កែវ រតនៈ Archives - Millions times

រដ្ឋមន្រ្តីក្រសួងរ៉ែ ណែនាំមន្ត្រីអគ្គិសនី មិនយកលុយថ្លៃតភ្លើងដល់អតិថិជន ដែលស្នើកម្លាំង ២០ អំពែចុះ

Ravy Try — Fri, 13 Feb 2026 02:14:44 +0000

កាលពីពេលថ្មីៗនេះ រដ្ឋមន្រ្តីក្រសួងរ៉ែ និងថាមពល លោក កែវ រតនៈ បានណែនាំឲ្យអាជ្ញាធរអគ្គិសនីលើកលែងថ្លៃតភ្ជាប់ចរន្ត (មិនយកលុយថ្លៃតភ្លើង) ឲ្យអតិថិជនលំនៅឋាន ដែលស្នើកម្លាំងពី ៥អំពែ, ១០អំពែ និង ២០អំពែ ១ហ្វា ចាប់ពីថ្ងៃទី១ ខែមីនា ឆ្នាំ២០២៦តទៅ និងកាត់បន្ថយពេលវេលាតភ្ជាប់ ដើម្បីជួយសម្រួលការភ្ជាប់ចរន្តថ្មីដល់ពលរដ្ឋឲ្យបានឆាប់រហ័ស។

តាមដានជាមួយយើង៖ Million Times

រដ្ឋមន្រ្តីក្រសួងរ៉ែ និងថាមពល ចេញសេចក្ដីណែនាំដូច្នេះ នៅក្នុងពិធីបើកសន្និបាតបូកសរុបលទ្ធផលការងារឆ្នាំ ២០២៥ និងលើកទិសដៅការងារអនុវត្តសម្រាប់ឆ្នាំ២០២៦ របស់អាជ្ញាធរអគ្គិសនីកម្ពុជា កាលពីព្រឹកថ្ងៃ១២ ខែកុម្ភៈ ឆ្នាំ ២០២៦ កន្លងទៅ។

លោក កែវ រតនៈ ក៏បានលើកឡើងពីវិធានការថ្មី ដោយលោកចង់កាត់បន្ថយការិយាធិបតេយ្យក្នុងការផ្ដល់សេវាទៅកាន់ប្រជាពលរដ្ឋ ដើម្បីផ្តល់ភាពងាយស្រួល ដូច្នេះលោកបានណែនាំឲ្យអាជ្ញាធរអគ្គិសនីចេញបទបញ្ញត្តិមិនឲ្យលើសពីថ្ងៃទី១ ខែមីនា ឆ្នាំ២០២៦។

លោករដ្ឋមន្ត្រីក៏បានប្រាប់ឲ្យកាត់បន្ថយរយៈពេលភ្ជាប់ចរន្តជូនអតិថិជនធុនតូច មានន័យថា ចំពោះអតិថិជនដែលស្នើប្រើប្រាស់កម្លាំងចាប់ពី ១ហ្វា ៦៣ អំពែ ឬ ៣ហ្វា ២០អំពែ គឺត្រូវកាត់បន្ថយមកត្រឹមតែ ៨ ថ្ងៃធ្វើការតែប៉ុណ្ណោះ ទាំងអគ្គិសនីកម្ពុជា និងសេវាករទូទាំងប្រទេស។

គិតមកទល់ពេលនេះភូមិប្រមាណ ៩៩,១ ភាគរយ បានភ្ជាប់ចរន្តអគ្គិសនីពីបណ្តាញជាតិរួចហើយ ខណៈភូមិពុំមានភ្ជាប់ចរន្តពីបណ្ដាញជាតិ ក៏មានការដាក់ពង្រាយប្រព័ន្ធពន្លឺព្រះអាទិត្យ (សូឡា) របស់អគ្គិសនីកម្ពុជា ដើម្បីឲ្យពលរដ្ឋមានអគ្គិសនីប្រើបណ្ដោះអាសន្នផងដែរ ហើយ បើគិតជាលំនៅឋានខ្នងផ្ទះ គឺបានភ្ជាប់ចរន្តអគ្គិសនីពីបណ្ដាញជាតិជិត ៩៦ ភាគរយហើយ៕

អត្ថបទ៖ ឆដា, រូបភាព៖ Ministry of Mines and Energy Cambodia

The post រដ្ឋមន្រ្តីក្រសួងរ៉ែ ណែនាំមន្ត្រីអគ្គិសនី មិនយកលុយថ្លៃតភ្លើងដល់អតិថិជន ដែលស្នើកម្លាំង ២០ អំពែចុះ appeared first on Millions times.

កម្ពុជានឹងមានរោងចក្រកែច្នៃដបប្លាស្ទិកប្រើប្រាស់រួច ដើម្បីផលិតជាប្រភេទ PET

Vin Chang — Tue, 20 Jan 2026 03:15:15 +0000

រោងចក្រកែច្នៃប្លាស្ទិកPET របស់ក្រុមហ៊ុនហុងកុង A1 បានបើកការដ្ឋានសាងសង់នៅស្រុកក្រគរ ខេត្តពោធិ៍សាត់ដែលមានទុនគ្រោង ២៩ លានដុល្លារ។ នេះបើតាមការលើកឡើងរបស់លោក កែវ រតនៈ រដ្ឋមន្ត្រីក្រសួងរ៉ែ និងថាមពល។

តាមដានជាមួយយើង៖ Million Times

កាលពីព្រឹកថ្ងៃ១៩ ខែមករា ឆ្នាំ ២០២៦ ក្រុមហ៊ុនហុងកុង A1 បានបើកការដ្ឋានសាងសង់រោងចក្រកែច្នៃដបប្លាស្ទិក ដែលប្រើប្រាស់រួច ដើម្បីផលិតជាប្រភេទ PET សម្រាប់បម្រើដល់ឧស្សាហកម្មម្ហូបអាហារ និងភេសជ្ជៈ។ ក្រុមហ៊ុនអេវ័ន្តប្លាស្ទិក (A1-Plastic) ដែលជាក្រុមហ៊ុនជំនាញលើការផលិត និងចែកចាយផលិតផលប្លាស្ទិក ដ៏លេចធ្លោមួយក្នុងប្រទេសកម្ពុជា ។

នាពិធីបើកការដ្ឋានសាងសង់រោងចក្រខាងលើ បានធ្វើឡើងនៅតំបន់សេដ្ឋកិច្ចពិសេសខេត្តពោធិ៍សាត់ ស្ថិតក្នុងឃុំស្នាអន្សា ស្រុកក្រគរ។ រដ្ឋមន្ត្រីក្រសួងរ៉ែ និងថាមពល បានបញ្ជាក់បន្ថែមថា នេះជាការខិតខំប្រឹងប្រែងរបស់សម្តេចធិបតី ហ៊ុន ម៉ាណែត ក្នុងការបង្កើតការងារបៃតងជូនបងប្អូនប្រជាពលរដ្ឋខ្មែរ និងពង្រីកមូលដ្ឋានចំណូលរបស់ជាតិ។

ក្នុងនោះមានការចូលរួមពីសំណាក់ លោក ខូយ រីដា អភិបាលនៃគណៈអភិបាលខេត្តពោធិ៍សាត់ , លោកស្រី Deborah Lee នាយិកាប្រតិបត្តិ និងជាប្រធានក្រុមហ៊ុន A1-Plastic, លោកបណ្ឌិត ប្រាំង ជលសា ប្រតិភូរាជរដ្ឋាភិបាលកម្ពុជា អគ្គនាយកអគ្គិសនីកម្ពុជា លោក យឹម វិសិដ្ឋ ប្រធានអាជ្ញាធរអគ្គិសនីកម្ពុជា ព្រមទាំងលោក លោកស្រី អស់លោក លោកស្រី ជាភ្ញៀវកិត្តិយស លោកគ្រូ អ្នកគ្រូ និងសិស្សានុសិស្សយ៉ាងច្រើនកុះករ៕

អត្ថបទ៖ឆដា, រូបភាព៖ កែវ រតនៈ

The post កម្ពុជានឹងមានរោងចក្រកែច្នៃដបប្លាស្ទិកប្រើប្រាស់រួច ដើម្បីផលិតជាប្រភេទ PET appeared first on Millions times.

ទុនវិនិយោគសរុប ១,១១ ពាន់លានដុល្លារ ចាក់ចូលក្នុងវិស័យផលិតកម្មស៊ីម៉ងត៍នៅកម្ពុជា

Vin Chang — Wed, 21 May 2025 07:19:37 +0000

ក្នុងពិធីសម្ពោធដំណើរការរោងចក្រផលិតស៊ីម៉ងត៍ របស់ក្រុមហ៊ុន ខនស៍ ខេធី ស៊ីមេន (ភ្នំពេញ) ឯ.ក នៅខេត្តកំពង់ស្ពឺកាលពីថ្ងៃអង្គារ ទី២០ ខែឧសភា លោក កែវ រតនៈ រដ្ឋមន្ត្រីក្រសួងរ៉ែ និងថាមពល បានឲ្យដឹងថា គិតត្រឹមឆ្នាំ២០២៥នេះ ផលិតកម្មស៊ីម៉ងត៍នៅកម្ពុជាមានរោងចក្រសរុបចំនួន ៦ ដែលបានបោះទុនវិនិយោគសរុបប្រមាណ ១,១១ ពាន់លានដុល្លារអាមេរិក និងផ្តល់ការងារជូនប្រជាពលរដ្ឋ សរុបប្រមាណ ៣ ០០០កន្លែង។

តាមដានជាមួយយើង៖ Million Times

លោកបន្តថា រោងចក្រទាំង៦ មានសមត្ថភាពផលិតស៊ីម៉ងត៍បានប្រមាណ ១១ លានតោន ក្នុងមួយឆ្នាំ ដែលបានប្រែក្លាយកម្ពុជាពីប្រទេសនាំចូលស៊ីម៉ងត៍ ១០០% ពីបរទេស ទៅជាប្រទេសមានលទ្ធភាពផ្គត់ផ្គង់តម្រូវការទាំងស្រុងដោយខ្លួនឯង ហើយក៏បានចាប់ផ្តើមនាំចេញទៅប្រទេសថៃក្នុងបរិមាណប្រមាណ ជាង ៣០ ០០០តោនក្នុងឆ្នាំ២០២៤ ថែមទៀតផង។

បន្ថែមពីគម្រោងទាំង៦ខាងលើ លោក កែវ រតនៈ បន្តថា នៅមានក្រុមហ៊ុនចំនួន ៣ផ្សេងទៀត កំពុងស្ថិតក្នុងដំណាក់កាលសាងសង់រោងចក្រ និងអភិវឌ្ឍការដ្ឋាន។

ក្នុងពិធីសម្ពោធរោងចក្រផលិតស៊ីម៉ងត៍របស់ក្រុមហ៊ុនខនស៍ ខេធី ស៊ីមេន ភ្នំពេញ ដដែលនេះ សម្តេច ហ៊ុន ម៉ាណែត បានលើកទឹកចិត្តដល់វិនិយោគិនទាំងអស់ឱ្យខិតខំពង្រីកការវិនិយោគនៅកម្ពុជាឱ្យកាន់តែច្រើនបន្ថែមទៀត ដោយសម្តេចលើកឡើងថា ការវិនិយោគលើរោងចក្រ សហគ្រាសផលិតក្នុងស្រុកកំពុងកើនឡើងគួរឱ្យកត់សម្គាល់ ដែលនេះជាសញ្ញានៃការជំរុញល្បឿននៃការអភិវឌ្ឍប្រទេសកម្ពុជាឱ្យបោះជំហានទៅមុខកាន់តែលឿន។ សម្តេចបន្តថា រដ្ឋាភិបាលនឹងបន្តទទួលស្វាគមន៍ និងផ្តល់កិច្ចសហប្រតិបត្តិការជានិច្ចចំពោះរាល់គម្រោងវិនិយោគ ជាពិសេសគម្រោងវិនិយោគដែលជួយជំរុញកំណើនសេដ្ឋកិច្ចកម្ពុជា ប្រកបដោយភាពធន់ ចីរភាព និងបរិយាបន្ន ដើម្បីសម្រេចបាននូវចក្ខុវិស័យកម្ពុជាឆ្នាំ២០៣០ និងឆ្នាំ២០៥០។

សម្តេចនាយករដ្ឋមន្រ្តីបានថ្លែងថា៖ «ខ្ញុំសូមអំពាវនាវដល់វិនិយោគិនសូមជ្រើសរើសយកកម្ពុជាធ្វើជាគោលដៅសម្រាប់ការវិនិយោគ ដោយកម្ពុជារក្សាបាននូវភាគលាភនៃសុខសន្តិភាព ស្ថិរភាពនយោបាយ និងម៉ាក្រូសេដ្ឋកិច្ច»។

បន្ថែមពីលើនេះ សម្តេច ហ៊ុន ម៉ាណែត ក៏បានជំរុញឱ្យក្រសួងរ៉ែ និងថាមពល និងសហគមឧស្សាហកម្មស៊ីម៉ងត៍កម្ពុជា ត្រូវខិតខំស្វែងរកទីផ្សារដើម្បីជំរុញការចេញផលិតផលស៊ីម៉ងត៍របស់កម្ពុជាទៅកាន់ទីផ្សារអន្តរជាតិឱ្យបានច្រើន៕

អត្ថបទ៖ សាងតេជៈ រូបភាព៖ ផេកសម្តេចធិបតី

The post ទុនវិនិយោគសរុប ១,១១ ពាន់លានដុល្លារ ចាក់ចូលក្នុងវិស័យផលិតកម្មស៊ីម៉ងត៍នៅកម្ពុជា appeared first on Millions times.

លោក កែវ រតនៈ ឲ្យប្ដឹងមកក្រសួងបើមានអ្នកយកតួនាទីរដ្ឋនិងមន្ត្រីបក្សប្រើប្រាស់រកស៊ីអាជីវកម្មខ្សាច់ថ្មគេចមិនបង់ពន្ធ

Vin Chang — Tue, 18 Mar 2025 11:51:42 +0000

តាមរយៈវីដេអូខ្លីដែលមន្ទីររ៉ែ និងថាមពលខេត្តពោធិ៍សាត់ផ្សព្វផ្សាយ លោក កែវ រតនៈ បានព្រមានទៅកាន់អ្នកដែលយកតួនាទីជាមន្ដ្រីរាជរដ្ឋាភិបាល និងមន្ដ្រីគណបក្សប្រជាជនកម្ពុជា ប្រើប្រាស់ដើម្បីរកស៊ីគេមិនបង់ពន្ធ និងបន្លំសួយសារចំណូលដែលត្រូវបង់ជូនរដ្ឋ ចំពោះអាជីវកម្មខ្សាច់ និងថ្ម។

លោក កែវ រតនៈ រដ្ឋមន្ដ្រីក្រសួងរ៉ែ និងថាមពល បានណែនាំទៅអគ្គនាយកដ្ឋានចំណុះឱ្យក្រសួងរ៉ែ ចំពោះការបន្លំសួយសារ អាជីវកម្មខ្សាច់ និងថ្ម គឺមិនឲ្យមានដាច់ខាត រាប់ទាំងប្រតិបត្ដិការរបស់មន្ដ្រីរបស់គណបក្ស។

តាមដានជាមួយយើង៖ Million Times

លោកបានមានប្រសាសន៍ធ្ងន់ៗថា៖ «ខ្ញុំបានដាក់គោលដៅហើយ យើងគ្មានត្រូវការយកអ្វី ដែលជាអ្វីដែលមិនត្រូវយកនោះទេ ប៉ុន្ដែអ្វីត្រូវយកឲ្យជាតិមួយសេន ក៏មិនត្រូវបាត់ដែរ រាប់ទាំងប្រតិបត្ដិការ របស់មន្ដ្រីរបស់គណបក្សផងដែរ»។

«មន្ដ្រីមួយចំនួនបង្កើតអាជីវកម្មខ្សាច់ ខ្ញុំបានណែនាំទៅអគ្គនាយកដ្ឋានហើយ គឺបន្លំសួយសារ អត់ឲ្យមានដាច់ខាត បើរកស៊ីបង់ពន្ធបង់សួយសារ ដូចគេដែរ ហើយលើកទឹកចិត្ដឲ្យអាជីវករដែលរកស៊ីផ្នែកខ្សាច់ ផ្នែកថ្ម ផ្នែកអីដូចគ្នា ផ្ដល់មកក្រសួងរ៉ែ និងថាមពលតាមរយៈ Hotline របស់អគ្គនាយកដ្ឋានធនធានរ៉ែ ០៩៥ ៧២៧ ៧២៧»។ លោករដ្ឋមន្រ្តីបញ្ជាក់បន្ថែម។

លោកថ្លែងបន្ថែមទៀតថា «បើសិនជាមានអ្នកណាមួយ ដែលយកក្របខ័ណ្ឌគណបក្សប្រជាជន ទៅប្រើប្រាស់យកក្របខ័ណ្ឌតួនាទីរាជរដ្ឋាភិបាលទៅប្រើប្រាស់ ហើយមិនធ្វើអាជីវកម្មស្របច្បាប់នឹងគេ បង់នឹងគេ ឲ្យស្មើភាពគ្នាអាចប្ដឹងមកក្រសួងជាសម្ងាត់ យើងរក្សាការសម្ងាត់នឹងឲ្យ យើងចាត់ការអ្នកដែលមិនធ្វើតាមច្បាប់»៕

អត្ថបទ៖ ពិសិដ្ឋ រូបភាព៖ ផេកលោក កែវ រតនៈ

The post លោក កែវ រតនៈ ឲ្យប្ដឹងមកក្រសួងបើមានអ្នកយកតួនាទីរដ្ឋនិងមន្ត្រីបក្សប្រើប្រាស់រកស៊ីអាជីវកម្មខ្សាច់ថ្មគេចមិនបង់ពន្ធ appeared first on Millions times.

២០២៥ ក្រសួងរ៉ែ និងថាមពល ដាក់ផែនការឲ្យសេវាករផ្គត់ផ្គង់អគ្គិសនីទូទាំងប្រទេសប្រតិបត្តិការលើ App ទាំងអស់

Vin Chang — Tue, 04 Feb 2025 02:28:30 +0000

ក្រសួងរ៉ែ និងថាមពល មានផែនការយុទ្ធសាស្ត្រចង់ឱ្យឆ្នាំ២០២៥នេះ ជាឆ្នាំដែលសេវាករផ្គត់ផ្គង់អគ្គិសនី នៅទូទាំងប្រទេស ត្រូវធ្វើប្រតិបត្តិការលើថ្នាល់ឌីជីថល (App) ទាំងអស់។

ក្នុងឱកាសបើកសន្និបាតបូកសរុបលទ្ធផលការងារឆ្នាំ២០២៤ និងលើកទិសដៅការងារឆ្នាំ២០២៥ របស់អាជ្ញាធរអគ្គិសនីកម្ពុជា នៅព្រឹកថ្ងៃទី០៣ ខែកុម្ភៈ លោក កែវ រតនៈ រដ្ឋមន្ត្រីក្រសួងរ៉ែ និងថាមពល លើកឡើងថា៖ «យើងចង់បានឆ្នាំ២០២៥នេះ ជាឆ្នាំដែលសេវាផ្តត់ផ្គង់អគ្គិសនី ត្រូវធ្វើប្រតិបត្តិការលើ App ទាំងអស់ សូមឱ្យការបង់ថវិកាពីអតិថិជន គឺមានភាគរយមិនលើសពី៥ភាគរយ ដែលបង់ថវិកាដោយផ្ទាល់ ទៅទីតាំងបញ្ជរបង់ប្រាក់ សូមឱ្យ៩៥ភាគរយ ត្រូវតែបង់ថវិកាតាមប្រព័ន្ធធនាគារទាំងអស់ នេះជាផែនការ សម្រាប់ឆ្នាំ២០២៥»។

តាមដានជាមួយយើង៖ Million Times

បន្ថែមពីនេះ លោកបានសង្កត់ធ្ងន់ៗថា រាល់ការដាក់ពាក្យស្នើសុំតភ្ជាប់ចរន្តអគ្គិសនី និងការបង្កើតកម្លាំងអំពែអគ្គិសនីជាដើម គឺសុំឱ្យធ្វើប្រតិបត្តិការនៅឆ្នាំ២០២៥នេះ នៅត្រឹមឱ្យចប់នៅចុង១២ខែ ឆ្នាំ២០២៥។ ពោល សម្រាប់ការសុំដំឡើងអំពែថាមពលអគ្គិសនីនេះ ត្រូវធ្វើតាមប្រព័ន្ធអ៊ិនធឺណែត ដោយមិនតម្រូវឱ្យអតិថិជនមកបំពេញបែបបទ ដល់ទីតាំងផ្តល់សេវាករអគ្គិសនីទៀតនោះទេ។

លោកបានបន្តថា អាជ្ញាធរអគ្គិសនីកម្ពុជា, អគ្គិសនីកម្ពុជា ត្រូវតែដើរជាតួមុខគេ ដើម្បីធ្វើយ៉ាងណាជួយគាំទ្រឱ្យសេវាករឯកជនជាង ៤០០ទីតាំង អាចមានលទ្ធភាពធ្វើដំណើរការលើថ្នាល់ប្រព័ន្ធឌីជីថល មានភាពប្រហាក់ប្រហែលគ្នាផងដែរ។

លោក កែវ រតនៈ គូសបញ្ជាក់ថា ដាច់ខាតសេវាករផ្គត់ផ្គង់អគ្គិសនីទាំងអស់ ត្រូវឱ្យមានលេខផ្ទាល់របស់ក្រុមហ៊ុន និងដាច់ខាតមិនត្រូវយកលេខទូរស័ព្ទដៃរបស់បុគ្គលិក ដើម្បីធ្វើជា Hotline របស់ក្រុមហ៊ុននោះទេ ហើយអាជ្ញាធរទាមទារឱ្យសេវាករដែលគ្រប់សេវាកម្មមួយកន្លែង ត្រូវមានភ្នាក់ងារទទួលបន្ទុកការងារអតិថិជនច្បាស់លាស់ ដែលអាចទាក់ទងបាន។

លោក យឹម វិសិដ្ឋ ប្រធានអាជ្ញាធរអគ្គិសនីកម្ពុជា បានឱ្យដឹងថា អាជ្ញាធរអគ្គិសនីកម្ពុជាបានបង្កើត EAC-App សម្រាប់អ្នកប្រើប្រាស់អគ្គិសនី នៅក្នុងតំបន់ផ្គត់ផ្គង់របស់អ្នកផ្គត់ផ្គង់ឯកជនប្រើ ហើយមកដល់ពេលនេះ EAC-App ត្រូវបានបន្ថែមមុខងារប្រើប្រាស់ជាបន្តបន្ទាប់ ហើយមុខងារសំខាន់ដែលត្រូវបន្ថែមក្នុងឆ្នាំ២០២៥ គឺមុខងារអនុញ្ញាតឱ្យអ្នកប្រើប្រាស់អាចស្នើសុំបន្តចរន្ត និងបន្ថែមកម្លាំងប្រើប្រាស់បាន។

ទន្ទឹមនឹងនេះ លោកក៏បានលើកឡើងពីបញ្ហាប្រឈមចំបងនាពេលកន្លងមក ដែលធ្វើឱ្យ EAC-App ដំណើរការមិនសូវរលូន គឺទិន្នន័យរបស់អ្នកកាន់អាជ្ញាបណ្ណមិនអាចអនឡាញគ្រប់ពេល ប៉ុន្តែបញ្ហាប្រឈម នេះត្រូវបានដោះស្រាយរួចរាល់ តាមរយៈការជួល Cloud រួម ឱ្យអ្នកកាន់អាជ្ញាបណ្ណប្រើដោយអាជ្ញាធរអគ្គិសនីកម្ពុជាជាអ្នកទទួលបន្ទុកចំណាយ។ ជាមួយគ្នានេះត្រូវរៀបចំវគ្គបណ្តុះបណ្តាលដល់បុគ្គលិករបស់ អ្នកកាន់អាជ្ញាបណ្ណនូវរបៀបដំឡើង និងរបៀបប្រើ ជំរុញការផ្សព្វផ្សាយ និងជួយណែនាំរបៀបដំឡើង និងរបៀបប្រើបន្តដល់អតិថិជន។

លោកបានបន្ថែមថា ដើម្បីដំណើរការ EAC-App ឲ្យរលូនតម្រូវឱ្យអ្នកកាន់អាជ្ញាបណ្ណត្រូវមានហ្វេសបុក លេខហតឡាញ លេខទំនាក់ទំនងអតិថិជន បានចាប់ផ្តើមច្រើនឆ្នាំដែរហើយ ប៉ុន្តែមកដល់ពេលនេះ អាជ្ញាធរអគ្គិសនីកម្ពុជាសង្កេតឃើញថា នៅមានគណនីហ្វេសបុកពុំច្បាស់លាស់ ឈ្មោះគណនីហ្វេសបុក មិនដូចនឹងឈ្មោះអាជ្ញាបណ្ណ លេខហតឡាញ លេខទំនាក់ទំនងអតិថិជន តេមិនចូល តេមិនលើក ផ្លាស់ប្តូរគ្មានការជូនដំណឹង យកលេខរបស់បុគ្គលិកមកប្រើជាដើម៕

អត្ថបទ៖ សាងតេជេៈ រូបភាព៖ ក្រសួងរ៉ែ

The post ២០២៥ ក្រសួងរ៉ែ និងថាមពល ដាក់ផែនការឲ្យសេវាករផ្គត់ផ្គង់អគ្គិសនីទូទាំងប្រទេសប្រតិបត្តិការលើ App ទាំងអស់ appeared first on Millions times.

យកអតីតវាលយន្តហោះសម័យសង្គ្រាមជប៉ុនវាយចូលប្រទេសកម្ពុជា ២៥ហិកតាធ្វើពហុកីឡដ្ឋាន

Vin Chang — Mon, 01 Jul 2024 11:00:08 +0000

រដ្ឋាភិបាលយកអតីតទីតាំងសមរភូមិសង្គ្រាម ស្ថិតក្នុងខេត្តពោធិ៍សាត់ ប្រែក្លាយទៅជាគម្រោងសាងសង់ពហុកីឡដ្ឋានដែលត្រូវបានបើកការដ្ឋានសាសង់នៅថ្ងៃទី១ខែកក្កដានេះ មានតម្លៃប្រមាណ ៥លានដុល្លារសហរដ្ឋអាមេរិក មានឈ្មោះថា «ពហុកីឡដ្ឋានសម្តេចតេជោក្រគរ»។

លោក កែវ រតនៈ រដ្ឋមន្ត្រីក្រសួងរ៉ែ និងថាមពល និងជាប្រធានក្រុមការងាររាជរដ្ឋាភិបាល ចុះមូលដ្ឋានខេត្តពោធិ៍សាត់ បានលើកឡើងថា ការសម្រេចសាងសង់ពហុកីឡដ្ឋាន នៅវាលសម្តេចយសនេះឡើង គឺដោយបានការគាំទ្រអស់លទ្ធភាពពីសំណាក់អតីតនាយករដ្ឋមន្ត្រី សម្តេច ហ៊ុន សែន ដើម្បីប្រែក្លាយទីកន្លែងមួយនេះ ពីអតីតទីតាំងសមរភូមិសង្គ្រាម ទៅជាពហុកីឡាដ្ឋាន ដែលអាចធ្វើការប្រកួតកីឡាភូមិភាគ និងជាកន្លែងជួបជុំរបស់ប្រជាពលរដ្ឋស្រុកក្រគរ ក៏ដូចជាខេត្តពោធិ៍សាត់ និងតំបន់ភាគខាងលិចនៃប្រទេស។

តាមដានជាមួយយើង៖ Million Times

លោកថ្លែងថា «ពីអតីតកាលទីតាំងនេះជាកន្លែងវាលយន្តហោះខ្នាតតូចមួយ ដែលកាលនោះមហាអំណាចជប៉ុនវាយចូលដល់ប្រទេសកម្ពុជា និងយកទីតាំងនេះ ធ្វើជាព្រលានយន្តហោះ ដើម្បីដំណើរការគាំទ្រសង្គ្រាមផ្លូវអាកាស។ នៅពេលសង្គ្រាមបានបញ្ចប់ ទីតាំងនេះបានប្រើប្រាស់ក្នុងការដឹកជញ្ជូនទំនិញ កសិផល ពីខេត្តពោធិ៍សាត់ ទៅភ្នំពេញ នៅសម័យលន់ណុល ដែលផ្លូវជាតិភាគច្រើនកាន់កាប់ដោយខ្មែរក្រហម ពុំអាចដឹកជញ្ជូន និងធ្វើដំណើរឆ្លងកាត់បាន។ ក្រោយថ្ងៃរំដោះ ៧ មករា ទីតាំងនេះបានបញ្ឈប់ការប្រើប្រាស់ ហើយប្រជាពលរដ្ឋមួយចំនួន បានអាស្រ័យផលនៅទីនេះ»។

លោកបន្តថា នៅឆ្នាំ២០១៨ ក្រោមការផ្តួចផ្តើមរបស់លោកផ្ទាល់ បានកំណត់យកទីតាំងនេះជាសម្បត្តិរដ្ឋ ដើម្បីធ្វើការអភិវឌ្ឍន៍សាងសង់ជាពហុកីឡដ្ឋាន និងត្រូវបានសម្តេចតេជោ ប្រកាសគាំទ្រយ៉ាងម៉ឺងម៉ាត់ ក្នុងពេលដែលសម្តេចជួបកម្មករ-កម្មការិនី រោងចក្រកាត់ដេរ នៅថ្ងៃទី២០ ខែមីនា ឆ្នាំ២០១៩កន្លងទៅ។

លោកថ្លែងបន្តទៀតថា «កិច្ចការដែលយើងត្រូវធ្វើមិនត្រឹមតែពហុកីឡដ្ឋាននេះប៉ុណ្ណោះទេ គឺនៅមានផ្សារទំនើប ភោជនីយដ្ឋាន ហាងកាហ្វេ ទីតាំងសាករថយន្តអគ្គិសនី… ដើម្បីទាក់ទាញចំណាប់អារម្មណ៍ វិនិយោគិន ដែលបានដាក់ទុនវិនិយោគនៅកម្ពុជា និយាយជារួមនឹងនិយាយដោយឡែក នៅតំបន់សេដ្ឋកិច្ចពិសេសក្រគរ អាចមានកន្លែងហូបចុក ដើរលេង និងហាត់ប្រាណបានសមរម្យ»។

គួរឲ្យដឹងថា គម្រោងសាងសង់ពហុកីឡដ្ឋានសម្តេចតេជោក្រគរ រដ្ឋាភិបាលប្រើប្រាស់ថវិកាមូលនិធិសង្គមអគ្គិសនីកម្ពុជា អនុវត្តដោយក្រុមហ៊ុន KIM MEX CONSTRUCTION & INVESTMENT Co., Ltd លើផ្ទៃដីប្រមាណ២៥ហិកតា ស្ថិតក្នុងភូមិវាលវង់ ឃុំស្នាអន្សា ស្រុកក្រគរ ដោយបានការចូលរួមពីលោក ខូយ រីដា អភិបាលខេត្តពោធិ៍សាត់៕

អត្ថបទ៖ សេដ្ឋានី រូបភាព៖ ផេកលោក កែវ រតនៈ

The post យកអតីតវាលយន្តហោះសម័យសង្គ្រាមជប៉ុនវាយចូលប្រទេសកម្ពុជា ២៥ហិកតាធ្វើពហុកីឡដ្ឋាន appeared first on Millions times.

គម្រោងសាងសង់ទំនប់វ៉ារីអគ្គិសនីស្ទឹងពោធិ៍សាត់១ តម្លៃ១៦០លានដុល្លារសម្រេចបាន ៣៥ភាគរយ

Vin Chang — Sun, 30 Jun 2024 06:48:58 +0000

គម្រោងសាងសង់ទំនប់វ៉ារីអគ្គិសនី ស្ទឹងពោធិ៍សាត់១ នៅត្រង់ចំណុចចិនយំ ស្ថិតក្នុងភូមិស្ទឹងថ្មី ឃុំប្រម៉ោយ ស្រុកវាលវែង ខេត្តពោធិ៍សាត់ សម្រេចបានប្រមាណ ៣៥ភាគរយហើយ ដែលចំនួននេះគឺមានការយឺតជាងផែនការគ្រោងទុក។

លោក កែវ រតនៈ រដ្ឋមន្រ្តីក្រសួងរ៉ែ និងថាមពល បានឲ្យដឹងក្នុងពេលចុះពិនិត្យការដ្ឋានវ៉ារីអគ្គិសនី ស្ទឹងពោធិ៍សាត់១ នាពេលថ្មីៗនេះថា គម្រោងសាងសង់តំបន់វារីអគ្គិសនីស្ទឹងពោធិ៍សាត់១ សម្រេចបានប្រមាណ ៣៥ភាគរយប៉ុណ្ណោះ បើប្រៀបធៀបជាមួយផែនការពីដើមឃើញថាមានការយឺតយ៉ាវ។ លោកបញ្ជាក់ថា ការយឺតយ៉ាវដោយសារបញ្ហាធំពីរ គឺការស្វែងរកហិរញ្ញប្បទាន និងការសាងសង់ ក៏ព្រោះកម្ពុជាក៏ដូចពិភពលោកជួបវិបត្តិសេដ្ឋកិច្ច។

តាមដានជាមួយយើង៖ Million Times

លោកថ្លែងថា «ក្រោយវិបត្តិកូវីដ១៩នេះយើងកំពុងតែខិតខំធ្វើម៉េចផ្តល់ការគាំទ្រចាំបាច់ទាំងអស់ដើម្បីអាចឲ្យគម្រោងចាប់ផ្តើមសាងសង់ឲ្យបានទាន់ពេលវេលា។ លោកបានអះអាងថា ការគិតគូរលើគម្រោងទំនប់វារីអគ្គិសនីនេះធានាធ្វើយ៉ាងណានៅឆ្នាំ២០២៦ គម្រោងនេះចេញជារូបរាងនិងដំណើរការឲ្យបាន។

សូមជម្រាបថា គម្រោងសាងសង់ទំបន់វារីអគ្គិសនីស្ទឹងពោធិ៍សាត់១ ចាប់ផ្តើមដំណើការកាលពីចុងឆ្នាំ២០២២កន្លងទៅគ្រោងនឹងប្រើប្រាស់ថវិកាប្រមាណ ១៦០លានដុល្លារអាមេរិក ដែលជាការសហការរវាងក្រុមហ៊ុនចិន និងកូរ៉េ ហើយរំពឹងបង្កើតថាមពលអគ្គិសនីមានអានុភាព៨០មេហ្គាវ៉ាត់ គ្រោងនឹងបញ្ចប់ដាក់ឱ្យប្រើប្រាស់ជាផ្លូវការក្នុងឆ្នាំ២០២៦។

គួរឲ្យដឹងដែលថា នៅខេត្តពោធិ៍សាត់ មានវ៉ារីអគ្គិសនី ចំនួន២កន្លែងមួយកំពុងដំណើរការសាងសង់ទំបន់វារីអគ្គិសនីស្ទឹងពោធិ៍សាត់១ និងទី២ វារីអគ្គិសនីស្ទឹងអាតៃ ស្ថិតក្នុងឃុំអូរសោម ស្រុកវាលវែង សាងសង់ដោយក្រុមហ៊ុនចិន មានអានុភាព១២០មេហ្គាវ៉ាត់ ត្រូវបានដាក់ឱ្យប្រើប្រាស់ជាផ្លូវការ តាំងពីឆ្នាំ២០១៥៕

អត្ថបទ៖ ផល កុសល រូបភាព៖ រដ្ឋបាលខេត្តពោធិ៍សាត់

The post គម្រោងសាងសង់ទំនប់វ៉ារីអគ្គិសនីស្ទឹងពោធិ៍សាត់១ តម្លៃ១៦០លានដុល្លារសម្រេចបាន ៣៥ភាគរយ appeared first on Millions times.

សម្តេច ហ៊ុន ម៉ាណែត និងប្រធានាធិបតីសិង្ហបុរី ពិភាក្សាជំរុញយន្តការសម្រេចឲ្យបានតភ្ជាប់បណ្តាញអគ្គិសនីអាស៊ាន

Vin Chang — Wed, 19 Jun 2024 03:48:05 +0000

ក្នុងឱកាសនៃដំណើរទស្សនកិច្ចផ្លូវការនៅសិង្ហបុរី រយៈពេល២ថ្ងៃ ចាប់ពីថ្ងៃទី១៨ ដល់ថ្ងៃទី១៩ ខែមិថុនានេះ កម្ពុជា និងសិង្ហបុរី បង្ហាញក្តីរំពឹងខ្ពស់នឹងឈានដល់ការសម្រេចបាននូវបណ្តាញអគ្គិសនីអាស៊ាន (ASEAN Power Grid) ដែលប្រទេសទាំងពីរជាអ្នកផ្ដួចផ្ដើមក្នុងគោលបំណងការការពារបរិស្ថាន ជំរុញថាមពលបៃតង និងទប់ការឡើងថ្លៃអគ្គិសនី។

ក្នុងជំនួបរវាងសម្តេច ហ៊ុន ម៉ាណែត នាយករដ្ឋមន្រ្តីកម្ពុជា និងលោក Tharman Shanmugaratnam ប្រធានាធិបតីសិង្ហបុរី កាលពីថ្ងៃអង្គារម្សិលមិញ បានពិភាក្សាអំពីយន្តការ និងក្របខណ្ឌគោលនយោបាយនានាសម្រាប់កិច្ចការពារដល់បរិស្ថាន ជាពិសេសការទប់ទល់នឹងការប្រែប្រួលអាកាសធាតុ ដើម្បីធានាបាននូវភាពធន់របស់សេដ្ឋកិច្ចនៃប្រទេសទាំងពីរ ដោយផ្តោតលើការពង្រីកការប្រើប្រាស់ថាមពលកកើតឡើងវិញ ដែលអាចឈានដល់ការសម្រេចបាននូវបណ្តាញអគ្គិសនីអាស៊ាន (ASEAN Power Grid)។

តាមដានជាមួយយើង៖ Million Times

កម្ពុជានិងសឹង្ហបុរី បានផ្តួចផ្តើមគំនិតឱ្យមានការបង្កើតការតភ្ជាប់បណ្តាញអគ្គិសនីអាស៊ាន (ASEAN Power Grid) ឡើងវិញ ខណៈកាលពី២៥ឆ្នាំមុន អាស៊ានបានដាក់គោលដៅនេះ តែមិនទាន់សម្រេច។ តាមរយៈវីដេអូខ្លី ផ្សាយចេញនៅថ្ងៃទី៤ ខែមិថុនា ឆ្នាំ២០២៤ លោក កែវ រតនៈ រដ្ឋមន្ត្រីក្រសួងរ៉ែ និងថាមពល បានលើកឡើងថា កាលពី២៥ឆ្នាំមុន អាស៊ានបានដាក់គោលដៅនេះ ហើយ ប៉ុន្តែមិនទាន់អាចមានលទ្ធភាពធ្វើគម្រោងនេះបាននៅឡើយទេ ហើយគំនិតផ្តួចផ្តើមថ្មីនេះ មិនត្រឹមតែល្អសម្រាប់បរិស្ថានប៉ុណ្ណោះទេ តែក៏ល្អសម្រាប់ការប្រកួតប្រជែងផ្នែកសេដ្ឋកិច្ច បង្កើនឱកាសវិនិយោគ បង្កើតឱកាសការងារថ្មីៗជូនយុវជន យុវនារីរបស់យើងផងដែរ។

សម្រាប់គម្រោងតភ្ជាប់បណ្តាញអគ្គិសនីអាស៊ាននេះដែរ លោក កែវ រតនៈ បានបង្ហើបថា កិច្ចប្រជុំស្តីពីគម្រោងបង្កើតបណ្តាញអគ្គិសនីអាស៊ាននេះ មានលក្ខណៈវិជ្ជមានដោយសារប្រទេសកម្ពុជា ឡាវ សិង្ហបុរី និងប្រទេសម៉ាឡេស៊ី បានប្តេជ្ញាជំរុញឱ្យអាស៊ាន រួបរួមគ្នាធ្វើឱ្យគោលដៅដ៏សំខាន់មួយនេះលេចចេញជារូបរាងឱ្យខានតែបាន។

ទន្ទឹមនឹងនេះលោកបានអះអាងថា នេះគឺជាឱកាសសម្រាប់កម្ពុជា ក្នុងការផលិតថាមពល ដោយផលិតខ្លះសម្រាប់ប្រើប្រាស់ក្នុងស្រុក និងបើកច្រកនាំចេញអគ្គិសនីទៅប្រទេសអាស៊ានទាំង ១០ ព្រមទាំងទាក់ទាញការវិនិយោគមកកម្ពុជា សម្រាប់រយៈពេលវែងជាដើម។

សូមជម្រាបជូនថា នៅខែកញ្ញា ឆ្នាំ២០២៤ ខាងមុខនេះ នឹងមានកិច្ចប្រជុំថ្នាក់រដ្ឋមន្ត្រីថាមពលអាស៊ាន នៅទីក្រុងវៀងចន្ទន៍ ប្រទេសឡាវ ដូច្នេះកម្ពុជា និងសិង្ហបុរី នឹងលើកយកបញ្ហានេះ មកពិភាក្សាបន្ថែមទៀត ដើម្បីឱ្យមានការតភ្ជាប់បណ្ដាញអគ្គិសនីរវាងអាស៊ានទាំង១០តែម្តង៕

អត្ថបទ៖ សាង តេជៈ រូបភាព៖ ក្រុមព័ត៌មានសម្តេចធិបតី

The post សម្តេច ហ៊ុន ម៉ាណែត និងប្រធានាធិបតីសិង្ហបុរី ពិភាក្សាជំរុញយន្តការសម្រេចឲ្យបានតភ្ជាប់បណ្តាញអគ្គិសនីអាស៊ាន appeared first on Millions times.

ក្រសួងរ៉ែរបស់លោក កែវ រតនៈ ប្រកាសប្តេជ្ញាចិត្តជាថ្មីបញ្ចប់នូវសកម្មភាពជីករ៉ែអនាធិបតេយ្យ

Vin Chang — Sun, 05 May 2024 07:06:47 +0000

ក្រសួងរ៉ែ និងថាមពលរបស់លោក កែវ រតនៈ ប្រកាសប្តេជ្ញាបញ្ចប់នូវសកម្មភាពរ៉ែអនាធិបតេយ្យ និងជំរុញឱ្យមានការធ្វើអាជីវកម្មរ៉ែដោយស្របច្បាប់ដែលនាំមកនូវផលប្រយោជន៍ជាតិជាច្រើន។ នេះបើតាមការជូនដំណឺងរបស់ខ្លួនកាលពីថ្ងៃទី៣ ខែឧសភា ឆ្នាំ២០២៤។

ក្រសួងរ៉ែ និងថាមពល បានបញ្ជាក់ថា ការធ្វើអាជីវកម្មរ៉ែដោយស្របច្បាប់ដែលនាំមកនូវផលប្រយោជន៍ជាតិជាច្រើន មានជាអាទិ៍ ការបង្កើតឱ្យមានឱកាសការងារនៅនឹងកន្លែងនិងប្រយោល ការចូលរួមចំណែកដល់ការបង្កើតប្រភពចំណូលថវិកាជាតិបន្ថែម និងការបំបាត់នូវផលប៉ះពាល់ធ្ងន់ធ្ងរដល់បរិស្ថាននិងសង្គម ព្រមទាំងចូលរួមចំណែកអភិវឌ្ឍសហគមមូលដ្ឋានតាមរយៈការធ្វើអាជីវកម្មរ៉ែប្រកបដោយចីរភាព។

ក្រសួងបន្តថា របរជីករ៉ែមាសរបស់ប្រជាពលរដ្ឋខ្មែរគឺមានតាំងពីយូរលង់ណាស់មកហេីយ ដែលតែងតែធ្វេីឡេីងជាលក្ខណៈគ្រួសារនៅពេលទំនេរពីការងារស្រែចម្ការសម្រាប់ផ្គត់ផ្គង់ជីវភាពបន្ថែមប្រេីប្រាស់ឧបករណ៍សាមញ្ញមាននៅក្នុងមូលដ្ឋាន និងមិនប្រេីប្រាស់សារធាតុគីមីដែលនាំឱ្យប៉ះពាល់ដល់បរិស្ថានទេ។ ប៉ុន្តែចុងក្រោយនេះ សកម្មភាពជីករ៉ែអនាធិបតេយ្យនៅតែបន្តមានកាន់តែធ្ងន់ធ្ងរជាមួយនឹងការប្រើប្រាស់សារធាតុគីមី រំសេវជាតិផ្ទុះថ្មបំបែក និងជីករូងអណ្តូងរ៉ែក្រោមដី ដែលអាចបង្កគ្រោះថ្នាក់បំផុត។ ក្រៅពីនេះសកម្មភាពអាជីវកម្មអនាធិបតេយ្យទាំងនេះ បន្តបង្កឱ្យមានការបាត់បង់ទ្រព្យសម្បត្តិជាតិ ប៉ះពាល់យ៉ាងធ្ងន់ធ្ងរដល់បរិស្ថាន បង្កជាហានិភ័យខ្ពស់ដល់សុខភាពនិងសុវត្ថិភាពរបស់អ្នកធ្វើអាជីវកម្មរ៉ែអនាធិបតេយ្យខ្លួនឯង ព្រមទាំងប្រជាពលរដ្ឋនៅក្នុងនិងក្រៅមូលដ្ឋាន។

ជាមួយគ្នានេះ ក្រសួងរ៉ែ និងថាមពលសូមអំពាវនាវដល់បងប្អូនប្រជាពលរដ្ឋដែលកំពុងធ្វើអាជីវកម្មរ៉ែមាសអនាធិបតេយ្យ បញ្ឈប់នូវរាល់សកម្មភាពខុសច្បាប់ទាំងនេះ ហើយចូលរួមទប់ស្កាត់ដោយធ្វើការជូនដំណឹងអំពីសកម្មភាពរ៉ែអនាធិបតេយ្យមកក្រសួងរ៉ែនិងថាមពល៕

អត្ថបទះ សាង តេជៈ រូបភាព៖ បណ្តាញសង្គម

The post ក្រសួងរ៉ែរបស់លោក កែវ រតនៈ ប្រកាសប្តេជ្ញាចិត្តជាថ្មីបញ្ចប់នូវសកម្មភាពជីករ៉ែអនាធិបតេយ្យ appeared first on Millions times.