ក្រុមហ៊ុន WorldBridge Group និងក្រុមហ៊ុន Lippo Group បានចុះហត្ថលេខាលើអនុស្សរណៈនៃការយោគយល់គ្នា (MoU) ដើម្បីបង្កើតកិច្ចសហប្រតិបត្តិការគម្រោងអភិវឌ្ឍន៍អចលនទ្រព្យនៅក្នុងប្រទេសកម្ពុជា។ នេះបើតាមសេចក្ដីប្រកាសព័ត៌មានរបស់ក្រុមហ៊ុន WorldBridge Group។
ពិធីចុះហត្ថលេខាធ្វើឡើងនៅទីក្រុងហ្សាកាតា ប្រទេសឥណ្ឌូនេស៊ី រវាងលោក David Iman Santosa និងលោក Marshal Martinus នាយកក្រុមហ៊ុន PT Lippo Karawaci Tbk និងអ្នកឧកញ៉ា Daniel Sear នាយកប្រតិបត្តិនៃក្រុមហ៊ុន WorldBridge Group រួមនឹងវត្តមានអ្នកឧកញ៉ា សៀ ឫទ្ធី កាលពីថ្ងៃទី ២០ ខែសីហា ឆ្នាំ២០២៤។
Million Times 
សេចក្ដីប្រកាសព័ត៌មានរបស់ក្រុមហ៊ុន WorldBridge Group បានឲ្យដឹងថា ទំនាក់ទំនងជាយុទ្ធសាស្ត្ររវាងក្រុមហ៊ុនទាំងពីរ មានគោលបំណងបង្កើនភាពរឹងមាំ និងបទពិសោធន៍រួមគ្នា នៅក្នុងវិស័យអចលនទ្រព្យ ដើម្បីស្វែងរកកិច្ចសហការដ៏មានសក្តានុពលនៅក្នុងគម្រោងអភិវឌ្ឍន៍នានានៅទូទាំងប្រទេសកម្ពុជា ពិសេសក្រុមហ៊ុនទាំងពីរបានពិភាក្សាដាក់មូលដ្ឋានគ្រឹះសម្រាប់ការស្វែងយល់ពីការអភិវឌ្ឍអចលនទ្រព្យតែមួយគត់នៅក្នុងខេត្តកំពត។
WorldBridge Group គឺជាក្រុមហ៊ុនវិនិយោគចម្រុះលើផ្នែកភស្តុភារ អចលនទ្រព្យ ហិរញ្ញវត្ថុ បដិសណ្ឋារកិច្ច និងច្រើនទៀត ដែលបានបង្កើតឡើងក្នុងឆ្នាំ១៩៩២។ ចំណែក Lippo Group គឺជាក្រុមហ៊ុនដ៏ល្បីមួយនៅអាស៊ី ដែលរកស៊ីក្នុងវិស័យអចលនទ្រព្យ ការថែទាំសុខភាព បដិសណ្ឋារកិច្ច ការលក់រាយ ហិរញ្ញវត្ថុ និងសេវាកម្មប្រើប្រាស់ផ្សេងៗទៀត។
សេចក្តីប្រកាសព័ត៌មានដដែលបានគូសបញ្ជាក់ថា ការចុះ MoU ជាមួយ Lippo Group គឺការប្តេជ្ញាចិត្តបន្តរបស់ក្រុមហ៊ុន WorldBridge Group ក្នុងការរួមចំណែកដល់ការអភិវឌ្ឍប្រកបដោយចីរភាពរបស់កម្ពុជា។ ក្រុមហ៊ុនទន្ទឹងរង់ចាំកិច្ចសហការប្រកបដោយផ្លែផ្កាដែលនឹងផ្តល់អត្ថប្រយោជន៍ដល់ស្ថាប័នទាំងពីរ និងបង្កើតផលប៉ះពាល់ជាវិជ្ជមានយូរអង្វែងសម្រាប់ប្រជាជនកម្ពុជា៕
អត្ថបទ៖ ផល កុសល រូបភាព៖ WorldBridge Group