តាមដានជាមួយយើង៖ Million Times

នៅថ្ងៃទី១៩ ខែធ្នូ ឆ្នាំ២០២៥នេះ លោកជំទាវ ជា សិរី ទេសាភិបាលធនាគារជាតិនៃកម្ពុជា និងលោកជំទាវ Bounkham Vorachit ទេសាភិបាលធនាគារកណ្តាលឡាវ បានអញ្ជើញជាអធិបតីក្នុងពិធីដាក់ឱ្យ ដំណើរការជាផ្លូវការការទូទាត់ឆ្លងដែនតាម QR Codes រវាងកម្ពុជា និងឡាវ (ដំណាក់កាលទី២៖ ឡាវស្កេនKHQR Codes) នៅរាជធានីភ្នំពេញ។

គម្រោងអភិវឌ្ឍន៍ប្រព័ន្ធទូទាត់ឆ្លងដែនតាម QR Codes រវាងប្រទេសទាំងពីរ ត្រូវបានបែងចែកជា ២ ដំណាក់កាល។ ដំណាក់កាលទី១ ដែលត្រូវបានដាក់ឱ្យដំណើរការដោយជោគជ័យ កាលពីថ្ងៃទី១៨ ខែសីហា ឆ្នាំ២០២៣ បានផ្តល់លទ្ធភាពឱ្យប្រជាជនកម្ពុជា ដែលមានគណនីជាប្រាក់រៀល អាចធ្វើប្រតិបត្តិការទូទាត់ថ្លៃទំនិញ និងសេវាឱ្យអាជីវករនៅប្រទេសឡាវ ដោយស្កេនឡាវ LAOQR តាមកម្មវិធីបាគង ឬកម្មវិធីធនាគាចល័ត។

សម្រាប់ដំណាក់កាលទី ២នេះ ប្រជាជនឡាវដែលធ្វើដំណើរមកប្រទេសកម្ពុជា អាចធ្វើប្រតិបត្តិការទូទាត់ថ្លៃទំនិញ និងសេវាឱ្យអាជីវករនៅទូទាំងប្រទេសកម្ពុជា ដោយស្កេន KHQR Codes តាមកម្មវិធីធនាគារចល័តរបស់គ្រឹះស្ថានធនាគារ និងហិរញ្ញវត្ថុនៅប្រទេសឡាវ ដោយពុំចាំបាច់យកក្រដាសប្រាក់តាមខ្លួន ឬប្តូររូបិយប័ណ្ណឡើយ។

លោកជំទាវ ជា សិរី មានប្រសាសន៍ថា ការអភិវឌ្ឍគម្រោងទូទាត់ឆ្លងដែននេះ មិនត្រឹមតែជាសមិទ្ធផលកម្រិតបច្ចេកទេសប៉ុណ្ណោះទេ តែក៏ជាស្ពានតភ្ជាប់រវាងវប្បធម៌ សេដ្ឋកិច្ច និងប្រជាជននៃប្រទេសទាំងពីរផងដែរ។ គំនិតផ្តួចផ្តើមនេះមានសក្តានុពលក្នុង ១/-ការលើកកម្ពស់ការតភ្ជាប់សេដ្ឋកិច្ចនៃប្រទេសទាំងពីរ តាមរយៈប្រតិបត្តិការទូទាត់ឌីជីថលដែលសុវត្ថិភាព ២/-ការពង្រឹងវិស័យទេសចរណ៍ តាមរយៈការរៀបចំដំណើរការទូទាត់ដែលងាយស្រួល និង ៣/-ការលើកកម្ពស់ការធ្វើ សមាហរណកម្មក្នុងតំបន់អាស៊ាន។

ចំណែកលោកជំទាវ Bounkham Vorachit ក៏បានលើកឡើងថា ការអភិវឌ្ឍប្រព័ន្ធតភ្ជាប់ប្រតិបត្តិការទូទាត់ឆ្លងដែនតាម QR Codes រវាងប្រទេសកម្ពុជា និងប្រទេសឡាវ ត្រូវបានចាត់ទុកជាសមិទ្ធផល ប្រកបដោយផ្លែផ្កា ដែលកើតចេញពីកិច្ចសហប្រតិបត្តិការរវាងធនាគារកណ្តាលទាំងពីរ។

គួរឱ្យដដឹងថា កិច្ចសហប្រតិបត្តិការនេះ ផ្តោតសំខាន់ទៅលើការអភិវឌ្ឍប្រព័ន្ធទូទាត់សងប្រាក់ ដែលមានលទ្ធភាព ក្នុងការទូទាត់ជារូបិយវត្ថុជាតិនៃប្រទេសទាំងពីរ ស្របតាមទិសដៅនៃការធ្វើសមាហរណកម្មអាស៊ាន។ តាមរយៈការវិវត្តនៃនវានុវត្តន៍ឌីជីថល ធនាគារកណ្តាលទាំងពីរ មានបំណងដោះស្រាយបញ្ហាប្រឈមក្នុងការទូទាត់បែបប្រពៃណី និងជំរុញលំហូរហិរញ្ញវត្ថុទៅវិញទៅមករវាងប្រទេសទាំងពីរ ឱ្យកាន់តែ ប្រសើរឡើង៕

អត្ថបទ៖ វីរៈ​ រូបភាព៖ ធនាគារជាតិ

The post ប្រជាជនឡាវ អាចធ្វើប្រតិបត្តិការទូទាត់ថ្លៃទំនិញ និងសេវាឱ្យអាជីវករនៅទូទាំងប្រទេសកម្ពុជា តាមរយៈស្កេន KHQR Codes appeared first on Millions times.

វត្តមាននៃការអញ្ជើញដល់របស់គណៈប្រតិភូកម្ពុជា ត្រូវបានទទួលការធ្វើគារវកិច្ចស្វាគមន៍រាក់ទាក់ និងកក់ក្តៅជាទីបំផុត ពីសំណាក់ថ្នាក់ដឹកនាំជាន់ខ្ពស់ឡាវ និងថ្នាក់ដឹកនាំសំខាន់ៗជាច្រើនទៀតផងដែរ។

តាមដានជាមួយយើង៖ Million Times

សមាសភាពគណៈប្រតិភូអមដំណើរសម្តេចប្រធានព្រឹទ្ធសភា រួមមាន៖ សម្តេចក្រឡាហោម ស ខេង ឧត្តមប្រឹក្សាផ្ទាល់ព្រះមហាក្សត្រ និងជាអនុប្រធានគណបក្សប្រជាជនកម្ពុជា សម្តេចពិជ័យសេនា ទៀ បាញ់ ឧត្តមប្រឹក្សាផ្ទាល់ព្រះមហាក្សត្រ និងជាអនុប្រធានគណបក្សប្រជាជនកម្ពុជា សម្តេចកិតិ្តសង្ហបណ្ឌិត ម៉ែន សំអន ឧត្តមប្រឹក្សាផ្ទាល់ព្រះមហាក្សត្រ និងជាអនុប្រធានគណបក្សប្រជាជនកម្ពុជា លោក ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេស និងសហប្រតិបត្តិការអន្តរជាតិ និងជាប្រធានគណៈទាក់ទងបរទេសនៃគណបក្សប្រជាជនកម្ពុជា ព្រមទាំងសមាជិកព្រឹទ្ធសភា-រដ្ឋសភា និងថ្នាក់ដឹកនាំសំខាន់ៗនៃស្ថាប័ននីតិប្បញ្ញត្តិកម្ពុជា និងគណបក្សប្រជាជនកម្ពុជា។

នៅក្នុងឱកាសទស្សនកិច្ចនេះ សម្តេចនឹងមានជំនួបទ្វេភាគីជាមួយប្រធានរដ្ឋសភាឡាវ ជួបពិភាក្សាការងារជាមួយនាយករដ្ឋមន្ត្រីឡាវ និងធ្វើជាសហប្រធានជាមួយប្រធានរដ្ឋឡាវ និងជាអគ្គលេខាធិការគណបក្សប្រជាជនបដិវត្តន៍ឡាវ ដឹកនាំកិច្ចប្រជុំកំពូលលើកទី១៥ រវាងគណបក្ស ប្រជាជនកម្ពុជានិងគណបក្សប្រជាជនបដិវត្តន៍ឡាវ។

គួរបញ្ជាក់ដែរថា តាមរយៈដំណើរទស្សនកិច្ចទៅកាន់ប្រទេសឡាវនាពេលនេះ ត្រូវបានសម្តេច ហ៊ុន សែន នឹងផ្តល់សន្ទុះថ្មីក្នុងការពង្រឹង និងលើកកម្ពស់ភាពជាដៃគូយុទ្ធសាស្ត្រគ្រប់ជ្រុងជ្រោយ និងយូរអង្វែង រវាងកម្ពុជា និងឡាវ ឱ្យកាន់តែរឹងមាំស៊ីជម្រៅ និងប្រកបដោយផ្លែផ្កាបន្ថែមទៀត៕

អត្ថបទ៖ សាងតេជៈ រូបភាព៖ CPP

The post សម្តេច ហ៊ុន សែន ដឹកនាំឥស្សរជនជាន់ខ្ពស់បំពេញទស្សនកិច្ចផ្លូវការនៅឡាវ ២ថ្ងៃ appeared first on Millions times.

វេទិកាធុរកិច្ចកម្ពុជា-ឡាវ គឺជាព្រឹត្តិការណ៍អមនៃដំណើរទស្សនកិច្ចផ្លូវការរបស់លោក សនសៃ ស៊ីផាន់ដន នាយករដ្ឋមន្ត្រីឡាវ មកកាន់កម្ពុជារយៈពេល ២ថ្ងៃ ចាប់ពីថ្ងៃទី៤-៥ ខែធ្នូ ឆ្នាំ២០២៤។

តាមដានជាមួយយើង៖ Million Times

លោក សនសៃ ស៊ីផាន់ដន

ក្នុងពេលថ្លែងបើកវេទិកាធុរកិច្ចកម្ពុជា-ឡាវ លោក សនសៃ ស៊ីផាន់ដន បានសង្កត់ធ្ងន់អំពីតួនាទីដ៏សំខាន់របស់វិស័យឯកជន ក្នុងការជំរុញកិច្ចសហប្រតិបត្តិការសេដ្ឋកិច្ច ពាណិជ្ជកម្ម និងវិនិយោគរវាងប្រទេសទាំងពីរ។ លោកបានគូសបញ្ជាក់ថា រាជរដ្ឋាភិបាលនៃប្រទេសទាំងពីរបានលើកកម្ពស់កម្រិតនៃកិច្ចសហប្រតិបត្តិការ និងភាពជាដៃគូរទៅជាភាពជាដៃគូយុទ្ធសាស្រ្តយូរអង្វែងដោយរាប់បញ្ចូលទាំងផែនការកិច្ចសហប្រតិបត្តិការកម្ពុជាឡាវតាមរយៈប្រាំឆ្នាំផងដែរ ២០២៣-២០២៧។

វេទិកាធុរកិច្ចកម្ពុជា-ឡាវ បានសង្កត់ធ្ងន់ទៅលើការប្តេជ្ញា របស់ប្រទេសទាំងពីរក្នុងការជំរុញទំនាក់ទំនងសេដ្ឋកិច្ច និងបង្កើនពាណិជ្ជកម្មទ្វេភាគី ព្រមទាំងបានរំលេចនូវវិស័យសក្តានុពលសម្រាប់កិច្ចសហប្រតិបត្តិការ ដែលរួមមាន៖ កសិកម្ម ថាមពល ទេសចរណ៍ និង ការតភ្ជាប់ហេដ្ឋារចនាសម្ព័ន្ធជាដើម។

វេទិកាធុរកិច្ចនេះ គេរំពឹងថា សកម្មភាពធុរកិច្ច និងទំនាក់ទំនងរវាងប្រជាជន និងប្រជាជន នឹងកាន់តែសកម្មនិងរឹងមាំជាលំដាប់ ដែលដើរតួនាទីយ៉ាងសំខាន់ក្នុងការតភ្ជាប់ទំនាក់ទំនង កសាងភាពជាដៃគូ និង ជំរុញកាលានុវត្តភាពវិនិយោគរវាងប្រទេសទាំងពីរ។

លោក សួន សុផល អគ្គលេខាធិការរងគណៈកម្មាធិការវិនិយោគកម្ពុជា បានលើកឡើងថា ការរៀបចំវេទិកាធុរកិច្ចកម្ពុជា-ឡាវសំដៅធ្វើសន្ធានកម្មរវាងវិនិយោគិនក្នុងស្រុក និងវិនិយោគិនឡាវ។

លោក សួន សុផល

លោកក៏បានបង្ហាញទៅកាន់អ្នកចូលរួមវេទិកានេះអំពីលក្ខណៈអំណោយផលនៃកម្ពុជាដល់ការវិនិយោគលើគ្រប់វិស័យរួមមានស្ថិរភាពនយោបាយ និងសេដ្ឋកិច្ច, ទីតាំងយុទ្ធសាស្រ្ត, កម្លាំងពលកម្មវ័យក្មេងប្រកបដោយផលិតភាព, អត្ថិភាពនៃរាជរដ្ឋាភិបាលដែលមានទំនោរគាំទ្រដល់ធុរកិច្ច និងរបបវិនិយោគដែលមានភាពអនុគ្រោះដល់ការធ្វើធុរកិច្ចតាមរយៈការផ្តល់កិច្ចសម្រួលវិនិយោគ, កញ្ចប់លើកទឹកចិត្តឆ្លាតវៃ និងការថែទាំវិនិយោគប្រកបដោយភាពកក់ក្តៅ។

ជាមួយគ្នានេះ លោកបានបង្ហាញជំនឿចិត្តថា វិនិយោគិនដែលមានវត្តមានក្នុងកម្មវិធីនេះនឹងស្វែងរកកាលានុវត្តភាពធ្វើការបណ្តាក់ទុនវិនិយោគនៅកម្ពុជាក្រោមរូបភាពភាគហ៊ុនិក ឬដោយផ្ទាល់នាពេលដ៏ខ្លីខាងមុខ៕

The post មេដឹកនាំឡាវ រំលេចអំពីតួនាទីដ៏សំខាន់របស់វិស័យឯកជនក្នុងការជំរុញកិច្ចសហប្រតិបត្តិការសេដ្ឋកិច្ច ពាណិជ្ជកម្ម និងវិនិយោគកម្ពុជា-ឡាវ appeared first on Millions times.

នៅក្នុងកិច្ចប្រជុំនេះ លោករដ្ឋមន្ត្រី ឌិត ទីណា បានស្វាគមន៍ចំពោះកិច្ចសហប្រតិបត្តិការរវាងប្រទេសទាំងពីរ កម្ពុជា-ឡាវ ដោយចំពោះការរៀបចំអនុស្សរណៈនៃការយោគយល់គ្នា MOU រវាងក្រសួងទាំងពីរ ផ្ដោតសំខាន់លើការចិញ្ចឹមត្រីទឹកសាប ការគ្រប់គ្រងនិងរៀបចំដីព្រៃឈើនិងកសិកម្ម ការផលិតស្រូវ និងការផ្ដោះផ្ដូរពាណិជ្ជកម្មរវាងប្រទេសទាំងពីរ។

តាមដានជាមួយយើង៖ Million Times

រដ្ឋមន្ត្រីក្រសួងកសិកម្មកម្ពុជា លើកឡើងថា MOU រវាងប្រទេសទាំងពីរនេះ ត្រូវរៀបចំដោយគិតគូរឲ្យ​បានច្បាស់លាស់ ទាំងផ្នែកបច្ចេកទេស នយោបាយ និងសេដ្ឋកិច្ច ធ្វើយ៉ាងណាឲ្យវិស័យកសិកម្មរវាងប្រទេសទាំងពីរ ផ្ដល់ផលចំណេញ និងបំពេញបន្ថែមគ្នាទៅវិញទៅមក។

លោករដ្ឋមន្ត្រី ក៏បានគូសបញ្ជាក់ទៅកាន់សមភាគីឡាវ អំពីគោលនយោបាយកសិកម្មរបស់កម្ពុជា គឺធ្វើយ៉ាងណាឲ្យមានហូប មានបាន មានប្រើ និងមានរហូត តាមរយៈការជំរុញសហគមន៍កសិកម្មទំនើប ការកាត់បន្ថយថ្លៃដើមផលិត និងមានតម្លៃបន្ថែមខ្ពស់ ទទួលបានផលចំណេញច្រើន។

ចំណែកឯពាណិជ្ជកម្មក្នុងវិស័យកសិកម្ម លោករដ្ឋមន្ត្រីគូសបញ្ជាក់ថា កិច្ចសហការប្រតិបត្តិការរវាងប្រទេសទាំងពីរ គឺបង្កើតឲ្យមានការដោះដូរទំនិញ និងបំពេញបន្ថែមឲ្យគ្នា ជាជាងប្រកួតប្រជែងគ្នា។ លោក ឌិត ទីណា ក៏បានលើកឡើងអំពីលទ្ធភាពនៃការសហការជាមួយភាគីឡាវ ដើម្បីផ្សារភ្ជាប់ខ្សែច្រវាក់តម្លៃជាមួយគ្នា​​ ចាប់តាំងពីការដឹកជញ្ជូន ការប្រើប្រាស់ថាមពល និងការកែច្នៃ ដើម្បីផ្ដល់ផលប្រយោជន៍ផ្នែកសេដ្ឋកិច្ចដល់កសិករ និងពាណិជ្ជករនៃប្រទេសទាំងពីរ។

នៅក្នុងកិច្ចប្រជុំដដែលនេះ ភាគីទាំងពីរ បានបង្ហាញឆន្ទៈបន្តកិច្ចសហប្រតិបត្តិការជាមួយគ្នា ឲ្យ​បានកាន់តែជិតស្និទ្ធ​ ពិសេសគឺការពិនិត្យបន្ថែមលើសេចក្តីព្រាង MOU បន្ថែមធាតុចូលដែលបានពិភាក្សាគ្នានាពេលនេះ និងឈានទៅចុះ MOU ជាផ្លូវការរួមគ្នានៅក្នុងខែតុលាឆ្នាំ ២០២៤ ឬយ៉ាងយូរបំផុតនៅចុងឆ្នាំ ២០២៤៕  

អត្ថបទ៖ វីរៈ រូបភាព៖ ហ្វេសប៊ុកក្រសួងកសិកម្ម

The post ក្រសួងកសិកម្ម កម្ពុជា-ឡាវ កំពុងរៀបចំ MOU ផ្ដោតលើការចិញ្ចឹមត្រីទឹកសាប ការផលិតស្រូវ និងការផ្ដោះផ្ដូរពាណិជ្ជកម្ម appeared first on Millions times.