ក្រសួងកសិកម្ម រុក្ខាប្រមាញ់ និងនេសាទ Archives - Millions times

ជីកសិកម្មផលិតក្នុងស្រុក ជួយកាត់បន្ថយចំណាយលើការនាំចូលជាង ១៧ លានដុល្លារ

Vin Chang — Thu, 19 Mar 2026 07:24:17 +0000

ក្រុមហ៊ុនផលិតជីកសិកម្មក្នុងស្រុក បានចូលរួមចំណែកយ៉ាងសំខាន់ក្នុងការកាត់បន្ថយលើចំណាយ នៃការនាំចូលជីកសិកម្មពីក្រៅប្រទេសបានប្រមាណជាង ១៧ លានដុល្លារនៅឆ្នាំ ២០២៥។

តាមដានជាមួយយើង៖ Million Times

បច្ចុប្បន្ន កម្ពុជាមានក្រុមហ៊ុនផលិតជីកសិកម្មលក្ខណៈសិប្បកម្មខ្នាតតូច ២៥ ក្រុមហ៊ុន ដែលមានសមត្ថភាពផលិតជីសរីរាង្គបានសរុបរហូតដល់ ១៨ ម៉ឺនតោនក្នុងមួយឆ្នាំ។

ដោយឡែក កាលពីឆ្នាំ ២០២៥ ក្រុមហ៊ុនផលិតជីតាមការបញ្ជាទិញរបស់កសិករក្នុងស្រុកសរុប ៧០ ០០០តោន មានតម្លៃប្រមាណជា ១៧.៥ លានដុល្លារ ដែលភាគច្រើនជាជីសរីរាង្គ។ ការផលិតជីកសិកម្មក្នុងស្រុកនេះ បានរួមចំណែកសំខាន់ក្នុងការកាត់បន្ថយចំណាយ លើការនាំចូលជីកសិកម្មពីក្រៅប្រទេសបានមួយចំណែក ហើយបង្កើនការប្រកួតប្រជែងក្នុងស្រុកផងដែរ។

សូមបញ្ជាក់ថា ក្រុមហ៊ុនផលិតជីកសិកម្មខ្នាតតូចខាងលើ ភាគច្រើនមានលក្ខណៈជាសិប្បកម្មផលិតជីសរីរាង្គ និងពាក់កណ្ដាលសរីរាង្គ ដោយមិនរាប់បញ្ចូលក្រុមហ៊ុនខ្នាតមធ្យម និងធំ ដូចជាក្រុមហ៊ុន ម៉ុង ឬទ្ធី និងក្រុមហ៊ុន វីរៈ ប៊ុនថំា នៅឡើយ។

គួររំលឹកថា ការប្រើប្រាស់ជីសរីរាង្គធ្វើឲ្យដំណាំកសិកម្មមានការរីកលូតលាស់យឺតជាងការប្រើប្រាស់ជីគីមី ប៉ុន្តែជីសរីរាង្គផ្ដល់អត្ថប្រយោជន៍ច្រើនដល់កសិករ រួមមានការកែប្រែគុណភាពដី កែប្រែគុណភាពផលិតផលកសិកម្ម និងជួយដល់សុខភាពមនុស្សដែលជាអ្នកទទួលទានទៀតផង៕

អត្ថបទ៖ ឆដា, រូបភាព៖ អ៊ីនធឺណិត

The post ជីកសិកម្មផលិតក្នុងស្រុក ជួយកាត់បន្ថយចំណាយលើការនាំចូលជាង ១៧ លានដុល្លារ appeared first on Millions times.

លោក ឌិត ទីណា រដ្ឋមន្ត្រីក្រសួងកសិកម្ម ដឹកនាំផលិតអន្ទង់ខកំប៉ុង និងត្រីរៀលខកំប៉ុង

Vin Chang — Fri, 16 Jan 2026 07:20:23 +0000

ថ្មីៗនេះ លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានផ្ដួចផ្ដើមគំនិត និងដឹកនាំផលិតជាអន្ទង់ខកំប៉ុង និងត្រីរៀលខ្មែរខកំប៉ុង ចេញជារូបរាង។

តាមដានជាមួយយើង៖ Million Times

លោក ឌិត ទីណា មើលឃើញថា ខណៈដែលត្រីខកំប៉ុងភាគច្រើនជាប្រភេទត្រីសមុទ្រ រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ក៏បានផ្ដួចផ្ដើមផលិតត្រីខកំប៉ុង ពីប្រភេទត្រីរៀលខ្មែរដែលជាត្រីទឹកសាប ហើយបានស្រាវជ្រាវ និងផលិតដោយនាយកដ្ឋានកសិឧស្សាហកម្ម។

ចំណែក អន្ទង់ខកំប៉ុង ផលិតដោយនាយកដ្ឋានបច្ចេកវិទ្យាកែច្នៃ និងគុណភាពនៃរដ្ឋបាលជលផល។ ជាធម្មតារដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ តែងយកចិត្តទុកដាក់លើសកម្មភាពណា ដែលលេចចេញជារូបភាពពិតៗ ជាជាងទ្រឹស្ដី។

រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក ឌិត ទីណា ជ្រើសរើសសកម្មភាពពិត បម្រើផលប្រយោជន៍ពិត ព្រោះថាការកែច្នៃចេញពីផលិតផលដែលខ្មែរមានស្រាប់ នឹងជួយដល់ជីវភាពប្រជាពលរដ្ឋ។

លទ្ធផលនេះ គ្រាន់ជាចំណែកតូចមួយ នៃសកម្មភាពដែលរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បាននិងកំពុងព្យាយាមជំរុញកសិកម្មកម្ពុជា ឲ្យទៅជារូបភាព មានហូប មានប្រើ មានបាន និងមានរហូត៕

អត្ថបទ៖ ឆដា, រូបភាព៖ Kong Visal

The post លោក ឌិត ទីណា រដ្ឋមន្ត្រីក្រសួងកសិកម្ម ដឹកនាំផលិតអន្ទង់ខកំប៉ុង និងត្រីរៀលខកំប៉ុង appeared first on Millions times.

ក្រសួងកសិកម្មកំពុងជំរុញការតភ្ជាប់ទីផ្សារអង្ករថ្មីពីកម្ពុជា ទៅកាន់ហ្វីលីពីន

Vin Chang — Thu, 04 Dec 2025 07:15:01 +0000

រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក ឌិត ទីណា បានឲ្យដឹងថា ក្រសួងកសិកម្មកំពុងជំរុញការតភ្ជាប់ទីផ្សារអង្ករថ្មីពីកម្ពុជា ទៅកាន់ប្រទេសហ្វីលីពីន។

តាមដានជាមួយយើង៖ Million Times

កាលពីថ្ងៃ៣ ខែធ្នូ ឆ្នាំ ២០២៥ លោក ឌិត ទីណា បានជួបពិភាក្សាការងារជាមួយគណៈប្រតិភូក្រុមហ៊ុនហ្វីលីពីន ដឹកនាំដោយលោក Joseph Rudolf Lo ប្រធាន និងជានាយកប្រតិបត្តិក្រុមហ៊ុន Food Terminal Incorporated ក្នុងគោលបំណងពិនិត្យលទ្ធភាពនៃការបញ្ជាទិញអង្ករដោយផ្ទាល់ពីកម្ពុជា ដើម្បីផ្គត់ផ្គង់ដល់ទីផ្សារប្រទេសហ្វីលីពីន ដែលជាការបើកច្រកទីផ្សារស្រូវបន្ថែមទៀតជូនដល់បងប្អូនកសិករកម្ពុជា។

រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានឲ្យដឹងថា ក្នុងគោលបំណងពិនិត្យលទ្ធភាពនៃការបញ្ជាទិញអង្ករដោយផ្ទាល់ពីកម្ពុជា ដើម្បីផ្គត់ផ្គង់ដល់ទីផ្សារប្រទេសហ្វីលីពីន ដែលជាការបើកច្រកទីផ្សារស្រូវបន្ថែមទៀត ជូនដល់បងប្អូនកសិករខ្មែរ។

ដើម្បីធ្វើឲ្យកិច្ចការនេះកាន់តែមានប្រសិទ្ធភាព ក្រសួងកសិកម្មបានសម្របសម្រួលឲ្យមានជំនួបដោយផ្ទាល់រវាងគណៈប្រតិភូក្រុមហ៊ុនហ្វីលីពីន និងសហព័ន្ធស្រូវអង្ករកម្ពុជា ដើម្បីចរចាលម្អិតអំពីលទ្ធភាពនៃការនាំចេញ និងជំរុញការបញ្ជាទិញនេះអាចកើតឡើងក្នុងពេលឆាប់ៗ។

ការតភ្ជាប់ទំនាក់ទំនងកសិពាណិជ្ជកម្មថ្មីនេះ នឹងផ្ដល់ផលប្រយោជន៍ទៅវិញទៅមក សម្រាប់ប្រទេសទាំងពីរ។ ភាគីហ្វីលីពីននឹងទទួលបានប្រភពផ្គត់ផ្គង់អង្ករដែលមានគុណភាពខ្ពស់ ខណៈកម្ពុជានឹងទទួលបានទីផ្សារអន្តរជាតិថ្មីមួយទៀត។

លោក ឌិត ទីណា បានបន្ថែមទៀតថា ការបើកទីផ្សារអង្ករថ្មីនេះ ក៏នឹងជួយឲ្យរោងម៉ាស៊ីនកិនស្រូវដៃគូរបស់ក្រសួងកសិកម្មមានលទ្ធភាពក្នុងការប្រមូលទិញស្រូវពីប្រជាកសិករខ្មែរបានកាន់តែច្រើន និងទូលំទូលាយជាងមុន៕

អត្ថបទ៖ ឆដា, រូបភាព៖ ឌិត ទីណា – DITH Tina

The post ក្រសួងកសិកម្មកំពុងជំរុញការតភ្ជាប់ទីផ្សារអង្ករថ្មីពីកម្ពុជា ទៅកាន់ហ្វីលីពីន appeared first on Millions times.

ក្រុមហ៊ុនវិរៈប៊ុនថាំប្រកាសទិញស្រូវពីកសិករ ៣ ម៉ឺនតោន ក្នុងតម្លៃមួយគីឡូ ៩៥០ រៀល

Vin Chang — Mon, 03 Nov 2025 06:21:17 +0000

បន្ទាប់ពីមានការអំពាវនាវដល់ក្រុមហ៊ុននានានៅក្នុងស្រុកជួយដល់កសិករខ្មែរ ក្នុងការជួយទិញស្រូវ ក៏ទទួលបានការគាំទ្រ ដោយមិនថាអ្នកជំនួញទាំងនៅក្នុងអនឡាញ និងបណ្ដាលក្រុមហ៊ុនធំៗដទៃប្រមូលទិញស្រូវដោយផ្ទាល់។

តាមដានជាមួយយើង៖ Million Times

ក្នុងនោះក្រុមហ៊ុនវិរៈប៊ុនថាំ របស់អ្នកឧកញ៉ា សួរ វីរៈ ចុះប្រកាសទិញស្រូវពីកសិករ ៣ ម៉ឺនតោន ដោយឲ្យតម្លៃខ្ពស់ ៩៥០៛ ក្នុងមួយគីឡូក្រាម។ ក្រុមហ៊ុនវីរ:ប៊ុនថាំ ជាក្រុមហ៊ុនដំបូងបំផុតដែលហ៊ានទិញស្រូវពីកសិករតម្លៃជិត ១ ពាន់រៀល ព្រោះចង់ជួយដល់ប្រជាកសិករខ្មែរ។

នៅព្រឹកថ្ងៃ ៣ ខែវិច្ឆិកា ឆ្នាំ ២០២៥ អ្នកឧកញ៉ា សួរ វីរៈ អគ្គនាយកក្រុមហ៊ុន វិរៈប៊ុនថាំ អេចប្រេស បានប្រកាសដំណឹងទិញស្រូវ ៣ ម៉ឺនតោន លើបណ្ដាញសង្គម។ អ្នកឧកញ៉ារូបនេះ បានសរសេររៀបរាប់ថា “ក្រុមហ៊ុនវីរ:ប៊ុនថាំ ជាក្រុមហ៊ុនដំបូងបំផុតដែលហ៊ានទិញស្រូវពីកសិកររតំលៃ ៩៥០៛ ចំនួន ៣០,០០០តោន ព្រោះចង់ជួយកសិករ”។

បញ្ហានេះដែរ កាលពីថ្ងៃ ២ ខែវិច្ឆិកា ឆ្នាំ២០២៥ រដ្ឋមន្ត្រីក្រសួងកសិកម្ម ក្រសួងកសិកម្ម រុក្ខាប្រមាញ់ និងនេសាទ បានប្រកាសដាក់ចេញនូវវិធានការ ដើម្បីជួយដោះស្រាយបញ្ហាប្រឈមថ្លៃស្រូវដល់កសិករខ្មែរ។

វិធានការទាំងនោះរួមមាន រោងម៉ាស៊ីនជួយទិញស្រូវពីកសិករក្នុងតម្លៃសមរម្យ, ម្ចាស់ដេប៉ូជីថ្នាំជួយពន្យារការទូទាត់សងជំពាក់, ម្ចាស់ដីជួយកាត់បន្ថយថ្លៃឈ្នួលដី, អ្នកហូបជួយទិញអង្ករ និងគាំទ្រដល់រោងម៉ាស៊ីនដៃគូដែលបានទិញស្រូវពីកសិករ និងសហគមន៍៕

អត្ថបទ៖ ឆដា, រូបភាព៖ Neak Oknha Vireak Suo និង ក្រសួងកសិកម្ម រុក្ខាប្រមាញ់ និងនេសាទ

The post ក្រុមហ៊ុនវិរៈប៊ុនថាំប្រកាសទិញស្រូវពីកសិករ ៣ ម៉ឺនតោន ក្នុងតម្លៃមួយគីឡូ ៩៥០ រៀល appeared first on Millions times.

កសិករចិញ្ចឹមជ្រូក ៣៨គ្រួសារ ទទួលបានជំនួយថវិកាជាង ៣ម៉ឺនដុល្លារ សម្រាប់គាំទ្រជាទុនបដិភាគ

Virak វីរៈ — Sun, 12 Oct 2025 11:58:37 +0000

កសិករអ្នកចិញ្ចឹមជ្រូកចំនួន ៣៨គ្រួសារ មកពីសហគមន៍កសិកម្មចំណារលើរីកចម្រើន ស្រុកស្ទោង ខេត្តកំពង់ធំ បានទទួលជំនួយឥតសំណងចំនួននូវថវិកា ៣២ ៥០០ដុល្លារ តាមរយៈ គម្រោងពិពិធកម្មកសិកម្មកម្ពុជា(CASDP) នៃក្រសួងកសិកម្ម រុក្ខាប្រមាញ់ និងនេសាទ។

តាមដានជាមួយយើង៖ Million Times

ជំនួយនេះ គឺសម្រាប់គាំទ្រជាទុនបដិភាគ ដល់ការទិញឧបករណ៍សម្ភារៈផលិតកម្មកូនជ្រូក និងជ្រូកសាច់ ដូចជា៖ សម្ភារៈសាងសង់ទ្រុងជ្រូក ម៉ាស៊ីនវ៉ៃកន្ទក់ ម៉ូទ័រហាន់ដើមចេក ម៉ូទ័របូមទឹក សម្ភារៈដាក់ចំណីជ្រូក និងមេ-បាជ្រូក។ នេះបើតាមការឱ្យដឹងពីឯកឧត្តម ឃឹម ហ្វីណង់ អនុរដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ នៅថ្ងៃទី ១២ ខែតុលានេះ។

ឯកឧត្តម ឃឹម ហ្វីណង់ ឱ្យដឹងបន្តថា តាមរយៈផែនការពង្រឹងសមត្ថភាពផលិតកម្ម និងបង្កើនប្រសិទ្ធភាពសេដ្ឋកិច្ច ដែលគាំទ្រដោយគម្រោង CASDP សហគមន៍ដែលមានសមាជិកភាគច្រើនជាស្ត្រីនេះ គ្រោងនឹងផលិតកូនជ្រូកយ៉ាងតិច ២ ០០០ក្បាល និងជ្រូកសាច់ជិត ៧ ០០០ ក្បាល ក្នុងរយៈពេល ៣ឆ្នាំខាងមុខ។

មន្ត្រីជាន់ខ្ពស់ក្រសួងកសិកម្ម បានបន្ថែមថា សហគមន៍ខាងលើនេះ ក៏គ្រោងនឹងប្រែក្លាយខ្លួនទៅជាសហគមន៍កសិកម្មទំនើបក្នុងពេលអនាគត ដោយសិក្សាពិនិត្យលទ្ធភាពទិញធាតុចូលរួមគ្នា ផលិតពូជកូនជ្រូករួមគ្នា ដើម្បីផ្គត់ផ្គង់ដល់សមាជិកយកទៅចិញ្ចឹម និងចុះកិច្ចសន្យាតភ្ជាប់ទីផ្សារទុកជាមុន ផងដែរ។

លោក សុខ សុថា ប្រធានសមាគមសហព័ន្ធកសិករកម្ពុជានៃអ្នកផលិតកសិកម្ម មានប្រសាសន៍ប្រាប់ Million Times ដោយរំលឹកថា កន្លងមកសមាគមរបស់លោក ក៏ធ្លាប់បានធ្វើការងារជាមួយកសិករអ្នកចិញ្ចឹមជ្រូកមួយចំនួនដែរ ដោយជួយបណ្ដុះបណ្ដាលលើបច្ចេកទេសចិញ្ចឹមជ្រូក និងការរៀបចំទ្រុង ក៏ដូចជាបានជួយលើការផ្ដល់ទុនបង្វិលជូនពួកគាត់ ដែរ។

ប្រធានសមាគមរូបនេះ កត់សម្គាល់ឃើញថា កសិករអ្នកចិញ្ចឹមជ្រូក បានយកចិត្តទុកដាក់ជាងមុនទៅលើការចិញ្ចឹម បើប្រៀបធៀបនឹង ២០ឆ្នាំមុន ដោយបច្ចុប្បន្នពួកគាត់ចប់ការចិញ្ចឹមមួយវគ្គបន្តទៅមួយវគ្គទៀត ដែលជាលក្ខណៈវិលជុំ។ ចំពោះការផ្ដល់ជំនួយដល់កសិករអ្នកចិញ្ចឹមជ្រូក តាមរយៈតាមរយៈគម្រោងពិពិធកម្មកសិកម្មកម្ពុជា(CASDP) គឺអាចជួយបង្កើនការចិញ្ចឹមជ្រូកកាន់តែច្រើន ហើយក៏នឹងធ្វើឱ្យមានអ្នកចិញ្ចឹមកាន់តែច្រើនដែរ។

លោក សុខ សុថា បន្ថែមថា «បើមានការគាំទ្រជាជំនួយឧបត្ថម្ភពីគម្រោង ឬក៏រាជរដ្ឋាភិបាលបន្ថែមទៀត គឺកាន់តែមានលំនឹង និងនិរន្តភាព ក្នុងការចិញ្ចឹមសម្រាប់ផ្គត់ផ្គង់ទីផ្សារ ហើយជាចំណូលរបស់កសិករ សម្រាប់ប្រចាំឆ្នាំ»។

យ៉ាងណាក៏ដោយ អ្នកជំនាញកសិកម្មរូបនេះ លើកឡើងថា ក្រសួង-ស្ថាប័នពាក់ព័ន្ធ ត្រូវយកចិត្តទុកដាក់ពីបញ្ហាទីផ្សារ ដោយធ្វើយ៉ាងណាឱ្យមានទីផ្សារវិលជុំតាមការចិញ្ចឹមពេញមួយឆ្នាំ ដែលនេះជាការលើកទឹកចិត្តដ៏ធំមួយសម្រាប់ប្រជាកសិករ៕

អត្ថបទ៖ វីរៈ រូបភាព៖ ឯកឧត្តម ឃឹម ហ្វីណង់

The post កសិករចិញ្ចឹមជ្រូក ៣៨គ្រួសារ ទទួលបានជំនួយថវិកាជាង ៣ម៉ឺនដុល្លារ សម្រាប់គាំទ្រជាទុនបដិភាគ appeared first on Millions times.

កម្ពុជានឹងនាំចេញស្វាយទៅចិន តាមរយៈរថភ្លើងល្បឿនលឿនឆ្លងកាត់ប្រទេសឡាវ

sovanmoly tep — Mon, 05 May 2025 08:17:57 +0000

ដំណើរទស្សនកិច្ចផ្លូវការរបស់រដ្ឋមន្ត្រីក្រសួងកសិកម្មរុក្ខប្រម៉ាញ់ និងនេសាទ លោក ឌិត ទីណា ទៅកាន់ប្រទេសឡាវកាលពីថ្ងៃ ៣០ ខែមេសា ដល់ថ្ងៃ៣ ខែឧសភា កន្លងទៅ បានពិភាក្សាលើកិច្ចសហប្រតិបត្តការ ក្រោមក្របខ័ណ្ឌអនុស្សរណៈនៃការយោគយល់គ្នា (MOU) ដែលភាគីកម្ពុជា និងឡាវ បានចុះហត្ថលេខា កាលពីថ្ងៃទី ៤ ខែធ្នូ ឆ្នាំ២០២៤ កន្លងទៅ។

តាមដានជាមួយយើង៖ Million Times

ជាលទ្ធផលនៃកិច្ចប្រជុំនេះ ភាគីទាំង២ បានឯកភាពគ្នាជំរុញកិច្ចសហប្រតិបត្តការលើការងារអទិភាពចំនួន ៣ សំខាន់ៗ ដូចជា៖

ទី១ កិច្ចសហប្រតិបត្តការលើធាតុចូលកសិកម្ម ជាពិសេសធាតុផ្សំនៃជីកសិកម្ម ដោយផ្តោតសំខាន់លើ លើ ជីប៉ូតាស(Potash -based fertilizer )។

ទី២ ជំរុញកសិពាណិជ្ជកម្មរវាងប្រទេសទាំង២ ដោយផ្តោតលើការនាំចេញផលិតផលស្វាយទៅប្រទេសចិន ឬប្រទេសទី៣ តាមរយះការប្រើប្រាស់ ប្រព័ន្ធផ្លូវដែក និងរថភ្លើងល្បឿនលឿនឆ្លងកាតប្រទេសឡាវ ដើម្បីបើកទីផ្សារថ្មី សម្រាប់ផលិតផលកសិកម្មរបស់កម្ពុជា ។

ទី៣ ពង្រឹងកិច្ចសហប្រតិបត្តិការផ្សេងៗ លើឆាកអន្តរជាតិ ក្នងវិស័យកសិកម្មដើម្បីផលប្រយោជន៍រួមនៃប្រទេសទាំង២ ។

ក្នុងកិច្ចប្រជុំនោះ រដ្ឋមន្ត្រីក្រសួងកសិកម្មរុក្ខប្រម៉ាញ់ និងនេសាទ បានផ្តល់គោលការណ៍ឲ្យក្រសួងកសិកម្មឡាវ បន្តពង្រឹងកិច្ចសហប្រតិបត្តិការជាមួយក្រសួងកសិកម្មកម្ពុជាបន្ថែមទៀត៕

អត្ថបទ ៖ មោលី, រូបភាព៖ ក្រសួងកសិកម្ម រុក្ខាប្រមាញ់ និងនេសាទ

The post កម្ពុជានឹងនាំចេញស្វាយទៅចិន តាមរយៈរថភ្លើងល្បឿនលឿនឆ្លងកាត់ប្រទេសឡាវ appeared first on Millions times.

ជប៉ុនចាប់អារម្មណ៍វិនិយោគកែច្នៃខ្នុរ ទៅជាទឹកស៊ីរ៉ូ និងការធ្វើវារីវប្បកម្មត្រីទីឡាព្យា

Vin Chang — Fri, 04 Apr 2025 08:58:39 +0000

រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ លោក ប្រាក់ ដាវីដ បានទទួលជួបពិភាក្សាជាមួយលោកTakahashi Fumiaki ប្រធានសមាគមជប៉ុន-កម្ពុជា នៅទីស្ដីការក្រសួងកសិកម្ម រុក្ខាប្រមាញ់ និងនេសាទ ដើម្បីពង្រឹងកិច្ចសហប្រតិបត្តិការទ្វេភាគីលើវិស័យកសិកម្មរវាងប្រទេសទាំងពីរ។

តាមដានជាមួយយើង៖ Million Times

លោក ប្រាក់ ដាវីដ បានទទួលស្វាគមន៍ លោកTakahashi Fumiaki ព្រមទាំងគណៈប្រតិភូជប៉ុន ក្នុងការពង្រឹងកិច្ចសហប្រតិបត្តិការទ្វេភាគីលើវិស័យកសិកម្មរវាងប្រទេសទាំង ២ ឲ្យកាន់តែរឹងមាំ និងពិភាក្សាពីការងារគម្រោងវិនិយោគលើការកែច្នៃជាច្រើន។

ជំនួបពិភាក្សារវាងលោក ប្រាក់ ដាវីដ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ រួមជាមួយលោក តាកាហាស៊ី ហ្វូមីអាគី (Takahashi Fumiaki) ប្រធានសមាគមជប៉ុន-កម្ពុជា ធ្វើឡើងកាលពីព្រឹកថ្ងៃ១ ខែមេសា ឆ្នាំ២០២៥ កន្លងទៅ ផ្ដោតទៅលើគម្រោងវិនិយោគការកែច្នៃគ្រឿងសម្អាង, កែច្នៃខ្នុរទៅជាទឹកស៊ីរ៉ូ និងការធ្វើវារីវប្បកម្មត្រីទីឡាព្យា សំដៅជំរុញការកែច្នៃក្នុងស្រុក ហើយនាំចេញទៅកាន់ទីផ្សារអន្តរជាតិ។

រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ កម្ពុជាបានបញ្ជាក់ថាកម្ពុជាមានកសិផលសក្ដានុពលជាច្រើនដូចជា អង្ករប្រណិត ម្រេច ស្ករត្នោត និងស្វាយចន្ទី មានគុណភាពខ្ពស់ រសជាតិឆ្ងាញ់ ដែលភាគីជប៉ុនអាចពិចារណាក្នុងការវិនិយោគកែច្នៃជាមួយនឹងតម្លៃបន្ថែមខ្ពស់ ហើយក្រសួងនឹងជួយគាំទ្រផ្នែកបច្ចេកទេស ប្រការសំខាន់ត្រូវចេះបង្កើតស្លាកយីហោល្អ និងមានការធ្វើទីផ្សារត្រឹមត្រូវ។

ការប្រជុំបញ្ចប់ទៅដោយលទ្ធផលល្អ ដោយភាគីទាំងពីរបានឯកភាពពង្រឹងកិច្ចសហប្រតិបត្តិការរួមគ្នាលើវិស័យកសិកម្ម៕

អត្ថបទ៖ មេរ៉ា, រូបភាព៖ ក្រសួងកសិកម្ម រុក្ខាប្រមាញ់ និងនេសាទ

The post ជប៉ុនចាប់អារម្មណ៍វិនិយោគកែច្នៃខ្នុរ ទៅជាទឹកស៊ីរ៉ូ និងការធ្វើវារីវប្បកម្មត្រីទីឡាព្យា appeared first on Millions times.

រដ្ឋមន្ត្រីក្រសួងកសិកម្មហ្វីលីពីនថា មានតម្រូវការផលិតផលកសិកម្មជាច្រើនពីកម្ពុជា

Vin Chang — Wed, 12 Feb 2025 04:48:00 +0000

លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានជួបពិភាក្សាទ្វេភាគីលើវិស័យកសិកម្ម ជាមួយរដ្ឋមន្ត្រីក្រសួងកសិកម្មនៃសាធារណរដ្ឋហ្វីលីពីនលោក Francisco P.Tiu Laurel Jr. ដើម្បីអាចពង្រឹងកិច្ចសហប្រតិបត្តិការជាមួយគ្នាកាន់តែរឹងមាំបន្ថែមទៀត។

តាមដានជាមួយយើង៖ Million Times

កាលពីថ្ងៃ១០ ខែកុម្ភៈ ឆ្នាំ ២០២៥ លោក ឌិត ទីណា បានដឹកនាំគណៈប្រតិភូក្រសួងកសិកម្ម រុក្ខាប្រមាញ់ និងនេសាទ ដើម្បីសម្ដែងការគួរសម និងកិច្ចជំនួបទ្វេភាគីលើវិស័យកសិកម្ម ជាមួយ Francisco P.Tiu Laurel Jr. រដ្ឋមន្ត្រីក្រសួងកសិកម្មសាធារណរដ្ឋហ្វីលីពីន នៅក្រសួងកសិកម្ម នៃសាធារណរដ្ឋហ្វីលីពីនផ្ទាល់។

ក្នុងជំនួបថ្នាក់ដឹកនាំកំពូលនៃក្រសួងកសិកម្ម រុក្ខាប្រមាញ់ និងនេសាទទាំង២ បានគូសបញ្ជាក់ថា ការធ្វើកសិពាណិជ្ជកម្មរវាងប្រទេសកម្ពុជា និងហ្វីលីពីន ធ្វើឡើងក្នុងគោលបំណងបំពេញតម្រូវការឲ្យគ្នាទៅវិញទៅមក មិនមែនជាការប្រកួតប្រជែងគ្នានោះទេ។ មួយវិញទៀត គឺដើម្បីប្រទេសទាំង២ អាចពង្រឹងកិច្ចសហប្រតិបត្តិការជាមួយគ្នាកាន់តែរឹងមាំបន្ថែមទៀត ជំរុញការរីកចម្រើនក្នុងវិស័យកសិកម្ម សំដៅចូលរួមចំណែកលើកកម្ពស់សេដ្ឋកិច្ច និងការអភិវឌ្ឍឲ្យមានចីរភាព។

លោក Francisco P.Tiu Laurel Jr. មានប្រសាសន៍ថាហ្វីលីពីន មានតម្រូវការលើផលិតផលកសិកម្មជាច្រើនពីកម្ពុជា ដើម្បីឆ្លើយតបទៅនឹងតម្រូវការកំណើនប្រជាជនហ្វីលីពីន ដែលកើនជាង ១០ លាននាក់ក្នុងមួយឆ្នាំ។ ហ្វីលីពីនមានតម្រូវការដូចជាអង្ករ សាច់ជ្រូក សាច់គោ មាន់ ត្រី និងបន្លែផ្លែឈើជាច្រើនប្រភេទ។

រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទហ្វីលីពីន បានបន្តទៀតថា លើសពីនេះខាងហ្វីលីពីនក៏នឹងពិនិត្យមើលលើលទ្ធភាពក្នុងការវិនិយោគលើរោងម៉ាស៊ីនកិនស្រូវ និងការធ្វើវារីវប្បកម្មផងដែរ។ លោករដ្ឋមន្ត្រីបានបន្ថែមឲ្យដឹងទៀតថា ក្រសួងកសិកម្មហ្វីលីពីន បានទទួលសិទ្ធិក្នុងការនាំចូលអង្ករ និងម្ហូបអាហារ ដោយប្រើកញ្ចប់ថវិកា ១០០ លានដុល្លារ។

ក្រោយស្ដាប់លោក Francisco P.Tiu Laurel Jr. ថ្លែងរួច រដ្ឋមន្ត្រី ឌិត ទីណា ក៏បានអញ្ជើញរដ្ឋមន្ត្រី និងគណៈប្រតិភូក្រសួងកសិកម្មហ្វីលីពីន មកទស្សនកិច្ចនៅកម្ពុជា ដើម្បីពិនិត្យពីសក្ដានុពលនៃផលិតផលកសិកម្មកម្ពុជា និងពិភាក្សាលម្អិតថែមទៀតរវាងវិស័យឯកជននៃប្រទេសទាំង២។

គោលបំណងនៃកិច្ចជំនួបរវាងប្រទេសទាំង២ ដើម្បីជំរុញកិច្ចសហប្រតិបត្តិការទ្វេភាគីក្នុងវិស័យកសិកម្ម ដោយផ្ដោតលើចំណុចសំខាន់ ២ រួមមានការធានាសន្តិសុខស្បៀង និងការធ្វើកសិពាណិជ្ជកម្មនៃប្រទេសទាំង២។ រដ្ឋមន្ត្រីកសិកម្មនៃប្រទេសទាំង២ ក៏ បានចុះហត្ថលេខាលើអនុស្សរណៈការយោគយល់គ្នា ស្ដីពីកិច្ចសហប្រតិបត្តិការលើវិស័យកសិកម្ម និងកសិពាណិជ្ជកម្ម រវាងរាជរដ្ឋាភិបាលកម្ពុជា និងរដ្ឋាភិបាលសាធារណរដ្ឋហ្វីលីពីនផងដែរ៕

អត្ថបទ៖ មេរ៉ា, រូបភាព៖ ក្រសួងកសិកម្ម រុក្ខាប្រមាញ់ និងនេសាទ

The post រដ្ឋមន្ត្រីក្រសួងកសិកម្មហ្វីលីពីនថា មានតម្រូវការផលិតផលកសិកម្មជាច្រើនពីកម្ពុជា appeared first on Millions times.

ស្រូវស្រែកសិករ ៤ពាន់ហិកតានៅស្រុកបាទីមានក្តីសង្ឃឹមរស់ឡើងវិញ ក្រោយបិទផ្លូវអស់មួយព្រឹក

Vin Chang — Tue, 21 Jan 2025 14:26:43 +0000

ក្រោយបិទផ្លូវជាតិលេខ២ អស់មួយព្រឹកធំនៅថ្ងៃអង្គារ ទី២១ ខែមករានេះ ដែលស្រែកដង្ហើយហៅអាជ្ញាធរអន្តរាគមន៍ជួយដោះស្រាយបញ្ហាខ្វះខាតទឹកសម្រាប់ស្រោចស្រពស្រូវរដូវប្រាំង ក្នុងឃុំកណ្ដឹង ស្រុកបាទី ខេត្តតាកែវ ឥឡូវបញ្ហាប្រឈមទាំងនោះមានក្តីសង្ឃឹមវិញហើយ ក្រោយរដ្ឋមន្រ្តី ២ក្រសួង និងគណៈកម្មាធិការជាតិគ្រប់គ្រងគ្រោះមហន្តរាយចុះជួបផ្ទាល់ភ្លាមៗ។

លោក គន់ គីម អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ លោក ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម និងលោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានជួបជាមួយប្រជាកសិករដោយផ្ទាល់ នៅទីតាំងដែលជួបប្រទះបញ្ហាខ្វះខាតទឹកសម្រាប់ស្រោចស្រពស្រូវរដូវប្រាំង។

តាមដានជាមួយយើង៖ Million Times

លោក ឃឹម ហ្វីណង់ អ្នកនាំពាក្យក្រសួងកសិកម្មរុក្ខាប្រមាញ់ និងនេសាទ បានឲ្យដឹងថា ករណីខ្វះខាតទឹកបង្កបង្កើនផលនៅឃុំកណ្តឹង ស្រុកបាទី ខេត្តតាកែវ ដែលបណ្តាលមកពីការធ្វើស្រែប្រាំងលើសពីសមត្ថភាពផ្គត់ផ្គង់ទឹកនិងការជួសជុលប្រឡាយ ត្រូវបានដោះស្រាយបញ្ចប់ដោយទេសរដ្ឋមន្ត្រី គន់ គីម, រដ្ឋមន្ត្រីក្រសួងកសិកម្ម និងរដ្ឋមន្ត្រីក្រសួងធនធានទឹក។

លោកលើកឡើងថា ក្រោមការសម្របសម្រួលពីសំណាក់លោក គន់ គីម ក្រសួងធនធានទឹកបានសម្រេចប្រើប្រាស់ប្រេងដើម្បីបូមយកទឹកពីទន្លេបាទីដាក់ចូលទៅក្នុងប្រឡាុ ដើម្បីជួយអន្តរាគមន៍សង្គ្រោះស្រូវប្រាំង និងដោះស្រាយបញ្ហាប្រឈមចំពោះមុខជូនដល់បងប្អូនកសិករ។

បើតាមក្រសួងធនធានទឹក ក្នុងផែនការឆ្នាំ២០២៥ នៅស្រុកបាទី ការបង្កបង្កើនផលស្រូវរដូវប្រាំងមានចំនួន ២ពាន់ហិកតា ក៏ប៉ុន្តែប្រជាពលរដ្ឋបានធ្វើស្រែប្រាំងរហូតដល់ ៤ពាន់ហិកតា ក្នុងពេលដែលប្រភពទឹកជាក់ស្តែងនៅក្នុងមូលដ្ឋានមិនមានគ្រប់គ្រាន់សម្រាប់បម្រើឱ្យការងារបង្កបង្កើនផល ហើយប្រព័ន្ធស្ទឹងព្រែកត្នោតនៅផ្នែកខាងលើតំបន់រលាំងជ្រៃ និងប្រព័ន្ធប្រឡាយបញ្ជូនទឹកចូលអាងទន្លេបាទីបានបិទជាបណ្តោះអាសន្នដើម្បីធ្វើការជួសជុល បណ្តាលឱ្យស្រូវប្រាំងប្រជាពលរដ្ឋប្រឈមមុខនឹងបញ្ហាខ្វះខាតទឹកស្រោចស្រព។

ជាដំណោះស្រាយ មន្ទីរធនធានទឹកខេត្តតាកែវ បានអន្តរាគមន៍បូមទឹកពីទន្លេបាទីតាមស្ថានីយទី២២ និងទី២៣ បញ្ចូលក្នុងប្រឡាយមេហនុមាន ដើម្បីសង្គ្រោះស្រូវប្រាំងប្រមាណ ៤ពាន់ហិកតារបស់ប្រជាកសិករចំនួន ៣៥០០គ្រួសារ ក្នុងឃុំក្រាំងធ្នង់ ឃុំពត់សរ ឃុំកណ្តឹង ឃុំចំប៉ី ឃុំត្រពាំងសាប ឃុំចំបក់ ឃុំដូង ឃុំពារាម និងឃុំត្នោត ស្រុកបាទី ខេត្តតាកែវ។

ជាមួយគ្នានេះ ក្រសួងធនធានទឹករៀបចំបូមទឹកពីស្ទឹងព្រែកត្នោតបញ្ជូនតាមប្រឡាយ ៧៨ ចូលក្នុងអាងទឹកទន្លេបាទី ហើយបញ្ជូនបន្តតាមប្រឡាយមេហនុមាន ដើម្បីទៅស្រោចស្រពផ្ទៃដីស្រូវប្រាំងដែលកំពុងប្រឈមនឹងការខ្វះខាតទឹក៕

អត្ថបទ៖ សាងតេជៈ រូបភាព៖ ក្រសួងធនធានទឹក

The post ស្រូវស្រែកសិករ ៤ពាន់ហិកតានៅស្រុកបាទីមានក្តីសង្ឃឹមរស់ឡើងវិញ ក្រោយបិទផ្លូវអស់មួយព្រឹក appeared first on Millions times.

អត្ថប្រយោជន៍នៃការប្រើប្រាស់ «ពូជស្រូវយុទ្ធសាស្ត្ររបស់កម្ពុជា» ល្អទាំងកសិករ និងជួយដល់សេដ្ឋកិច្ចជាតិ

Vin Chang — Sat, 18 Jan 2025 05:30:12 +0000

បញ្ហាទីផ្សារស្រូវកម្ពុជានៅតែសំខាន់សម្រាប់ប្រជាកសិករ ពិសេសបញ្ហាតម្លៃស្រូវ OM ដែលមានការធ្លាក់ថ្លៃខ្លាំងឆ្នាំនេះ។ ក្រសួងកសិកម្មក៏បានលើកឡើងពីចំណាត់ការ ដោះស្រាយការធ្លាក់ថ្លៃស្រូវ OM និងវិធានការផ្សេងៗ សម្រាប់ជួយដល់កសិករខ្មែរជាបន្តបន្ទាប់ ហើយមួយក្នុងចំណោមយុទ្ធសាស្រ្តជាច្រើន ខាងក្រសួងបានជំរុញឲ្យកសិករងាកមកដាំពូជស្រូវសែនក្រអូបវិញ ដែលមាន តម្លៃខ្ពស់ដល់ទៅ ១៣០០៛/គីឡូក្រាម។

តាមដានជាមួយយើង៖ Million Times

ក្នុងនោះអ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ លោក ឃឹម ហ្វីណង់ បានធ្វើការងារយ៉ាងសកម្ម ដើម្បីពន្យល់ និងណែនាំពីអត្ថប្រយោជន៍នៃការប្រើប្រាស់ «ពូជស្រូវយុទ្ធសាស្ត្ររបស់កម្ពុជា» មានផលល្អដល់ទាំងកសិករ ហើយក៏ជួយដល់សេដ្ឋកិច្ចជាតិថែមទៀតផង។

ក្នុងវីដេអួលោក ឃឹម ហ្វីណង់ បានរៀបរាប់ពីអត្ថប្រយោជន៍ «ពូជស្រូវយុទ្ធសាស្ត្ររបស់កម្ពុជា» មិនថាសែនក្រអូប ឬផ្ការំដួលឡើយ។ លោកបញ្ជាក់ថា គោលការណ៍របស់ក្រសូងកសិកម្ម រុក្ខាប្រមាញ់ និងនេសាទតែងលើកទឹកចិត្តឲ្យកសិករប្រើប្រាស់ពូជរបស់ខ្មែរ។ ព្រោះអាចកែច្នៃជាអង្ករអាចនាំចេញបាន ដែលធ្វើឲ្យមានតម្លៃបន្ថែមខ្ពស់ជាង ហើយបើប្រើពូជរបស់គេ ភាគច្រើននាំចេញជាស្រូវ និងសើមទៀត ហើយមិនអាចនាំចេញអង្ករពូជរបស់គេទេ។

ចំណុចមួយទៀត បើកសិករប្រើប្រាស់ពូជក្នុងស្រុកមានបញ្ហា រដ្ឋអាចមានអន្ទរាគមន៍បានច្រើន ព្រោះមានគោលនយោបាយគាំទ្រ (បើសិនមានបញ្ហារដ្ឋទម្លាក់កញ្ចប់ថវិការឲ្យខាងរោងម៉ាស៊ីន)។ មិនតែប៉ុណ្ណោះនៅមានរឿងជាច្រើនទៀតដូចខាងក្រោម៖

- មានស្ថេរភាពថ្លៃ

- មានការធានាពីទីផ្សារក្នុងស្រុក

- មានបណ្តាញពូជសុទ្ធ

- បង្កើនតម្លៃបន្ថែមដល់សេដ្ឋកិច្ចជាតិ

- ជួយធានាសន្តិសុខស្បៀង

- ជាមោទនភាពជាតិ

- ប្រើពូជខ្មែរ មានគោលនយោបាយគាំទ្រ និងអាចជួយអន្តរាគមន៍បានក្នុងករណីចាំបាច់៕

អត្ថបទ៖ មេរ៉ា,រូបភាព៖ Khim Finan

The post អត្ថប្រយោជន៍នៃការប្រើប្រាស់ «ពូជស្រូវយុទ្ធសាស្ត្ររបស់កម្ពុជា» ល្អទាំងកសិករ និងជួយដល់សេដ្ឋកិច្ចជាតិ appeared first on Millions times.

ក្រសួងកសិកម្ម រុក្ខាប្រមាញ់ និងនេសាទ Archives - Millions times

ជីកសិកម្មផលិតក្នុងស្រុក ជួយកាត់បន្ថយចំណាយលើការនាំចូលជាង ១៧ លាន​ដុល្លារ

លោក ឌិត ទីណា រដ្ឋមន្ត្រី​ក្រសួង​កសិកម្ម ដឹកនាំផលិតអន្ទង់ខកំប៉ុង និងត្រីរៀលខកំប៉ុង

ក្រសួងកសិកម្មកំពុងជំរុញការតភ្ជាប់ទីផ្សារអង្ករថ្មីពីកម្ពុជា ទៅកាន់​ហ្វីលីពីន

ក្រុមហ៊ុនវិរៈប៊ុនថាំប្រកាសទិញស្រូវពីកសិករ ៣ ម៉ឺនតោន ក្នុងតម្លៃមួយគីឡូ ៩៥០ រៀល

កសិករចិញ្ចឹមជ្រូក ៣៨គ្រួសារ ទទួលបានជំនួយថវិកាជាង ៣ម៉ឺនដុល្លារ សម្រាប់គាំទ្រជាទុនបដិភាគ

កម្ពុជានឹងនាំចេញស្វាយទៅចិន តាមរយៈរថភ្លើងល្បឿន​លឿនឆ្លងកាត់ប្រទេសឡាវ

ជប៉ុនចាប់អារម្មណ៍វិនិយោគកែច្នៃខ្នុរ ទៅជាទឹកស៊ីរ៉ូ និងការធ្វើវារីវប្បកម្មត្រីទីឡាព្យា

រដ្ឋមន្ត្រីក្រសួងកសិកម្មហ្វីលីពីនថា មានតម្រូវការផលិតផលកសិកម្មជាច្រើនពីកម្ពុជា

ស្រូវស្រែកសិករ ៤ពាន់ហិកតានៅស្រុកបាទីមានក្តីសង្ឃឹមរស់ឡើងវិញ ក្រោយបិទផ្លូវអស់មួយព្រឹក

អត្ថប្រយោជន៍នៃការប្រើប្រាស់ «ពូជស្រូវយុទ្ធសាស្ត្ររបស់កម្ពុជា» ល្អទាំងកសិករ និងជួយដល់សេដ្ឋកិច្ចជាតិ

ជីកសិកម្មផលិតក្នុងស្រុក ជួយកាត់បន្ថយចំណាយលើការនាំចូលជាង ១៧ លានដុល្លារ

លោក ឌិត ទីណា រដ្ឋមន្ត្រីក្រសួងកសិកម្ម ដឹកនាំផលិតអន្ទង់ខកំប៉ុង និងត្រីរៀលខកំប៉ុង

ក្រសួងកសិកម្មកំពុងជំរុញការតភ្ជាប់ទីផ្សារអង្ករថ្មីពីកម្ពុជា ទៅកាន់ហ្វីលីពីន

កម្ពុជានឹងនាំចេញស្វាយទៅចិន តាមរយៈរថភ្លើងល្បឿនលឿនឆ្លងកាត់ប្រទេសឡាវ