កំពង់ផែក្រុងព្រះសីហនុ Archives - Millions times

ក្រសួង អំពាវនាវពលរដ្ឋកាន់កាប់សំណង់មិនរៀបរយ ក្នុងគម្រោងអភិវឌ្ឍន៍កំពង់ផែក្រុងព្រះសីហនុ ចូលរួមសហការដោះស្រាយផលប៉ះពាល់

Virak វីរៈ — Mon, 19 Jan 2026 05:41:24 +0000

ក្រសួងរៀបចំដែនដី នគរូបនីយកម្ម និងសំណង់ បានអំពាវនាវដល់ប្រជាពលរដ្ឋ ដែលកំពុងកាន់កាប់សំណង់មិនរៀបរយ ក្នុងបរិវេណដីគម្រោងអភិវឌ្ឍន៍កំពង់ផែស្វយ័តក្រុងព្រះសីហនុ មានទីតាំងស្ថិតនៅភូមិ៣ សង្កាត់លេខ៣ ក្រុងព្រះសីហនុ ខេត្តព្រះសីហនុ ចូលរួមសហការជាមួយក្រុមការងារក្រសួង និងរដ្ឋបាលខេត្តព្រះសីហនុ ក្នុងការចុះពិនិត្យដោះស្រាយផលប៉ះពាល់នានាដោយផ្ទាល់ ប្រកបដោយស្មារតីទទួលខុសត្រូវខ្ពស់ ដើម្បីរួមចំណែកកសាង និងអភិវឌ្ឍប្រទេសជាតិ ឱ្យកាន់តែមានការរីកចម្រើន។

តាមដានជាមួយយើង៖ Million Times

សេចក្ដីជូនដំណឹងរបស់ក្រសួងរៀបចំដែនដី នគរូបនីយកម្ម និងសំណង់ ផ្សព្វផ្សាយនៅថ្ងៃទី១៩ ខែមករានេះ ដោយជម្រាបជូនប្រជាពលរដ្ឋដែលកំពុងកាន់កាប់ សំណង់មិនរៀបរយក្នុងបរិវេណដីគម្រោងអភិវឌ្ឍន៍កំពង់ផែស្វយ័តក្រុងព្រះសីហនុ មានទីតាំងស្ថិតនៅភូមិ៣ សង្កាត់លេខ៣ ក្រុងព្រះសីហនុ ខេត្តព្រះសីហនុ ឱ្យបានជ្រាបថា រាជរដ្ឋាភិបាលកម្ពុជា បានសម្រេចរៀបចំអភិវឌ្ឍន៍ និងសាងសង់ចំណតផែកុងតឺន័រទឹកជ្រៅរបស់កំពង់ផែស្វយ័តក្រុងព្រះសីហនុ ជា ៣ជំហាន គិតចាប់ពី ឆ្នាំ២០២៣ ដល់ឆ្នាំ២០៣០ ដោយប្រើប្រាស់ថវិកាកម្ចីសម្បទានពីរដ្ឋាភិបាលជប៉ុន។

ក្រសួងរៀបចំដែនដី បានឱ្យដឹងបន្តថា គម្រោងអភិវឌ្ឍន៍នេះ មានគោលបំណងដើម្បីបង្កើនសមត្ថភាពផែកុងតឺន័រ ដែលអនុញ្ញាតឱ្យនាវាដឹកកុងតឺន័រមានចំណុះផ្ទុករហូតដល់ ១៦០.០០០ DWT (១៥.០០០ TEUs) ចេញ-ចូលដឹកជញ្ជូនពីកំពង់ផែស្វយ័តក្រុងព្រះសីហនុ ទៅកាន់ពិភពលោកដោយផ្ទាល់ និងគ្មានឧបសគ្គជម្រៅទឹកទៀតឡើយ។

កន្លងមក ក្រសួងរៀបចំដែនដី នគរូបនីយកម្ម និងសំណង់ បានចាត់តាំងក្រុមការងារសហការជាមួយរដ្ឋបាលខេត្តព្រះសីហនុ ចុះពិនិត្យ វាស់វែង និងកំណត់អត្តសញ្ញាណប្រជាពលរដ្ឋដែលបានកាន់កាប់ដី និងផ្ទះ ស្ថិតក្នុងតំបន់គម្រោងអភិវឌ្ឍន៍ចំណតផែកុងតឺន័រ រួចហើយ។

ទន្ទឹមនេះ ដើម្បីឱ្យផែនការអភិវឌ្ឍន៍គម្រោងសាងសង់ចំណតផែកុងតឺន័រទឹកជ្រៅថ្មី អាចដំណើរការទៅបានសម្រេចតាមផែនការដែលបានគ្រោងទុក ក្រសួងរៀបចំដែនដី នគរូបនីយកម្ម និងសំណង់ បានរៀបចំក្រុមការងារសហការជាមួយរដ្ឋបាលខេត្តព្រះសីហនុ ដើម្បីចុះពិនិត្យដោះស្រាយផលប៉ះពាល់នានាជាមួយប្រជាពលរដ្ឋដោយផ្ទាល់ ដើម្បីយកទីតាំងដីនេះធ្វើការអភិវឌ្ឍទៅតាមផែនការរបស់រាជរដ្ឋាភិបាល។

ក្នុងន័យនេះ ក្រសួងរៀបចំដែនដី នគរូបនីយកម្ម និងសំណង់ បានអំពាវនាវដល់ប្រជាពលរដ្ឋ ដែលពាក់ព័ន្ធទាំងអស់ចូលរួមសហការជាមួយក្រុមការងារខាងលើ ប្រកបដោយស្មារតីទទួល ខុសត្រូវខ្ពស់ ដើម្បីរួមចំណែកកសាង និងអភិវឌ្ឍប្រទេសជាតិ ឱ្យកាន់តែមានការរីកចម្រើន៕

អត្ថបទ៖ វីរៈ រូបភាព៖ ក្រសួងរៀបចំដែនដី

The post ក្រសួង អំពាវនាវពលរដ្ឋកាន់កាប់សំណង់មិនរៀបរយ ក្នុងគម្រោងអភិវឌ្ឍន៍កំពង់ផែក្រុងព្រះសីហនុ ចូលរួមសហការដោះស្រាយផលប៉ះពាល់ appeared first on Millions times.

កម្ពុជាស្វាគមន៍នាវាទេសចរណ៍ MS Westerdam មកចូលកម្ពុជាជាលើកទី៣

Vin Chang — Tue, 18 Nov 2025 09:23:17 +0000

នាវាទេសចរណ៍ MS Westerdam បានចូលចតនៅកំពង់ផែស្វយ័តអន្តរជាតិ នាក្រុងព្រះសីហនុ សាជាថ្មីម្ដងទៀតហើយ ដែលមានភ្ញៀវទេសចរណ៍ចម្រុះជាតិសាសន៍ប្រមាណជិត ២ ពាន់នាក់ផងដែរ។

តាមដានជាមួយយើង៖ Million Times

ថ្នាក់ដឹកនាំរបស់នាវាទេសចរណ៍មួយនេះ មិនដែលភ្លេចឡើយសម្រាប់ទឹកចិត្តដ៏ធំធេងរបស់កម្ពុជា អំឡុងពេលកូវីដ-១៩កន្លងទៅ ដែលកាលនោះមានតែប្រទេសកម្ពុជាមួយគត់ដែលយល់ព្រមឱ្យពួកគេចូលចត។ ព្រឹត្តិការណ៍មនុស្សធម៌ ដែលសម្ដេចតេជោ ហ៊ុន សែន បានធ្វើនាពេលនោះ ធ្វើឲ្យកម្ពុជាល្បីរន្ទឺពេញពិភពលោក ជាមួយនឹងពាក្យថា កម្ពុជាតូច តែបេះដូងធំ។ ចាប់តាំងពីនោះមក នាវាមួយនេះមិនដែលភ្លេចកម្ពុជា និងតែងតែនឹករលឹកចូលចតនៅកំពង់ផែព្រះសីហនុជានិច្ច។

កាលពីឆ្នាំ ២០២៣ MS Westerdam ក៏បានត្រលប់មកប្រទេសកម្ពុជា ជាលើកទីពីរហើយ ឆ្នាំ ២០២៥ មកម្ដងទៀត បើគិតទៅជាលើកទី ៣។

ដោយឡែកនៅព្រឹកថ្ងៃ១៨នេះ ជាលើកទី២ហើយសម្រាប់នាវាមួយនេះដែលនាំយកភ្ញៀវទេសចរណ៍អន្តរជាតិជិត ២ ពាន់នាក់មកលេងកម្ពុជា។ ភ្ញៀវទេសចរ ១៨៥០ នាក់ ស្រី ៩៩២ នាក់ មាន ៤៣ សញ្ជាតិ ក្នុងនោះមាននាវិក ៨០៤ នាក់ ស្រី ១៥៦ នាក់ ក្នុងនោះភ្ញៀវដែលមានច្រើនជាងគេ គឺមកពីសហរដ្ឋអាមេរិក អូស្ត្រាលី និងប្រទេសកាណាដា។

នាវាទេសចរណ៍ WESTERDAM សញ្ជាតិ HOLLAND ដែលមានប្រវែងបណ្តោយ ២៨៥,២២ ម៉ែត្រ ប្រវែងទទឹង ៣២,២០ ម៉ែត្រ ជម្រៅ ៨,១០ ម៉ែត្រ បានចូលចតនៅកំពង់ផែស្វយ័តក្រុងព្រះសីហនុ។ បើតាមការឲ្យដឹងពីមន្ត្រីជំនាញកំពង់ផែស្វយ័ត ក្រុងព្រះសីហនុ នៅព្រឹកនេះផ្ទាល់។
គួរបញ្ជាក់ផងដែរថា កាលពីឆ្នាំ ២០២០ MS Westerdam ដែលមានមនុស្ស ២២៥៧ នាក់នៅលើនោះ បានចំណាយពេលជិតពីរសប្ដាហ៍នៅសមុទ្រមិនអាចចរចាបានជោគជ័យលើកំពង់ផែដែលត្រូវចូលចត ដោយប្រទេសជាច្រើនបានបដិសេធ ដោយមានតែកម្ពុជាមួយគត់ ដែលទទួលកាប៉ាល់យក្សមួយនេះឲ្យចុះចត៕

អត្ថបទ៖ ឆដា, រូបភាព៖ កំពង់ផែស្វយ័ត

The post កម្ពុជាស្វាគមន៍នាវាទេសចរណ៍ MS Westerdam មកចូលកម្ពុជាជាលើកទី៣ appeared first on Millions times.

កំពង់ផែទឹកជ្រៅក្រុងព្រះសីហនុ សម្រេចបាន ៤៧% នៃផែនការដើម

Vin Chang — Fri, 31 Oct 2025 08:44:31 +0000

បើតាមការឲ្យដឹងពីកិច្ចប្រជុំប្រចាំខែតុលាស្តីពីការត្រួតពិនិត្យវឌ្ឍនភាព និងសុវត្ថិភាពការដ្ឋានសាងសង់នៃការអនុវត្តគម្រោងអភិវឌ្ឍន៍ចំណតផែកុងតឺន័រទឹកជ្រៅថ្មី-ជំហានទី ១ នៃកំពង់ផែក្រុងព្រះសីហនុ សម្រេចបានជាង ៤០ ភាគរយហើយ។

តាមដានជាមួយយើង៖ Million Times

អគ្គនាយករងទទួលបន្ទុកបច្ចេកទេសកំពង់ផែស្វយ័តក្រុងព្រះសីហនុ លោក ទី សាគុណ កាលពីថ្ងៃ៣០ ខែតុលា ឆ្នាំ ២០២៥ បានបើកកិច្ចប្រជុំប្រចាំខែ ដើម្បីតាមដានត្រួតពិនិត្យពីដំណើរការសាងសង់នៃការអនុវត្តគម្រោងអភិវឌ្ឍន៍ចំណតផែកុងតឺន័រទឹកជ្រៅថ្មី-ជំហានទី ១ ជាមួយក្រុមហ៊ុនសាងសង់ TOA Corporation និងក្រុមហ៊ុនទីប្រឹក្សាគម្រោង Nippon Koei & Oriental Consultant Global JV។

គិតរហូតដល់ដំណាច់ខែតុលា ឆ្នាំ ២០២៥ កន្លងទៅ ដំណើរការសាងសង់កំពង់ផែស្វយ័តក្រុងព្រះសីហនុជំហានទី ១ សម្រេចបាន ៤៧,៩០% ខណៈតាមផែនការគ្រោងបញ្ចប់នៅឆ្នាំ ២០២៨ដែលអាចឲ្យនាវាប្រមាណ ៩៣ ភាគរយ ក្នុងតំបន់ចូលចតបាន។

រីឯចំណតផែកុងតឺន័រទឹកជ្រៅជំហានទី ២ និងជំហានទី៣ នឹងពង្រីកតាមដំណាក់កាលបន្តបន្ទាប់ ហើយក្រោយបញ្ចប់ទាំង ៣ ដំណាក់កាល ទំនិញពីកម្ពុជាអាចដឹកចេញដោយផ្ទាល់ទៅកំពង់ផែនៅតំបន់អឺរ៉ុប និងអាមេរិក មិនចាំបាច់ឆ្លងកាត់បណ្ដាកំពង់ផែប្រទេសនៅក្នុងតំបន់ទៀតឡើយ។

រដ្ឋាភិបាលបានវិនិយោគទឹកប្រាក់ប្រមាណ ៧៥០ លានដុល្លារ ដើម្បីអភិវឌ្ឍកំពង់ផែទឹកជ្រៅខេត្តព្រះសីហនុទាំង ៣ ដំណាក់កាល ដើម្បីឆ្លើយតបទៅកំណើនការដឹកជញ្ជូនទំនិញតាមផ្លូវសមុទ្រ និងការធ្វើពាណិជ្ជកម្មរបស់ប្រទេសកម្ពុជា៕

អត្ថបទ៖ ឆដា, រូបភាព៖ កំពង់ផែស្វយ័តក្រុងព្រះសីហនុ

The post កំពង់ផែទឹកជ្រៅក្រុងព្រះសីហនុ សម្រេចបាន ៤៧% នៃផែនការដើម appeared first on Millions times.

នាវាទេសចរណ៍ VIKING VENUS ដឹកភ្ញៀវចម្រុះជាតិសាសន៍ជិត ១ ពាន់នាក់មកចតនៅកំពង់សោម

Vin Chang — Thu, 30 Oct 2025 02:59:56 +0000

កំពង់ផែក្រុងព្រះសីហនុបានទទួលស្វាគមន៍នាវាទេសចរណ៍ VIKING VENUS សញ្ជាតិន័រវែស ដែលបានដឹកភ្ញៀវទេសចរសរុប ៨០៨ នាក់ នាវិក ៤៦៣នាក់ នៅព្រឹកថ្ងៃ ៣០ ខែតុលា ឆ្នាំ ២០២៥ នេះ។

តាមដានជាមួយយើង៖ Million Times

មន្ទីរទេសចរណ៍ខេត្តព្រះសីហនុបានបានឲ្យដឹងនៅព្រឹកថ្ងៃនេះថា ក្រុមការងារមន្ទីរទេសចរណ៍បានចូលរួមសហការជាមួយអាជ្ញាធរ និងវិស័យឯកជនទទួលស្វាគមន៍ដំណើរមកដល់នាវាទេសចរណ៍ VIKING VENUS សញ្ជាតិន័រវែសដែលមានបណ្ដោយប្រវែង ២២៨.៣០ ម៉ែត្រ និងទទឹងប្រវែង ២៨.៨០ ម៉ែត្រ ជម្រៅ ៦.៦៥ម៉ែត្រ ធ្វើដំណើរមកពីប្រទេសវៀតណាម និងបានចូលចតនៅកំពង់ផែក្រុងព្រះសីហនុ នៅម៉ោង ៧៖ ០០ នាទីព្រឹក និងត្រូវចាកចេញទៅប្រទេសថៃបន្តនៅវេលាម៉ោង ១៤៖ ០០ ថ្ងៃ៣១ ខែតុលា ឆ្នាំ២០២៥។

ក្នុងចំណោមភ្ញៀវទេសចរសរុប ៨០៨ នាក់ ស្រី ៤២៣ នាក់ មាន ២០ សញ្ជាតិ នាវិក ៤៦៣ នាក់ ដោយមានស្រី ១១០ នាក់ ទាំងអស់មាន ៤០ សញ្ជាតិ។ ភ្ញៀវទេសចរភាគច្រើនជនជាតិអាមេរិក ៦៧១ នាក់ កាណាដា ៥៨ នាក់។ គោលដៅភ្ញៀវទេសចរទៅទស្សនា រួមមានរមណីយដ្ឋានឆ្នេរក្នុងក្រុង វត្តអារាម និងផ្សារលើជាដើម៕

អត្ថបទ៖ ឆដា, រូបភាព៖ មន្ទីរទេសចរណ៍ខេត្តព្រះសីហនុ

The post នាវាទេសចរណ៍ VIKING VENUS ដឹកភ្ញៀវចម្រុះជាតិសាសន៍ជិត ១ ពាន់នាក់មកចតនៅកំពង់សោម appeared first on Millions times.

កម្ពុជា លែងពឹងប្រទេសជិតខាងផ្ទេរទំនិញ ឥឡូវដឹកត្រង់ទៅមកចិន

million times — Thu, 22 May 2025 08:35:17 +0000

ក្រោយកំពង់ផែអន្តរជាតិព្រះសីហនុ បានកែលំអ នាវាដឹកទំនិញមួយគ្រឿង បានធ្វើដំណើរត្រង់ពីចិនមកផែកម្ពុជា ដែលរយៈពេលនៃការដឹកជញ្ជូននឹងត្រូវកាត់ខ្លីមកនៅត្រឹម ៧ ទៅ ១០ ថ្ងៃប៉ុណ្ណោះ។ ក្នុងពិធីអបអរសាទរក្រុមហ៊ុនវិនិយោគចំនួន២០០ នៅក្នុងតំបន់សេដ្ឋកិច្ចពិសេសក្រុងព្រះសីហនុ នាព្រឹកថ្ងៃទី២២ ខែឧសភានេះ សម្តេច ហ៊ុន ម៉ាណែត នាយករដ្ឋមន្រ្តី បានលើកឡើងថា នាវាដឹកទំនិញមួយគ្រឿង បានធ្វើដំណើរត្រង់ពីចិនមកផែកម្ពុជា ក្រោយកំពង់ផែបានកែលំអ ខណៈពីមុននាវានេះចូលចតនៅប្រទេសដទៃ។

តាមដានជាមួយយើង៖ Million Times

សម្តេចមានប្រសាសន៍ថា៖ «ជាក់ស្ដែងក្រោយពេលដែលយើងធ្វើកាលពីថ្ងៃទី១៨ ប៉ុន្មានថ្ងៃមុន គឺមានកប៉ាល់មួយដែលចូលរួចមកហើយដែលមកពី ផែហ្វូស៊ី ប្រទេសចិនចូលមកត្រង់នៅកម្ពុជា ដឹកទំនិញមក ពីមុនគឺអត់ចូលបានទេ គឺដឹកចូលទៅលឹមច្បាងដោយចំណាយពេល ៧ទៅ៨ម៉ោងសម្រាប់ផ្ទេរឥវ៉ាន់ដឹកមកយើង»។

សម្តេចគូសបញ្ជាក់ថា បច្ចុប្បន្ននេះ ការដឹកជញ្ជូនទំនិញតាមកំពង់ផែបាន ដឹកត្រង់ពីចិនមកកម្ពុជា និងដឹកត្រង់ពីកម្ពុជាទៅចិន ដោយមិនបាច់ពឹងពាក់ប្រទេសជិតខាង ដើម្បីផ្ទេរទំនិញ។ ការដឹកជញ្ជូនទំនិញដោយផ្ទាល់បានសន្សំសំចៃពេលវេលាបានច្រើនគួរឲ្យកត់សម្គាល់ ជាពិសេសគឺកាត់បន្ថយការចំណាយបានច្រើនជាងមុន។

ក្នុងន័យនេះ សម្តេចអះអាងថា នៅពេលកាត់បន្ថយចំណាយកាន់តែច្រើន កប៉ាល់ដឹកជញ្ជូននឹងកើនឡើងកាន់តែច្រើន ពោលគឺកើនឡើងនៃសេដ្ឋកិច្ចពាណិជ្ជកម្មកម្ពុជា និងកើនឡើងការងារជូនប្រជាពលរដ្ឋដែលជាចំណែកមួយក្នុងការអភិវឌ្ឍន៍ប្រទេស។

សូមជម្រាបថា កាលពីថ្ងៃទី២០ ខែឧសភា លោក វ៉ាង វិនប៊ីន ឯកអគ្គរដ្ឋទូតចិនប្រចាំកម្ពុជា បង្ហោះសារលើបណ្ដាញសង្គមរបស់ខ្លួនដោយបញ្ជាក់ថា ការដឹកជញ្ជូនត្រង់ពីកំពង់ផែ Wuxi (Jiangyin) ទៅខេត្តព្រះសីហនុបានបើកជាផ្លូវការនៅថ្ងៃទី ១៨ ខែឧសភា។ លោកឲ្យដឹងថា តាមការប៉ាន់ប្រមាណថា រយៈពេលនៃការដឹកជញ្ជូននឹងត្រូវកាត់ខ្លីមកនៅត្រឹម ៧ ទៅ ១០ ថ្ងៃ។ ការកាត់បន្ថយផ្ទេរការដឹកជញ្ជូនក៏អាចសន្សំបានពី ២០% ទៅ ៣០% នៃថ្លៃដើមប្រតិបត្តិការនៅកំពង់ផែ៕

អត្ថបទ៖ លីណូ រូបភាព៖ ក្រុមព័ត៌មានសម្តេចធិបតី និងផេក លោក វ៉ាង វិនប៊ីន

The post កម្ពុជា លែងពឹងប្រទេសជិតខាងផ្ទេរទំនិញ ឥឡូវដឹកត្រង់ទៅមកចិន appeared first on Millions times.

រដ្ឋាភិបាល គ្រោងចាយជិត១ពាន់លានដុល្លារអភិវឌ្ឍន៍កំពង់ផែអន្តរជាតិខេត្តព្រះសីហនុ ជំហានទី៣

Vin Chang — Wed, 26 Mar 2025 04:42:48 +0000

កំពង់ផែអន្តរជាតិខេត្តព្រះសីហនុនឹងមានទុនវិនិយោគប្រមាណជិត ១ ០០០ លានដុល្លារអាម៉េរិកបន្ថែមទៀតនៅឆ្នាំ២០២៩ខាងមុខ ដែលរាជរដ្ឋាភិបាលមានផែនការរៀបចំឱ្យទៅជាតំបន់ភស្តុភាកម្មនៃប្រព័ន្ធឡូជីស្ទិកតំបន់ ដើម្បីបម្រើដល់សេចក្តីត្រូវការចំពោះមុខ។

ក្នុងពិធីសម្ពោធដាក់ឱ្យប្រើប្រាស់ជាផ្លូវការអគារសិក្សា អគារស្នាក់នៅរបស់គ្រូបង្រៀន ទីចាត់ការ និងអគារកាត់ដេរនៅវិទ្យាល័យ ហ៊ុនសែន វាលរេញ ខេត្តព្រះសីហនុ នាព្រឹកថ្ងៃទី២៦ ខែមីនានេះ សម្តេច ហ៊ុន ម៉ាណែត នាយករដ្ឋមន្រ្តី បានថ្លែងថា «នៅឆ្នាំ២០២៩ខាងមុខ កំពង់ផែខេត្តព្រះសីហនុនឹងមានទុនវិនិយោគប្រមាណជិត ១ ០០០ លានដុល្លារអាម៉េរិកបន្ថែមទៀត ខណៈដែលកំពង់ផែមួយនេះត្រូវការនូវទុនវិនិយោគដ៏ធំ ដែលយើងមិនត្រឹមតែធ្វើឱ្យវាជាកំពង់ផែអន្តរជាតិប៉ុណ្ណោះទេ តែយើងត្រូវរៀបចំឱ្យទៅជាតំបន់ភស្តុភាកម្មនៃប្រព័ន្ធឡូជីស្ទិកតំបន់តែម្តងដើម្បីបម្រើដល់សេចក្តីត្រូវការចំពោះមុខ»។

តាមដានជាមួយយើង៖ Million Times

សម្ដេចបានបញ្ជាក់ថា ខេត្តព្រះសីហនុជាខេត្តដែលមានសេដ្ឋកិច្ចធំ ជាខេត្តផែសមុទ្រ ទឹកជ្រៅដែលមានសក្តានុពលនិងវិនិយោគ ដោយយើងមានគម្រោងវិនិយោគដល់ឆ្នាំ២០២៩ លើទឹកប្រាក់ ១ ០០០លានដុល្លារ ដែលជំហានទី១ បានចំណាយ ២០០លានដុល្លារលើការពង្រឹងនិងពង្រីកផែព្រះសីហនុ។ ដំណាក់កាលទី២ គ្រោងចាយ ៦០០លានដុល្លារទៀត ដើម្បីអោយកំពង់ផែខេត្តព្រះសីហនុអាចបំរើ មិនត្រឹមតែជាផែអន្តរជាតិនោះទេ តែរៀបចំសម្រាប់បំរើភស្តុភារកម្មនៃប្រព័ន្ធដឹកជញ្ជូនថ្នាក់តំបន់តែម្តង។

ទន្ទឹមគ្នានេះ សម្ដេច ហ៊ុន ម៉ាណែត បានស្នើឲ្យមានការរៀបចំការបណ្ដុះបណ្ដាលធនធានមនុស្សនៅនឹងកន្លែង ពិសេសរៀបចំការបណ្តុះបណ្តាលធ្វើយ៉ាងណាឲ្យមានមូលដ្ឋាន រឹងមាំសម្រាប់ផលិតធនធានមនុស្សដែលមានសមត្ថភាព និងមានលទ្ធភាពនៅក្នុងការចាប់យកឱកាសបម្រើឲ្យការអភិវឌ្ឍនៅកំពង់ផែព្រះសីហនុ។

សម្តេចនាយករដ្ឋមន្រ្តីបានបញ្ជាក់បន្ថែមថា ការទាមទារធនធានមនុស្សនេះ ស្របពេលដែលកម្ពុជាកំពុងពង្រីកសក្តានុពលរបស់ខេត្តព្រះសីហនុ ឲ្យកាន់តែធំថែមទៀត ដើម្បីជំរុញឲ្យខេត្តព្រះសីហនុកាន់តែជួយជាកម្លាំងជួយដល់សេដ្ឋកិច្ចជាតិទាំងមូល៕

អត្ថបទ៖ សាងតេជៈ រូបភាព៖ ផេកសម្តេចធិបតី

The post រដ្ឋាភិបាល គ្រោងចាយជិត១ពាន់លានដុល្លារអភិវឌ្ឍន៍កំពង់ផែអន្តរជាតិខេត្តព្រះសីហនុ ជំហានទី៣ appeared first on Millions times.

កំពង់ផែសមុទ្រកម្ពុជា ទទួលនាវាទេសចរណ៍យក្ស ២ គ្រឿង នាំភ្ញៀវចម្រុះជាតិសាសន៍ជាង ២ពាន់នាក់មកសំចត

Vin Chang — Thu, 06 Feb 2025 08:10:14 +0000

នាវាទេសចរណ៍ ២ គ្រឿងដែលមានភ្ញៀវបរទេសចម្រុះជាតិសាសន៍ជាង ២ ០០០នាក់បានចូលសំចតតាមច្រកកំពង់ផែសមុទ្រខេត្តព្រះសីហនុ នៅព្រឹកថ្ងៃទី៦ ខែកុម្ភៈនេះ។

តាមដានជាមួយយើង៖ Million Times

មន្ទីរទេសចរណ៍ខេត្តព្រះសីហនុ បានឲ្យដឹងថា នាវាខ្នាតយក្សចំនួន ២គ្រឿង បាននាំភ្ញៀវទេសចរចម្រុះជាតិសាសន៍ជាច្រើនពាន់នាក់ មកចូលសំចត ធ្វើទស្សនកិច្ចនៅកម្ពុជារយៈពេលមួយថ្ងៃ តាមច្រកកំពង់ផែស្វយ័តក្រុងព្រះសីហនុ ប្រកបដោយសុវត្ថិភាព។ ដោយមានការទទួលស្វាគមន៍ពីក្រុមឆៃយ៉ាំផងដែរ និងក្រុមការងារជាច្រើនផងនោះ ភ្ញៀវម្នាក់ៗមើលទៅតាមទឹកមុខពិតជាសប្បាយរីករាយខ្លាំង ពេលមកដល់កម្ពុជា។

នាវាទី១ ឈ្មោះ NOORDAM សញ្ជាតិហូឡង់ មានភ្ញៀវទេសចរចម្រុះជាតិសាសន៍ ១ ៩០៩ នាក់ ក្នុងនោះស្រី ៩៨៣ នាក់ ស្មើនឹង ៤២ សញ្ជាតិ និងមាននាវិកសរុប ៧៨៥ នាក់ ដោយស្រី ១៣៩ នាក់ ស្មើនឹង ៣៩ សញ្ជាតិ។ NOORDAM បានធ្វើដំណើរចាកចេញពីប្រទេសថៃ ចូលសំចតនៅកំពង់ផែស្វយ័តក្រុងព្រះសីហនុ កាលពីវេលាម៉ោង៧ និង ៣០នាទីព្រឹក ថ្ងៃព្រហស្បតិ៍ និងមានគម្រោងចាកចេញពីកំពង់ផែស្វយ័តក្រុងព្រះសីហនុ ម៉ោង២១ ថ្ងៃដដែល ឆ្ពោះទៅកាន់កំពង់ផែប្រទេសវៀតណាម។ ភ្ញៀវទេសចរធ្វើដំណើរតាមនាវា NOORDAM មានសញ្ជាតិច្រើនជាងគេគឺអាមេរិក ៩២៥ នាក់។ ភ្ញៀវទេសចរចុះពីនាវាចេញទៅកម្សាន្តនៅអង្គរ ខេត្តសៀមរាប ៤០ នាក់ ស្រី ២៣ នាក់ ស្មើនឹង៦ សញ្ជាតិ។

ចំណែកនាវាទេសចរណ៍ទី២ ឈ្មោះ ZHAO SHANG YIDUN របស់ប្រទេសចិន មានភ្ញៀវទេសចរចម្រុះជាតិសាសន៍ ២៦៣ នាក់ ក្នុងនោះមានស្រី ១៤៣ នាក់ និងមាន ២១ សញ្ជាតិ ព្រមជាមួយ នាវិក ៣៥០ នាក់ ស្រី ៩៩ នាក់ ស្មើនឹង ១ សញ្ជាតិ។ នាវា ZHAO SHANG YIDUN បានធ្វើដំណើរចាកចេញពីប្រទេសថៃ ចូលសំចតនៅកំពង់ផែស្វយ័តក្រុងព្រះសីហនុ កាលពីម៉ោង៨៖៥០ នាទី និងមានគម្រោងចាកចេញពីកំពង់ផែស្វយ័តក្រុងព្រះសីហនុ ទៅកាន់វៀតណាម ម៉ោង ២២ ថ្ងៃនេះ។ ភ្ញៀវបរទេសធ្វើដំណើរតាមនាវា ZHAO SHANG YIDUN មានសញ្ជាតិជប៉ុនច្រើនជាងគេពោលគឺរហូតទៅដល់ ១៦៦ នាក់។

បើតាមមន្រ្តីនៃមន្ទីរទេសចរណ៍ខេត្តព្រះសីហនុ ភ្ញៀវទេសចរបរទេសបានធ្វើដំណើរកម្សាន្តក្នុងខេត្តព្រះសីហនុនៅភូមិនេសាទទំនប់រលក សង្កាត់លេខ១ ទីប្រជុំជនផ្សារលើក្រុងព្រះសីហនុ តំបន់ទេសចរណ៍មាត់សមុទ្រ រូបសំណាកតោពីរ តំបន់វប្បធម៌ដូចជា វត្តឥន្ទញ្ញាណ វត្តជោតញ្ញាណក្នុងក្រុងព្រះសីហនុ។ តំបន់អភិឌ្ឍន៍ Boy of light រូបសំណាកព្រះថោងនាងនាគ មជ្ឈមណ្ឌលវិបស្សនាធុរៈគិរីនាគវ័ន (វត្តសមាធិ) ឃុំរាម ស្រុកព្រៃនប់៕

អត្ថបទ៖ មេរ៉ា, រូបភាព៖ កំពង់ផែស្វយ័តក្រុងព្រះសីហនុ

The post កំពង់ផែសមុទ្រកម្ពុជា ទទួលនាវាទេសចរណ៍យក្ស ២ គ្រឿង នាំភ្ញៀវចម្រុះជាតិសាសន៍ជាង ២ពាន់នាក់មកសំចត appeared first on Millions times.

កំពង់ផែភ្នំពេញ និងកំពង់ផែព្រះសីហនុ រកចំណូលបាន ១៤៧.៦៨លានដុល្លារនៅឆ្នាំ២០២៤

Vin Chang — Wed, 22 Jan 2025 05:00:34 +0000

កំពង់ផែយុទ្ធសាស្រ្តធំៗពីររបស់កម្ពុជា គឺកំពង់ផែស្វយ័តភ្នំពេញ និងកំពង់ស្វយ័តខេត្តព្រះសីហនុ សម្រេចបានចំណូលប្រមាណ ១៤៧.៦៨លានដុល្លារអាមេរិកនៅក្នុងឆ្នាំ២០២៤។

របាយការណ៍ក្នុងសន្និបាតបូកសរុបលទ្ធផលការងារឆ្នាំ២០២៤ និងទិសដៅការងារឆ្នាំ២០២៥ របស់ក្រសួងសាធារណការ និងដឹកជញ្ជូន បានឲ្យដឹងថា នៅឆ្នាំ២០២៤ កំពង់ផែស្វយ័តភ្នំពេញ សម្រេចបានការដឹកជញ្ជូនឆ្លងកាត់ផែនាំចេញ-នាំចូល មានចំនួនសរុប ៤,៥១លានតោន និងទទួលបានចំណូលសរុបប្រមាណ ៤៣,៤៥លានដុល្លារ កើនឡើង ១៦,៦០ភាគរយ ធៀបនឹងឆ្នាំ២០២៣ ដែលមានចំនួន ៣៧,២៧លានដុល្លារខណៈដែលកំពង់ផែព្រះសីហនុទទួលចំណូលបានចំនួន ១១០,៣៨ លានដុល្លារ កើនឡើង ២៤,១២% ធៀបនឹងឆ្នាំ២០២៣។

តាមដានជាមួយយើង៖ Million Times

បើតាមរបាយការណ៍ ការងារដឹកជញ្ជូនផ្លូវទឹក ផ្លូវសមុទ្រ និងកំពង់ផែនេះ ក្នុងឆ្នាំ២០២៤ ក្រសួងបានផ្តល់សេវាចុះបញ្ជី ១) នាវាផ្លូវទឹកចំនួន ២៦ គ្រឿង និង ២)នាវាផ្លូវសមុទ្រចំនួន ១០គ្រឿង ក្នុងនោះទទួលបានចំណូលសរុបពីការផ្ដល់សេវាដឹកជញ្ជូនតាមផ្លូវទឹក ផ្លូវសមុទ្រ និងកំពង់ផែ ចំនួន ២ ២៨១ លានរៀល កើនឡើង ៣,៨៧% ធៀបនឹងឆ្នាំ២០២៣ ដែលមានចំនួន ២ ១៩៦លានរៀល។

ជាមួយគ្នានេះ កំពង់ផែស្វយ័តក្រុងព្រះសីហនុ សម្រេចបានការដឹកជញ្ជូនទំនិញឆ្លងកាត់ផែ (នាំចូល និងនាំចេញ) មានចំនួនសរុប ៩,៦០លានតោន និងទទួលបានចំណូលសរុបប្រមាណ ១១០,៣៨លានដុល្លារអាម៉េរិក កើនឡើង ២៤,១២% ធៀបនឹងឆ្នាំ២០២៣ ដែលមានចំនួន ៨៨,៩៤លានដុល្លារអាមេរិក។

ចំណែកកំពង់ផែស្វយ័តភ្នំពេញ សម្រេចបានការដឹកជញ្ជូនទំនិញឆ្លងកាត់ផែ (នាំចូល និងនាំចេញ) មានចំនួនសរុប ៤,៥១លានតោន និងទទួលបានចំណូលសរុបប្រមាណ ៤៣,៤៥លានដុល្លារអាម៉េរិក កើនឡើង ១៦,៦០% ធៀបនឹងឆ្នាំ២០២៣ ដែលមានចំនួន ៣៧,២៧ លានដុល្លារអាមេរិក៕

អត្ថបទ៖ សាងតេជៈ រូបភាព៖ ក្រសួងសាធារណការ

The post កំពង់ផែភ្នំពេញ និងកំពង់ផែព្រះសីហនុ រកចំណូលបាន ១៤៧.៦៨លានដុល្លារនៅឆ្នាំ២០២៤ appeared first on Millions times.

សម្តេច ហ៊ុន ម៉ាណែត៖ ការពង្រីកសមត្ថភាពកំពុងផែស្វយ័តក្រុងព្រះសីហនុ គឺជាការពង្រឹងមូលដ្ឋានសេដ្ឋកិច្ចរបស់កម្ពុជា

Vin Chang — Thu, 12 Sep 2024 04:05:19 +0000

នៅព្រឹកថ្ងៃទី១២ ខែកញ្ញានេះ ចំណតផែកុងតឺន័រប្រវែង ២៥៣ម៉ែត្រ តម្លៃជិត ៤០លានដុល្លារនៅកំពង់ផែស្វយ័តក្រុងព្រះសីហនុ ដាក់ឱ្យប្រើប្រាស់ជាផ្លូវការ ដែលដើរតួនាទីសំខាន់សម្រាប់ការធ្វើពាណិជ្ជកម្មរបស់កម្ពុជា។ សម្តេច ហ៊ុន ម៉ាណែត បានចាត់ទុកការពង្រីកសមត្ថភាពកំពុងផែស្វយ័តក្រុងព្រះសីហនុ គឺជាការពង្រឹងមូលដ្ឋានសេដ្ឋកិច្ចរបស់កម្ពុជា។

សម្តេច ហ៊ុន ម៉ាណែត ថ្លែងថា កំពង់ផែស្វយ័តក្រុងព្រះសីហនុ គឺជាកំពង់ផែទឹក ជ្រៅតែមួយគត់របស់កម្ពុជា ដែលបាននិងកំពុងដើរតួនាទីយ៉ាងសំខាន់ក្នុងការរួមចំណែកដល់ អភិវឌ្ឍប្រទេសជាតិ តាមរយៈផលចំណូលអាជីវកម្មទទួលបានពីកំណើនបរិមាណទំនិញ និងកុងតឺន័រឆ្លងកាត់ជារៀងរាល់ថ្ងៃ។

តាមដានជាមួយយើង៖ Million Times

សម្តេចមានប្រសាសន៍ថា «ចំណតផែកុងតឺន័របន្ថែមប្រវែង ២៥៣ម៉ែត្រនេះ នឹងផ្តល់ជាជម្រើសបន្ថែម សម្រាប់ជួយបំពេញមុខងាររបស់កំពង់ផែស្វយ័តក្រុងព្រះសីហនុ ក្នុងគោលដៅ ពង្រីកសមត្ថភាព និងធ្វើទំនើបកម្មកំពង់ផែ ដើម្បីឆ្លើយតបនឹងកំណើនកុងតឺន័រឆ្លងកាត់នាពេលបច្ចុប្បន្ន មុននឹង ទទួលបានសមិទ្ធផលចំណតផែកុងតឺន័រទឹកជ្រៅថ្មីទាំង៣ជំហាន នាពេលអនាគត»។

បើតាមសម្តេចនាយករដ្ឋមន្រ្តី ចំណតផែកុងតឺន័របន្ថែមថ្មីនេះ បាន និងកំពុងជួយបំពេញបន្ថែមមុខងាររបស់កំពង់ផែស្វយ័តក្រុងព្រះសីហនុ ដែលធ្វើឱ្យសមត្ថភាពផែសរុបកើន ឡើងពី ៥៥ម៉ឺនធីអីយូ/ឆ្នាំ ទៅ ១លានធីអ៊ីយូ/ឆ្នាំ និងអាចឱ្យនាវាកុងតឺន័រ មានជម្រៅទឹក -១០,៤ម៉ែត្រ ចូលចតបាន ដែលតាមការព្យាករកើនឡើងពី១៨ភាគរយ ទៅប្រមាណ ៣៨ភាគរយនៃនាវា ដែលធ្វើនាវាចរក្នុងពិភពលោក ដោយឡែកសម្រាប់នាវា ដែលមានផ្លូវរត់ក្នុងតំបន់អាស៊ីប៉ាស៊ី ហ្វិក កើន ឡើងរហូតដល់ ៤៩,២៥ភាគរយ៕

អត្ថបទ៖ សាងតេជៈ រូបភាព៖ ក្រុមព័ត៌មានសម្តេចធិបតី

The post សម្តេច ហ៊ុន ម៉ាណែត៖ ការពង្រីកសមត្ថភាពកំពុងផែស្វយ័តក្រុងព្រះសីហនុ គឺជាការពង្រឹងមូលដ្ឋានសេដ្ឋកិច្ចរបស់កម្ពុជា appeared first on Millions times.

រដ្ឋាភិបាលរៀបចំគោលនយោបាយលើកកម្ពស់ប្រសិទ្ធភាពសេវាកំពង់ផែ កាត់បន្ថយចំណាយសេវាដឹកជញ្ជូន

Vin Chang — Fri, 19 Jul 2024 06:19:57 +0000

ថ្មីៗនេះ ក្រុមការងារអន្តរក្រសួងបានពិភាក្សាលើសេចក្តីព្រាង «ក្របខណ្ឌនៃការអភិវឌ្ឍ និងការគ្រប់គ្រងអាជីវកម្មកំពង់ផែទន្លេ និងការតភ្ជាប់បណ្តាញប្រព័ន្ធដឹកជញ្ជូនតាមផ្លូវទឹកទន្លេជាមួយផ្លូវសមុទ្រនៅកម្ពុជា» មុននឹងដាក់ជូនរាជរដ្ឋាភិបាល ពិនិត្យ និងអនុម័តដាក់ឱ្យអនុវត្តនាពេលខាងមុខ ដែលជាផែនទីបង្ហាញផ្លូវសម្រាប់ក្រសួង ស្ថាប័នពាក់ព័ន្ធ ក្នុងការរៀបចំ និងអភិវឌ្ឍវិស័យដឹកជញ្ជូនតាមផ្លូវទឹកនៅកម្ពុជាឱ្យកាន់តែរីកចម្រើន និងស្របតាមនិន្នាការសកល។

ក្របខណ្ឌនេះ មានគោលបំណងពង្រីក និងបង្កើនការប្រើប្រាស់ប្រព័ន្ធដឹកជញ្ជូនតាមផ្លូវទឹកទន្លេ តាមរយៈការធ្វើឱ្យប្រសើរឡើងនូវហេដ្ឋារចនាសម្ព័ន្ធដឹកជញ្ជូនតាមផ្លូវទឹក លើកកម្ពស់ប្រសិទ្ធភាពសេវាកំពង់ផែដោយការប្រើប្រាស់បច្ចេកវិទ្យាទំនើប និងការកាត់បន្ថយចំណាយឡូជីស្ទិក សំដៅរួមចំណែកទ្រទ្រង់ចីរភាពនៃកំណើនសេដ្ឋកិច្ចកម្ពុជាក្នុងរយៈពេលវែង និងបង្កើនសមត្ថភាពប្រកួតប្រជែងក្នុងតំបន់ និងសកល។

តាមដានជាមួយយើង៖ Million Times

ដើម្បីសម្រេចគោលបំណងខាងលើ ក្របខណ្ឌនេះ ក្រុមការងារអន្តរក្រសួងបានកំណត់គោលដៅក្នុងការបង្កើនការប្រើប្រាស់មធ្យោបាយដឹកជញ្ជូនតាមផ្លូវទឹកទន្លេ តាមរយៈការដាក់ចេញនូវវិធានការជាយុទ្ធសាស្រ្ត ដែលគិតគូរអំពី៖ ១. ការកំណត់ទីតាំងកំពង់ផែទន្លេជាយុទ្ធសាស្រ្តរបស់រាជរដ្ឋាភិបាល និង
២. ការដាក់ចេញនូវសសរស្តម្ភចំនួន ៥ រួមមាន៖ ការពង្រឹងក្របខណ្ឌគតិយុត្ត, ការពង្រឹងយន្តការស្ថាប័ន, ការកំណត់អាទិភាពលើយុទ្ធសាស្ត្រវិនិយោគ, – ការកំណត់ប្រភពហិរញ្ញប្បទាន និងម៉ូឌែលអភិវឌ្ឍន៍ និង ការអនុវត្តបញ្ជីគម្រោងនៃផែនការមេគ្រប់ជ្រុងជ្រោយ ស្តីពីប្រព័ន្ធដឹកជញ្ជូនអន្តរ មធ្យោបាយ និងភស្តុភារកម្មកម្ពុជា ២០២៣-២០៣៣។

សូមជម្រាបជូនថា រាជរដ្ឋាភិបាលកាលពីពេលកន្លងទៅបានដាក់ចេញនូវផែនការមេគ្រប់ជ្រុងជ្រោយ ស្តីពីប្រព័ន្ធដឹកជញ្ជូនអន្តរមធ្យោបាយ និងភស្តុភារកម្មកម្ពុជាឆ្នាំ២០២៣-២០៣៣ (CITLS) ដោយរាជរដ្ឋាភិបាលបានសម្រេចលើកិច្ចការអាទិភាពមួយចំនួនពាក់ព័ន្ធនឹងវិស័យដឹកជញ្ជូនតាមផ្លូវទឹក រួមជាមួយនឹងជំពូក១៨ និងមាត្រា២៧៥ នៃច្បាប់ដឹកជញ្ជូនតាមផ្លូវទឹកត្រូវបានចូលជាធរមាននៅថ្ងៃទី២៣ ខែមីនា។

អត្ថបទ៖ ផល កុសល រូបភាព៖ ក្រសួងសេដ្ឋកិច្ច

The post រដ្ឋាភិបាលរៀបចំគោលនយោបាយលើកកម្ពស់ប្រសិទ្ធភាពសេវាកំពង់ផែ កាត់បន្ថយចំណាយសេវាដឹកជញ្ជូន appeared first on Millions times.

កំពង់ផែក្រុងព្រះសីហនុ Archives - Millions times

កម្ពុជា​​ស្វាគមន៍នាវា​ទេសចរណ៍​ MS Westerdam មក​ចូល​កម្ពុជា​ជា​លើក​ទី​៣

កំពង់ផែទឹកជ្រៅ​​ក្រុងព្រះសីហនុ សម្រេច​បាន ៤៧% នៃផែនការដើម

នាវាទេសចរណ៍ VIKING VENUS ដឹកភ្ញៀវចម្រុះជាតិសាសន៍ជិត ១ ពាន់នាក់មកចតនៅកំពង់សោម

កម្ពុជា លែងពឹងប្រទេសជិតខាងផ្ទេរទំនិញ ឥឡូវដឹកត្រង់ទៅមកចិន

រដ្ឋាភិបាល គ្រោងចាយជិត១ពាន់លានដុល្លារអភិវឌ្ឍន៍កំពង់ផែអន្តរជាតិខេត្តព្រះសីហនុ ជំហានទី៣

កំពង់ផែសមុទ្រកម្ពុជា ទទួលនាវាទេសចរណ៍យក្ស ២ គ្រឿង នាំភ្ញៀវចម្រុះជាតិសាសន៍​ជាង ២ពាន់នាក់មកសំចត

កំពង់ផែភ្នំពេញ និងកំពង់ផែព្រះសីហនុ រកចំណូលបាន ១៤៧.៦៨លានដុល្លារនៅឆ្នាំ២០២៤

រដ្ឋាភិបាលរៀបចំគោលនយោបាយលើកកម្ពស់ប្រសិទ្ធភាពសេវាកំពង់ផែ កាត់បន្ថយចំណាយសេវាដឹកជញ្ជូន

កម្ពុជាស្វាគមន៍នាវាទេសចរណ៍ MS Westerdam មកចូលកម្ពុជាជាលើកទី៣

កំពង់ផែទឹកជ្រៅក្រុងព្រះសីហនុ សម្រេចបាន ៤៧% នៃផែនការដើម

កំពង់ផែសមុទ្រកម្ពុជា ទទួលនាវាទេសចរណ៍យក្ស ២ គ្រឿង នាំភ្ញៀវចម្រុះជាតិសាសន៍ជាង ២ពាន់នាក់មកសំចត