អំឡុងពេលដឹកនាំគណៈប្រតិភូមកបំពេញទស្សនកិច្ចផ្លូវការនៅកម្ពុជា លោក Lawrence Wong (ឡរ៉េន វ៉ុង) នាយករដ្ឋមន្ត្រីសឹង្ហបុរី សម្តេច ហ៊ុន សែន ប្រធានព្រឹទ្ធសភា បានប្រាប់ឲ្យនាយករដ្ឋមន្រ្តីសឹង្ហបុរីជំរុញវិស័យពាណិជ្ជកម្ម សេដ្ឋកិច្ច និងទេសចរណ៍នៃប្រទេសទាំងពីរបន្ថែមទៀត។
Million Times 
ក្នុងជំនួបពិភាក្សាការងារនៅព្រឹកថ្ងៃពុធនេះ សម្តេច ហ៊ុន សែន បានចាត់ទុកដំណើរទស្សនកិច្ចរបស់លោក Lawrence Wong នៅកម្ពុជានាពេលនេះ ជាផ្នែកដ៏សំខាន់ នៃការជំរុញទំនាក់ទំនងរវាងកម្ពុជា និងសិង្ហបុរីឲ្យកាន់តែល្អប្រសើររីកចម្រើនបន្ថែមទៀត។
ក្នុងឱកាសនោះ សម្ដេចបានលើកឡើងអំពីការពង្រីកទំនាក់ទំនងរវាងប្រទេសទាំងពីរបន្ថែមទៀត ជាពិសេសតាមរយៈវិស័យពាណិជ្ជកម្ម សេដ្ឋកិច្ច និងវិស័យទេសចរណ៍ប្រទេសទាំងពីរផងដែរ។ សម្ដេចចង់ឱ្យមានជើងហោះហើរ កាន់តែច្រើនបន្ថែមទៀត ពីសិង្ហបុរីមកកាន់កម្ពុជា ជាពិសេសនៅពេលដែលកម្ពុជាដាក់ឱ្យដំណើរការព្រលានយន្តហោះអន្តរជាតិតេជោថ្មីនាពេលឆាប់ខាងមុខ។
ក្នុងចំណោមបណ្តាប្រទេសសមាជិកអាស៊ានទាំងអស់ មានប្រទេសចំនួន៥ ដែលជាដៃគូពាណិជ្ជកម្មកំពូលរបស់កម្ពុជា រួមមាន៖ វៀតណាម ថៃ សិង្ហបុរី ម៉ាឡេស៊ី និងឥណ្ឌូនេស៊ី។ ដោយឡែក ប្រទេសសិង្ហបុរី នាំចូលទំនិញពីកម្ពុជាក្នុងទំហំទឹកប្រាក់ចំនួន ២៦១លានដុល្លារ នៅឆ្នាំ២០២៤។
តាមរយៈរបាយការណ៍របស់រដ្ឋលេខាធិការដ្ឋានអាកាសចរណ៍ស៊ីវិល (SSCA) បានបង្ហាញពីនិន្នាការវិជ្ជមានបន្ថែមទៀត ក្នុងរយៈពេល ៤ខែ ចុងក្រោយនេះ មានជើងហោះហើរចេញ-ចូល(ទ្វេទិស)ឆ្លងកាត់ប្រទេសកម្ពុជាមានជាង ២.២ ម៉ឺនជើង ពោលគឺកើនឡើង ១៧% បើធៀបនឹងរយៈពេលដូចគ្នាក្នុងឆ្នាំ២០២៤។
តាមរបាយការណ៍ដដែល ប្រទេសចំនួន៦ ក្នុងចំណោមប្រទេសទាំង ១២ ដែលមានចំនួនជើងហោះហើរ និងចំនួនអ្នកដំណើរតាមផ្លូវអាកាសចេញ-ចូលកម្ពុជាច្រើនជាងគេ គឺប្រទេសថៃ ចិន វៀតណាម សិង្ហបុរី ម៉ាឡេស៊ី និងប្រទេសកូរ៉េ៕