ដើម្បី​បាន​ជួប​ពិគ្រោះ​ពិភាក្សា​ការងារ​សំខាន់​ៗ​ទាក់ទង​វិស័យ​អលចនទ្រព្យនៅ​កម្ពុជា ហើយ​ពាក់ព័ន្ធ​ជា​ស្ថាប័ន​ហិរញ្ញវត្ថុ។ វត្តមាន​​នៅ​ក្នុង​កិច្ច​ប្រជុំ​នោះដូចជា អ្នកតំណាង​ធនាគារ​ជាតិ​នៃ​កម្ពុជា, ធនាគារ​អេស៊ីលីដា, ABA, PPCB, J Trust, RHB, First Commercial Bank, FTB, Agri-Bank, SBI LY HOUR Bank, និង​ប្រធាន​សមាគម​អ្នក​អភិវឌ្ឍន៍​លំនៅ​ឋាន​កម្ពុជា ក្នុង​គោល​បំណង​ស្វែង​រក​ការ​ឯកភាព​លើ​គោលការណ៍​មួយ​ចំនួន ដើម្បី​ដោះស្រាយ​បញ្ហា​ប្រឈម​នៃ​វិស័យ​លំនៅ​ឋាន និង​អចលន​ទ្រព្យ ដែល​កំពុង​មាន ជា​ពិសេស​ជួយ​សម្រួល​បន្ទុក​ហិរញ្ញវត្ថុ ដែល​ជា​កាតព្វកិច្ច​ក្នុង​ការ​ទិញ-លក់​លំនៅ​ឋាន របស់​បងប្អូន​ប្រជាពលរដ្ឋ។

ជា​លទ្ធផល តំណាង​ធនាគារ និង​ស្ថាប័ន​ហិរញ្ញវត្ថុ​ ដែល​បាន​ចូលរួម​ក្នុង​កិច្ច​ពិភាក្សា បាន​គាំទ្រ​លើ​គោលការណ៍ និង​ឯកភាព​ដូច​ប៉ុន្មាន​ចំណុច​ខាងក្រោម៖

១. គាំទ្រ​គំនិត​ផ្ដួចផ្ដើម ក្នុង​ការ​បន្ធូរបន្ថយ​ការ​ប្រាក់​លើ​កម្ចី សម្រាប់​ការ​អភិវឌ្ឍ​លំនៅ​ឋាន និង​ទិញ​អចលនទ្រព្យ មក​ត្រឹម ៨% ក្នុង​មួយ​ឆ្នាំ ដែល​អត្រា​ការ​ប្រាក់​ថ្មី​នេះ នឹង​ផ្ដល់​ឲ្យ​អតិថិជន ទិញ​លំនៅ​ឋាន​នូវ​លទ្ធភាព​អនុវត្ត​កាតព្វកិច្ច​សង​ត្រឡប់ កាន់តែ​មាន​ភាព​ងាយស្រួល ដែល​នឹង​ផ្ដល់​ឲ្យ​អតិថិជន​ក៏​ដូចជា ស្ថាប័ន​ហិរញ្ញវត្ថុ បន្ត​ដំណើរ​ការ​ទូទាត់​កាន់តែ​មាន​សុវត្ថិភាព និង​ងាយ​ស្រួល។

២. កម្ចី​ដែល​មាន​ការ​ប្រាក់​ទាប​លើ​វិស័យ​អចលនទ្រព្យ នឹង​កាត់​បន្ថយ​វិវាទ​ដែល​កើត​ឡើង ដោយសារ អតិថិជន​គ្មាន​លទ្ធភាព​បំពេញ​កាតព្វកិច្ច ហើយ​ការ​អនុវត្ត​គោលការណ៍ នឹង​ឈាន​ទៅ​បញ្ចប់​វិវាទ​បុរី ក៏​ដូច​ជា​ការ​បើក​ទំព័រ​ថ្មី សម្រាប់​ការ​ងើប​ឡើង​វិស័យ​អចលនទ្រព្យ និង​ការ​ទិញ​លក់​លំនៅ​ឋាន។

៣. ភាគី​ទាំងអស់​បាន​ឯកភាព​ថា នឹង​បន្ត​ជួប​ពិភាក្សា​លម្អិត​លើ​គោលការណ៍​នេះ នៅ​ក្នុង​កិច្ច​ប្រជុំ​របស់​ក្នុង​ក្របខ័ណ្ឌ​ក្រុម​ការងារ​ផ្នែក​សំណង់ និង​អចលនទ្រព្យ “ឌ” វេទិកា​រាជរដ្ឋាភិបាល-ផ្នែក​ឯកជន នា​ពេល​ខាង​មុខ ហើយ​ចំពោះ​គ្រឹះស្ថាន​ហិរញ្ញវត្ថុ​ណា​ដែល​មាន​លទ្ធភាព​អនុវត្ត​បាន នឹង​ចាប់ផ្ដើម​អនុវត្ត​គោលការណ៍​ថ្មី​នេះ​ជា​បណ្ដើរ​ៗ។

កិច្ច​ប្រជុំ​ពិគ្រោះ​យោបល់​នេះ មាន​សារសំខាន់​ក្នុង​ការ​កំណត់​យន្តការ សម្រួល​ដល់​ដំណើរការ និង​សុវត្ថិភាព របស់​ឧស្សាហកម្ម​អចលនទ្រព្យ ដែល​ជា​ប្រភព​ផ្ដល់​ឱកាស​ការងារ និង​កម្រៃ​ជូន​ប្រជាជន​បាន​ច្រើន ពិសេស​សម្របសម្រួល​រក​ដំណោះស្រាយ​ជាក់ស្ដែង សម្រាប់​ប្រជាជន​មាន​លំនៅឋាន​សមរម្យ ជីវភាព​ល្អ​ប្រសើរ បន្ត​រក្សា​បរិយាកាស​គ្មាន​វិវាទ​នៅ​ក្នុង​សង្គម ធានា​ដល់​ដំណើរ​ការ​ឧស្សាហកម្ម​អចលនទ្រព្យ, ឧស្សាហកម្ម​ប្រាក់កម្ចី, និង​ឧស្សាហកម្ម​ធនាគារ និង​ហិរញ្ញវត្ថុ នៅ​ប្រទេស​កម្ពុជា ជា​រួម៕

អត្ថបទ៖ មេរ៉ា, រូបភាព៖ ក្រសួងរៀបចំដែនដី នគរូបនីយកម្ម និងសំណង់

The post ក្រសួងរៀបចំដែនដី នគរូបនីយកម្ម និងសំណង់ ជួបប្រជុំជាមួយធនាគារធំៗក្នុងស្រុក ហើយសម្រេចឯកភាព ៣ ចំណុច appeared first on Millions times.