ក្រសួងយុត្តិធម៌ បានប្រកាសកាលពីថ្ងៃទី២៥ ខែវិច្ឆិកាថា ពួកគេនឹងទុកពេល ៥ថ្ងៃ ដើម្បីឲ្យលោកស្រី Sara Duterte អនុប្រធានាធិបតីហ្វីលីពីន បកស្រាយហេតុផលជុំវិញការបញ្ចេញសារគំរាមសម្លាប់ប្រធានាធិបតី Ferdinand Marcos Jr. មុនពេលចេញដីការបើកការស៊ើបអង្កេតផ្លូវការ។
Million Times 
ទីភ្នាក់ងារសារព័ត៌មានហ្វីលីពីន ABS CBN News បានរាយការណ៍ថា ក្រសួងយុត្តិធម៌បានចាត់ទុកលោកស្រីអនុប្រធានាធិបតីរូបនេះ ជាមេខ្លោងពីក្រោយគ្រោងការណ៍តាមធ្វើឃាតប្រមុខដឹកនាំប្រទេស ស្របពេលបច្ចុប្បន្នការិយាល័យជាតិនៃការស៊ើបអង្កេត (NBI) បានចាប់ផ្ដើមស្វែងរកឃាតករ ដែលលោកស្រី Duterte អះអាងថាបានជួលរួចរាល់។
អនុរដ្ឋលេខាធិការក្រសួងយុត្តិធម៌ Jesse Andres បានមានប្រសាសន៍ថា «ផែនការរៀបចំទុកជាមុនក្នុងការធ្វើឃាតប្រធានាធិបតី ដែលបានប្រកាសដោយមេខ្លោង ដែលបានសារភាពដោយខ្លួនឯងនឹងប្រឈមជាមួយផលវិបាកផ្លូវច្បាប់»។
លោក Andres បានបន្តទៀតថា «ឥឡូវនេះ យើងកំពុងស្វែងរកភ្នាក់ងារអនុវត្តច្បាប់របស់យើង ដើម្បីស៊ើបអង្កេតកន្លែងលាក់ខ្លួនរបស់មនុស្សទាំងនេះ ដែលគ្រោងប្រឆាំងនឹងប្រធានាធិបតី។ យើងនឹងប្រើប្រាស់ធនធានទាំងអស់របស់រដ្ឋាភិបាល ភ្នាក់ងាររដ្ឋាភិបាលទាំងអស់ ដើម្បីស្វែងរកអត្តសញ្ញាណរបស់ឃាតកនេះ ហើយពួកគេនឹងត្រូវបានដោះស្រាយដោយកម្លាំងពេញលេញនៃច្បាប់»។
គួររំលឹកបន្តិចថា កាលពីថ្ងៃសៅរ៍ ទី២៣ ខែវិច្ឆិកា អនុប្រធានាធិបតីហ្វីលីពីន Sara Duterte បានចេញសារគំរាមសម្លាប់ប្រធានាធិបតី Ferdinand Marcos Jr. និងភរិយារបស់លោក ដោយបានអះអាងថា បានជួលឃាតកររួចស្រេចហើយ។
នេះមិនមែនជាការគំរាមកំហែងដល់អាយុជីវិតមេដឹកនាំកំពូលហ្វីលីពីនលើកទីមួយឡើយ ពោលកាលពីខែតុលា កូនស្រីអតីតប្រធានាធិបតីរូបនេះ ក៏ធ្លាប់និយាយថា នាងចង់កាត់ក្បាលរបស់លោក Marcos និងគាស់ផ្នូរឪពុករបស់លោកថែមទៀត៕
អត្ថបទ៖ Luffy រូបភាព៖ ABS CBN