អ្នកឧកញ៉ា លាង ពៅ និងមានឈ្មោះក្រៅ Peter ដែលជាម្ចាស់ ជីបម៉ុង គ្រុប មួយរូបផងដែរនោះ បានបង្ហោះពីវីដេអូដែលជាការជួបជុំជាមួយបុគ្គលិក។ ក្នុងនោះដែរលោកក៏បានចែករំលែកពីនិយមន័យ អ្វីដែលហៅថាជាអ្នកដឹកនាំ។
Million Times 
អគ្គនាយកនៃក្រុមហ៊ុន ជីប ម៉ុង អិនស៊ី ស៊ីមេន ខបភើរេសិន បានឲ្យដឹងថា «អ្នកដឹកនាំមិនមែនទាល់តែមានកូនក្រុមច្រើនឡើយ ទោះមានកូនក្រុមតែម្នាក់ ក៏ជា leader ដែរ»។ ក្នុងនាមជាអ្នកកាន់ជំនួញជាច្រើនក្នុងដៃ អ្នកឧកញ៉ា លាង ពៅ បានរៀបរាប់ពីគោលគំនិតនៃអ្នកដឹកនាំ គឺត្រូវធ្វើជាគំរូឲ្យអ្នកក្រោមបង្គាប់ធ្វើតាម។
លោកបានបន្តទៀតថា អ្នកដឹកនាំពិតតែងមានគំនិតចង់ឲ្យកូនក្រុមរីកចម្រើនទៅមុខដូចខ្លួនដែរ បែបនេះហើយទើបសមអាចដឹកនាំគេបាន។ ដើម្បីឲ្យក្រុមមានភាពរីកចម្រើន អ្នកដឹកនាំនេះឯងត្រូវនៅក្បែរក្រុមឲ្យបានច្រើន ដោយចំណាយពេលនិយាយប្រាស្រ័យទាក់ទងជាមួយក្រុម។
អ្នកឧកញ៉ា លាង ពៅ ក៏បានលើកឡើងបន្តថា បើឃើញសមាជិកក្រុមម្នាក់មិនសប្បាយចិត្ត ត្រូវតែសួរនាំ ដើម្បីស្វែងរកឫសគល់ និងចូលខ្លួនសូមជួយដោះស្រាយបញ្ហាមិនសប្បាយចិត្តរបស់ក្រុមការងារ។
ដើម្បីឲ្យអ្នកក្រោមបង្គាប់ជឿជាក់ថា ខ្លួនជាអ្នកដឹកនាំល្អមែន ត្រូវបើកទូលាយឲ្យទូលាយ អាចឲ្យអ្នកដទៃដែលមានបញ្ហាចូលមកពិភាក្សាជាមួយបាន ឬមិនចាំតែក្រុមចូលមកនិយាយឡើយ ត្រូវចេះសង្កេតទឹកមុខអ្នកក្រោមបង្គាប់ សួរសុខទុក្ខដល់បុគ្គលិកគ្រប់រូប។
ជាចុងក្រោយ អ្នកឧកញ៉ា លាង ពៅ បានកំណត់និយមន័យរបស់លោកថា ភាពជាអ្នកដឹក ត្រូវចំណាយពេលច្រើនខ្លាំងជាងអ្នកនៅក្រោមទៅទៀត ហើយក៏ជាមនុស្សត្រូវទទួលរងសម្ពាធច្រើនជាងគេ ទើបអាចដឹកនាំអ្នកដទៃបាន។ មួយវិញទៀត ត្រូវគិតបញ្ហាទាំងអស់ និងការលំបាកទៅជាឱកាសវិញ៕
អត្ថបទ៖ ឆដា, រូបភាព Neak Oknha LEANG Pov