ការលើកឡើងយ៉ាងដូច្នេះ គឺនៅក្នុងជំនួបពិភាក្សាការងាររវាងសម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា ជាមួយលោកឯកអគ្គរដ្ឋទូត Jamieson Greer តំណាងពាណិជ្ជកម្មសហរដ្ឋអាមេរិក នៅរដ្ឋធានីវ៉ាស៊ីនតោន សហរដ្ឋអាមេរិក កាលពីរសៀលថ្ងៃទី១៨ ខែកុម្ភៈ។  

តាមដានជាមួយយើង៖ Million Times

នៅក្នុងជំនួបនេះ លោកឯកអគ្គរដ្ឋទូត Jamieson Greer បានវាយតម្លៃខ្ពស់ចំពោះការខិតខំប្រឹងប្រែងរបស់កម្ពុជា ដែលបានជំរុញឱ្យទំនាក់ទំនងទ្វេភាគី អាមេរិក-កម្ពុជា កាន់តែរីកចម្រើនជាលំដាប់ ជាពិសេសនៅក្នុងវិស័យពាណិជ្ជកម្ម។

លោកថា ជាក់ស្ដែង ពាណិជ្ជកម្មទ្វេភាគី អាម៉េរិក-កម្ពុជា បន្តកើនឡើងប្រមាណជិត ២៩% ក្នុងឆ្នាំ២០២៥ បើធៀបនឹងទំហំពាណិជ្ជទ្វេភាគីក្នុងឆ្នាំ២០២៤ ស្របពេលដែលការវិនិយោគរបស់សហរដ្ឋអាមេរិកនៅកម្ពុជាក៏កើនឡើងគួរឱ្យកត់សម្គាល់ ដែលនេះជាផ្លែផ្កានៃការជឿទុកចិត្តនៅក្នុងកិច្ចសហប្រតិបត្តិការរវាងប្រទេសទាំងពីរ។ 

ចំណែកសម្ដេចធិបតីនាយករដ្ឋមន្ត្រី បានវាយតម្លៃខ្ពស់ចំពោះកិច្ចខិតខំប្រឹងប្រែងរបស់ក្រុមការងារទទួលបន្ទុកផ្នែកពាណិជ្ជកម្មរបស់សហរដ្ឋអាមេរិកក្នុងការចរចា និងឈានដល់សម្រេចបាននូវកិច្ចព្រមព្រៀងពាណិជ្ជកម្មបដិការរវាងកម្ពុជា និងអាមេរិក ដែលសម្រេចបានអត្រាពន្ធក្នុងរង្វង់ ១៩% លើការនាំចូលទំនិញរបស់កម្ពុជាចូលសហរដ្ឋអាម៉េរិក។

ជាមួយគ្នានេះ សម្ដេចធិបតី និងលោកឯកអគ្គរដ្ឋទូត Jamieson Greer ក៏បានសម្ដែងនូវសុទិដ្ឋិនិយមថា ក្រោមការខិតខំប្រឹងប្រែងរវាងប្រទេសទាំងពីរ, ទំនាក់ទំនង កម្ពុជា-អាមេរិក នឹងកាន់តែប្រសើរឡើង ជាពិសេសជំរុញឱ្យមានកំណើនពាណិជ្ជកម្មទ្វេភាគី និងកំណើនការវិនិយោគរបស់សហរដ្ឋអាមេរិកនៅកម្ពុជា។

បន្ថែមលើនេះ សម្ដេចធិបតី បានបញ្ជាក់ជូនលោកឯកអគ្គរដ្ឋទូត Jamieson Greer ថា កម្ពុជានឹងបន្តខិតខំប្រឹងប្រែងដើម្បីបញ្ចប់នូវការបំពេញនិតីវិធីនានា សំដៅជំរុញការអនុវត្តពេញលេញនូវកិច្ចព្រមព្រៀងពាណិជ្ជកម្មបដិការរវាងប្រទេសទាំងពីរ សម្រាប់ជាឧត្តមប្រយោជន៍ដល់ប្រជាជាតិទាំងពីរ៕

អត្ថបទ៖ វីរៈ រូបភាព៖ បណ្ដាញសង្គមសម្ដេចធិបតី

The post អាមេរិក វាយតម្លៃខ្ពស់ចំពោះការខិតខំរបស់កម្ពុជា ក្នុងការជំរុញឱ្យទំនាក់ទំនងទ្វេភាគីកាន់តែរីកចម្រើន appeared first on Millions times.

តាមដានជាមួយយើង៖ Million Times

ការលើកឡើងនេះ បានធ្វើឡើងក្នុងជំនួបរវាងឯកឧត្តម ឆៃ ស៊ីណារិទ្ធ ទេសរដ្ឋមន្ត្រីទទួលបន្ទុកបេសកកម្មពិសេស និងជាប្រធានលេខាធិការដ្ឋានគណៈកម្មការប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា (គ.ប.ឆ.ប.) ជាមួយលោក  Scott Schelble ឧបការីរង នៃអង្គភាពប្រតិបត្តិការអន្តរជាតិរបស់FBI និងសហការី កាលពីរសៀលថ្ងៃទី៤ ខែកុម្ភៈ។

នៅក្នុងជំនួបនេះ ឯកឧត្ដមទេសរដ្ឋមន្ត្រី ឆៃ ស៊ីណារិទ្ធ បានវាយតម្លៃខ្ពស់ចំពោះកិច្ចសហប្រតិបត្តិការរវាងប្រទេសកម្ពុជា និងសហរដ្ឋអាមេរិក ហើយជំនួបក្នុងថ្ងៃនេះជាឱកាសដើម្បីចែករំលែក និងផ្លាស់ប្តូរទស្សនៈក្នុងការប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា កាន់តែមានប្រសិទ្ធភាពខ្ពស់។

ឯកឧត្តម បានគូសបញ្ជាក់ថា កិច្ចខិតខំប្រឹងប្រែងក្នុងការប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យាក្រោមយន្តការរបស់គ.ប.ឆ.ប. ដែលមានសម្តេចធិបតីនាយករដ្ឋមន្រ្តី ជាប្រធាន បានបង្ហាញលទ្ធផលជាផ្លែផ្កា ទោះបីកម្ពុជាប្រឈមនឹងសង្រ្គាមនៅតាមបណ្តោយព្រំដែនកម្ពុជា-ថៃ ក៏ដោយ។

ឯកឧត្ដមទេសរដ្ឋមន្ត្រី បានបញ្ជាក់ទៀតថា រាជរដ្ឋាភិបាលកម្ពុជា បានប្រកាសជំហរក្នុងការប្រយុទ្ធប្រឆាំង និងការបោសសម្អាតការឆបោកតាមប្រព័ន្ធបច្ចេកវិទ្យា ដោយដាក់ចេញនូវវិធានការជំនាញ និងវិធានការច្បាប់យ៉ាងម៉ឺងម៉ាត់បំផុត។ តាមរយៈយន្តការ គ.ប.ឆ.ប. សមត្ថកិច្ចកម្ពុជានឹងបន្តបង្កើនកិច្ចសហប្រតិបត្តិការជាមួយដៃគូអន្តរជាតិ ជាលក្ខណៈទ្វេភាគី ឬពហុភាគី ដើម្បីស្រាវជ្រាវឱ្យដល់ឫសគល់នៃបណ្តាញ និងហិរញ្ញវត្ថុ របស់បណ្តាញឧក្រិដ្ឋជន។

ជាកិច្ចឆ្លើយតប លោក Scott Schelble ឧបការីរង នៃអង្គភាពប្រតិបត្តិការអន្តរជាតិរបស់ FBI បានកោតសរសើរ និងអំណរគុណដល់រាជរដ្ឋាភិបាល ក៏ដូចជាសមត្ថកិច្ចកម្ពុជា ដែលបានយកចិត្តទុកដាក់លើការប្រយុទ្ធប្រឆាំង Online Scams ចេញជាលទ្ធផលជាក់ស្តែងជាច្រើនក្រោមយន្តការ គ.ប.ឆ.ប.។

លោកឧបការីរង បានទទួលស្គាល់ថា ការឆបោកតាមប្រព័ន្ធបច្ចេកវិទ្យាជាបញ្ហាសកល និងស្មុគស្មាញ ដោយប្រទេសជាច្រើនជួបប្រទះបញ្ហានេះ ពោលមិនមែនកម្ពុជាតែមួយទេ។ លោកឧបការីរងបានសង្កត់ធ្ងន់ថា ចំណាត់ការនិងលទ្ធផលរបស់ គ.ប.ឆ.ប. បង្ហាញថា កម្ពុជាមិនមែនជាកន្លែងលាក់ខ្លួនរបស់ក្រុមឆបោកតាមប្រព័ន្ធបច្ចេកវិទ្យាទេ។

លោក ក៏បានគូសបញ្ជាក់បន្ថែមថា ការប្រយុទ្ធប្រឆាំងនឹងការឆបោកនេះតម្រូវឱ្យមានដៃគូនិងកិច្ចសហប្រតិបត្តិការទ្វេភាគី ឬពហុភាគី។ ក្នុងន័យនេះ លោកឧបការីរងបានបង្ហាញនូវឆន្ទៈច្បាស់លាស់ ក្នុងការបន្តនិងពង្រឹងកិច្ចសហប្រតិបត្តិការរវាង FBI និង គ.ប.ឆ.ប. ។

ក្នុងនោះដែរ ភាគីទាំងពីរបានពិភាក្សា និងផ្លាស់ប្តូរទស្សនៈពាក់ព័ន្ធជំហានបន្ទាប់ក្នុងការបន្តកិច្ចសហប្រតិបត្តិការរវាង គ.ប.ឆ.ប. និងFBI រួមទាំងការកសាងសមត្ថភាព ក្នុងភាពជាដៃគូ ក្នុងការប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា៕

អត្ថបទ៖ វីរៈ រូបភាព៖ គ.ប.ឆ.ប.

The post ឧបការីរង FBI៖ កម្ពុជាមិនមែនជាកន្លែងលាក់ខ្លួនរបស់ក្រុមឆបោកតាមប្រព័ន្ធបច្ចេកវិទ្យាទេ appeared first on Millions times.

តាមដានជាមួយយើង៖ Million Times

តាមរយៈគណនីហ្វេសប៊ុករបស់ខ្លួន នៅថ្ងៃទី២៩ ខែមករានេះ លោក Casey Barnett បានឱ្យដឹងថា នៅឆ្នាំ ២០២៥ ការនាំចេញរបស់កម្ពុជាទៅសហរដ្ឋអាមេរិក បានកើនឡើង ២៨% ដល់ ១២.៧ ពាន់លានដុល្លារ។ ការកើនឡើងដែលគួរឱ្យកត់សម្គាល់ រួមមាន៖ ការនាំចេញស្បែកជើង ដែលកើនឡើង ៥២% ដល់ ៨៦៩ លានដុល្លារ និងការនាំចេញសំបកកង់ ដែលកើនឡើង ៤៥% ដល់ ១.១ ពាន់លានដុល្លារ។

ប្រធានសភាពាណិជ្ជកម្មអាមេរិកប្រចាំកម្ពុជា បានបន្ថែមថា តាមលក្ខណៈរដូវកាល ការនាំចេញរបស់កម្ពុជាទៅសហរដ្ឋអាមេរិកជាទូទៅធ្លាក់ចុះនៅត្រីមាសទី៤ ព្រោះអ្នកលក់រាយអាមេរិកស្តុកសំលៀកបំពាក់ច្រើននៅត្រីមាសទី៣ ដើម្បីត្រៀមសម្រាប់រដូវត្រឡប់ទៅសាលារៀន និងរដូវលក់ពេលថ្ងៃបុណ្យចុងឆ្នាំ។

ជាមួយគ្នានេះ លោក Casey Barnett បានកត់សម្គាល់ថា អស់រយៈពេលជាង ២៦ឆ្នាំមកនេះ សហរដ្ឋអាមេរិក បានជាប្រភពចំណូលដែលអាចពឹងផ្អែកបានសម្រាប់កម្ពុជា។

លោក ក៏បានឱ្យដឹងបន្ថែមថា បច្ចុប្បន្ន សហរដ្ឋអាមេរិកកំពុងរង់ចាំឲ្យរដ្ឋសភាកម្ពុជាផ្តល់សច្ចាប័នលើកិច្ចព្រមព្រៀងពាណិជ្ជកម្មទៅវិញទៅមក (reciprocal trade agreement) ដែលបានធ្វើឡើងនៅខែតុលា ឆ្នាំ ២០២៥៕

អត្ថបទ៖ វីរៈ រូបភាព៖ ហ្វេសប៊ុកលោក Casey Barnett

The post លោក Casey Barnett៖ ទីផ្សារអាមេរិកនៅតែជាមូលដ្ឋានដ៏រឹងមាំ និងអាចទុកចិត្តបានសម្រាប់កំណើនសេដ្ឋកិច្ចកម្ពុជា appeared first on Millions times.

ការគូសបញ្ជាក់នេះ គឺស្របពេលដែលសម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានអនុញ្ញាតឱ្យលោកនាយឧត្តមនាវី Samuel Paparo មេបញ្ជាការនៃបញ្ជាការដ្ឋានឥណ្ឌូ-ប៉ាស៊ីហ្វិក នៃសហរដ្ឋអាមេរិក ចូលជួបសម្តែងការគួរសម និងពិភាក្សាការងារ នៅវិមានសន្តិភាព នាថ្ងៃទី២៦ ខែមករានេះ។  

តាមដានជាមួយយើង៖ Million Times

ក្នុងជំនួបនេះ សម្តេចនាយករដ្ឋមន្ត្រី បានជម្រាបជូនលោកនាយឧត្តមនាវី Samuel Paparo ថា កម្ពុជាបានទទួលលិខិតអញ្ញើញរបស់លោកប្រធានាធិបតី ដូណាល់ ត្រាំ ក្នុងការចូលរួម “ក្រុមប្រឹក្សាសន្តិភាព” ដោយសម្ដេច បានបញ្ជាក់ថា «កម្ពុជានឹងចូលរួមក្នុងក្រុមប្រឹក្សាសន្តិភាពនេះ ដែលការណ៍នេះ បានបង្ហាញនូវសុឆន្ទៈ និងការប្តេជ្ញាចិត្តខ្ពស់របស់កម្ពុជាចំពោះសន្តិភាពសកល»។

កាលពីថ្ងៃទី២១ ខែមករាកន្លងទៅនេះ សម្ដេចនាយករដ្ឋមន្ត្រី ហ៊ុន ម៉ាណែត បានបង្ហាញលិខិតរបស់លោក ដូណាល់​ ជេ​ ត្រាំ​ ប្រធានាធិបតី​សហរដ្ឋអាមេរិក​ ជូនចំពោះសម្តេច ដែលអញ្ជើញកម្ពុជាចូលរួមជារដ្ឋសមាជិកស្ថាបនិក​នៃក្រុមប្រឹក្សាសន្តិភាព​ និងជាភាគីនៃធម្មនុញ្ញរបស់ក្រុមប្រឹក្សាសន្តិភាព។

គិតត្រឹមថ្ងៃទី២៥ ខែមករា មានប្រទេសចំនួន ២៥ បានយល់ព្រមចូលរួមក្នុងក្រុមប្រឹក្សាសន្តិភាពរបស់លោក ដូណាល់ ត្រាំ ប្រធានាធិបតីអាមេរិក បន្ទាប់ពីលោកបានចុះហត្ថលេខាលើការបង្កើតធម្មនុញ្ញ នៃក្រុមប្រឹក្សានេះ នៅឯវេទិកាសេដ្ឋកិច្ចពិភពលោកក្នុងទីក្រុង Davos ប្រទេសស្វ៊ីស កាលពីថ្ងៃព្រហស្បតិ៍ ទី២២ ខែមករាកន្លងទៅនេះ។

លោកនាយឧត្តមនាវី Samuel Paparo បានថ្លែងក្នុងជំនួបជាមួយសម្ដេចធិបតីថា លោកពេញចិត្ត និងវាយតម្លៃខ្ពស់ចំពោះវឌ្ឍនភាពនៃទំនាក់ទំនងសហរដ្ឋអាមេរិក-កម្ពុជា ជាពិសេសកិច្ចសហប្រតិបត្តិការលើវិស័យការពារជាតិ។ លោកក៏បានថ្លែងអំណរគុណចំពោះរាជរដ្ឋាភិបាលកម្ពុជា ដែលបានអនុញ្ញាតឱ្យនាវាកងទ័ពជើងទឹកសហរដ្ឋអាមេរិកចូលចតនៅមូលដ្ឋានសមុទ្ររាម ដែលនេះជាសក្ខីភាពឆ្លុះបញ្ចាំងពីការពង្រឹងទំនាក់ទំនងយោធាកាន់តែស៊ីជម្រៅរវាងប្រទេសទាំងពីរ។

ចំណែកសម្តេចបវរធិបតី ក៏បានវាយតម្លៃខ្ពស់ចំពោះកិច្ចសហប្រតិបត្តិការដ៏ល្អប្រសើរលើវិស័យយោធារវាងប្រទេសទាំងពីរនាពេលកន្លងមក និងបានគូសបញ្ជាក់ថា ការចូលចតនៃនាវាជើងទឹកសហរដ្ឋអាម៉េរិកនៅកម្ពុជា នាពេលនេះ គឺជាលទ្ធផលជាក់ស្តែងនៃទំនាក់ទំនងទ្វេភាគីដែលកំពុងរីកចម្រើន។ សម្តេចបវរធិបតី មានជំនឿយ៉ាងមុតមាំថា ទំនាក់ទំនងរវាងប្រទេសទាំងពីរ នឹងត្រូវបានបន្តពង្រឹង និងពង្រីកបន្ថែមទៀត៕

អត្ថបទ៖ វីរៈ រូបភាព៖ ហ្វេសប៊ុកនាយករដ្ឋមន្ត្រី

The post កម្ពុជា នឹងចូលរួមក្នុងក្រុមប្រឹក្សាសន្តិភាព ក្រោយទទួលបានលិខិតអញ្ជើញពីលោក ដូណាល់ ត្រាំ appeared first on Millions times.

តាមដានជាមួយយើង៖ Million Times

តាមរយៈទំព័រហ្វេសប៊ុករបស់ខ្លួន នៅល្ងាចថ្ងៃទី១៥ ខែធ្នូនេះ ស្ថានទូតអាមេរិកប្រចាំកម្ពុជា លើកឡើងថា អាមេរិក មានកិត្តិយសក្រៃលែងក្នុងការប្រារព្ធខួបទី៧៥ ឆ្នាំនៃទំនាក់ទំនងការទូតរវាងសហរដ្ឋអាមេរិក និងកម្ពុជា នៅក្នុងឧទ្យានអង្គរ ដែលនេះជានិមិត្តរូបពិតប្រាកដមួយ នៃប្រវត្តិសាស្ត្រ ភាពរឹងប៉ឹង និងស្មារតីរបស់កម្ពុជា។

ស្ថានទូតអាមេរិក បានឱ្យដឹងបន្តថា ក្នុងពេលដែលប្រារព្ធពិធីបិទបញ្ចប់ខួបទី៧៥ ឆ្នាំនៃទំនាក់ទំនងការទូតរវាងទាំងពីរ គឺបានរំលឹកឡើងវិញនូវអ្វីដែលអាមេរិក និងកម្ពុជា បានសម្រេចរួមគ្នា ដោយអាមេរិកជួយអភិវឌ្ឍសេដ្ឋកិច្ចកម្ពុជា ក្នុងទឹកប្រាក់ចំនួនជាង ៣ពាន់លានដុល្លារ។

ម្យ៉ាងទៀត អាមេរិក ក៏បានជួយអភិរក្សបេតិកភណ្ឌវប្បធម៌កម្ពុជា ក្នុងទឹកប្រាក់ចំនួន ៦លានដុល្លារ ដោយរួមមានប្រាសាទភ្នំបាខែង និងប្រាសាទព្រះវិហារ ហើយក៏បានឧបត្ថម្ភកម្មវិធីផ្លាស់ប្តូរទស្សនកិច្ចសិក្សា ដែលមាននិស្សិតចូលរួមពាន់នាក់ និងផ្សាភ្ជាប់វប្បធម៌របស់យើងទាំងពីរ។

ស្ថានទូតអាមេរិក បានគូសបញ្ជាក់ថា ភាពជាដៃគូរបស់យើងកាន់តែរឹងមាំជាងពេលណាទាំងអស់។ យើងរីករាយនឹងធ្វើការរួមគ្នា ដើម្បីកសាងអនាគតមួយឈរលើការគោរពគ្នា និងគុណតម្លៃរួម»។

កាលពីថ្ងៃទី៨ ខែធ្នូកន្លងទៅនេះ លោកជំទាវ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ និងអ្នកស្រី Bridgette Walker ភារៈធារីនៃស្ថានទូតអាមេរិកប្រចាំកម្ពុជា បានអញ្ជើញជាអធិបតីនៃការប្រារព្ធខួបលើកទី៧៥ឆ្នាំ នៃទំនាក់ទំនងមិត្តភាពរវាងកម្ពុជា និងអាមេរិក នៅប្រាសាទក្រវ៉ាន់ ខេត្តសៀមរាប។

ក្នុងពិធីនោះ អ្នកស្រី Bridgette Walker បានថ្លែងថា ក្នុងរយៈពេល ៧៥ឆ្នាំមកនេះ អាមេរិក និងកម្ពុជា បានក្លាយជាដៃគូ នៃកិច្ចសហប្រតិបត្តិការផ្នែកស៊ីវិលជាច្រើនដូចជា៖ ការជួយលើកកម្ពស់ផ្នែកសុខភាពសាធារណៈ ផ្នែកអប់រំ ជួយជំរុញកំណើនសេដ្ឋកិច្ច ការវិនិយោគទុន ព្រមទាំងកិច្ចសហប្រតិបត្តិការរួមគ្នាផ្នែកយោធា ហើយនិងជួយដល់ការងារអភិរក្សវប្បធម៌ និងសម្បត្តិបេតិកភណ្ឌជាដើម។

ចំណែកលោកជំទាវ ភឿង សកុណា បានថ្លែងថា ទំនាក់ទំនងការទូត និងមិត្តភាពរយៈពេល ៧៥ឆ្នាំមកនេះ បានធ្វើឱ្យកម្ពុជា និងអាមេរិក ក្លាយជាដៃគូនៃកិច្ចសហប្រតិបត្តិការ ព្រមទាំងប្តេជ្ញាចិត្តរួមគ្នាដើម្បីសន្តិភាពនិងការអភិវឌ្ឍន៍។ លោកជំទាវ បន្តថា បេតិកភណ្ឌវប្បធម៌របស់កម្ពុជា គឺជាអរិយធម៌ដ៏អស្ចារ្យមួយរបស់ពិភពលោក ហើយរយៈពេលជាច្រើនទសវត្សរ៍មកនេះអាមេរិក គឺជាដៃគូដ៏មានតម្លៃនៅក្នុងការងារអភិរក្ស៕

អត្ថបទ៖​ វីរៈ រូបភាព៖ ស្ថានទូតអាមេរិក

The post ស្ថានទូតអាមេរិក៖ ភាពជាដៃគូរវាងអាមេរិក និងកម្ពុជា កាន់តែរឹងមាំជាងពេលណាទាំងអស់ appeared first on Millions times.

តាមដានជាមួយយើង៖ Million Times

ការលើកឡើងនេះ ស្របពេលដែលអ្នកស្រី និងលោកជំទាវ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ បានអញ្ជើញជាអធិបតីនៃការប្រារព្ធខួបលើកទី ៧៥ឆ្នាំ នៃទំនាក់ទំនងមិត្តភាពរវាងកម្ពុជានិងសហរដ្ឋអាមេរិក នៅប្រាសាទក្រវ៉ាន់ ខេត្តសៀមរាប នៅរាត្រីថ្ងៃទី៨ ខែធ្នូ ឆ្នាំ២០២៥។

ថ្លែងនៅក្នុងការប្រារព្ធខួប៧៥ឆ្នាំនេះ អ្នកស្រី Bridgette Walker បានលើកឡើងថា ក្នុងរយៈពេល៧៥ឆ្នាំមកនេះ សហរដ្ឋអាមេរិក និងកម្ពុជា បានក្លាយជាដៃគូនៃកិច្ចសហប្រតិបត្តិការផ្នែកស៊ីវិលជាច្រើន ដូចជា ការជួយលើកកម្ពស់ផ្នែកសុខភាពសាធារណៈ ផ្នែកអប់រំ ជួយជំរុញកំណើនសេដ្ឋកិច្ច ការវិនិយោគទុន ព្រមទាំងកិច្ចសហប្រតិបត្តិការរួមគ្នាផ្នែកយោធា ហើយនិងជួយដល់ការងារអភិរក្សវប្បធម៌និងសម្បត្តិបេតិកភណ្ឌជាដើម។

ចំណែកលោកជំទាវ ចារ្យ ភឿង សកុណា រដ្ឋមន្ត្រីក្រសួងវប្បធម៌និងវិចិត្រសិល្បៈ បានថ្លែងថា ទំនាក់ទំនងការទូតនិងមិត្តភាពរយៈពេល ៧៥ឆ្នាំមកនេះ បានធ្វើឱ្យព្រះរាជាណាចក្រកម្ពុជា និងសហរដ្ឋអាមេរិក ក្លាយជាដៃគូនៃកិច្ចសហប្រតិបត្តិការ ព្រមទាំងប្តេជ្ញាចិត្តរួមគ្នាដើម្បីសន្តិភាពនិងការអភិវឌ្ឍន៍។

លោកជំទាវ បានបញ្ជាក់ទៀតថា បេតិកភណ្ឌវប្បធម៌របស់ប្រទេសកម្ពុជា គឺជាអរិយធម៌ដ៏អស្ចារ្យមួយរបស់ពិភពលោក ហើយរយៈពេលជាច្រើនទសវត្សរ៍មកនេះសហរដ្ឋអាមេរិក គឺជាដៃគូដ៏មានតម្លៃនៅក្នុងការងារអភិរក្ស៕

រដ្ឋមន្ត្រីក្រសួងវប្បធម៌ បានបញ្ជាក់ទៀតថា រយៈពេលជាច្រើនឆ្នាំមកហើយ សហរដ្ឋអាមេរិក តាមរយៈអង្គការមូលនិធិប្រាសាទ(WMF) បានជួយលើកិច្ចការអភិរក្សវប្បធម៌ ជាច្រើន ដូចជាការពារសាស្ត្រាស្លឹករឹត សិល្បៈប្រពៃណី ការអប់រំប្រវត្តិសាស្ត្រ និងការជួសជុលប្រាសាទបុរាណនៅភ្នំបាខែង ព្រះខ័ន និងប្រាសាទតាសោម ជាដើម៕

អត្ថបទ៖ វីរៈ រូបភាព៖ ក្រសួងវប្បធម៌

The post ភារៈធារីទូតអាមេរិក៖ អាមេរិក-កម្ពុជា បានក្លាយជាដៃគូនៃកិច្ចសហប្រតិបត្តិការផ្នែកស៊ីវិលជាច្រើន appeared first on Millions times.

តាមដានជាមួយយើង៖ Million Times

ការស្នើនេះ ស្របពេលដែលឯកឧត្ដមឧបនាយករដ្ឋមន្ត្រី បានទទួលជួបសម្តែងការគួរសម និងពិភាក្សាកាងារជាមួយថ្នាក់ដឹកនាំក្រុមហ៊ុន HP កាលពីថ្ងៃទី៤ ខែវិច្ឆិកា នៅទីក្រុងវ៉ាស៊ីងតុន ឌីស៊ី សហរដ្ឋអាមេរិក ដោយជំនួបបានផ្តោតលើការផ្សារភ្ជាប់វិស័យបច្ចេកវិទ្យាកម្ពុជា ទៅនឹងខ្សែច្រវាក់ផ្គត់ផ្គង់សកលរបស់ HP និងការជំរុញយុគសម័យឌីជីថលនៅកម្ពុជា។

នៅក្នុងជំនួបនេះ ឯកឧត្តម​ឧបនាយករដ្ឋមន្ត្រី បាន​គូសបញ្ជាក់​អំពី​ការ​ប្តេជ្ញាចិត្ត​របស់​រាជរដ្ឋាភិបាលកម្ពុជា ​ក្នុង​ការ​ផ្តល់​នូវកញ្ចប់​លើកទឹកចិត្ត​ពិសេស សម្រាប់​ការវិនិយោគ​លើ​ការផលិត​គ្រឿង​បង្គុំ​អេឡិចត្រូនិក ការ​ដំឡើង​ផលិតផលបច្ចេកវិទ្យាព័ត៌មាន(IT) និង​ឧស្សាហកម្ម​ឌីជីថល ដែល​ជា​វិស័យ​អាទិភាព និងជាឯកទេស​របស់ HP។

ជាមួយនឹងកត្តាអំណោយផលជាច្រើនរបស់កម្ពុជា ដូចជាប្រជាជនដែលមានវ័យក្មេង ប្រជាជនដែលមាននិន្នាការខ្ពស់ក្នុងការចាប់យកបច្ចេកវិទ្យាថ្មីៗ និងមានភាពឆ្លាតវៃ ឯកឧត្តមឧបនាយករដ្ឋមន្ត្រី បាន​ស្នើឱ្យ HP ពិនិត្យ​ពិចារណា​បង្កើត​មូលដ្ឋាន​ផលិតកម្ម​នៅ​កម្ពុជា ដើម្បី​ធ្វើពិពិធកម្ម​ខ្សែសង្វាក់​ផ្គត់ផ្គង់​របស់​ខ្លួន​ផងដែរ។

ជាការឆ្លើយតប ថ្នាក់ដឹកនាំ​ក្រុមហ៊ុន HP បាន​សម្តែង​នូវ​ការ​ចាប់អារម្មណ៍​ខ្ពស់​ចំពោះ​វឌ្ឍនភាព​សេដ្ឋកិច្ច​របស់​កម្ពុជា កត្តាអំណោយផលរបស់កម្ពុជា និង​ការ​ប្តេជ្ញាចិត្ត​របស់​រាជរដ្ឋាភិបាលកម្ពុជា ​ក្នុង​ការ​អភិវឌ្ឍ​វិស័យ​បច្ចេកវិទ្យាឌីជីថល។ ក្រុមហ៊ុន​ បានយល់ស្របចំពោះគំនិត ដែលលើកឡើងថា ការ​ធ្វើពិពិធកម្ម​ទីតាំង​ផលិតកម្ម​ គឺជា​យុទ្ធសាស្ត្រ​ដ៏​សំខាន់។ 

ជំនួប​នេះ ​បាន​បើក​ទំព័រ​ថ្មី​មួយទៀត​សម្រាប់​កម្ពុជា ​ក្នុង​ការ​ក្លាយជា​គោលដៅ​វិនិយោគ​ដ៏​ទាក់ទាញ​សម្រាប់​ក្រុមហ៊ុន​បច្ចេកវិទ្យា​លំដាប់​ពិភពលោក ដែល​អាច​ជួយ​លើកកម្ពស់​កម្រិត​ជីវភាព និង​សមត្ថភាព​ប្រកួតប្រជែង​របស់​កម្ពុជា​ក្នុង​តំបន់ ពិសេសគឺចូលរួមពន្លឿនគោលនយោបាយរដ្ឋាភិបាលឌីជីថល និងសេដ្ឋកិច្ចឌីជីថល របស់កម្ពុជាផងដែរ៕

អត្ថបទ៖ វីរៈ រូបភាព៖ ហ្វេសប៊ុកឯកឧត្តម ស៊ុន ចាន់ថុល

The post ឯកឧត្តម ស៊ុន ចាន់ថុល ស្នើឱ្យក្រុមហ៊ុនអាមេរិក HP ពិចារណាបង្កើតមូលដ្ឋានផលិតកម្មនៅកម្ពុជា appeared first on Millions times.

តាមដានជាមួយយើង៖ Million Times

យោងតាមសេចក្ដីប្រកាសព័ត៌មាន របស់អង្គភាពអ្នកនាំពាក្យរាជរដ្ឋាភិបាលកម្ពុជា បានឱ្យដឹងថា កិច្ចប្រជុំនេះ បានវាយតម្លៃខ្ពស់លើវឌ្ឍនភាពជាវិជ្ជមាន នៃការចរចាកិច្ចព្រមព្រៀងពាណិជ្ជកម្មបដិការ និងបានពិភាក្សាអំពីការបង្កើនកិច្ចសហប្រតិបត្តិការពាណិជ្ជកម្មទ្វេភាគី បន្ថែមទៀត។

អង្គភាពអ្នកនាំពាក្យរាជរដ្ឋាភិបាលកម្ពុជា បានឱ្យដឹងបន្តថា រាជរដ្ឋាភិបាលកម្ពុជា ដែលមានសម្តេចមហាបវរធិបតី ហ៊ុន ម៉ាណែត ជា នាយករដ្ឋមន្ត្រី នឹងបន្តធ្វើកិច្ចការងារនេះដោយយកចិត្តទុកដាក់បំផុត។

គួររំលឹកថា កាលពីថ្ងៃទី ៣១ ខែកក្កដា ឆ្នាំ ២០២៥ ប្រទេសកម្ពុជា ទទួលបានអត្រាពន្ធគយបដិការត្រឹម ១៩ភាគរយ ពោលគឺបានចុះពីអត្រាពន្ធគយបដិការដំបូង ដែលមានរហូតដល់ ៤៩ភាគរយ។ លទ្ធផលនៃការកាត់បន្ថយអត្រាពន្ធគយបដិការនេះ សម្រេចបានបន្ទាប់ពីការចរចាយ៉ាងស្វិតស្វាញ ដែលបានប្រព្រឹត្តទៅតាមរយៈប្រព័ន្ធវីដេអូចំនួន ៧លើក និងជួបផ្ទាល់ចំនួន ៣ជុំ។

ឯកឧត្តម ស៊ុន ចាន់ថុល ធ្លាប់បានលើកឡើងកាលពីថ្ងៃទី ១ ខែសីហាថា បើទោះបីជាទទួលបានអត្រាពន្ធ ១៩ភាគរយក៏ដោយ ក៏រាជរដ្ឋាភិបាលនៅតែបន្តចរចាបន្ថែមទៀត ដើម្បីឱ្យបានទាបជាងនេះនៅលើទំនិញផ្សេងៗទៀត ដែលជាទំនិញអាទិភាពរបស់កម្ពុជា។

ឯកឧត្តមឧបនាយករដ្ឋមន្ត្រី បង្ហាញសុទិដ្ឋិនិយមថា សហរដ្ឋអាមេរិក នឹងបន្តបញ្ចុះអត្រាពន្ធដល់ប្រទេសកម្ពុជាបន្ថែមទៀត ស្របពេលដែលកម្ពុជាបានសម្រេចយកពន្ធ ០ភាគរយ ពីទំនិញនាំចូលពីសហរដ្ឋអាមេរិកវិញ៕

អត្ថបទ៖ វីរៈ រូបភាព៖ បណ្ដាញសង្គមឯកឧត្តម ស៊ុន ចាន់ថុល

The post ឧបនាយករដ្ឋមន្ត្រី ស៊ុន ចាន់ថុល ជួបប្រជុំជាមួយតំណាងពាណិជ្ជកម្មអាមេរិក ពិភាក្សាបង្កើនកិច្ចសហប្រតិបត្តិការពាណិជ្ជកម្មទ្វេភាគី appeared first on Millions times.

តាមដានជាមួយយើង៖ Million Times

លោកស្រី Bridgette L. Walker ភារធារីរបស់ស្ថានទូតសហរដ្ឋអាម៉េរិកប្រចាំនៅកម្ពុជា បានលើកឡើងថា ទិវាឯករាជ្យរបស់សហរដ្ឋអាម៉េរិក គឺជាពេលវេលាមួយសម្រាប់ឆ្លុះបញ្ចាំងឱ្យឃើញថា តើសហរដ្ឋអាម៉េរិកបានចេញដំណើរមកពីទីណា ហើយកំពុងមានទិសដៅធ្វើដំណើរទៅកាន់ទីណា។ ជាមួយគ្នានេះ លោកស្រីក៏បានរំលេចអំពីខួបលើកទី ៧៥ នៃទំនាក់ទំនងការទូតកម្ពុជា-អាម៉េរិក ដោយបានបញ្ជាក់ថា នេះគឺជាសក្ខីភាពជាក់ស្តែងនៃមិត្តភាពដ៏រឹងមាំ រវាងសហរដ្ឋអាម៉េរិក និងប្រទេសកម្ពុជា និងបានបញ្ជាក់ជាថ្មីនូវការប្តេជ្ញាចិត្តរួម ក្នុងការបន្តកិច្ចសហប្រតិបត្តិការដើម្បីកសាងអនាគតមួយដែលមានភាព រុងរឿង សន្តិភាព និងការរីកចម្រើនរួមគ្នា។

លោក ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា បានលើកឡើងថា ឆ្នាំនេះគឺជាឆ្នាំដ៏សំខាន់ ដែលយើងរួមគ្នាអបអរខួបលើកទី ៧៥ នៃចំណងទំនាក់ទំនងការទូតរវាងប្រទេសកម្ពុជា និងសហរដ្ឋអាម៉េរិក។ អស់រយៈពេលជាច្រើនទសវត្សរ៍កន្លងមកនេះ ប្រទេសជាតិយើងទាំងពីរបានកសាងនូវភាពជាដៃគូយ៉ាងរឹងមាំ និងកាន់តែស្អិតរមួត ដោយផ្អែកលើគោលការណ៍នៃការគោរពគ្នាទៅវិញទៅមក និងសហប្រតិបត្តិការល្អ។ ទំនាក់ទំនងទ្វេភាគីនេះ បាននិងកំពុងបន្តរីកលូតលាស់ ក៏ដូចជាពង្រីកវិសាលភាពបន្ថែមលើបណ្តាវិស័យដូចជា៖ ពាណិជ្ជកម្ម និងវិនិយោគ កិច្ចសហប្រតិបត្តិការលើវិស័យការពារជាតិ វិស័យអប់រំ ការអភិរក្សវប្បធម៌ និងទំនាក់ទំនងរវាងប្រជាជននិងប្រជាជន។

លោកបានសង្កត់ធ្ងន់ថា ក្នុងនាមរាជរដ្ឋាភិបាល និងប្រជាជនកម្ពុជា បានសម្តែងនូវទឹកចិត្តអរគុណដ៏ស្មោះស្ម័គ្រ ចំពោះការគាំទ្រ និងចំណងមិត្តភាពដ៏យូរអង្វែងរបស់សហរដ្ឋអាម៉េរិក។

ជាពិសេស លោកបានសម្តែងនូវការកោតសើរជូនចំពោះ លោកស្រីភារធារី ព្រមទាំងសហការីទាំងអស់នៅស្ថានទូតសហរដ្ឋអាម៉េរិក និងសហគមន៍ជនជាតិអាម៉េរិកនៅកម្ពុជាទាំងអស់ ចំពោះកិច្ចខិតខំប្រឹងប្រែងដោយមិនគិតអំពីការនឿយហត់លើគ្រប់វិស័យ។ 

លោកឧបនាយករដ្ឋមន្ត្រី បានបន្ថែមថា ការងាររបស់ពួកគាត់គឺពិតជាមានសារៈសំខាន់ក្នុងការពង្រឹងចំណងទាក់ទងរវាងប្រទេសទាំងពីរ ព្រមទាំងគាំទ្រដល់ការអភិវឌ្ឍ និងភាពរីកចម្រើនរបស់ប្រទេសកម្ពុជាផ្ទាល់ផងដែរ។

ក្នុងឱកាសនោះ លោក ស៊ុន ចាន់ថុល បានបង្ហាញពីជំហររបស់កម្ពុជាដែរថា កម្ពុជានៅតែជាដៃគូជាទីទុកចិត្តរបស់សហរដ្ឋអាម៉េរិក និងជឿជាក់ថា ចំណងមិត្តភាពមួយនេះ នឹងបន្តរីកចម្រើនប្រកបដោយភាពរឹងម៉ាំ ជាមួយទិសដៅនិងសារៈសំខាន់ជាយុទ្ធសាស្ត្រ។ លោកសង្ឃឹមយ៉ាងមុតមាំថា កម្ពុជានិងសហរដ្ឋអាម៉េរិក នឹងបន្តកត់ត្រាភាពជាដៃគូពោរពេញដោយទំនុកចិត្តរវាងគ្នានិងគ្នា ប្រកបដោយវឌ្ឍនភាព និងនវានុវត្តន៍ បន្តយូរអង្វែងទៅមុខទៀត៕ 

The post លោក ស៊ុន ចាន់ថុល៖ កម្ពុជានៅតែជាដៃគូជាទីទុកចិត្តរបស់សហរដ្ឋអាម៉េរិក appeared first on Millions times.

ការគូសបញ្ជាក់របស់ប្រមុខមេទ័ពជើងគោកអាមេរោកធ្វើឡើងនារសៀលថ្ងៃទី២៤ ខែកុម្ភៈនេះ ក្នុងពេលចូលជួបសម្ដែងការគួរសម និងពិភាក្សាការងារ នៅវិមានសន្ដិភាពជាមួយសម្តេច ហ៊ុន ម៉ាណែត នាយករដ្ឋមន្រ្តី។

តាមដានជាមួយយើង៖ Million Times

ក្នុងជំនួបនោះ នាយឧត្តមសេនីយ៍ រ៉ូណាល់ ខ្លាក( Ronald P. CLARK) មេបញ្ជាការកងទ័ពជើងគោកសហរដ្ឋអាមេរិក ប្រចាំប៉ាស៊ីហ្វិក (USARPAC) បានជម្រាបសម្ដេច ហ៊ុន ម៉ាណែត អំពីលទ្ធផលប្រកបដោយផ្លែផ្កានៃជំនួបរវាងលោក និងនាយឧត្តមសេនីយ៍ ម៉ៅ​ សុផាន់​ មេបញ្ជាការកងទ័ពជេីងគោកកម្ពុជា ដោយបានសង្កត់ធ្ងន់ពីសារៈសំខាន់នៃទំនាក់ទំនងរវាងប្រជាជន និងប្រជាជន ក៏ដូចជាកិច្ចសហប្រតិបត្តិការល្អរវាងកងទ័ពនិងកងទ័ព នៃប្រទេសទាំងពីរ ព្រមទាំងបានគូសបញ្ជាក់ថា សហរដ្ឋអាមេរិកចង់ឃើញការរីកចម្រើននៅក្នុងទំនាក់ទំនងនេះ ជាពិសេសទំនាក់ទំនងរវាងកងទ័ពនៃប្រទេសទាំងពីរ។ 

បន្ថែមលើនោះ លោក រ៉ូណាល់ ខ្លាក បានចាប់អារម្មណ៍ និងវាយតម្លៃខ្ពស់ចំពោះកម្ពុជាដែលបានចូលរួមចំណែកយ៉ាងសកម្ម ក្នុងបេសកកម្មថែរក្សាសន្ដិភាព តាមរយៈការបញ្ជូនកងកម្លាំងថែរក្សាសន្តិភាពក្រោមឆ័ត្រអង្គការសហប្រជាជាតិ នៅតាមបណ្ដាប្រទេសមួយចំនួនលើពិភពលោក។

សម្ដេចនាយករដ្ឋមន្ត្រីបានវាយតម្លៃខ្ពស់ចំពោះលទ្ធផលដ៏ល្អនៃជំនួបរវាងប្រមុខកងទ័ពជេីងគោគ​កម្ពុជាជាមួយគណៈប្រតិភូកងទ័ពជើងគោក សហរដ្ឋអាមេរិក។ សម្ដេចបានសង្កត់ធ្ងន់ថា ការផ្លាស់ប្ដូរដំណើរទស្សនកិច្ចជាញឹកញាប់ រវាងកងទ័ពនិងកងទ័ព ក៏ដូចជាការបន្ដកិច្ចសហប្រតិបត្តិការឡេីងវិញលើសកម្មភាពមួយចំនួនដូចជា ការបណ្ដុះបណ្ដាល ជាដេីម នាពេលកន្លងមក បានឆ្លុះបញ្ចាំងពីភាពរីកចម្រើននៃទំនាក់ទំនងប្រទេសទាំងពីរ។ 

ក្នុងជំនួបនោះ សម្ដេច ហ៊ុន ម៉ាណែត ក៏មិនភ្លេចថ្លែងអំណរគុណចំពោះរដ្ឋាភិបាលអាមេរិកដែលបានផ្ដល់ការគាំទ្រកម្ពុជាក្នុងសកម្មភាពបោសសំអាតមីន និងយុទ្ធភ័ណ្ឌមិនទាន់ផ្ទុះ និងបានគូសបញ្ជាក់ថា “ពីមុន កម្ពុជាធ្លាប់ជាប្រទេសទទួលយកកងកម្លាំងរក្សាសន្តិភាពរបស់អង្គការសហប្រជាជាតិ តែមកដល់បច្ចុប្បន្ននេះ កម្ពុជាបានប្រែក្លាយទៅជាប្រទេសបញ្ជូនកងកម្លាំងដើម្បីចូលរួមក្នុងបេសកកម្មថែរក្សាសន្តិភាពនៅតាមបណ្ដាប្រទេសលើពិភពលោក”។ 

ក្នុងឱកាសនោះដែរ សម្ដេចបានលើកទឹកចិត្តឱ្យកងទ័ពជើងគោកសហអាមេរិក និង បញ្ជាការដ្ឋានកងទ័ពជេីងគោក​ កងយោធពលខេមរភូមិន្ទ​ បន្តទំនាក់ទំនងឱ្យកាន់តែជិតស្និទ្ធថែមទៀត ដើម្បីពង្រឹងនិងពង្រីកកិច្ចសហប្រតិបត្តិការរវាងកងទ័ពនៃប្រទេសទាំងពីរ ឱ្យកាន់តែល្អប្រសើរ៕

អត្ថបទ៖ សាងតេជៈ រូបភាព៖ ក្រុមការងារនាយករដ្ឋមន្រ្តី

The post សហរដ្ឋអាមេរិកចង់ឃើញការរីកចម្រើននៅក្នុងទំនាក់ទំនងជាមួយកម្ពុជា appeared first on Millions times.