គិតត្រឹមម៉ោង១១ព្រឹក ថ្ងៃ៨ ខែធ្នូ ឆ្នាំ ២០២៥ នេះ យោធាថៃនៅតែបន្តបាញ់ប្រហារមកលើកម្ពុជា គ្រប់ទិសក្នុងយោធភូមិភាគ៤ ដោយប្រើប្រាស់កាំភ្លើងយន្ត កាំភ្លើងធំ155MM រថក្រោះ កាំភ្លើងត្បាល់ យន្តហោះចម្បាំង និងផ្សែងពុល។ នេះជាការបញ្ជាក់របស់ឧត្តមសេនីយ៍ឯក ម៉ាលី សុជាតា អ្នកនាំពាក្យក្រសួងការពារជាតិ នៃព្រះរាជាណាចក្រកម្ពុជា។
Million Times 
ការបាញ់ប្រហាររបស់យោធាថៃ បានបំផ្លាញទីតាំងផ្ទះសម្បែងរបស់ប្រជាពលរដ្ឋ និងធ្វើឲ្យពលរដ្ឋមួយចំនួនរងរបួសផងដែរ ប៉ុន្តែកម្ពុជាមិនបានតបតវិញឡើយ។ មិនតែប៉ុណ្ណោះសិស្សសាលាជាច្រើនបានរងផលប៉ះពាល់ដោយសារទាហានថៃ រហូតឈានដល់ការបិទសាលា។
ដោយក្រសួងអប់រំ យុវជន និងកីឡាបានបញ្ជាក់ថា ព្រឹកនេះសាលារៀនក្នុងខេត្ត ជាប់បន្ទាត់ព្រំដែន ៤ បិទទ្វារសរុប ៣៧៧ សាលា គ្រូបង្រៀន ៣ ១៩៧ នាក់ ប៉ះពាល់សិស្សសរុប ៧៨ ៥៨៥ នាក់។
សម្រាប់ខេត្តទាំង ៤ នៅតាមបន្ទាត់ព្រំដែន រួមមានខេត្តព្រះវិហារ ឧត្ដរមានជ័យ បន្ទាយមានជ័យ និងពោធិ៍សាត់ ដែលរងផលប៉ះពាល់ដោយការបាញ់ប្រហារពីភាគីថៃ៕
អត្ថបទ៖ ឆដា, រូបភាព៖ MoEYS Cambodia