នៅថ្ងៃចន្ទ ទី២៥ ខែវិច្ឆិកានេះ សភាពាណិជ្ជកម្មកម្ពុជារបស់អ្នកឧកញ៉ា គិត ម៉េង បានប្រកាសទទួលស្គាល់ អ្នកឧកញ៉ា សំ សុខនឿន ប្រធានក្រុមប្រឹក្សាភិបាលក្រុមហ៊ុន ខេធី ស្ទៀល ស្ត្រាក់ឈ័រ ឯ.ក និងជាអ្នកជំនួញដ៏ល្បីឈ្មោះទាំងក្នុង និងក្រៅប្រទេស ជាសមាជិកថ្មីរបស់សភាពាណិជ្ជកម្មកម្ពុជា។
Million Times 
ក្នុងសេចក្ដីប្រកាសព័ត៌មានអំពីសមាជិកថ្មីរបស់ សភាពាណិជ្ជកម្មកម្ពុជា ពីការស្វាគមន៍យ៉ាងកក់ក្ដៅចំពោះវត្តមានសមាជិកថ្មីគឺ អ្នកឧកញ៉ា បណ្ឌិត សំ សុខនឿន ប្រធានក្រុមប្រឹក្សាភិបាលក្រុមហ៊ុន ខេធី ស្ទៀល ស្ត្រាក់ឈ័រ ឯ.ក ដែលឈរឈ្មោះក្នុងវិស័យជំនួញជាច្រើនឆ្នាំមកហើយ។
ការដែលរោងចក្រផ្តង់ផ្គងគ្រោងដែក KTSS របស់អ្នកឧកញ៉ា សំ សុខនឿន ក្លាយជាសមាជិកថ្មីសភាពាណិជ្ជកម្មកម្ពុជា ទទួលបានការស្វាគមន៍ និងសាទរយ៉ាងច្រើន។ ងាកទៅមើលបណ្ដាញទំនាក់ទំនងសង្គមរបស់អ្នកជំនួញកំពូលរូបនេះ ក៏ទទួលបានការកោតសរសើរដល់កិច្ចខិតខំប្រឹងប្រែងរបស់លោក និងជូនពរឲ្យការងារកាន់តែជោគជ័យថែមទៀត។
អ្នកឧកញ៉ា សំ សុខនឿន ជាប្រធានក្រុមប្រឹក្សាភិបាលនៃសម្ព័ន្ធក្រុមហ៊ុន SAM SN GROUP និងជាអ្នកជំនាញអចលនទ្រព្យមួយរូបនៅកម្ពុជា ជាសមាជិកសកម្មនៃសមាគមឧកញ៉ាកម្ពុជា និងសមាជិកសភាពាណិជ្ជកម្មកម្ពុជា។
សូមជម្រាបជូនថា ថ្មីៗនេះ អ្នកឧកញ៉ាសម្រេចចេញផ្សាយសៀវភៅ «គ្រឹះនៃជីវិតអ្នកឧកញ៉ា សំ សុខនឿន ក្នុងមាគ៌ាអចលនទ្រព្យ» ដែលនិយាយពីជីវិតផ្ទាល់ខ្លួនរបស់លោកក្នុងវិស័យជំនួញកន្លងមក ធ្លាប់ជាកូនកសិករប្រែក្លាយជាអ្នកដឹកនាំសាជីវកម្មជាច្រើនក្នុងពហុវិស័យ ហើយកីទទួលបានការចាប់អារម្មណ៍ជាខ្លាំងពីសំណាក់អ្នកជំនួញ ម្ចាស់ក្រុមហ៊ុនធំៗនៅក្នុងស្រុក៕
អត្ថបទ៖មេរ៉ា, រូបភាព៖ ផ្ដល់ឲ្យ