អ្នកឧកញ៉ា សំ សុខនឿន អ្នក​ជំនួញ​អចលនទ្រព្យ និង​ជាប្រធាន​សម្ព័ន្ធ​ក្រុមហ៊ុន SAM SN Group បានចែករំលែកទស្សនទានមួយ ទាក់ទងនឹងមូលហេតុ ដែលប្រជាជនខ្មែរគួរតែងាកមកប្រើប្រាស់ផលិតផលក្នុងស្រុក​។

ការចែករំលែកទស្សនទានរបស់ អ្នកឧកញ៉ា សំ សុខនឿន ត្រូវបានធ្វើឡើង ស្របពេលប្រទេសកម្ពុជាកំពុងមានបញ្ហាព្រំដែនជាមួយថៃ ដែលឈ្លានពានចូលទឹកដីកម្ពុជា។ ការឈ្លានពាននេះដែរ បានធ្វើឱ្យប្រជាជនខ្មែរមានការឈឺចាប់ និងធ្វើពហិការឈប់ប្រើប្រាស់ទំនិញថៃ ដោយងាកមកប្រើប្រាស់ទំនិញផលិតក្នុងស្រុក ឬប្រើប្រាស់ទំនិញប្រទេសដទៃជំនួសវិញ។

ទាក់ទងនឹងទស្សនទានលើផងដែរ អ្នកឧកញ៉ា សំ សុខនឿន បានរៀបរាប់ថា ៖​ “កាលពី ១៥ ឆ្នាំមុន មានអតិថិជនម្នាក់ចង់ទិញខុនដូ គាត់ជាជនជាតិចិន គាត់បានតេមកខ្ញុំ ហើយបានមកមើលខុនដូ គាត់សួរខ្ញុំថា «តើសម្ភារៈក្នុងផ្ទះនេះប្រើផលិតផលពីប្រទេសណា?» ខ្ញុំឆ្លើយថា «សម្ភារៈគឺល្អៗណាស់ មកពីប្រទេសជប៉ុន»”។

អ្នកឧកញ៉ា បានបន្តថា ៖ “ស្រាប់តែគាត់ប្រាប់មកខ្ញុំវិញថា «ដូរសំភារៈនេះចេញ ដាក់របស់ចិនទាំងអស់ គាត់នឹងកក់លុយទិញ។» គាត់ថា «ជីតាគាត់ជាទាហាន តែបានស្លាប់ដោយសារសង្រ្គាម»។ មកដល់ពេលនេះទើប ខ្ញុំយល់កាន់តែច្បាស់ពីអារម្មណ៍របស់គាត់ និងយល់នូវមូលហេតុគាត់មិនប្រើប្រាស់របស់ជប៉ុនកាន់តែច្បាស់ ហើយសុខចិត្តប្រើរបស់ចិន ទោះគុណភាពខុសគ្នាក៏ពិតមែន»”។

ស្រដៀងគ្នានេះដែរ មុននឹងមានបញ្ហាព្រំដែនរវាងប្រទេសកម្ពុជា និងថៃ ទំនិញថៃជាច្រើនចរចរណ៍ទៅលើទឹកដីកម្ពុជា។ ប៉ុន្តែក្រោយពីមានបញ្ហាព្រំដែនរវាងប្រទេសទាំងពីរ គេសង្កេតឃើញថា ប្រៀបដូចយុទ្ធនាការមួយ ប្រជាជនខ្មែរទាំងនៅលើបណ្តាញសង្គម និងជាក់ស្តែង  បាននាំគ្នាប្រកាសធ្វើពហិការឈប់ប្រើប្រាស់ទំនិញថៃ ក្រោមហេតុផលថា ការទិញទំនិញថៃ ដូចឱ្យលុយថៃទិញអាវុធឈ្លានពានទឹកដីខ្មែរ។

ទោះបីជាយ៉ាងក៏ដោយ បើនិយាយពីន័យសេដ្ឋកិច្ចវិញ និងជុំវិញការលើកឡើងជាទស្សនទានរបស់ អ្នកឧកញ៉ា សំ សុខនឿន ពីការរួមគ្នាគាំទ្រផលិតផលក្នុងស្រុក គឺក្នុងគោលបំណងជួយកសាងសេដ្ឋកិច្ចជាតិឱ្យរឹងមាំ និងបង្កើតអត្តសញ្ញាណជាតិដ៏ខ្លាំងក្លាមួយ។

លើសពីនេះ ការលើកឡើងរបស់ អ្នកឧកញ៉ា នេះ​ទៀតសោត ក៏សបញ្ជាក់ឱ្យឃើញថា ការប្រើប្រាស់ផលិតផលក្នុងស្រុក មិនត្រឹមតែបង្ហាញពីទឹកចិត្តស្រឡាញ់ជាតិសាសន៍របស់ខ្លួនប៉ុណ្ណោះទេ ប៉ុន្តែវាថែមជួយជំរុញសេដ្ឋកិច្ចជាតិ តាមរយៈការជួយលើកកម្ពស់ផលិតផលក្នុងស្រុក ការបង្កើតការងារ ការបង្កើនចំណូលថវិកាជាតិទៀត និងការបង្កើនសមត្ថភាពប្រកួតប្រជែងនៅក្នុងប្រទេសផងដែរ៕

អត្ថបទ៖ ប៊ី