កសិកម្មទំនើប Archives - Millions times

ក្រសួងកសិកម្មទម្លាក់ទុន ៥ លានដុល្លារ និងឲ្យកសិករដាំពូជស្រូវសែនក្រអូបវិញ តម្លៃ ១៣០០៛/គីឡូក្រាម

Vin Chang — Tue, 14 Jan 2025 09:24:22 +0000

បច្ចុប្បន្នទីផ្សារស្រូវ អូអឹម កំពុងធ្លាក់ថ្លៃខ្លាំង ក្រោយពីខាងវៀតណាមដែលជាអ្នកប្រមូលទិញ ក៏កំពុងធ្លាក់តម្លៃដូចគ្នា ធ្វើឲ្យប៉ះពាល់ដល់កសិករកម្ពុជា ដាំដុះពូជស្រូវប្រភេទនេះមែនទែន។

តាមដានជាមួយយើង៖ Million Times

ជាមួយដំណោះស្រាយ ក្រសួងកសិកម្ម រុក្ខាប្រមាញ់ និងនេសាទ បានប្រកាស និងណែនាំកសិករងាកមកធ្វើស្រូវជាលក្ខណៈសហគមន៍វិញ ហើយដាំស្រូវកម្ពុជាសែនក្រអូបដែលកំពុងមានទីផ្សារស្រាប់។ ដូចដែលប្រជាកសិករមកពីឃុំអូរកន្ទរ និងឃុំស្រយ៉ូវ ស្រុកកំពង់ស្វាយ ខេត្តកំពង់ធំ ស្ម័គ្រចិត្តរួមគ្នាជាមួយឃុំកំពង់គោ ដើម្បីក្លាយជាសហគមន៍កសិកម្មទំនើបខ្នាតធំ ផលិតស្រូវសែនក្រអូបរបស់កម្ពុជាលើផ្ទៃដី ៥០០០ ហិកតា ក្នុងតម្លៃកុងត្រាទុកជាមុនចាប់ពី ១៣០០៛/គីឡូក្រាមឡើងទៅ។

មិនត្រឹមតែមានតម្លៃកុងត្រាទុកមុនល្អទេ ខាងក្រសួងកសិកម្ម នឹងដាក់ទុនឲ្យសហគមន៍ខ្ចី ក្នុងរង្វង់ ៥ លានដុល្លារ ដោយមិនចាំបាច់ឲ្យកសិករជាសមាជិកពិបាកជាប់បំណុលគេ ឬត្រូវដាក់ទុនដោយខ្លួនឯងឡើយ។ នេះគឺជាដំណោះស្រាយបន្ទាន់របស់ថ្នាក់ដឹកនាំព្យាយាមផ្ដល់ជូនប្រជាកសិករយើង ដែលធ្លាប់តែដាំពូជស្រូវរបស់ប្រទេសវៀតណាម ហើយកំពុងពិបាករកទីផ្សារ និងមិនទទួលបានតម្លៃល្អ។

ក្នុងនោះថ្នាក់ដឹកនាំ អំពាវនាវថា បើអាណិតកសិករយើង ហើយពិតជាចង់ជួយដោះស្រាយបញ្ហាជូនពួកគាត់មែន សូមជួយផ្សព្វផ្សាយឲ្យកសិករងាកមករួមគ្នាជាសហគមន៍ និងដាំពូជអង្ករក្រអូបរបស់ខ្មែរ ជាជាងការនៅតែបន្តដាំពូជរបស់គេ ដែលពិបាកទាំងទីផ្សារ ពិបាកទាំងការអន្តរាគមន៍ជួយពេលមានបញ្ហា។

នេះជាពេលខ្មែរយើងត្រូវចេះរួមគ្នា ទទួលស្គាល់ឫសគល់នៃបញ្ហា ចាប់យកទីផ្សារមកទុកក្នុងកណ្ដាប់ដៃរបស់យើង ហើយរៀនម្ចាស់ការលើជោគវាសនារបស់ខ្លួនដោយខ្លួនឯងហើយ៕

អត្ថបទ៖ មេរ៉ា, រូបភាព៖ ឃឹម ហ្វីណង់

The post ក្រសួងកសិកម្មទម្លាក់ទុន ៥ លានដុល្លារ និងឲ្យកសិករដាំពូជស្រូវសែនក្រអូបវិញ តម្លៃ ១៣០០៛/គីឡូក្រាម appeared first on Millions times.

រដ្ឋមន្រ្តី៣ក្រសួងមូរដៃអាវធ្វើការរួមគ្នា ជំរុញវិស័យកសិកម្មទំនើប និងកែលម្អជីវភាពសហគមន៍តាមមូលដ្ឋាន

Vin Chang — Thu, 19 Sep 2024 06:34:34 +0000

នៅព្រឹកថ្ងៃព្រហស្បតិ៍ ទី១៩ ខែកញ្ញានេះ រដ្ឋមន្រ្តីចំនួន ៣ក្រសួង គឺក្រសួងធនធានទឹក និងឧតុនិយម ក្រសួងកសិកម្ម រុក្ខាប្រមាញ់ និងនេសាទ និងក្រសួងអភិវឌ្ឍន៍ជនបទ បានរួមគ្នាដឹកនាំកិច្ចប្រជុំអន្តរក្រសួងលើកទី២ ស្ដីពីការសម្របសម្រួលការអនុវត្តកម្មវិធីនយោបាយ និងសកម្មភាពដែលពាក់ព័ន្ធនឹងសហគមន៍កសិកម្មទំនើប សហគមន៍កសិករប្រើប្រាស់ទឹក និងភូមិគំរូ ដើម្បីជំរុញឱ្យមានកិច្ចសហការជិតស្និទ្ធ បង្កើនប្រសិទ្ធភាព និងសហថាមពល សំដៅគាំទ្រដល់ការលើកកម្ពស់ និងកែលម្អជីវភាពសហគមន៍តាមមូលដ្ឋាន។

កិច្ចប្រជុំអន្តរក្រសួងលើកទី១ កាលពីថ្ងៃទី៦ ខែឧសភាកន្លងទៅនៅក្រសួងកសិកម្ម សម្រេចលទ្ធផលរួមគ្នាចំនួនបួនចំណុចគឺ ទី១)កំណត់គោលដៅយុទ្ធសាស្ត្រជាអាទិភាពរបស់ក្រសួងទាំងបី ដោយដាក់កម្លាំងនិងធនធានរួមគ្នាដើម្បីសហការអនុវត្តឱ្យបានជោគជ័យ ទី២)ប្រឹក្សាយោបល់ជាមួយគ្នាតាមជំនាញនិងវិស័យរៀងៗខ្លួនឱ្យបានទៀងទាត់និងជាប់លាប់ ដើម្បីបង្ការ និងទម្លុះនូវភាពរាំងស្ទះទាំងឡាយ ដើម្បីឈានទៅសម្រេចបាននូវគោលដៅដែលបានកំណត់ ទី៣)ផ្សារភ្ជាប់គម្រោងនិងកម្មវិធីនយោបាយដែលពាក់ព័ន្ធនឹងសហគមន៍កសិកម្មទំនើប សហគមន៍កសិករប្រើប្រាស់ទឹក និងភូមិគំរូ ធ្វើយ៉ាងណាជួយដល់ប្រជាពលរដ្ឋនៅតាមមូលដ្ឋានឱ្យទទួលបានអត្ថប្រយោជន៍ជាអតិបរមា និងទី៤) ឯកភាពជាគោលការណ៍បង្កើតក្រុមការងារអន្តរក្រសួង ដើម្បីធ្វើការរួមគ្នាជាប់លាប់ និងដាក់ចេញនូវរបបប្រជុំទៀងទាត់រៀងរាល់បីខែម្ដង ដើម្បីតាមដានការងារដែលបានដាក់ចេញ និងកំណត់ផែនការអនុវត្តការងារបន្ត។

តាមដានជាមួយយើង៖ Million Times

សូមបញ្ជាក់ថា កិច្ចប្រជុំអន្តរក្រសួងលើកទី២ នាពេលនេះគឺដើម្បីពិនិត្យ និងពិភាក្សា៖ ទី១)របាយការណ៍វឌ្ឍនភាពការងារនិងរបាយការណ៍សង្ខេបលទ្ធផលកិច្ចប្រជុំលើកដំបូង ទី២)ការរៀបចំបង្កើតលេខាធិការដ្ឋានសម្រាប់គាំទ្រដល់ដំណើរការក្រុមការងារអន្តរក្រសួង និងសេចក្តីព្រាងលក្ខខណ្ឌការងារ(ToR) របស់លេខាធិការដ្ឋាន និងទី៣)លក្ខខណ្ឌវិនិច្ឆ័យរួម និងការកំណត់តំបន់គោលដៅអនុវត្តសកម្មភាពដែលមានលក្ខណៈសម្របសម្រួល សមាហរណកម្មគ្នា សំដៅជួយដល់សហគមន៍គោលដៅតាមមូលដ្ឋាន(MAC/FWUC/MV) ឱ្យទទួលបានអត្ថប្រយោជន៍ជាអតិបរិមា និងជំហានបន្ទាប់។

លោក ឃឹម ហ្វីណង់ អ្នកនាំពាក្យក្រសួងកសិកម្មរុក្ខាប្រមាញ់ និងនេសាទ បានលើកឡើងបណ្តាញសង្គមថា មានពេលខ្លះ គ្រាន់តែអង្គុយផឹកកាហ្វេមួយកែវជុំគ្នា ក៏អាចសម្រេចការងារធំបាន។ លោកថា ម្តងហើយម្តងទៀត យើងតែងឃើញរដ្ឋមន្ត្រីទាំង៣ដើរជុំគ្នាក្នុងអាណត្តិថ្មីនេះ មូរដៃអាវធ្វើការរួមគ្នា ដោយមិនប្រកាន់ក្រសួង មិនរើសទីកន្លែង នៅស្រែក៏បាន នៅហាងកាហ្វេក៏បាន ឱ្យតែការងារទៅមុខ មិនចាំបាច់តែនៅក្នុងបន្ទប់ប្រជុំនោះទេ៕

អត្ថបទ៖ សាងតេជៈ រូបភាព៖ ក្រសួងធនធានទឹក

The post រដ្ឋមន្រ្តី៣ក្រសួងមូរដៃអាវធ្វើការរួមគ្នា ជំរុញវិស័យកសិកម្មទំនើប និងកែលម្អជីវភាពសហគមន៍តាមមូលដ្ឋាន appeared first on Millions times.