ក្រសួងសាធារណការ និងដឹកជញ្ជូនកម្ពុជា បានចេញសេចក្ដីជូនដំណឹងបញ្ជាក់ក្នុងន័យមនុស្សធម៌ ថា ផ្លូវល្បឿនលឿនភ្នំពេញ-ព្រះសីហនុ នឹងលើកលែងកម្រៃសេវា សម្រាប់យានយន្តដែលដឹកជញ្ជូនគ្រឿងឧបភោគ និងសម្ភារៈប្រើប្រាស់ចាំបាច់ទៅកាន់តំបន់ពលរដ្ឋភៀសសឹក។
Million Times 
ក្នុងលិខិតរបស់ក្រសួងសាធារណការ និងដឹកជញ្ជូនកម្ពុជា បានបញ្ជាក់ឲ្យដឹងយ៉ាងច្បាស់ មិនថាក្រសួង ស្ថាប័ន និងឯកជនអង្គការមហាជន និងសប្បុរសជនទូទៅ ដែលមានបំណងដឹកជញ្ជូនគ្រឿងឧបភោគបរិភោគ និងសម្ភារប្រើប្រាស់ចាំបាច់យកទៅផ្ដល់ជូនពលរដ្ឋភៀសសឹក នៅខេត្តកោះកុង ហើយធ្វើដំណើរតាមផ្លូវល្បឿនលឿន មិនមានការបង់កម្រៃសេវាឡើយ។
ដើម្បីជាការសម្រួលបន្ទុក ធ្វើដំណើរប្រកបដោយសុវត្ថិភាព ងាយស្រួល និងឆាប់រហ័ស ក្រសួងបានសម្របសម្រួលជាមួយក្រុមហ៊ុនផ្លូវល្បឿនលឿនភ្នំពេញ-ក្រុងព្រះសីហនុ ដោយក្នុងន័យមនុស្សធម៌ ក្រុមហ៊ុនបានឯកភាពមិនយកកម្រៃចំពោះរថយន្តដឹកជញ្ជូនស្បៀង សម្រាប់ផ្គត់ផ្គង់តាមតំបន់ភៀសសឹកនានា។
ជាការសម្រួលដល់ការដឹកជញ្ជូន ស្ថាប័នរដ្ឋ ក្រសួង និងឯកជនអង្គការមហាជន និងសប្បុរសជនទូទៅ សូមធ្វើការទំនាក់ទំនងទៅក្រសួងសាធារណការ និងដឹកជញ្ជូនកម្ពុជា តាមទូរស័ព្ទ ០១២ ៩៧២ ០២៧ ដើម្បីឲ្យក្រសួងសម្របសម្រួលជាមួយក្រុមហ៊ុនផ្លូវល្បឿនលឿន៕
អត្ថបទ៖ឆដា, រូបភាព៖ក្រសួងសាធារណការ និងដឹកជញ្ជូន