ក្រសួងកសិកម្ម រុក្ខាប្រមាញ់ និងនេសាទ Archives - Millions times

អ្នកនាំពាក្យក្រសួងកសិកម្មបញ្ជាក់តម្លៃជ្រូករស់រង្វង់ ១ម៉ឺនរៀល/១គីឡូ គឺជាថ្លៃសមរម្យ

Vin Chang — Tue, 25 Mar 2025 09:56:37 +0000

អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ លោក ឃឹម ហ្វីណង់ បានបញ្ជាក់ថាតម្លៃជ្រូករស់រង្វង់ ១ម៉ឺនរៀល ក្នុង១ គីឡូក្រាម គឺជាតម្លៃសមរម្យ មិនប៉ះពាល់ដល់ប្រាក់ចំណេញអ្នកផ្គត់ផ្គង់សាច់ជ្រូក ឬអ្នកបរិភោគឡើយ។ នេះដោយសារតែមានការស្នើសុំឲ្យក្រសួងជួយអន្តរាគមន៍រឿងជ្រូករស់ឡើងថ្លៃខ្ពស់។

តាមដានជាមួយយើង៖ Million Times

លោក ឃឹម ហ្វីណង់ បានលើកឡើងបញ្ហានេះ ក្រោយពីសង្កេតឃើញថា បច្ចុប្បន្ននេះថ្លៃជ្រូករស់ មានការកើនឡើងប្រសើរជាងមុន សម្រាប់កសិករអ្នកចិញ្ចឹម។ តែតម្លៃនេះមិនទាន់ប៉ះពាល់ដល់ប្រាក់ចំណេញរបស់អ្នកផ្គត់ផ្គង់សាច់ជ្រូក ឬអ្នកបរិភោគនៅឡើយទេ ខណៈក្រសួងកសិកម្មសង្កេតយ៉ាងយកចិត្តទុកដាក់ ចំពោះស្ថានភាពកសិផលសំខាន់ៗ រួមទាំងថ្លៃសត្វជ្រូករស់ និងទីផ្សារផ្គត់ផ្គង់សាច់ជ្រូកនេះផងដែរ។

អនុរដ្ឋលេខាធិការ និងជាអ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ បានបង្ហោះលើបណ្ដាញសង្គមហ្វេសប៊ុកខ្លួននាថ្ងៃ ២៥ ខែមីនា ឆ្នាំ ២០២៥ នេះថា “ដោយសង្កេតឃើញមានការជជែកវែកញែក ពីបញ្ហាថ្លៃជ្រូករស់ និងថ្លៃសាច់ជ្រូក ខ្ញុំសូមបញ្ជាក់ថា ក្រសួងកសិកម្មតែងតែតាមដានយ៉ាងយកចិត្តទុកដាក់ ចំពោះស្ថានភាពកសិផលសំខាន់ៗ រួមទាំងថ្លៃសត្វជ្រូករស់ និងទីផ្សារផ្គត់ផ្គង់សាច់ជ្រូកនេះផងដែរ។ បច្ចុប្បន្ននេះ ថ្លៃជ្រូករស់មានការកើនឡើងប្រសើរជាងមុន សម្រាប់កសិករអ្នកចិញ្ចឹម តែថ្លៃនេះមិនទាន់ប៉ះពាល់ដល់ប្រាក់ចំណេញរបស់អ្នកផ្គត់ផ្គង់សាច់ជ្រូក ឬអ្នកបរិភោគនៅឡើយទេ។ ថ្លៃជ្រូករស់ក្នុងរង្វង់១ ម៉ឺនរៀល គឺជាថ្លៃសមរម្យ ហើយអ្នកផ្គត់ផ្គង់សាច់ជ្រូក ក៏ធ្លាប់បានទទួលប្រាក់ចំណេញច្រើន ក្នុងអំឡុងពេលដែលថ្លៃជ្រូករស់ថយចុះ ដោយសារមានការចិញ្ចឹមច្រើន។ ក្នុងករណីថ្លៃជ្រូករស់កើនខ្ពស់លើសពីធម្មតា ក្រសួងនឹងចាត់វិធានការឆ្លើយតបជាក់លាក់ ដូចដែលធ្លាប់បានអនុវត្តលើករណីថ្លៃជ្រូករស់ធ្លាក់ចុះផងដែរ។ កន្លងមក យើងបានធ្វើកិច្ចការជាច្រើនពាក់ព័ន្ធនឹងការពង្រឹងខ្សែច្រវាក់តម្លៃ និងជួយសម្របសម្រួលផែនការផលិតកម្មឱ្យសមស្របទៅនឹងតម្រូវការទីផ្សារ។ ខណៈដែលអ្នកផលិតចង់បានថ្លៃខ្ពស់ ហើយអ្នកបរិភោគចង់បានថ្លៃទាប មានតែការរក្សាស្ថេរភាពថ្លៃកសិផលប៉ុណ្ណោះ ដែលអាចការពារផលប្រយោជន៍របស់គ្រប់ភាគីពាក់ព័ន្ធទាំងអស់ និងធានាបាននូវនិរន្តរភាពនៃប្រព័ន្ធស្បៀងអាហាររបស់កម្ពុជា“។

គួរបញ្ជាក់ថា ពីក្រុមអាជីវករលក់សាច់ជ្រូកមួយចំនួន ក្នុងរាជធានីភ្នំពេញបង្ហាញក្តីកង្វល់ ការបន្តឡើងថ្លៃជ្រូករស់ដល់ ១១ ២០០ រ ក្នុង១គីឡូក្រាម ជាពិសេស ការលក់តម្លៃផ្តាច់មុខរបស់ក្រុមហ៊ុនចិញ្ចឹមមកពីក្រៅប្រទេស៕

អត្ថបទ៖ មេរ៉ា, រូបភាព៖ ឃឹម ហ្វីណង់

The post អ្នកនាំពាក្យក្រសួងកសិកម្មបញ្ជាក់តម្លៃជ្រូករស់រង្វង់ ១ម៉ឺនរៀល/១គីឡូ គឺជាថ្លៃសមរម្យ appeared first on Millions times.

ប្រវត្តិសាស្រ្តកម្ពុជាហើយ ដែលមានស្ត្រីធ្វើជាប្រធានមន្ទីរកសិកម្ម នៅខេត្តកោះកុង

Vin Chang — Wed, 11 Dec 2024 09:55:20 +0000

ប្រធានមន្ទីរកសិកម្ម រុក្ខាប្រមាញ់ និងនេសាទខេត្តកោះកុងថ្មី លោកស្រី អែម សុធារ៉ា ត្រូវបានចូលរួមប្រកាសតែងតាំងដោយផ្ទាល់ពីលោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ។

តាមដានជាមួយយើង៖ Million Times

កាលពីព្រឹកថ្ងៃ ១០ ខែធ្នូ ឆ្នាំ ២០២៤ កន្លង ទៅរដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ លោក ឌិត ទីណា បានអញ្ជើញចូលរួមផ្ទាល់ក្នុងពិធីប្រកាសចូលកាន់មុខតំណែងលោកស្រី អែម សុធារ៉ា ប្រធានមន្ទីរកសិកម្ម រុក្ខាប្រមាញ់ និងនេសាទខេត្តកោះកុង នៅក្នុងសាលមហោស្រពខេត្តកោះកុង។

លោក ឌិត ទីណា សម្ដែងក្ដីសោមនស្សរីករាយ និងអបអរសាទរដល់លោកស្រីប្រធានមន្ទីរថ្មី ដែលកាន់តំណែងជាប្រធានមន្ទីរកសិកម្ម រុក្ខាប្រមាញ់ និងនេសាទ ព្រោះជាប្រវត្តិសាស្ត្រកម្ពុជាហើយ ដែលមានស្ត្រីកាន់មុខតំណែងនេះ។

រដ្ឋមន្ត្រីរូបនោះ ក៏បានលើកឡើងពីគោលនយោបាយរបស់រាជរដ្ឋាភិបាលអាណត្តិទី៧ ដឹកនាំដោយសម្ដេច ហ៊ុន ម៉ាណែត នាយករដ្ឋមន្រ្តីកម្ពុជា ក្នុងការរក្សាស្ថេរភាពថ្លៃកសិផល សម្រាប់ប្រជាកសិករ និងអ្នកប្រើប្រាស់។ ដោយពិនិត្យច្បាស់លាស់ពីតម្រូវការ និងការផ្គត់ផ្គង់ ការដាក់ពង្រាយមន្ត្រីកសិកម្មឃុំ ដែលជាជំនួយការតាមដានបច្ចេកទេសរបស់កសិករ ហើយរាយការណ៍បញ្ហាប្រឈមទាន់ពេលវេលា រួមទាំងការកសាងសហគមន៍កសិកម្មទំនើប ដែលមានភាពទំនើបកម្មការងារ អាចជួយកសិករកាត់បន្ថយថ្លៃដើមផលិត ក្នុងនោះរួមមានផែនការផលិតកម្មច្បាស់លាស់ ទទួលបានកម្ចីដើមទុនការប្រាក់ទាប អាចផ្គត់ផ្គង់ទៅតាមតម្រូវការទីផ្សារ ដោយមានការគាំទ្របច្ចេកទេសពីក្រសួងកសិកម្ម វិនិយោគទទួលបានប្រាក់ចំនេញ និងមានហានិភ័យទាបនៃការប្រែប្រួលអាកាសធាតុ៕

អត្ថបទ៖ មេរ៉ា, រូបភាព៖ ក្រសួងកសិកម្ម រុក្ខាប្រមាញ់ និងនេសាទ

The post ប្រវត្តិសាស្រ្តកម្ពុជាហើយ ដែលមានស្ត្រីធ្វើជាប្រធានមន្ទីរកសិកម្ម នៅខេត្តកោះកុង appeared first on Millions times.

ដាក់សម្ពោធមជ្ឈមណ្ឌលអភិវឌ្ឍន៍ការវេចខ្ចប់កម្ពុជា ដើម្បីការប្រកួតប្រជែងវិស័យម្ហូបអាហារកាន់តែរីកចម្រើន

Vin Chang — Mon, 09 Dec 2024 10:08:08 +0000

នាថ្ងៃនេះមានការដាក់សម្ពោធមជ្ឈមណ្ឌលអភិវឌ្ឍន៍ការវេចខ្ចប់កម្ពុជា (CPC) ឲ្យប្រើប្រាស់ជាផ្លូវការ ក្រោមវត្តមានលោក ចាន់ សុវុឌ្ឍ រដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ។

តាមដានជាមួយយើង៖ Million Times

លោក ចាន់ សុវុឌ្ឍ បានឲ្យដឹងថាការដាក់សម្ពោធមជ្ឈមណ្ឌលអភិវឌ្ឍន៍ការវេចខ្ចប់ នាឲ្យដំណើរការ ដើម្បីបង្កើនភាពប្រកួតប្រជែង និងនិរន្តរភាពនៃឧស្សាហកម្មម្ហូបអាហារនៅកម្ពុជា។ CPC ត្រូវបានសម្ពោធដាក់ឲ្យប្រើប្រាស់ជាផ្លូវការ ដែលនេះជាសមិទ្ធផលនៃថ្នាលស្រាវជ្រាវ នវានុវត្តន៍ និងបច្ចេកវិទ្យាម្ហូបអាហារ (FTRIP) បង្កើតឡើងដោយគម្រោងអភិវឌ្ឍន៍ជលផលក្រោយប្រមូលផល (CAPFISH-Capture) ក្រោមការគាំទ្រថវិកាពីសហភាពអឺរ៉ុប (EU)។

ការវេចខ្ចប់បែបនវានុវត្តន៍ គឺមានសារៈសំខាន់ខ្លាំង ដើម្បីឆ្លើយតបទៅនឹងបញ្ហាប្រឈមសំខាន់ៗដែលក្រុមហ៊ុន សហគ្រាសកែច្នៃម្ហូបអាហារនៅក្នុងវិស័យឯកជនកំពុងជួបប្រទះ រួមមានកាកសំណល់ម្ហូបអាហារ និងការបាត់បង់ក្នុងដំណើរការកែច្នៃ ព្រមជ ជាមួយបញ្ហាប្រឈមនៃការប្រែប្រួលអាកាសធាតុជាដើម។ ការវាយតម្លៃជាផ្លូវការលើទិដ្ឋភាពរួមនៃការវេចខ្ចប់ក្នុងវិស័យកសិពាណិជ្ជកម្ម និងម្ហូបអាហារ បានគូសបញ្ជាក់យ៉ាងច្បាស់ពីបញ្ហាប្រឈមទាំងនេះ និងកំណើនតម្រូវការដំណោះស្រាយនៃការវេចខ្ចប់ ប្រកបដោយប្រសិទ្ធភាព។

មុខងារសំខាន់ៗរបស់មជ្ឈមណ្ឌលរួមមាន ការស្រាវជ្រាវ និងអភិវឌ្ឍន៍ដោយផ្ដល់ដំណោះស្រាយទំនើបៗ បានសមស្របទៅតាមតម្រូវការរបស់សហគ្រាសក្នុងស្រុក និងការបណ្ដុះបណ្ដាលកសាងសមត្ថភាព ដើម្បីបំពាក់បំប៉នជំនាញចាំបាច់ សម្រាប់ការវេចខ្ចប់ផលិតផលម្ហូបអាហារប្រកបដោយប្រសិទ្ធភាព និងនិរន្តរភាព។

មជ្ឈមណ្ឌលអភិវឌ្ឍន៍ការវេចខ្ចប់កម្ពុជា ដំណើរការដោយសាកលវិទ្យាល័យភូមិន្ទកសិកម្ម។ វាមិនត្រឹមតែដើរតួនាទីជាមជ្ឈមណ្ឌលបណ្ដុំ សម្រាប់អាជីវកម្មប៉ុណ្ណោះទេ ថែមទាំងជាវេទិកាសម្រាប់ឲ្យសិស្ស និស្សិត និងអ្នកស្រាវជ្រាវ រៀនសូត្រ ដកពិសោធន៍ និងផ្សារភ្ជាប់រវាងគម្លាតចំណេះដឹងទ្រឹស្តី និងការអនុវត្តជាក់ស្ដែង៕

អត្ថបទ៖ មេរ៉ា,រូបភាព៖ ក្រសួងកសិកម្ម រុក្ខាប្រមាញ់ និងនេសាទ

The post ដាក់សម្ពោធមជ្ឈមណ្ឌលអភិវឌ្ឍន៍ការវេចខ្ចប់កម្ពុជា ដើម្បីការប្រកួតប្រជែងវិស័យម្ហូបអាហារកាន់តែរីកចម្រើន appeared first on Millions times.

ក្រសួងកសិកម្ម រុក្ខា​ប្រមាញ់ និង​នេសាទ Archives - Millions times

អ្នកនាំពាក្យក្រសួងកសិកម្មបញ្ជាក់តម្លៃជ្រូករស់រង្វង់ ១ម៉ឺនរៀល/១គីឡូ គឺជាថ្លៃសមរម្យ

ប្រវត្តិសាស្រ្តកម្ពុជាហើយ ដែលមានស្ត្រីធ្វើជាប្រធានមន្ទីរកសិកម្ម នៅខេត្តកោះកុង

ដាក់សម្ពោធមជ្ឈមណ្ឌលអភិវឌ្ឍន៍ការវេចខ្ចប់កម្ពុជា ដើម្បីការប្រកួតប្រជែងវិស័យម្ហូបអាហារកាន់តែរីកចម្រើន

ក្រសួងកសិកម្ម រុក្ខាប្រមាញ់ និងនេសាទ Archives - Millions times