នាវាទេសចរណ៍ MS Westerdam បានចូលចតនៅកំពង់ផែស្វយ័តអន្តរជាតិ នាក្រុងព្រះសីហនុ សាជាថ្មីម្ដងទៀតហើយ ដែលមានភ្ញៀវទេសចរណ៍ចម្រុះជាតិសាសន៍ប្រមាណជិត ២ ពាន់នាក់ផងដែរ។
Million Times 
ថ្នាក់ដឹកនាំរបស់នាវាទេសចរណ៍មួយនេះ មិនដែលភ្លេចឡើយសម្រាប់ទឹកចិត្តដ៏ធំធេងរបស់កម្ពុជា អំឡុងពេលកូវីដ-១៩កន្លងទៅ ដែលកាលនោះមានតែប្រទេសកម្ពុជាមួយគត់ដែលយល់ព្រមឱ្យពួកគេចូលចត។ ព្រឹត្តិការណ៍មនុស្សធម៌ ដែលសម្ដេចតេជោ ហ៊ុន សែន បានធ្វើនាពេលនោះ ធ្វើឲ្យកម្ពុជាល្បីរន្ទឺពេញពិភពលោក ជាមួយនឹងពាក្យថា កម្ពុជាតូច តែបេះដូងធំ។ ចាប់តាំងពីនោះមក នាវាមួយនេះមិនដែលភ្លេចកម្ពុជា និងតែងតែនឹករលឹកចូលចតនៅកំពង់ផែព្រះសីហនុជានិច្ច។
កាលពីឆ្នាំ ២០២៣ MS Westerdam ក៏បានត្រលប់មកប្រទេសកម្ពុជា ជាលើកទីពីរហើយ ឆ្នាំ ២០២៥ មកម្ដងទៀត បើគិតទៅជាលើកទី ៣។
ដោយឡែកនៅព្រឹកថ្ងៃ១៨នេះ ជាលើកទី២ហើយសម្រាប់នាវាមួយនេះដែលនាំយកភ្ញៀវទេសចរណ៍អន្តរជាតិជិត ២ ពាន់នាក់មកលេងកម្ពុជា។ ភ្ញៀវទេសចរ ១៨៥០ នាក់ ស្រី ៩៩២ នាក់ មាន ៤៣ សញ្ជាតិ ក្នុងនោះមាននាវិក ៨០៤ នាក់ ស្រី ១៥៦ នាក់ ក្នុងនោះភ្ញៀវដែលមានច្រើនជាងគេ គឺមកពីសហរដ្ឋអាមេរិក អូស្ត្រាលី និងប្រទេសកាណាដា។
នាវាទេសចរណ៍ WESTERDAM សញ្ជាតិ HOLLAND ដែលមានប្រវែងបណ្តោយ ២៨៥,២២ ម៉ែត្រ ប្រវែងទទឹង ៣២,២០ ម៉ែត្រ ជម្រៅ ៨,១០ ម៉ែត្រ បានចូលចតនៅកំពង់ផែស្វយ័តក្រុងព្រះសីហនុ។ បើតាមការឲ្យដឹងពីមន្ត្រីជំនាញកំពង់ផែស្វយ័ត ក្រុងព្រះសីហនុ នៅព្រឹកនេះផ្ទាល់។
គួរបញ្ជាក់ផងដែរថា កាលពីឆ្នាំ ២០២០ MS Westerdam ដែលមានមនុស្ស ២២៥៧ នាក់នៅលើនោះ បានចំណាយពេលជិតពីរសប្ដាហ៍នៅសមុទ្រមិនអាចចរចាបានជោគជ័យលើកំពង់ផែដែលត្រូវចូលចត ដោយប្រទេសជាច្រើនបានបដិសេធ ដោយមានតែកម្ពុជាមួយគត់ ដែលទទួលកាប៉ាល់យក្សមួយនេះឲ្យចុះចត៕
អត្ថបទ៖ ឆដា, រូបភាព៖ កំពង់ផែស្វយ័ត