អ្នកជំនួញអនឡាញ និងស្រស់ស្អាត ស្រីណៃ បានចេញមុខឧបត្ថម្ភម៉ូតូ១ គ្រឿងដល់យុវជន រម៉ាស់ គ្វេន ដែលធ្វើដំណើរថ្មើរជើង ពីរាជធានីភ្នំពេញ ទៅខេត្តរតនគិរី ដើម្បីផ្សព្វផ្សាយពីទេសចរណ៍។
Million Times 
សេដ្ឋិនីដែលកំពុងទទួលបានជោគជ័យលើវិថីអនឡាញ ស្រីណៃ បានមើលឃើញពីការខិតខំប្រឹងប្រែងរបស់យុវជន រម៉ាស់ គ្វេន ដែលជាជនជាតិចារ៉ាយ ដែលមានទីលំនៅភូមិតេនង៉ាល ឃុំយ៉ាទុង ស្រុកអូរយ៉ាដាវ ខេត្តរតនគិរី និងសម្រេចជូនម៉ូតូ១គ្រឿង។
ស្រីណៃ ជាអ្នកជំនួញកំពុងលេចធ្លោមួយរូបក្នុងចំណោមអ្នកជំនួញអនឡាញវ័យក្មេង និងជាមនុស្សស្រីទាន់សម័យ ចូលចិត្តភាពឡូយឆាយ ហ៊ឺហាសម្ភារៈនិយម និងជាបុគ្គលជួយដល់មនុស្សទន់ខ្សោយ និងជាសប្បុរសជនសកម្ម ក្នុងរឿងមនុស្សធម៌ផងដែរ។
ទង្វើរបស់យុវជន រម៉ាស់ គ្វេន ទទួលបានការគាំទ្រខ្លាំងពីសំណាក់អ្នកជំនួញល្បីៗលើវិថីអនឡាញ ក៏ដូចជាមន្រ្តីរាជការជាច្រើនរូប។ ក្នុងនោះ ម្សិលមិញលោក គិត ទ្រី តំណាងរាស្ត្រមណ្ឌលខេត្តរតនគិរី បានអញ្ជើញចុះមកជួប រម៉ាស់ គ្វេន ដល់ទីលំនៅឋានផ្ទាល់តែម្ដង។
បេះដូងបរិសុទ្ធ របស់ជនជាតិដើមភាគតិច រម៉ាស់ គ្វេន អស្ចារ្យខ្លាំងណាស់ ក្នុងការរួមចំណែកផ្សព្វផ្សាយតំបន់ទេសចរណ៍ក្នុងប្រទេសកម្ពុជា ពិសេសទីកន្លែងកំណើតខ្លួនតែម្ដង។ បើទោះជាជីវភាពប្រចាំថ្ងៃមិនល្អក៏ដោយ តែយុវជន ដើរពីភ្នំពេញ ទៅខេត្តរតនគិរីរូបនេះ មិនស្ទាក់ស្ទើរក្នុងការចូលរួមចំណែកអភិវឌ្ឍន៍ស្រុកទេសឡើយ។
ប្រើពេល ១២ថ្ងៃ រយៈចម្ងាយ ៥៨៨ គីឡូ មិនមែនជាឧបសគ្គ សម្រាប់ រម៉ាស គ្វេន នោះឡើយក្នុងការ បង្ហាញពិភពលោកឲ្យបានឃើញ និងដឹងពីវិស័យទេសចរណ៍ដ៏សម្បូរបែបដែលមានក្នុងខេត្តរតនគិរី៕
អត្ថបទ៖ ឆដា, រូបភាព៖ NayNay Shanti និង Jarai Youth RTK Group