ការសន្សំប្រាក់ Archives - Millions times

ធនាគារ និងគ្រឹះស្ថានមីក្រូហិរញ្ញវត្ថុកម្ពុជា មាន ២៣ លានគណនីសន្សំ ទឹកប្រាក់ស្មើ ៥៤ ប៊ីលានដុល្លារ

Vin Chang — Wed, 06 Nov 2024 09:27:23 +0000

សេចក្ដីថ្លែងការណ៍របស់ប្រធានសមាគមធនាគារនៅកម្ពុជា (ABC) និងប្រធានសមាគមមីក្រូហិរញ្ញវត្ថុកម្ពុជា (CMA) បានឲ្យដឹងថា គិតត្រឹមឆមាសទី១ ឆ្នាំ ២០២៤ ប្រជាពលរដ្ឋដែលបានដាក់ប្រាក់សន្សំ (បញ្ញើ) ក្នុងប្រព័ន្ធធនាគារ និងគ្រឹះស្ថានមីក្រូហិរញ្ញវត្ថុមានសរុបជាង ២៣ លានគណនី ស្មើនឹងទឹកប្រាក់ ៥៤ ប៊ីលានដុល្លារអាមេរិក។

តាមដានជាមួយយើង៖ Million Times

របាយការណ៍ប្រចាំឆមាសទី១ ឆ្នាំ២០២៤ របស់ធនាគារជាតិនៃកម្ពុជាបានឲ្យដឹងថា ទ្រព្យសកម្មរបស់គ្រឹះស្ថានធនាគារបានកើនឡើងជិត ៦ ភាគរយ ឬប្រមាណជាង៨៨ប៊ីលានដុល្លារអាមេរិក។ក្នុងនោះវិស័យធនាគារមានជាង៩៥ ភាគរយ នៃទ្រព្យសកម្មប្រព័ន្ធធនាគារវិស័យមីក្រូហិរញ្ញវត្ថុមានចំណែក ៣.៦ ភាគរយ និងវិស័យភតិសន្យាហិរញ្ញវត្ថុ ០.៥ ភាគរយ។ ឥណទានអតិថិជនកើនឡើងប្រមាណជា ២.៦ ភាគរយដែលគិតជាទឹកប្រាក់ប្រមាណជិត ៥៩ ប៊ីលានដុល្លារអាមេរិក ដោយមាន ៤ លានគណនី។

ទន្ទឹមនេះប្រាក់បញ្ញើអតិថិជន ក៏កើនឡើង ជាមួយនឹងកំណើនជិត ១៣.៤ ភាគរយ ឬប្រមាណជាង ៥១.៩ ប៊ីលានដុល្លារអាមេរិក ដោយចំនួនគណនីប្រាក់បញ្ញើអតិថិជន បានកើនឡើងដល់ ២១.៣ លានគណនីនៅក្នុងវិស័យធនាគារ។

លោក រ័ត្ន សោភ័ណ ប្រធានសមាគមធនាគារនៅកម្ពុជា បានថ្លែងថា «ការកើនឡើងប្រាក់បញ្ញើរបស់អតិថិជន ក្នុងគ្រឹះស្ថានហិរញ្ញវត្ថុផ្លូវការ បានបង្ហាញពីជំនឿទុកចិត្តរបស់សាធារណជន មកលើប្រព័ន្ធធនាគារនៅកម្ពុជា» ក្នុងទិវាសន្សំអាស៊ាន ឆ្នាំ ២០២៤ ក្រោមប្រធានបទ «សារៈសំខាន់នៃការសន្សំប្រាក់តាំងពីវ័យក្មេង» ។

ចំណែកលោកស្រី ឌិត នីតា ប្រធានក្រុមប្រឹក្សាភិបាល នៃសមាគមមីក្រូហិរញ្ញវត្ថុកម្ពុជា បានឲ្យដឹងផងដែរថា ត្រឹមត្រីមាសទី២ ឆ្នាំ ២០២៤ គ្រឹះស្ថានមីក្រូហិរញ្ញវត្ថុទទួលប្រាក់បញ្ញើទាំង ៤ គ្រឹះស្ថាន ទទួលប្រាក់បញ្ញើសរុបជាង ២ ២១០ លានដុល្លារអាមេរិក, កើនឡើងប្រមាណ ៤ ភាគរយធៀបនឹងឆ្នាំមុន ពីអតិថិជនប្រមាណ ១.៩៩ លាននាក់៕

The post ធនាគារ និងគ្រឹះស្ថានមីក្រូហិរញ្ញវត្ថុកម្ពុជា មាន ២៣ លានគណនីសន្សំ ទឹកប្រាក់ស្មើ ៥៤ ប៊ីលានដុល្លារ appeared first on Millions times.

ការសន្សំប្រាក់មិនត្រឹមតែជួយខ្លួនឯងទេ ប៉ុន្ដែបានចូលរួមអភិវឌ្ឍសេដ្ឋកិច្ចជាតិដូចគ្នា

Vin Chang — Mon, 04 Nov 2024 07:43:17 +0000

ក្នុងសិក្ខាសាលាផ្សព្វផ្សាយស្ដីពី «ទិវាសន្សំអាស៊ាន» ដែលកម្ពុជាធ្វើជាម្ចាស់ផ្ទះ ក្រោមប្រធានបទ «សារៈសំខាន់នៃការសន្សំប្រាក់តាំងពីវ័យកុមារ» កាលពីថ្ងៃ ៣១ ខែតុលា ឆ្នាំ ២០២៤ នៅទីរួមខេត្តកំពង់ស្ពឺ លោក ឡាយ សុខហេង អគ្គនាយករង នៃអគ្គនាយកដ្ឋានត្រួតពិនិត្យ ធនាគារជាតិនៃកម្ពុជា បានលើកទឹកចិត្តដល់សាធារណជនឲ្យចេះសន្សំប្រាក់។

លោកលើកឡើងថា ការសន្សំប្រាក់ពិតជារឿងសំខាន់ខ្លាំងមែន ពិសេសការសន្សំជាមួយគ្រឹះស្ថានធនាគារ និងហិរញ្ញវត្ថុផ្លូវការនឹងជួយបំពេញតម្រូវការ ហិរញ្ញវត្ថុនាពេលអនាគត និងជាការរួមចំណែក ក្នុងការអភិវឌ្ឍសេដ្ឋកិច្ចជាតិដែលជាប្រភពមូលធន សម្រាប់បំពេញតម្រូវការហិរញ្ញវត្ថុ របស់វិនិយោគិនក្នុងប្រទេស។

តាមដានជាមួយយើង៖ Million Times

លោកបានពន្យល់ថា ការសន្សំប្រាក់មានច្រើនបែបដោយអាចសន្សំនៅតាមផ្ទះ ក្នុងទូដែកសុវត្ថិភាព ឬក្នុងកូនជ្រូកសន្សំជាដើម។ប៉ុន្តែការសន្សំល្អបំផុតនោះ គឺការសន្សំប្រាក់ជាមួយគ្រឹះស្ថានធនាគារ និងហិរញ្ញវត្ថុផ្លូវការ ដែលហៅថា ប្រាក់បញ្ញើសន្សំ។ ព្រោះ ការដាក់ប្រាក់បញ្ញើសន្សំ តាមគ្រឹះស្ថានផ្លូវការ នាំឲ្យម្ចាស់ប្រាក់បញ្ញើសន្សំទទួលបានអត្ថប្រយោជន៍ជាច្រើនដូចជា ផ្ដល់ការថែរក្សា និងការពារប្រាក់សន្សំ ប្រកបដោយសុវត្ថិភាព, ទទួលបានចំណូលការប្រាក់សន្សំបន្ថែម, ទទួលបានកិច្ចការពារតាមផ្លូវច្បាប់, និងផ្តល់លទ្ធភាពដល់ការរៀបចំគម្រោងហិរញ្ញវត្ថុ សម្រាប់អនាគតច្បាស់លាស់។

ក្នុង«ទិវាសន្សំអាស៊ាន» ដ៏មានសារៈសំខាន់នោះ លោកក៏បានបន្តទៀថា ការសន្សំប្រាក់ ចាំបាច់សម្រាប់ឆ្លើយតបទៅនឹងបញ្ហា និងតម្រូវការហិរញ្ញវត្ថុបន្ទាន់ ដែលឥតបានព្រាងទុកនៅពេលអនាគត ហើយក៏ជាផ្នែកមួយនៃការគ្រប់គ្រងហិរញ្ញវត្ថុរបស់បុគ្គល និងគ្រួសារ ដើម្បីធានាបានស្ថិរភាពហិរញ្ញវត្ថុ។

ពេលសន្សំជាមួយគ្រឹះស្ថានផ្លូវការមានន័យថា បានចូលរួមចំណែក ក្នុងការអភិវឌ្ឍសេដ្ឋកិច្ចជាតិ ដោយសារប្រាក់បញ្ញើសន្សំទាំងនោះ គឺជាប្រភពមូលធនសំខាន់មួយ សម្រាប់បំពេញតម្រូវការហិរញ្ញវត្ថុ របស់វិនិយោគិនក្នុងប្រទេស។ មើលឃើញអំពីសារៈសំខាន់ និងភាពចាំបាច់ក្នុងការជំរុញវប្បធម៌សន្សំ តាមគ្រឹះស្ថានធនាគារ និងហិរញ្ញវត្ថុផ្លូវការ រាជរដ្ឋាភិបាលកម្ពុជា បានដាក់ចេញយុទ្ធសាស្ត្រជាតិ ស្តីពីបរិយាបន្នកម្មហិរញ្ញវត្ថុឆ្នាំ ២០១៩-២០២៥ ដែលមានទិសដៅបង្កើនលទ្ធភាព ទទួលបានសេវាហិរញ្ញវត្ថុផ្លូវការ មានគុណភាព កាត់បន្ថយអត្រាស្រី្ត ដែលមិនទាន់ទទួលបានសេវាហិរញ្ញវត្ថុ និងពង្រីកការប្រើប្រាស់ សេវាហិរញ្ញវត្ថុផ្លូវការ ព្រមទាំងធ្វើឲ្យប្រសើរឡើងសុខុមាលភាពគ្រួសារ និងគាំទ្រកំណើនសេដ្ឋកិច្ច៕

អត្ថបទ៖ រ៉ាវី រូបភាព៖ បណ្តាញសង្គម

The post ការសន្សំប្រាក់មិនត្រឹមតែជួយខ្លួនឯងទេ ប៉ុន្ដែបានចូលរួមអភិវឌ្ឍសេដ្ឋកិច្ចជាតិដូចគ្នា appeared first on Millions times.