តាមដានជាមួយយើង៖ Million Times

សម្ដេច ហ៊ុន សែន បានវាយតម្លៃខ្ពស់ចំពោះអាជ្ញាធរដែលបានខិតខំកសាងច្រកអន្តរជាតិនេះឡើង ហើយតាមរយៈច្រកអន្តរជាតិម៉ឺនជ័យនេះ និងរួមចំណែកយ៉ាងសំខាន់ក្នុងការដោះដូរទំនិញរវាងប្រទេសទាំងពីរ កម្ពុជា-វៀតណាម ជាពិសេសផលិតកសិផល កសិកម្មរបស់ប្រជាពលរដ្ឋដែលស្ថិតនៅជាប់ព្រំដែននៃប្រទេសទាំងពីរ។ សម្ដេចក៏បានជំរុញឱ្យអាជ្ញាធរខិតខំ ប្រែក្លាយតំបន់ព្រំដែននេះឲ្យក្លាយទៅជាព្រំដែន សុខសន្តិភាព ជាព្រំដែនសម្រាប់ទីផ្សារដោះដូរទំនិញ និងជាព្រំដែនដែលមានការអភិវឌ្ឍន៍រីកចម្រើន សម្រាប់ជីវភាពរស់នៅរបស់ប្រជាពលរដ្ឋនៃប្រទេសទាំងពីរ។

យោងតាមរបាយការណ៍ បានឲ្យដឹងថា នេះគឺជាទីស្នាក់ការច្រកទ្វារព្រំដែនអន្តរជាតិ ម៉ឺនជ័យ-តីនណាម (កម្ពុជា-វៀតណាម) ដែលដំបូងឡើយ ទីតាំងនេះជាច្រករបៀងដែលប្រជាជនរស់នៅទាំងសងខាងតែងតែដោះដូរទំនិញ និងកសិផលទៅវិញទៅមក។ក្នុងអំឡុងឆ្នាំ២០១០ រាជរដ្ឋាភិបាលកម្ពុជាបានបង្កើតជាច្រកទ្វារតំបន់ព្រំដែនម៉ឺនជ័យនៅថ្ងៃទី ៣០ ខែមេសា ឆ្នាំ២០១៤ រាជរដ្ឋាភិបាលកម្ពុជា បានសម្រេចដំឡើងកម្រិតច្រកទ្វារតំបន់ ព្រំដែនម៉ឺនជ័យ ទៅជា “ច្រកទ្វារព្រំដែនអន្តរជាតិម៉ឹនជ័យ” ។

ចំពោះភាគីវៀតណាម បានឯកភាពដំឡើងកម្រិតច្រកទ្វារតំបន់ព្រំដែនតឺនណាម ទៅជា “ច្រកទ្វារ ព្រំដែនអន្តរជាតិ តឺនណាម នៅថ្ងៃទី ១៨ ខែតុលា ឆ្នាំ២០១៧។ ច្រកទ្វារព្រំដែនអន្តរជាតិ ម៉ឺនជ័យ-តឹនណាម (កម្ពុជា-វៀតណាម) ត្រូវបានសម្ពោធដាក់ឱ្យដំណើរការ ជាបណ្តោះអាសន្នកម្រិតថ្នាក់ខេត្ត គឺខេត្តព្រៃវែង ខេត្តតៃនិញ កាលពីថ្ងៃទី៣១ ខែឧសភា ឆ្នាំ២០២១។

សូមជម្រាបថា ខេត្តព្រៃវែងគ្រោងរៀបចំកិច្ចប្រជុំពិភាក្សាជាមួយអាជ្ញាធរខេត្តតៃនីញ អំពីពិធីសម្ពោធដាក់ឱ្យប្រើប្រាស់ជាផ្លូវការនូវច្រកទ្វារព្រំដែនអន្តរជាតិម៉ឺនជ័យ-តឺនណា ខ្ពង់ខ្ពស់ពីថ្នាក់ដឹកនាំនៃប្រទេសទាំងពីរ។ ច្រទ្វារនេះមានទំហំផ្ទៃដីសរុបចំនួន ៨៩,៥៧៧​ម៉ែត្រការេ ដោយបានដោះស្រាយផលប៉ះពាល់ជូនអ្នកពាក់ព័ន្ធបានរួចរាល់នៅឆ្នាំ២០២០ និងបានរៀបចំឱ្យមានហេដ្ឋារចនាសម្ព័ន្ធដូចខាងក្រោម៖ អគារបំពេញបែបបទចេញ-ចូលបណ្តោះអាសន្នចំនួន០១ខ្នង ទំហំ៤៥x៧,៣ម៉ែត្រ ស្មើរនឹង០៦បន្ទប់ សាងសង់ក្នុងឆ្នាំ២០១៩។ ខ្លោងទ្វាររូបប្រាសាទអង្គរវត្តចំនួន០១ ប្រវែង២២,៤ម៉ែត្រ កម្ពស់១៧ម៉ែត្រ សាងសង់ក្នុងឆ្នាំ២០២០។ អគារបំពេញបែបបទចេញ-ចូលជាសំណង់រឹងមាំ ចំនួន០២ខ្នង ដោយមួយខ្នងមានទំហំ៤៤x១៥ម៉ែត្រ ស្មើរ​នឹង ១៤បន្ទប់ សាងសង់នៅឆ្នាំ២០២០៕

The post សម្ដេច ហ៊ុន សែន ជំរុញឱ្យអាជ្ញាធរប្រែក្លាយតំបន់ព្រំដែនអន្តរជាតិម៉ឺនជ័យ ទៅជាព្រំដែនសុខសន្តិភាព សម្រាប់ទីផ្សារដោះដូរទំនិញ appeared first on Millions times.

តាមដានជាមួយយើង៖ Million Times

ពេលជួបពិភាក្សាទ្វេភាគីជាមួយ លោក Lawrence Wong សម្តេច ហ៊ុន ម៉ាណែត នាយករដ្ឋមន្ត្រី បានបញ្ជាក់ថា ដំណើរទស្សនកិច្ចរបស់លោក Wong មកកាន់កម្ពុជានាពេលនេះ ស្របពេលខួបទី៦០ នៃការបង្កេីតទំនាក់ទំនងការទូត នៃប្រទេសទាំងពីរ និងបានឆ្លុះបញ្ចាំង អំពីភាពជាដៃគូយូរអង្វែង និងរឹងមាំ រវាងប្រទេសយើងទាំងពីរ ក្នុងពេលបច្ចុប្បន្ន និងតទៅអនាគត។

ជំនួបដដែលនោះ ថ្នាក់ដឹកទាំងពីរ បានវាយតម្លៃខ្ពស់ចំពោះទំនាក់ទំនង និងកិច្ចសហប្រតិបត្តិការដ៏ល្អ យូរអង្វែង និងប្រកបដោយផ្លែផ្កា រវាងកម្ពុជា និង សិង្ហបុរី ព្រមទាំងសម្ដែងក្ដីរីករាយ និងស្វាគមន៍ចំពោះការរៀបចំនូវព្រឹត្តិការណ៍នានា ដើម្បីអបអរសាទរខួបទី៦០នៃការបង្កេីតទំនាក់ទំនងការទូតនៃប្រទេសទាំងពីរ។

ថ្នាក់ដឹកនាំទាំងពីរក៏បានវាយតម្លៃខ្ពស់អំពីការសម្រេចបាននូវសមិទ្ធផលជាច្រើន ដែលកើតចេញពីទំនាក់ទំនង និងកិច្ចសហប្រតិបត្តិការទ្វេភាគី ក្នុងគ្រប់កម្រិត និងគ្រប់វិស័យ, ព្រមទាំងប្ដេជ្ញាបន្តជំរុញពង្រឹង និងពង្រីក កិច្ចសហប្រតិបត្តិការដ៏ជិតស្និទ្ធនេះ ឱ្យកាន់តែរឹងមាំបន្ថែមទៀត។

ក្នុងក្របខ័ណ្ឌទ្វេភាគី ថ្នាក់ដឹកនាំទាំងពីរ បានពិភាក្សា និងឯកភាពគ្នាក្នុងការបន្តពង្រឹងពង្រីកនូវកិច្ចសហប្រតិបត្តិការ លើវិស័យសំខាន់ៗជាច្រើន រួមមាន៖ ពាណិជ្ជកម្ម, វិនិយោគ និងហិរញ្ញវត្ថុ, ការតភ្ជាប់ប្រជាជន និងប្រជាជន, ការពារជាតិ និងសន្តិសុខ, កសិកម្ម, សន្តិសុខស្បៀង និងថាមពល, និង ការបណ្តុះបណ្តាលជំនាញ និង វិជ្ជាជីវៈ។ ក្នុងក្របខ័ណ្ឌពហុភាគី, ថ្នាក់ដឹកនាំទាំងពីរ ក៏បានពិភាក្សា និងផ្លាស់ប្ដូរយោបល់គ្នាអំពីកិច្ចសហប្រតិបត្តិការនៅក្នុងក្របខ័ណ្ឌតំបន់ និងអន្តរជាតិ ដើម្បីជាឧត្តមប្រយោជន៍នៃប្រទេស និងប្រជាជនទាំងពីរ៕

The post កម្ពុជា-សិង្ហបុរី ប្ដេជ្ញាបន្តជំរុញការពង្រឹង និងពង្រីកកិច្ចសហប្រតិបត្តិការឱ្យកាន់តែរឹងមាំបន្ថែម appeared first on Millions times.

តាមដានជាមួយយើង៖ Million Times

ក្នុងជំនួបនោះ គណៈប្រតិភូសាជីវកម្ម Marubeni បានពិភាក្សាអំពីគម្រោងវិនិយោគរបស់ក្រុមហ៊ុនក្នុងវិស័យទឹកស្អាតនៅកម្ពុជា ដោយផ្តោតលើការរួមចំណែកដល់គោលដៅអភិវឌ្ឍន៍ប្រកបដោយចីរភាព (SDG 6.1) ការសម្រេចបាននូវ​សាកលកម្ម និង​សមធម៌​ទឹកបរិភោគដែលមាន​សុវត្ថិភាព និង​ថ្លៃ​សមរម្យសម្រាប់ប្រជាជន​ទាំងអស់​ត្រឹម​ឆ្នាំ២០៣០។

តំណាងក្រុមហ៊ុន Marubeni ប្រាប់រដ្ឋមន្រ្តីឧស្សាហកម្មកម្ពុជាថា ក្រុមហ៊ុនបានបង្ហាញចំណាប់អារម្មណ៍ខ្ពស់ក្នុងការវិនិយោគលើផ្នែកហេដ្ឋារចនាសម្ព័ន្ធទឹកស្អាតនៅប្រទេសកម្ពុជា ដោយអនុវត្តគំរូអាជីវកម្មស្រដៀងគ្នា សម្រាប់ទាំងតំបន់ទីក្រុង និងការពង្រីកទៅតំបន់ជនបទ។

ជាការឆ្លើយតប លោក ហែម វណ្ណឌី បានស្វាគមន៍ចំពោះគំនិតផ្តួចផ្តើមនេះ ដោយលើកឡើងថា រាជរដ្ឋាភិបាលបើកចំហចំពោះ​ការវិនិយោគឯកជន និងផ្តោតលើដំណោះស្រាយយុទ្ធសាស្រ្ត ប្រកបដោយចីរភាព ជាជាងដំណោះស្រាយរយៈពេលខ្លី និងខ្នាតតូច។ លោកថ្លែងថា៖ “ការវិនិយោគក្នុងវិស័យទឹកស្អាត ទោះបីមិនផ្តល់ប្រាក់ចំណេញខ្ពស់ និងឆាប់រហ័ស គឺជាការវិនិយោគមួយដែលមានសុវត្ថិភាព ហើយសេវាសាធារណៈនេះមានសារៈសំខាន់ខ្លាំងសម្រាប់សង្គមជាតិ”។

លោកបន្ថែមថា តំបន់ជនបទនាពេលបច្ចុប្បន្នអាចនឹងមិនមែនជាតំបន់ជនបទរហូតទេ។ យើងរំពឹងថានឹងតភ្ជាប់បណ្តាញទឹកស្អាតកម្រិតគ្រួសារកាន់តែច្រើន ហើយយើងមានទឡ្ហីករណ៍ច្បាស់លាស់ក្នុងការពង្រីកតួនាទីរបស់រដ្ឋាករទឹក បន្ថែមពីការគ្របដណ្តប់តែនៅតំបន់ទីក្រុង។

លោករដ្ឋមន្ត្រីក៏បានលើកទឹកចិត្តក្រុមហ៊ុន Marubeni ឱ្យធ្វើផែនការរយៈពេលវែង ដោយគិតគូរអំពីកំណើនតម្រូវការសម្រាប់ការរស់នៅ និងសម្រាប់តំបន់អភិវឌ្ឍន៍ឧស្សាហកម្មនាពេលអនាគត ទន្ទឹមនឹងនោះ ស្វែងរកគំរូអាជីវកម្មដែលមានភាពបត់បែន រួមទាំងការលក់ដុំទឹកឱ្យរដ្ឋាករទឹក ដោយក្រុមហ៊ុនអាចវិនិយោគលើរោងចក្រប្រព្រឹត្តិកម្ម និងបណ្តាញចែកចាយ។

សូមជម្រាបថា Marubeni គឺជាក្រុមហ៊ុនវិនិយោគដ៏ធំបំផុតមួយរបស់ប្រទេសជប៉ុន ដែលមានប្រតិបត្តិការអាជីវកម្មចម្រុះ នៅទូទាំងពិភពលោក រួមទាំងវិស័យគ្រឿងចក្រ ថាមពល សារធាតុគីមី ចំណីអាហារ វាយនភ័ណ្ឌ លោហធាតុនិងរ៉ែ និងវិស័យផ្សេងទៀតជាច្រើន។ នៅក្នុងវិស័យផ្គត់ផ្គង់ទឹក Marubeni បានសហការជាមួយរដ្ឋាភិបាល និងក្រុមហ៊ុនឯកជនលើគម្រោងហេដ្ឋារចនាសម្ព័ន្ធធំៗ ដោយប្រើប្រាស់ជំនាញ បទពិសោធ និងបណ្តាញសកលរបស់ខ្លួន ក្នុងការផ្តល់ដំណោះស្រាយសម្រាប់បញ្ហាកង្វះទឹកស្អាត និងគុណភាព៕

The post ក្រុមហ៊ុនជប៉ុន Marubeni បង្ហាញគម្រោងវិនិយោគទឹកស្អាតនៅកម្ពុជា ទាំងតំបន់ទីក្រុង និងការពង្រីកទៅតំបន់ជនបទ appeared first on Millions times.

តាមដានជាមួយយើង៖ Million Times

ក្នុងជំនួបពិភាក្សាការងារនៅព្រឹកថ្ងៃពុធនេះ សម្តេច ហ៊ុន សែន បានចាត់ទុក​ដំណើរ​ទស្សន​កិច្ច​របស់​លោក Lawrence Wong នៅ​កម្ពុជានាពេលនេះ ជាផ្នែកដ៏សំខាន់ នៃការជំរុញទំនាក់ទំនងរវាងកម្ពុជា និង​សិង្ហបុរី​ឲ្យ​កាន់​តែ​ល្អប្រសើរ​រីកចម្រើនបន្ថែមទៀត។

ក្នុង​ឱកាសនោះ សម្ដេចបានលើកឡើង​អំពី​ការ​ពង្រីក​ទំនាក់​ទំនង​រវាង​ប្រទេស​ទាំង​ពីរ​បន្ថែម​ទៀត​ ជាពិសេសតាមរយៈវិស័យពាណិជ្ជកម្ម សេដ្ឋកិច្ច និងវិស័យ​ទេសចរណ៍​ប្រទេស​ទាំង​ពីរ​ផង​ដែរ​។ សម្ដេចចង់ឱ្យមានជើងហោះហើរ កាន់តែច្រើនបន្ថែមទៀត ពីសិង្ហបុរីមកកាន់កម្ពុជា ជា​ពិសេស​នៅ​ពេល​ដែល​កម្ពុជា​ដាក់​ឱ្យ​ដំណើរ​ការ​ព្រលាន​យន្ត​ហោះ​អន្តរជាតិ​តេជោ​ថ្មី​នា​ពេល​ឆាប់​ខាងមុខ។

ក្នុងចំណោមបណ្តាប្រទេសសមាជិកអាស៊ានទាំងអស់ មានប្រទេសចំនួន៥ ដែលជាដៃ​គូ​ពាណិជ្ជកម្មកំពូលរបស់កម្ពុជា រួមមាន៖ វៀតណាម ថៃ សិង្ហបុរី ម៉ាឡេស៊ី និងឥណ្ឌូនេស៊ី។ ដោយឡែក ប្រទេសសិង្ហបុរី នាំចូលទំនិញពីកម្ពុជាក្នុងទំហំទឹកប្រាក់ចំនួន ២៦១​លានដុល្លារ នៅឆ្នាំ២០២៤។

តាមរយៈរបាយការណ៍របស់រដ្ឋលេខាធិការដ្ឋានអាកាសចរណ៍ស៊ីវិល (SSCA) បានបង្ហាញពីនិន្នាការវិជ្ជមានបន្ថែមទៀត ក្នុងរយៈពេល ៤ខែ ចុងក្រោយនេះ មានជើងហោះហើរចេញ-ចូល​(ទ្វេទិស)​ឆ្លងកាត់ប្រទេសកម្ពុជា​មានជាង ២.២ ម៉ឺនជើង ពោលគឺកើន​ឡើង ១៧​% បើ​ធៀប​នឹង​រយៈ​ពេល​ដូចគ្នា​ក្នុង​ឆ្នាំ២០២៤។

តាមរបាយការណ៍ដដែល ប្រទេសចំនួន៦ ​ក្នុងចំណោមប្រទេសទាំង ១២ ដែលមានចំនួនជើងហោះហើរ និងចំនួនអ្នកដំណើរតាមផ្លូវអាកាសចេញ-ចូល​កម្ពុជាច្រើនជាងគេ គឺ​​ប្រទេសថៃ ចិន​​ វៀតណាម ​សិង្ហបុរី ម៉ាឡេស៊ី និងប្រទេស​កូរ៉េ៕

The post សម្តេច ហ៊ុន សែន ប្រាប់នាយករដ្ឋមន្រ្តីសឹង្ហបុរី ឲ្យជំរុញពាណិជ្ជកម្ម សេដ្ឋកិច្ច និងទេសចរណ៍​ប្រទេស​ទាំង​ពីរ appeared first on Millions times.

តាមដានជាមួយយើង៖ Million Times

លោក សឿម ប៊ុនរិទ្ធ អ្នកនាំពាក្យរដ្ឋបាលខេត្តបាត់ដំបង បានឲ្យដឹងថា កម្ពុជាយើង មិនលេងល្បែងបិទពួនជាមួយថៃទេ គឺច្រកទ្វារព្រំដែនយើងបិទជាប់រហូត លើកលែងតែបងប្អូនប្រជាពលរដ្ឋ បងប្អូនពលករខ្មែរយើងចូលមកកម្ពុជាយើងវិញ និងបងប្អូនប្រជាពលរដ្ឋដែលមានជំងឺឈឺធ្ងន់ ឫ អ្នកជំងឺសង្គ្រោះបន្ទាន់ ចេញទៅប្រទេសថៃ។

កាលពីថ្ងៃអាទិត្យទី២៩ខែមិថុនា កងទ័ពនៅទិសបូព៌ាប្រទេសថៃ បានបញ្ជូនលិខិតមួយមករដ្ឋាភិបាលកម្ពុជា ស្នើសុំបើកច្រកទ្វារព្រំដែនមួយចំនួននៅជាប់ខេត្តស្រះកែវ តែនាយករដ្ឋមន្ត្រីកម្ពុជា សម្តេច ហ៊ុន ម៉ាណែត បានបដិសេធមិនធ្វើតាមសំណើនោះទេ។ សម្តេចបានប្រាប់ទៅអាជ្ញាធរថៃក៏ដូចជាប្រជាជនថៃ ដែលមានបំណងចង់ឲ្យមានការបើកច្រកព្រំដែនកម្ពុជា-ថៃ ឡើងវិញនោះ គឺពួកគេត្រូវស្នើទៅអ្នកដែលមានអំណាចពិតប្រាកដនៅប្រទេសថៃ ពោលគឺមិនថាជាកងទ័ពឬអ្នកណានោះទេ ឲ្យបើកច្រកព្រំដែនឲ្យមានស្ថានភាពប្រក្រតីឡើងវិញដូចមុនថ្ងៃទី ៧ មិថុនា ឆ្នាំ២០២៥។ នេះមានន័យថា អ្នកណាផ្តើមបញ្ហាមុន អ្នកនោះត្រូវដោះស្រាយ ហើយបើថៃព្រមបើកព្រំដែនវិញ កម្ពុជានឹងបើកច្រកព្រំដែនខាងកម្ពុជាយ៉ាងយូរ ៥ម៉ោងតាមក្រោយវិញដែរ។

ជុំវិញជម្លោះព្រំដែនកម្ពុជា-ថៃនេះ កាសែត Bangkok Post ចុះផ្សាយដកស្រង់សម្តី លោកស្រី អារ៉ាដា ហ្វួងតង (Arada Fuangtong) អគ្គនាយកនាយកដ្ឋាន ពាណិជ្ជកម្មបរទេស បាននិយាយថា​ ប្រសិនព្រំដែននៅបន្តបិទពីខែមិថុនានេះ ដល់ខែធ្នូ ការខាតបង់ដែលត្រូវបានប៉ាន់ស្មានទុកក្នុងប្រាក់ចំណូលនៃការនាំចេញនឹងអាច​លើសពី៦០ពាន់លានបាត។ ជាលទ្ធផលដែលបានមកពីផលវិបាកនៃការបិទព្រំដែននេះ គឺពាណិជ្ជកម្មថៃតាមទល់ដែនឆ្នាំនេះ ត្រូវបានប៉ាន់ស្មានថា នឹងកើនឡើងត្រឹមតែ ១ទៅ២ភាគរយ ប៉ុណ្ណោះ។

បើតាមការផ្សាយរបស់ Bangkok Post ការិយាល័យពាណិជ្ជកម្មរបស់ថៃតាមខេត្តនៅបណ្តោយព្រំដែនខ្មែរ ថៃ បានរកឃើញថា ហាងខ្មែរ និងថៃ ជាច្រើនត្រូវបានបិទ ចាប់តាំងពីមានវិធានការគ្រប់គ្រងព្រំដែននានាដែលត្រូវបានអនុវត្តចាប់ពីថ្ងៃទី ៧ ខែមិថុនា។ ផ្នែកនាំចេញដែលរងផលប៉ះពាល់អាក្រក់បំផុតគឺ បន្លែ ផ្លែឈើ និងអាហារប្រើប្រាស់ប្រចាំថ្ងៃជាច្រើនទៀត៕

The post ថៃបើកច្រកទ្វារជាឯកតោភាគីនៅគ្រប់ច្រកទ្វារព្រំដែនទាំង៥ ក្នុងភូមិសាស្រ្តខេត្តបាត់ដំបង appeared first on Millions times.

តាមដានជាមួយយើង៖ Million Times

សម្តេច ហ៊ុន ម៉ាណែត បានបង្ហាញរបាយការណ៍ពីក្រុមប្រឹក្សាអភិវឌ្ឍន៍កម្ពុជា ឲ្យដឹងថា ក្នុងរយៈពេល ៥ ខែ នៃឆ្នាំ ២០២៥នេះ គម្រោងវិនិយោគចំនួន ២៩០ គម្រោង ត្រូវបានអនុម័ត ក្នុងទុនវិនិយោគប្រមាណ ៤,២ពាន់លានដុល្លារអាមេរិក។ បើប្រៀបធៀបនឹងរយៈពេលដូចគ្នាក្នុងឆ្នាំ២០២៤ ចំនួនគម្រោងបានកើនឡើងចំនួន ១៣៧គម្រោង ស្មើនឹងប្រមាណ ៩០% ខណៈទុនវិនិយោគបានកើនឡើងប្រមាណជាង ១,៤ ពាន់លានដុល្លារអាមេរិក ស្មើនឹងប្រមាណ ៥២%។

សម្តេច ហ៊ុន ម៉ាណែត បានថ្លែងថា រាជរដ្ឋាភិបាលកម្ពុជា ប្តេជ្ញាបន្តថែរក្សា ការពារសន្តិភាព និង ស្ថិរភាពពេញលេញទោះក្នុងតម្លៃណាក៏ដោយ។ ទន្ទឹមនឹងការរក្សាបាននូវសន្តិភាព និង ស្ថិរភាព រាជរដ្ឋាភិបាលបន្តគិតគូរ និងយកចិត្តទុកដាក់ខ្ពស់ លើការអភិវឌ្ឍហេដ្ឋារចនាសម្ព័ន្ធ ជាមួយនឹងការអភិវឌ្ឍធនធានពលកម្មវ័យក្មេង ប្រកបដោយភាពប្រកួតប្រជែងខ្ពស់ ដែលនឹងជួយគាំទ្រដល់ផលិតកម្មនានាបានយ៉ាងសកម្ម និងមានប្រសិទ្ធភាព។

សម្តេចក៏បានថ្លែងលើកទឹកចិត្តខ្ពស់ និងសូមឲ្យអ្នកវិនិយោគជ្រើសរើសកម្ពុជា ដើម្បីធ្វើការវិនិយោគកិច្ចការផ្សេងនៅកម្ពុជា។ សម្តេចបន្ថែមថា លោកអ្នកបានយល់ដឹងពីស្ថេរភាព និងស្ថានភាពនៅកម្ពុជា រាជរដ្ឋាភិបាលប្តេជ្ញាក្នុងការរក្សាលំនឹងដល់អ្នកវិនិយោគបន្តវិនិយោគនៅកម្ពុជា៕

អត្ថបទ៖ សាងតេជៈ រូបភាព៖ បណ្តាញសង្គមសម្តេចធិបតី

The post រយៈពេល ៥ខែឆ្នាំ២០២៥ គម្រោងវិនិយោគចំនួន ២៩០ គម្រោង ត្រូវបានអនុម័ត appeared first on Millions times.

តាមដានជាមួយយើង៖ Million Times

ក្នុងកម្មវិធី អបអរសាទរខួបអនុស្សាវរីយ៍លើកទី៤៨ ទិវានៃការចងចាំដំណើរឆ្ពោះទៅផ្តួលរំលំរបបប្រល័យពូជសាសន៍ ប៉ុល ពត និងខួបលើកទី៤៧ ថ្ងៃបង្កើតកងកម្លាំងប្រដាប់អាវុធសាមគ្គីសង្រ្គោះជាតិកម្ពុជា លោក ទៀ សីហា ក៏បានអំពាវនាវដល់ប្រជាពលរដ្ឋខ្មែរ យើងសូមកុំរើសអើងដល់ជនជាតិថៃ។

លោក ទៀ សីហា ថ្លែងយ៉ាងដូច្នេះថា «ខ្ញុំសូមឲ្យអាជីវករថៃ អ្នកវិនិយោគថៃដែលនៅក្នុងប្រទេសកម្ពុជា សូមមេត្តារក្សាភាពអត់ធ្មត់បន្តិច កម្ពុជាមិនចង់ទេ ខ្ញុំថា ជាបញ្ហាកងទ័ព និងកងទ័ពដែលត្រូវបន្តដោះស្រាយរួមគ្នា»។

បើតាមការលើកឡើងរបស់ប្រមុខការពារជាតិ ចំពោះអាជីវករថៃ ដែលកំពុងប្រកបអាជីវកម្មនៅក្នុងប្រទេសកម្ពុជា សូមបន្តនិរន្តភាពនៃមុខរបររបស់ខ្លួន ព្រោះកម្ពុជាក៏ដូចជាប្រជាពលរដ្ឋកម្ពុជាទាំងមូល មិនធ្វើទុកបុកម្នេញទៅកាន់ជនជាតិថៃដែលរស់នៅប្រទេសកម្ពុជាឡើយ។

លោកបានអះអាងដែរថា បញ្ហាដែលកើតរវាងកងទ័ពទាំងពីរ កម្ពុជា-ថៃ ត្រូវតែដោះស្រាយដោយកងទ័ព និងកងទ័ព មិនបានទាញប្រជាពលរដ្ឋមកជាប់ពាក់ព័ន្ធ ឬញុះញង់ឲ្យមានការរើសអើងជាតិសាសាន៍នោះឡើយ៕

អត្ថបទ៖ សាងតេជៈ រូបភាព៖ ផេកក្រសួងការពារជាតិ

The post លោក ទៀ សីហា អំពាវនាវពលរដ្ឋថៃនៅកម្ពុជា បន្តខិតខំធ្វើការរកសុី កម្ពុជាមិនរើសអើងឡើយ appeared first on Millions times.

តាមដានជាមួយយើង៖ Million Times

ក្នុងកម្មវិធីអបអរសាទរខួបអនុស្សាវរីយ៍លើកទី៤៨ ទិវានៃការចងចាំដំណើរ​ឆ្ពោះទៅផ្តួលរំលំ​របបប្រល័យពូជសាសន៍ ប៉ុល ពត និងខួបលើកទី៤៧ ថ្ងៃបង្កើតកងកម្លាំងប្រដាប់អាវុធសាមគ្គីសង្រ្គោះជាតិកម្ពុជា នៅខេត្តត្បូងឃ្មុំ កាលពីព្រឹកថ្ងៃទី២០ ខែមិថុនា នាយឧត្តមសេនីយ៍ ទៀ សីហា បានថ្លែងថា បើថៃមានបំណងចង់ដោះស្រាយបញ្ហាព្រំដែននេះ គឺប្រហែលជាដោះស្រាយបញ្ហាតាមរយៈយន្តការ JBC កន្លងមកហើយ ប៉ុន្តែថៃបានអាក់ខាន​ជាមួយនឹង​ប្រទេសកម្ពុជាតាំងពីឆ្នាំ ២០១២, ២០១៣មកម្លេះ ទើបតែចាប់ដៃគ្នាក្នុងការដោះស្រាយបញ្ហាព្រំដែនក្រោមយន្តការ JBC នៅឆ្នាំ២០២៥ នេះទេ រយៈពេល ១២ឆ្នាំហើយដែលថៃ និងកម្ពុជា អាក់ខានក្នុងការ​ដោះស្រាយ​បញ្ហាព្រំដែន។

លោកថ្លែងថា៖ «កម្ពុជាចង់បានណាស់នូវព្រំដែនមិត្តភាព កិច្ចសហប្រតិបត្តិការ និងការអភិវឌ្ឍរួមគ្នាទាំង៣ប្រទេស ជាប់ព្រំដែនជាមួយគ្នា, ដល់ពេល​យើង​រកដំណោះស្រាយមិនបាន ដូចខ្ញុំលើកឡើង ដរាបណាយើងប្រើផែនទីខុសគ្នា យើងមិនអាចរកចំណុចកណ្តាលក្នុងការដោះស្រាយបាននោះទេ នេះហើយបានជារាជរដ្ឋាភិបាលកម្ពុជា សម្រេចចិត្តយ៉ាងម៉ឺងម៉ាត់បំផុត ក្នុងការដាក់ចំណុចនេះទៅតុលាការយុត្តិធម៍អន្តរជាតិ ដើ​ម្បីឱ្យមានអ្នកទី៣ មកកាត់ក្តី បើសិនជាយើងនៅប្រើផែនទីខុសគ្នា ចង់ ១០ឆ្នាំទៀត ចង់ ១០០ឆ្នាំទៀត ចង់១០០០ឆ្នាំទៀត ក៏យើងមិនអាចដោះស្រាយ​គ្នាបានដែរ»។

ចំពោះបញ្ហាព្រំដែនកម្ពុជា-ថៃ លោក ទៀ សីហា បានបញ្ជាក់ថា យន្តការដែលល្អបំផុតគឺជូនដល់តុលាការអន្តរជាតិទីក្រុងឡាអេ ដើម្បីជួយកាត់ក្តី, ការកាត់ក្តីនេះក៏មិនប្រាកដថា កម្ពុជាចំនេញទឹកដី ហើយក៏មិនប្រាកដថា ភាគីថៃចំនេញនោះទេ គឺអាចមានចំនេញ មានខាតដូចគ្នា ដោយយក​ចំណុចកណ្តាលជាគោល តែយើងបានមកវិញនូវសន្តិភាព និងបានការឯកភាពគ្នា ដែលនេះហើយ​គឺបានពីការកាត់ក្តី​របស់តុលាការយុត្តិធម៍អន្តរជាតិ។

រឿងព្រំដែននេះ កន្លងទៅថ្មីៗនេះ រាជរដ្ឋាភិបាលកម្ពុជា បានបញ្ជូនលិខិតជាផ្លូវការទៅកាន់តុលាការយុត្តិធម៌អន្តរជាតិ (ICJ) រួចហើយ ដើម្បីជួយស្វែងរកដំណោះស្រាយ​ពាក់ព័ន្ធទៅនឹងបញ្ហាវិវាទព្រំដែន​នៅតំបន់ប្រាសាទតាមាន់ធំ ប្រាសាទតាមាន់តូច ប្រាសាទតាក្របី និងតំបន់មុំបី៕

The post រឿងព្រំដែន! រដ្ឋមន្រ្តីការពារជាតិ៖ ដរាបណាភាគីទាំង២ នៅតែប្រើផែនទីខុសគ្នា គឺមិនអាចរកចំណុច​កណ្តាល​ដោះស្រាយ​បាននោះទេ appeared first on Millions times.

តាមដានជាមួយយើង៖ Million Times

សម្តេច ហ៊ុន សែន បានរំលឹកថា រឿងលោកឪស៊ុច ក៏មិនជារឿងថ្មីនោះដែរ ព្រោះសម្តេចក៏ដូចជារាជរដ្ឋាភិបាលកម្ពុជា ក៏ធ្លាប់ជួយដល់អតីតនាយករដ្ឋមន្ត្រី ថាក់សុីន និងអតីតនាយករដ្ឋមន្ត្រី យ៉ីងឡាក់ ដែលជាឪពុកបង្កើត ម្តាយមីងបង្កើត របស់នាយករដ្ឋមន្ត្រីថៃបច្ចុប្បន្នផងដែរ។ ការរំលឹករបស់សម្តេចធ្វើឡើងក្នុងពេលដែលសម្តេច ហ៊ុន ម៉ាណែត បានប្រកាសស្វាគមន៍លោកឪស៊ុច មកគង់នៅកម្ពុជា ក្រោយមានការរើសអើងពីប្រជាពលរដ្ឋថៃមួយចំនួន។

តាមរយៈបណ្តាញសង្គមហ្វេសប៊ុក សម្តេច ហ៊ុន សែន សរសេរយ៉ាងដូច្នេះថា នៅពេលទស្សនកិច្ចផ្លូវការរបស់នាយករដ្ឋមន្ត្រីថៃនៅកម្ពុជា កាលពីខែមេសា ឆ្នាំ២០២៥កន្លងទៅ ក្រៅពីកម្មវិធីផ្លូវការយើងមានកម្មវិធីគ្រួសារដោយនាយករដ្ឋមន្ត្រីថៃ អ៊ុងអុីន និងស្វាមីបានមកទទួលទានអាហារនៅផ្ទះខ្ញុំ។ មុនពេលចាកចេញនាយករដ្ឋមន្ត្រីថៃ បានសុំមើលបន្ទប់ដែលឪពុករបស់គាត់ និងម្តាយមីងរបស់គាត់សម្រាក ព្រោះផ្ទះរបស់ខ្ញុំបានរក្សាបន្ទប់ពីរជូនបងប្អូនទាំងពីរនាក់។ បន្ទប់មួយខ្ញុំដាក់ឈ្មោះថា បន្ទប់ ថាក់សុីន និងបន្ទប់មួយទៀតមានឈ្មោះថា បន្ទប់ យ៉ីងឡាក់។ ស្វាមីនាយករដ្ឋមន្ត្រីថៃ បានថត និងថតជាវីដេអូនៅបន្ទប់ទាំងពីរនេះ។

សម្តេចបានបញ្ជាក់ថា មនោសញ្ចេតនារយៈពេលជាង ៣០ឆ្នាំរវាងគ្រួសារទាំងពីរ ត្រូវបានបំផ្លាញដោយការបែកធ្លាយនូវការសន្ទនាតាមទូរស័ព្ទដោយមន្ត្រីកម្ពុជាណាមួយដែលមានកំហឹងចំពោះការប្រមាថមកលើរូបសម្តេច និងនាយករដ្ឋមន្ត្រីកម្ពុជាថាគ្មានវិជ្ជាជីវៈ។

គួររម្លឹកថា ការបែកធ្លាយសំឡេងសន្ទនាមួយរវាងសម្ដេច ហ៊ុន សែន និងនាយករដ្ឋមន្ត្រីថៃបច្ចុប្បន្ន បានលាតត្រដាងការពិតដ៏គួរឱ្យភ្ញាក់ផ្អើល និងគួរឲ្យព្រួយបារម្ភ ជុំវិញភាពប្រេះស្រាំផ្ទៃក្នុងរវាងរាជរដ្ឋាភិបាលថៃ និងក្រុមយោធា និងក៏បង្ហាញយ៉ាងច្បាស់ផងដែរថា តើជម្លោះនៅព្រំដែនរវាងកម្ពុជានិងថៃបច្ចុប្បន្ន តើអ្នកណាជាអ្នកបង្កហេតុ?

ការបែកធ្លាយសំឡេងសន្ទនារយៈពេលជាង១៧នាទី បានបង្ហាញថា ទំនាស់ព្រំដែនរវាងកម្ពុជា និងថៃនាពេលនេះ គឺកើតឡើងដោយសារតែមហិច្ឆតារបស់ក្រុមយោធាថៃ ដែលធ្វើឱ្យទំនាក់ទំនងធ្លាប់តែល្អរវាងកម្ពុជានិងថៃកន្លងមកនេះបានប្រែក្លាយជាមានភាពប្រេះស្រាំ។ ជាមួយគ្នានេះ ក៏នាំឲ្យបក្សប្រឆាំងថៃស្នើសុំឲ្យលោកស្រី Paetongtarn Shinawatra ចុះចេញពីតំណែងទៀតផង៕

អត្ថបទ៖ សាងតេជៈ រូបភាព៖ ផេកសម្តេចតេជោ

The post មនោសញ្ចេតនារយៈពេលជាង ៣០ឆ្នាំរវាងគ្រួសារសម្តេច ហ៊ុន សែន និងលោក ថាក់ស៊ីន ត្រូវបានបំផ្លាញដោយការបែកធ្លាយសារសន្ទនា appeared first on Millions times.

តាមដានជាមួយយើង៖ Million Times

លើបណ្តាញសង្គម Facebook លោកឧកញ៉ា អ៉ឹង គីមហុង បានបង្ហោះវីដេអូបង្ហាញអង្ករ ២០តោន ទិញពីរោងម៉ាស៊ីនកិនស្រូវកូនខ្មែរនៅខេត្តបាត់ដំបង ដើម្បីចែកជូនបងៗកងទ័ព។

លោកឧកញ៉ាបានសរសេរយ៉ាងដូច្នេះថា៖ «ខ្ញុំបាទនិងជំទាវតូចបានទិញអង្ករ២០តោននិងរបស់ផ្សេងទៀតដើម្បីយកទៅអោយបងៗកងទព័នៅជួរមុខនិងតាមបន្ទាត់ព្រំដែន»។

សូមទស្សនាវីដេអូ៖

The post ឧកញ៉ា អុឹង គីមហុង ទិញអង្ករ ២០តោនពីរោងម៉ាស៊ីនកិនស្រូវកូនខ្មែរ ជូនកងទ័ពជួរមុខតាមព្រំដែន appeared first on Millions times.