កាលពីថ្ងៃទី២៧ ខែឧសភា ក្រសួងរតនាគារអាមេរិកបានបញ្ចេញទិន្នន័យស្ដីពីចំណូលពន្ធគយប្រចាំខែ ដោយបង្ហាញថា រដ្ឋាភិបាលបានទទួលទឹកប្រាក់ប្រហែល ២២,៣ពាន់លានដុល្លារពីការទារពន្ធនាំចូលទំនិញ។

ទីភ្នាក់ងារព័ត៌មាន Yahoo បានចុះផ្សាយថា ចំណូលពន្ធគយក្នុងខែឧសភានេះ ទទួលបានច្រើនជាងខែមុនៗ ពោលកាលពីខែមេសា ទទួលបាន ១៧,៤ពាន់លានដុល្លារ ស្របពេលខែមីនាបានជាង ៩ពាន់លានដុល្លារ។

ប្រភពដដែលបានអះអាងថា រយៈពេលជាង ៥ខែមកនេះ រដ្ឋាភិបាលអាមេរិកបានកើបលុយពីការទារពន្ធគយ ប្រហែល ៩២ពាន់លានដុល្លារហើយ។

គួររំលឹកបន្តិចថា ប្រធានាធិបតី Donald Trump បានដាក់ចេញនូវផែនការទារពន្ធសងសឹក ចំពោះបណ្ដាប្រទេសជាច្រើនជុំវិញពិភពលោក ដោយបានអះអាងថា ចំណូលបានមកពីការទារពន្ធគយទាំងនោះ នឹងត្រូវយកមកដោះស្រាយបញ្ហាបំណុលដែលអាមេរិកំពុងមានសព្វថ្ងៃ៕

អត្ថបទ៖ Luffy រូបភាព៖ Snope