កូនស្រីសេដ្ឋី អ៊ឹង ប៊ុនហ៊ូវ ដែលបានភ្ជាប់ពាក្យជាមួយកូនប្រុសថៅកែហាងលក់សម្លៀកបំពាក់ លីម កាលពីអំឡុងខែធ្នូ ឆ្នាំ ២០២៤ កន្លងទៅនោះ ថ្មីៗនេះបានបង្ហាញសញ្ញាជិតនឹងចូលរោងការហើយ ដោយបញ្ចេញរូបភាព Pre-wedding។
Million Times 
កូនរបស់សេដ្ឋី អ៊ឹង ប៊ុនហ៊ូវ ប្រធានអគ្គនាយកក្រុមហ៊ុន ING Holdings Co., Ltd. មានឈ្មោះ អ៊ឹង ស៊ីវឈីនស៊ី និងអនាគតស្វាមី លីម ហ្វីលីប បានបញ្ចេញរូបថត Pre-wedding ជាច្រើនសន្លឹកនៅលើទឹកដីនៃខេត្តសៀមរាប។
ក្នុងឈុតសម្លៀកបំពាក់ប្រពៃណីខ្មែរយ៉ាងប្រណីត ថ្លៃថ្លាគួរជាទីគាប់ចិត្តបូករួមរូបសម្រស់កូនប្រុសស្រីនៃត្រកូលអភិជនទាំង២ ធ្វើឲ្យអនាគតកូនកំលោះកូនក្រមុំទាំងគូនោះ ដូចព្រះអង្គម្ចាស់ និងព្រះនាងនៅក្នុងព្រេងនិទាន។
គ្រួសារដន្លងនឹងគ្នា គឺអ្នកឧកញ៉ា អ៊ឹង ប៊ុនហ៊ូវ និងលោកស្រី ហេង សុខា ជាអ្នកមានគុណខាងស្រី ចំណែកឧកញ៉ា ចាប មួយហុង និងលោកស្រី លឹម សុខចេង ម្ចាស់ហាងលក់សម្លៀកបំពាក់ លីម ហុង ជាមេបាខាងប្រុស។ ការផ្សារជាប់សាច់ឈាមនៃគ្រួសារត្រកូលអភិជនទាំង ២ បានកក្រើកខ្លាំង ព្រោះទាំងសងខាងសុទ្ធតែជាអ្នកមានកំពូល ក្នុងដៃកាន់កាប់ជំនួញជាច្រើន។
សម្រាប់ថ្ងៃចូលរោងជ័យនៃកូនស្រីប្រធានអគ្គនាយកក្រុមហ៊ុន ING Holdings Co., Ltd. និងកូនកំលោះឧកញ៉ា ចាប មួយហុង អាចនឹងរៀបចំក្នុងពេលខាងមុខនេះ៕
អត្ថបទ៖ ឆដា, រូបភាព៖ The ring wedding cambodia