ជារឿយៗនៅក្នុងបទសម្ភាសអ្នកឧកញ៉ាវ័យក្មេង សំ សុខនឿន តែងរំលឹកពីការខិតខំប្រឹងប្រែងរៀនសូត្ររបស់លោក ជានិច្ចកាលត្រូវបានឪពុកលើកទឹកចិត្ត មិនឲ្យបោះបង់ឡើយ។ ដូចពាក្យចាស់ខ្មែរតែងពោលថា “ស្លឹកឈើជ្រុះមិនឆ្ងាយពីគល់” ប្រធានសម្ព័ន្ធក្រុមហ៊ុន SAM SN Group មានឪពុកជាអ្នកធ្លាប់បួសរៀនអក្សរសាស្ត្រខ្មែរជាច្រើនឆ្នាំ មុនកសាងគ្រួសារ។
Million Times 
ឪពុករបស់អ្នកឧកញ៉ាវ័យក្មេង សំ សុខនឿន ដែលជាកូនកសិករនៅស្រុកក្រូចឆ្មារ ធ្លាប់ធ្វើស្រែចម្ការ មានហត់នឿយ លំបាក តែលោកមិនភ្លេចរំលឹកកូនៗ ហើយអ្នកឧកញ៉ាវ័យក្មេងរូបនេះ ក៏តែងតែត្រងត្រាប់ស្ដាប់បង្គាប់ទៀតនោះ គឺថា «មិនចង់ហត់ មិនចង់លំបាក គឺកូនត្រូវខិតខំរៀនសូត្រឲ្យមានចំណេះ ទោះធ្វើការឲ្យគេក៏បានប្រាក់ខែខ្ពស់ដែរ»។
អ្វីដែលឪពុកតែងតែនិយាយប្រាប់ អ្នកឧកញ៉ាវ័យក្មេងមានមុខជំនួញច្រើនក្នុងដៃរូបនេះចងចាំតាំងពីតូច រហូតមកដល់បច្ចុប្បន្ន។ មិនតែប៉ុណ្ណោះបណ្ឌិត សំ សុខនឿន តែងចាត់ទុកឪពុកខ្លួន ជាមនុស្សគំរូ ដែលរៀនសូត្រតាំងពីកុមារភាពនូវ ៣ ចំណុចសំខាន់ៗ៖
១. គាត់មិនដែលបោះបង់ការងារដែលគាត់ធ្វើ ហើយមិនចូលចិត្តពឹងពាក់អ្នកដទៃ។ គាត់តែងនិយាយថា អ្វីដែលជារបស់យើង ប្រើតែរបស់យើងទៅ។ មានប៉ុនណា ប្រើប៉ុណ្ណោះទៅ។
២. គាត់តែងនិយាយថា ទ្រាំស៊ូលំបាកមុនបន្តិច តែនឹងស្រណុកស្រួលនាពេលអនាគត និងពេលខ្លះទ្រាំលំបាកសិន ដើម្បីប្រសើរនាពេលអនាគត។
៣. កុំច្រណែននឹងកូនគេអ្នកមាន មានកង់ថ្មី ម៉ូតូថ្មី និងទូរស័ព្ទទំនើប ពេលណាកូនរៀនមានចំណេះ កូនចង់ទិញកង់ថ្មី ម៉ូតូ ឬទូរស័ព្ទថ្មី ១០ គ្រឿងក៏បានដែរ។
ជាចុងក្រោយអ្នកឧកញ៉ាវ័យក្មេងរូបនេះ បានបញ្ជាក់ថា ឪពុកលោកជាអ្នកដែលតែងតែគាំទ្រការរៀនសូត្ររបស់លោកខ្លាំងជាងគេក្នុងគ្រួសារ បើទោះស្ថិតក្នុងស្ថានភាពបែបណាក៏ដោយ៕
អត្ថបទ៖ ឆដា, រូបភាព៖ ផ្ដល់ឲ្យ