សារព័ត៌មាន The New Yorker បានរាយការណ៍ថា ប្រធានាធិបតី Donald Trump បានអនុញ្ញាតឲ្យប្រជាជន ចូលសម្ដែងការគួរសមមួយទល់មួយ ឬទទួលទានអាហារមួយពេលជាមួយលោកបាន បើសិនជាពួកគេបរិច្ចាគទឹកប្រាក់ទៅកាន់មូលនិធិ MAGA Inc ដែលជាអ្នកគាំទ្រធំបំផុតរបស់លោក Trump។
Million Times 
ទស្សនាវដ្ដីអាមេរិកនេះអះអាងថា តម្លៃកៅអីជួបជជែកផ្ទាល់ជាមួយប្រធានាធិបតី Trump គឺត្រូវចំណាយប្រាក់ខ្ទង់ ៥លានដុល្លារ ទៅកាន់មូលនិធិ MAGA។ កន្លងមកមេដឹកនាំអាមេរិករូបនេះ ក៏ធ្លាប់ប្រកាសលក់កៅអីសម្រាប់កម្មវិធីផ្សេងៗរបស់លោកផងដែរ។
កាលពីខែធ្នូ ក្រុមអ្នកគាំទ្រលោក Trump អាចទទួលបានឱកាសចូលរួមកម្មវិធីទទួលទានអាហារពេលល្ងាច នៅភូមិគ្រឹះ Mar-a-Lago ដោយត្រូវចំណាយម្នាក់ ១លានដុល្លារ ទៅកាន់មូលនិធិ MAGA។
ថ្មីៗនេះ សេតវិមានក៏ទើបនឹងរៀបចំកម្មវិធីមួយ ដែលគេឲ្យឈ្មោះថា Crypto Dinner ដែលមានអ្នកចូលរួមសុទ្ធសឹងតែជារកស៊ីក្នុងវិស័យកាក់ឌីជីថល ខណៈតម្លៃកៅអីក្នុងម្នាក់គឺ ១,៧លានដុល្លារ និងត្រូវបានគេហៅថា ជាលិខិតអញ្ជើញមានតម្លៃថ្លៃបំផុតលើលោក។
គួរជម្រាបដែរថា មូលនិធិ MAGA ដែលជាខ្នងបង្អែកធំបំផុតមួយគាំទ្រលោក Donald Trump លើផ្នែកហិរញ្ញវត្ថុ ទទួលបានទឹកប្រាក់ច្រើនសន្ធឹកពីការលក់សំបុត្រជូនមហាសេដ្ឋី ក្នុងការជួបជជែកផ្ទាល់ជាមួយប្រធានាធិបតីអាមេរិក ពោលរយៈពេលប៉ុន្មានខែមកនេះ លោក Donald Trump មានការទទួលទានអាហារបែបឯកជនមួយទល់មួយ ជាមួយធុរជនគ្រាក់ៗច្រើនជាង ២០០នាក់មកពីទូទាំងសកលលោក៕
អត្ថបទ៖ Luffy រូបភាព៖ AP