កាលពីថ្ងៃ ២០ ខែវិច្ឆិកា ឆ្នាំ ២០២៤ កន្លងទៅលោក វ៉ាស៊ឹម សុរិយា អនុរដ្ឋលេខាធិការ ក្រសួងសាធារណការ និងដឹកជញ្ជូន បានទទួលជួប និងពិភាក្សាការងារជាមួយគណៈប្រតិភូក្រុមហ៊ុន Yunnan Linkun Investment Group Co., LTD ដឹកនាំដោយ លោក YUAN LINKUN ប្រធានក្រុមហ៊ុន ដោយមានការអញ្ជើញចូលរួមពី លោកប្រធាន អនុប្រធាននាយកដ្ឋានផ្លូវដែក នាយកដ្ឋានអង្កេត និងបូកសរុបភស្តុភារកម្ម និងមន្ត្រីជំនាញពាក់ព័ន្ធផងដែរ។
Million Times 
ការជួបពិភាក្សានេះធ្វើឡើងក្នុងគោលបំណង ដើម្បីសិក្សាស្វែងយល់បន្ថែម ពីឱកាសវិនិយោគលើវិស័យហេដ្ឋារចនាសម្ព័ន្ធដឹកជញ្ជូនផ្លូវដែក និងគម្រោងសំខាន់ៗទាក់ទងនឹងផែនការមេអភិវឌ្ឍន៍ផ្លូវដែកនៅកម្ពុជា។
អនុរដ្ឋលេខាធិការ លោក វ៉ាស៊ឹម សុរិយា បានលើកឡើងពីបច្ចុប្បន្នភាពខ្សែផ្លូវដែកទាំង ២ ខ្សែដែលមានស្រាប់ នៃការអភិវឌ្ឍហេដ្ឋារចនាសម្ព័ន្ធផ្លូវដែក និងគម្រោងសំខាន់ៗមួយចំនួន ដែលក្រសួងបាន និងកំពុងអនុវត្តជាមួយក្រុមហ៊ុនដៃគូក្នុងប្រទេស ព្រមទាំងទិសដៅរបស់រាជរដ្ឋាភិបាលអាណត្តិទី៧ ក្នុងការជំរុញ និងលើកកម្រិតគុណភាពផ្លូវទាំងពីរខ្សែនេះឲ្យមានសមត្ថភាពស្មើគ្នាដល់កម្រិតល្បឿន ៨០ គីឡូម៉ែត្រក្នុងមួយម៉ោង និងជំរុញនូវការចរចាបញ្ចប់កិច្ចសន្យាសម្បទានផ្លូវដែកថ្មី ឲ្យបានរួចរាល់ក្នុងពេលឆាប់ៗនេះ សំដៅចូលរួមចំណែកដល់ការអភិវឌ្ឍសេដ្ឋកិច្ចកម្ពុជាឲ្យកាន់តែមានការរីកចម្រើនបន្ថែមទៀត។
ចំណែកគណៈប្រតិភូក្រុមហ៊ុន Yunnan Linkun Investment Group Co., LTD បានអរគុណថ្នាក់ដឹកនាំក្រសួង ដែលបានផ្ដល់អនុសាសន៍ល្អៗដល់ក្រុមហ៊ុនក្នុងការស្វែងយល់បន្ថែមក្នុងការវិនិយោគលើខ្សែផ្លូវដែកថ្មីនៅកម្ពុជា ក្នុងការតភ្ជាប់ពីកម្ពុជាទៅវៀតណាម និងកម្ពុជាទៅឡាវ ជាមួយនឹងទស្សនាទាននៃការសិក្សាបណ្ដាញផ្លូវដែកល្បឿនលឿនថ្មីនៅក្នុងប្រទេសផងដែរ។
កម្ពុជាមានគម្រោងផ្លូវដែក ៨ ដែលរាជរដ្ឋាភិបាលកម្ពុជាបានអនុម័តដាក់បញ្ចូលក្នុងផែនការមេគ្រប់ជ្រុងជ្រោយស្ដីពីប្រព័ន្ធដឹកជញ្ជូនអន្តមធ្យោបាយ និងភស្តុភារកម្ពុជាឆ្នាំ ២០២៣ -២០៣៣ ក្នុងចំណោមផែនការមេសរុប ១៧៤ គម្រោង៕
អត្ថបទ៖ មេរ៉ា, រូបភាព៖ ក្រសួងសាធារណការ និងដឹកជញ្ជូន