ការលើកឡើងនេះធ្វើឡើងដោយលោកជំទាវ តោ ពិឡា រដ្ឋលេខាធិការក្រសួងពាណិជ្ជកម្ម ក្នុងពិធីសម្ពោធ «យុទ្ធនាការផលិតផលជាតិ #MadeInCambodia» នៅខេត្តកំពង់ចាម កាលពីព្រឹកថ្ងៃសៅរ៍ ទី១៥ ខែសីហា ឆ្នាំ២០២៦ នៅមុខមន្ទីរពាណិជ្ជកម្មខេត្តកំពង់ចាម។

ពិធីនេះមានការចូលរួមពីលោក ឡោ ចាន់លី អភិបាលរងនៃគណៈអភិបាលខេត្តកំពង់ចាម តំណាងមន្ទីរ-អង្គភាពពាក់ព័ន្ធ សិប្បករ ផលិតករក្នុងស្រុក តំណាងផ្សារទំនើប ម៉ាត និងមីនីម៉ាត ព្រមទាំងតំណាងវិស័យឯកជនជាច្រើនរូប។

ក្នុងឱកាសនោះ លោកជំទាវ តោ ពិឡា បានថ្លែងអំណរគុណដល់រដ្ឋបាលខេត្តកំពង់ចាម ដែលបានសហការរៀបចំកម្មវិធី និងផ្តល់ទីតាំងសម្រាប់រៀបចំពិធី ព្រមទាំងកោតសរសើរចំពោះកិច្ចសហការរវាងវិស័យឯកជន ជាពិសេសសហគ្រាសធុនមីក្រូ តូច និងមធ្យម សិប្បករ និងផលិតករក្នុងស្រុក ព្រមទាំងបណ្តាញផ្សារទំនើប ម៉ាត និងមីនីម៉ាត ដែលបានរួមគ្នាជំរុញការផលិត ការចែកចាយ និងការប្រើប្រាស់ផលិតផលជាតិឱ្យកាន់តែទូលំទូលាយ។

លោកជំទាវបានគូសបញ្ជាក់ថា ប្រជាពលរដ្ឋខ្មែរគ្រប់រូបមានតួនាទីសំខាន់ក្នុងការគាំទ្រផលិតផលជាតិ តាមរយៈការប្រើប្រាស់ ការផ្សព្វផ្សាយ និងការជួយនាំផលិតផលខ្មែរទៅកាន់ទីផ្សារឱ្យកាន់តែទូលំទូលាយ។

លោកជំទាវបានថ្លែងថា «ការរៀបចំយុទ្ធនាការផលិតផលជាតិ #MadeInCambodia» មិនត្រឹមតែជាការលើកកម្ពស់ផលិតផលក្នុងស្រុកប៉ុណ្ណោះទេ ប៉ុន្តែថែមទាំងជាការបង្ហាញពីស្មារតីស្រឡាញ់ជាតិ ស្រឡាញ់កសិករ និងផលិតករខ្មែរ ព្រមទាំងរួមចំណែកពង្រឹងសេដ្ឋកិច្ចជាតិផងដែរ។

លោកជំទាវរដ្ឋលេខាធិការបានបន្តថា ក្រសួងពាណិជ្ជកម្មបានផ្តួចផ្តើមយុទ្ធនាការនេះឡើង ដើម្បីលើកកម្ពស់ការផ្សព្វផ្សាយផលិតផលក្នុងស្រុក បង្កើនការយល់ដឹងរបស់អ្នកប្រើប្រាស់អំពីគុណភាព តម្លៃ និងស្តង់ដារផលិតផលជាតិ ព្រមទាំងភ្ជាប់ឱកាសទីផ្សាររវាងផលិតករ និងបណ្តាញលក់ទំនិញទំនើប។

យុទ្ធនាការ #MadeInCambodia នឹងអនុវត្តរយៈពេលមួយឆ្នាំពេញ ដោយមានការរៀបចំតាំងលក់ផលិតផលជាតិនៅតាមផ្សារទំនើប ម៉ល ម៉ាត និងមីនីម៉ាតនានាទូទាំងរាជធានី-ខេត្ត។

យោងតាមក្រសួងពាណិជ្ជកម្ម គិតត្រឹមថ្ងៃទី៩ ខែសីហា ឆ្នាំ២០២៦ មានទីតាំងជាង ៧០០កន្លែងបានចូលរួមក្នុងយុទ្ធនាការ «MadeInCambodia» ដែលបង្ហាញពីការចូលរួមកាន់តែទូលំទូលាយរបស់បណ្តាញលក់រាយក្នុងការលើកកម្ពស់ផលិតផលដែលផលិតនៅកម្ពុជា។

យុទ្ធនាការនេះត្រូវបានរៀបចំឡើងក្នុងគោលបំណងពង្រីកការដាក់លក់ផលិតផលជាតិនៅតាមបណ្តាផ្សារទំនើប ម៉ាត និងមីនីម៉ាត ដើម្បីបង្ហាញពីភាពសម្បូរបែប និងគុណភាពនៃផលិតផលដែលផលិតនៅកម្ពុជា ព្រមទាំងបង្កើនឱកាសទីផ្សារសម្រាប់ផលិតករក្នុងស្រុក។

បច្ចុប្បន្ន បណ្តាញផ្សារទំនើប និងហាងលក់ទំនិញជាច្រើនបានចូលរួមយុទ្ធនាការនេះ ដើម្បីរួមចំណែកលើកកម្ពស់ការប្រើប្រាស់ផលិតផលជាតិ និងជំរុញការរីកចម្រើនរបស់សហគ្រាសខ្មែរ៕

អត្ថបទ៖ ប៊ី

តាមដានជាមួយយើង៖ Million Times

second...

x

The post យុទ្ធនាការ #MadeInCambodia បង្ហាញស្មារតីស្រឡាញ់ជាតិ គាំទ្រកសិករ និងផលិតករខ្មែរ ពង្រឹងសេដ្ឋកិច្ចជាតិ appeared first on Millions times.

​ការ​អំពាវនាវ​នេះ​ធ្វើឡើង​នៅ​ព្រឹក​ថ្ងៃទី​១៤​ ​ខែសីហា ​ឆ្នាំ​២០២៦​ ក្នុង​ឱកាស​ដែល​ឯកឧត្តម​បណ្ឌិត​ ​កៅ ​ថា​ច ​ដឹកនាំ​ក្រុមការងារ​ចុះ​ជួប​សំណេះសំណាល ​សួរសុខទុក្ខ​ ​និង​ស្តាប់​ពី​កង្វល់​របស់​ប្រជាកសិករ​នៅ​ក្រុង​ព្រះវិហារ​ ​និង​ស្រុក​ត្បែងមានជ័យ ​ខេត្ត​ព្រះវិហារ ​ដោយ​មាន​ការ​ចូលរួម​ពី​អាជ្ញាធរ​ខេត្ត​ ​ក្រុង​ ​ស្រុក​ មន្ត្រី​ជំនាញ​កសិកម្ម​ ​ក្រុមការងារ​សមាគម​បណ្តាញ​កសិករ​តេជោ ​តំណាង​សមាគម​កសិករ​ និង​ប្រជាពលរដ្ឋ​សរុប​ប្រមាណ​ ​៤៥០​នាក់​។​

ក្នុង​ជំនួប​នេះ​ ​ឯកឧត្តម​បណ្ឌិត​ ​កៅ ​ថា​ច ​បាន​មានប្រសាសន៍​ថា​ ​គោលបំណង​នៃ​ការ​ចុះ​ជួប​កសិករ​គឺ​ ​ដើម្បី​ស្តាប់​បញ្ហា​ពិតប្រាកដ​ដែល​ពួកគាត់​កំពុង​ជួបប្រទះ​ និង​រួមគ្នា​ស្វែងរក​ដំណោះស្រាយ​ ​ដើម្បី​ធ្វើឱ្យ​ការ​ធ្វើ​កសិកម្ម​មាន​ប្រសិទ្ធភាព​ និង​ទទួលបាន​ផលចំណេញ​។

​បញ្ហា​ដែល​កសិករ​កំពុង​ប្រឈម ​រួមមាន​ទីផ្សារ​ តម្លៃ​កសិផល​ ថ្លៃ​ដើម​ផលិតកម្ម​ បច្ចេកទេស ​ការ​ទទួលបាន​ប្រភព​ទុន​ ​និង​បញ្ហា​ផ្សេង​ៗ​ទៀត​ដែល​ពាក់ព័ន្ធ​នឹង​ការ​ផលិត​ ​និង​លក់​កសិផល​។

​បន្ទាប់ពី​ស្តាប់​កង្វល់​របស់​កសិករ​ ​ឯកឧត្តម​បណ្ឌិត​ ​កៅ ​ថា​ច ​បាន​ពន្យល់​ពី​តួនាទី​របស់​សមាគម​បណ្តាញ​កសិករ​តេជោ ​ដែល​ជា​អង្គការ​ក្នុង​ស្រុក​ ​ប្រើប្រាស់​ធនធាន​ផ្ទាល់ខ្លួន​សម្រាប់​អនុវត្ត​សកម្មភាព​ ​និង​មាន​គោលបំណង​ចូលរួម​ជួយ​ដល់​ប្រជាកសិករ​នៅ​ទូទាំង​ប្រទេស​។

​សមាគម​មាន​តួនាទី​សំខាន់​ក្នុង​ការ​ការពារ​ និង​លើកកម្ពស់​ផលប្រយោជន៍​ស្រប​ច្បាប់​របស់​កសិករ​ តាមរយៈ​ការ​ផ្តល់​យោបល់​ ​ការ​សម្របសម្រួល​ និង​ការ​ជួយ​ស្វែងរក​ដំណោះស្រាយ​ចំពោះ​បញ្ហា​នានា​ដែល​កសិករ​កំពុង​ជួបប្រទះ​។

​ជាពិសេស​ សមាគម​បណ្តាញ​កសិករ​តេជោ​មាន​តួនាទី​ធ្វើជា​ស្ពាន​ភ្ជាប់​កសិករ​ទៅកាន់​ប្រភព​ទុន​ ទីផ្សារ​ ​និង​ចំណេះដឹង​បច្ចេកទេស​ តាមរយៈ​ការ​សម្របសម្រួល​ជាមួយ​ស្ថាប័ន​ហិរញ្ញវត្ថុ​ ​និង​ភាគី​ពាក់ព័ន្ធ​។​

សមាជិក​សមាគម​មាន​ទាំង​ជំនាញ​ ​និង​បទពិសោធន៍​ផ្នែក​ទ្រឹស្តី​ ​និង​ការ​អនុវត្ត​ជាក់ស្តែង​លើ​ការ​ដាំដុះ​ ​ការ​ចិញ្ចឹម​សត្វ​ ​ការ​ចិញ្ចឹម​ត្រី​ ​និង​សកម្មភាព​កសិកម្ម​ផ្សេង​ៗ​ទៀត​ ​ដែល​អាច​ចូលរួម​ចែករំលែក​ចំណេះដឹង​ និង​បទពិសោធន៍​ជាមួយ​កសិករ​។

​ឯកឧត្តម​បណ្ឌិត​ ​កៅ ​ថា​ច ​បាន​ណែនាំ​បន្ថែម​ឱ្យ​ប្រជាកសិករ​ស្គាល់​ ​និង​ប្រើប្រាស់​សេវាកម្ម​របស់​ធនាគារ​អភិវឌ្ឍន៍​ជនបទ​ និង​កសិកម្ម​ ​(​ARDB​) ​ដែល​ជា​ធនាគារ​គោលនយោបាយ​របស់​រដ្ឋ​ ​និង​មាន​តួនាទី​ផ្តល់​ហិរញ្ញប្បទាន​គាំទ្រ​ដល់​វិស័យ​កសិកម្ម​។

​សេវា​ហិរញ្ញប្បទាន​របស់​ ​ARDB​ ​ផ្តោត​លើ​សកម្មភាព​ដាំដុះ​ស្រូវ​ ការ​ចិញ្ចឹម​សត្វ ​វារី​វប្បកម្ម​ ​បន្លែ​ ​និង​ការ​កែច្នៃ​ផលិតផល​កសិកម្ម ​ដោយ​មាន​អត្រា​ការ​ប្រាក់​អនុគ្រោះ ​ដើម្បី​ជួយ​គាំទ្រ​ដល់​ប្រជាពលរដ្ឋ​ក្នុង​ការ​ប្រកបរបរ​កសិកម្ម​។

​ការ​ជំរុញ​ឱ្យ​កសិករ​ភ្ជាប់​ជាមួយ​សមាគម​នេះ​ ​ក៏​ស្រប​នឹង​ការ​លើកឡើង​របស់​ឯកឧត្តម​បណ្ឌិត​ ​កៅ ​ថា​ច ​ក្នុង​ការ​ចុះ​ជួប​កសិករ​នៅ​ខេត្ត​ព្រះវិហារ​កាលពី​ថ្ងៃទី​១១​-​១៣​ ​ខែសីហា ​ដែល​បាន​ផ្តោត​លើ​ការ​គ្រប់គ្រង​ថ្លៃ​ដើម​ផលិតកម្ម​ ការ​អនុវត្ត​បច្ចេកទេស​ និង​ការ​គិតគូរ​ពី​ទីផ្សារ​ ​ដើម្បី​ធានា​ថា​ការ​ផលិត​អាច​បង្កើត​ប្រាក់​ចំណេញ​៕

អត្ថបទ៖ ប៊ី

តាមដានជាមួយយើង៖ Million Times

second...

x

The post ឯកឧត្តម​ ​កៅ ​ថា​ច​៖ ​សមាគម​កសិករ​តេជោ ​ជា​ស្ពាន​ទៅកាន់​ប្រភព​ទុន​ ទីផ្សារ​ និង​បច្ចេកទេស appeared first on Millions times.

តាមដានជាមួយយើង៖ Million Times

អ្នកឧកញ៉ា ម៉ុង ឬទ្ធី អគ្គនាយក ក្រុមហ៊ុន ម៉ុង ឫទ្ធី គ្រុប ​បានឱ្យដឹងថា នៅថ្ងៃទី១៧ ខែមករា ឆ្នាំ២០២៦នេះ អ្នកឧកញ៉ា បានដឹកនាំកិច្ចប្រជុំ​បូក​សរុប​លទ្ធផល​ដែល​សម្រេច​បាន​ឆ្នាំ២០២៥​ និងទិសដៅ​អភិវឌ្ឍន៍​បន្ត​សម្រាប់​ឆ្នាំ​២០២៦ លើការ​វិនិយោគ​ក្នុង​វិស័យ​កសិកម្ម​ កសិឧស្សាហកម្ម​ ដាំដំណាំ​ និងចិញ្ចឹមសត្វ​ រោងចក្រ​កែច្នៃ​ចំណីសត្វ​ ស្ថិត​ក្រោម​ឱវាទ​របស់​ក្រុមហ៊ុន​ម៉ុង​ ឫទ្ធី ​គ្រុប​។

អ្នកឧកញ៉ា បានបញ្ជាក់ថា «សំខាន់បំផុតក្នុង​ឆ្នាំ២០២៦​នេះ​ ក្រុមហ៊ុន ​ត្រូវ​តែ​បង្កើន​ការ​ប្រមូល​ទិញ​កសិផល​ពី​កសិករ​ឱ្យបាន ក្នុង​កម្រិត​ចន្លោះពី៤០ ទៅ ៥០លាន​ដុល្លា​សហរដ្ឋអាមេរិក​ សម្រាប់​យកមក​ចូល​រោងចក្រ​កែច្នៃ​ផលិតជា​ចំណីសត្វ​»។

កាលពីថ្ងៃទី៦ ខែវិច្ឆិកា ឆ្នាំ២០២៥កន្លងទៅនេះ អ្នកឧកញ៉ា ម៉ុង ឬទ្ធី បានឱ្យដឹងថា តាំង​នាមអ្នកឧកញ៉ា​​ ជាអ្នកមាន​បទពិសោធ​ធ្វើ​ពាណិជ្ជកម្ម​លើ​វិស័យ​ កសិកម្ម​ កសិ-ឧស្សាហកម្ម​ អស់រយៈ​ពេល​ជាង​៣០ឆ្នាំ​កន្លមកហើយ​ រហូតមក​ដល់ពេល​បច្ចុប្បន្ន​នេះ ​ក៏នៅតែបន្ត​ប្រកប​មុខរបរ​នេះ​ដោយមិនបោះបង់​ បើទោះបីជា​ត្រូវ​ជួបឧបសគ្គ​តូចធំ​យ៉ាង​ណាក្ដី​ ចំពោះរឿង​កសិផល​ឡើងថ្លៃ​ចុះថ្លៃ​វាជារឿង​ធម្មតា​របស់​ពិភពលោក​នេះ​ទៅហើយ។

អ្នកឧកញ៉ា បានបន្ថែមថា គេមិន​អាច​ស្តី​បន្ទោសបង្អាប់​បង្ខូចកេរ្ដិ៍ឈ្មោះ​អ្នកណាបានទេ​ បើ​ចំពោះ​រាជរដ្ឋាភិបាល​ ចង់ឱ្យតែ​ប្រជាជន​លក់កសិផល​បាន​តម្លៃ​ថ្លៃទេ​ និយាយដោយឡែកជាបន្តបន្ទាប់​រហូតមកដល់ពេល​បច្ចុប្បន្ន​នេះ​ អ្នកឧកញ៉ា ​បានជួយ​ប្រមូលទិញ​កសិផល​ដូចជាពោត​ ដំឡូងមី​ កន្ទក់​ ចុង​អង្ករ​ ពេលខ្លះ​ជួយទិញ​ស្រូវស្រាល​ យកមកិន​ជា​សម្រូប​ពី​កសិករ​។

អគ្គនាយកក្រុមហ៊ុន ម៉ុង ឫទ្ធី គ្រុប ដដែល បានបន្ថែមថា ក្រុមហ៊ុនរបស់ខ្លួន ត្រូវចំណាយប្រមាណជាង ​៤០លាន​ដុល្លារ​អាមេរិក​ជារៀងរាល់ឆ្នាំ​ ដើម្បីប្រមូលទិញកសិផលសំខាន់ៗពីប្រជាកសិករ សម្រាប់​យកទៅ​ចូលរោងចក្រ​កែច្នៃ​ធ្វើ​ជា​ចំណី​សត្វ​ ដោយមាន​សាយឡូ ​និងឃ្លាំង​សម្រាប់ស្តុក​គ្រាប់​ធញ្ញជាតិ​ប្រមាណ​១០០ ០០០សែនតោន​៕

អត្ថបទ៖ វីរៈ រូបភាព៖ អ្នកឧកញ៉ា ម៉ុង ឬទ្ធី

second...

x

The post អ្នកឧកញ៉ា ម៉ុង ឬទ្ធី នឹងបង្កើន​ការ​ប្រមូល​ទិញ​កសិផល​ពីកសិករ​​ចន្លោះពី ​៤០ ទៅ៥០លាន​ដុល្លារ ក្នុងឆ្នាំ២០២៦នេះ appeared first on Millions times.

តាមដានជាមួយយើង៖ Million Times

ជំនួយនេះ គឺសម្រាប់គាំទ្រជាទុនបដិភាគ ដល់ការទិញឧបករណ៍សម្ភារៈផលិតកម្មកូនជ្រូក និងជ្រូកសាច់ ដូចជា៖ សម្ភារៈសាងសង់ទ្រុងជ្រូក ម៉ាស៊ីនវ៉ៃកន្ទក់ ម៉ូទ័រហាន់ដើមចេក ម៉ូទ័របូមទឹក សម្ភារៈដាក់ចំណីជ្រូក និងមេ-បាជ្រូក។ នេះបើតាមការឱ្យដឹងពីឯកឧត្តម ឃឹម ហ្វីណង់ អនុរដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ នៅថ្ងៃទី ១២ ខែតុលានេះ។  

ឯកឧត្តម ឃឹម ហ្វីណង់ ឱ្យដឹងបន្តថា តាមរយៈផែនការពង្រឹងសមត្ថភាពផលិតកម្ម និងបង្កើនប្រសិទ្ធភាពសេដ្ឋកិច្ច ដែលគាំទ្រដោយគម្រោង CASDP សហគមន៍ដែលមានសមាជិកភាគច្រើនជាស្ត្រីនេះ គ្រោងនឹងផលិតកូនជ្រូកយ៉ាងតិច ២ ០០០ក្បាល និងជ្រូកសាច់ជិត ៧ ០០០ ក្បាល ក្នុងរយៈពេល ៣ឆ្នាំខាងមុខ។

មន្ត្រីជាន់ខ្ពស់ក្រសួងកសិកម្ម បានបន្ថែមថា សហគមន៍ខាងលើនេះ ក៏គ្រោងនឹងប្រែក្លាយខ្លួនទៅជាសហគមន៍កសិកម្មទំនើបក្នុងពេលអនាគត ដោយសិក្សាពិនិត្យលទ្ធភាពទិញធាតុចូលរួមគ្នា ផលិតពូជកូនជ្រូករួមគ្នា ដើម្បីផ្គត់ផ្គង់ដល់សមាជិកយកទៅចិញ្ចឹម និងចុះកិច្ចសន្យាតភ្ជាប់ទីផ្សារទុកជាមុន ផងដែរ។

លោក សុខ សុថា ប្រធានសមាគមសហព័ន្ធកសិករកម្ពុជានៃអ្នកផលិតកសិកម្ម មានប្រសាសន៍ប្រាប់ Million Times ដោយរំលឹកថា កន្លងមកសមាគមរបស់លោក ក៏ធ្លាប់បានធ្វើការងារជាមួយកសិករអ្នកចិញ្ចឹមជ្រូកមួយចំនួនដែរ ដោយជួយបណ្ដុះបណ្ដាលលើបច្ចេកទេសចិញ្ចឹមជ្រូក និងការរៀបចំទ្រុង ក៏ដូចជាបានជួយលើការផ្ដល់ទុនបង្វិលជូនពួកគាត់ ដែរ។

ប្រធានសមាគមរូបនេះ កត់សម្គាល់ឃើញថា កសិករអ្នកចិញ្ចឹមជ្រូក បានយកចិត្តទុកដាក់ជាងមុនទៅលើការចិញ្ចឹម បើប្រៀបធៀបនឹង ២០ឆ្នាំមុន ដោយបច្ចុប្បន្នពួកគាត់ចប់ការចិញ្ចឹមមួយវគ្គបន្តទៅមួយវគ្គទៀត ដែលជាលក្ខណៈវិលជុំ។ ចំពោះការផ្ដល់ជំនួយដល់កសិករអ្នកចិញ្ចឹមជ្រូក តាមរយៈតាមរយៈគម្រោងពិពិធកម្មកសិកម្មកម្ពុជា(CASDP) គឺអាចជួយបង្កើនការចិញ្ចឹមជ្រូកកាន់តែច្រើន ហើយក៏នឹងធ្វើឱ្យមានអ្នកចិញ្ចឹមកាន់តែច្រើនដែរ។

លោក សុខ សុថា បន្ថែមថា «បើមានការគាំទ្រជាជំនួយឧបត្ថម្ភពីគម្រោង ឬក៏រាជរដ្ឋាភិបាលបន្ថែមទៀត គឺកាន់តែមានលំនឹង និងនិរន្តភាព ក្នុងការចិញ្ចឹមសម្រាប់ផ្គត់ផ្គង់ទីផ្សារ ហើយជាចំណូលរបស់កសិករ សម្រាប់ប្រចាំឆ្នាំ»។

យ៉ាងណាក៏ដោយ អ្នកជំនាញកសិកម្មរូបនេះ លើកឡើងថា ក្រសួង-ស្ថាប័នពាក់ព័ន្ធ ត្រូវយកចិត្តទុកដាក់ពីបញ្ហាទីផ្សារ ដោយធ្វើយ៉ាងណាឱ្យមានទីផ្សារវិលជុំតាមការចិញ្ចឹមពេញមួយឆ្នាំ ដែលនេះជាការលើកទឹកចិត្តដ៏ធំមួយសម្រាប់ប្រជាកសិករ៕

អត្ថបទ៖ វីរៈ រូបភាព៖ ឯកឧត្តម ឃឹម ហ្វីណង់

second...

x

The post កសិករចិញ្ចឹមជ្រូក ៣៨គ្រួសារ ទទួលបានជំនួយថវិកាជាង ៣ម៉ឺនដុល្លារ សម្រាប់គាំទ្រជាទុនបដិភាគ appeared first on Millions times.

លោក គន់ គីម អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ លោក ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម និងលោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានជួបជាមួយប្រជាកសិករដោយផ្ទាល់ នៅទីតាំងដែលជួបប្រទះបញ្ហាខ្វះខាតទឹកសម្រាប់ស្រោចស្រពស្រូវរដូវប្រាំង។

តាមដានជាមួយយើង៖ Million Times

លោក ឃឹម ហ្វីណង់ អ្នកនាំពាក្យក្រសួងកសិកម្មរុក្ខាប្រមាញ់ និងនេសាទ បានឲ្យដឹងថា ករណីខ្វះខាតទឹកបង្កបង្កើនផលនៅឃុំកណ្តឹង ស្រុកបាទី ខេត្តតាកែវ ដែលបណ្តាលមកពីការធ្វើស្រែប្រាំងលើសពីសមត្ថភាពផ្គត់ផ្គង់ទឹកនិងការជួសជុលប្រឡាយ ត្រូវបានដោះស្រាយបញ្ចប់ដោយទេសរដ្ឋមន្ត្រី គន់ គីម, រដ្ឋមន្ត្រីក្រសួងកសិកម្ម និងរដ្ឋមន្ត្រីក្រសួងធនធានទឹក។ 

លោកលើកឡើងថា ក្រោមការសម្របសម្រួលពីសំណាក់លោក គន់ គីម ក្រសួងធនធានទឹកបានសម្រេចប្រើប្រាស់ប្រេងដើម្បីបូមយកទឹកពីទន្លេបាទីដាក់ចូលទៅក្នុងប្រឡាុ ដើម្បីជួយអន្តរាគមន៍សង្គ្រោះស្រូវប្រាំង និងដោះស្រាយបញ្ហាប្រឈមចំពោះមុខជូនដល់បងប្អូនកសិករ។ 

បើតាមក្រសួងធនធានទឹក ក្នុងផែនការឆ្នាំ២០២៥ នៅស្រុកបាទី ការបង្កបង្កើនផលស្រូវរដូវប្រាំងមានចំនួន ២ពាន់ហិកតា ក៏ប៉ុន្តែប្រជាពលរដ្ឋបានធ្វើស្រែប្រាំងរហូតដល់ ៤ពាន់ហិកតា ក្នុងពេលដែលប្រភពទឹកជាក់ស្តែងនៅក្នុងមូលដ្ឋានមិនមានគ្រប់គ្រាន់សម្រាប់បម្រើឱ្យការងារបង្កបង្កើនផល ហើយប្រព័ន្ធស្ទឹងព្រែកត្នោតនៅផ្នែកខាងលើតំបន់រលាំងជ្រៃ និងប្រព័ន្ធប្រឡាយបញ្ជូនទឹកចូលអាងទន្លេបាទីបានបិទជាបណ្តោះអាសន្នដើម្បីធ្វើការជួសជុល បណ្តាលឱ្យស្រូវប្រាំងប្រជាពលរដ្ឋប្រឈមមុខនឹងបញ្ហាខ្វះខាតទឹកស្រោចស្រព។ 

ជាដំណោះស្រាយ មន្ទីរធនធានទឹកខេត្តតាកែវ បានអន្តរាគមន៍បូមទឹកពីទន្លេបាទីតាមស្ថានីយទី២២ និងទី២៣ បញ្ចូលក្នុងប្រឡាយមេហនុមាន ដើម្បីសង្គ្រោះស្រូវប្រាំងប្រមាណ ៤ពាន់ហិកតារបស់ប្រជាកសិករចំនួន ៣៥០០គ្រួសារ ក្នុងឃុំក្រាំងធ្នង់ ឃុំពត់សរ ឃុំកណ្តឹង ឃុំចំប៉ី ឃុំត្រពាំងសាប ឃុំចំបក់ ឃុំដូង ឃុំពារាម និងឃុំត្នោត ស្រុកបាទី ខេត្តតាកែវ។ 

ជាមួយគ្នានេះ ក្រសួងធនធានទឹករៀបចំបូមទឹកពីស្ទឹងព្រែកត្នោតបញ្ជូនតាមប្រឡាយ ៧៨ ចូលក្នុងអាងទឹកទន្លេបាទី ហើយបញ្ជូនបន្តតាមប្រឡាយមេហនុមាន ដើម្បីទៅស្រោចស្រពផ្ទៃដីស្រូវប្រាំងដែលកំពុងប្រឈមនឹងការខ្វះខាតទឹក៕

អត្ថបទ៖ សាងតេជៈ រូបភាព៖ ក្រសួងធនធានទឹក

second...

x

The post ស្រូវស្រែកសិករ ៤ពាន់ហិកតានៅស្រុកបាទីមានក្តីសង្ឃឹមរស់ឡើងវិញ ក្រោយបិទផ្លូវអស់មួយព្រឹក appeared first on Millions times.