គណៈប្រតិភូឥណ្ឌា ដែលដឹកនាំដោយក្រុមប្រឹក្សាលើកកម្ពស់ការនាំចេញឱសថឥណ្ឌា (Pharmexcil) បាននាំក្រុមហ៊ុនឱសថឥណ្ឌាល្បីៗ ៥៦ មកទស្សនាប្រទេសកម្ពុជា។
Million Times 
នៅថ្ងៃ ៤ ខែមីនា ឆ្នាំ ២០២៦ នេះ វេទិកាឱសថឥណ្ឌា-កម្ពុជា និងអន្តរកម្ម B2B ត្រូវបានប្រារព្ធឡើងនៅទីក្រុងភ្នំពេញ ដោយមានការចូលរួមពីភាគីពាក់ព័ន្ធកម្ពុជាជាង ១០០ នាក់មកពីវិស័យឱសថ និងថែទាំសុខភាពផងដែរ។ ព្រឹត្តិការណ៍នេះបានផ្ដល់វេទិកាសំខាន់មួយសម្រាប់ការចូលរួមប្រកបដោយស្ថាបនា ដែលអនុញ្ញាតឲ្យអ្នកតំណាងឧស្សាហកម្មមកពីប្រទេសទាំង ២ ស្វែងយល់ពីឱកាសអាជីវកម្ម ពង្រឹងភាពជាដៃគូ និងបង្កើនកិច្ចសហប្រតិបត្តិការក្នុងវិស័យឱសថ។
ការជួបប្រជុំគ្នារវាងខាងភាគីឥណ្ឌា និងកម្ពុជាត្រូវបានរៀបចំរួមគ្នាដោយក្រុមប្រឹក្សាផ្សព្វផ្សាយការនាំចេញឱសថនៃប្រទេសឥណ្ឌា (Pharmexcil) ដែលជាស្ថាប័នរដ្ឋាភិបាលសំខាន់មួយ សម្រាប់លើកកម្ពស់ផលិតផលឱសថឥណ្ឌាទៅកាន់ទីផ្សារអន្តរជាតិ និងស្ថានទូតឥណ្ឌាប្រចាំនៅភ្នំពេញ។
គណៈប្រតិភូសមាគមឧកញ៉ាកម្ពុជា ចូលរួមវេទិកា និងជំនួបផ្គូផ្គងធុរកិច្ចឥណ្ឌា-កម្ពុជាក្នុងវិស័យឱសថក្រោមអធិបតីភាព ឯកឧត្ដម Vanlalvawna Bawitlung ឯកអគ្គរដ្ឋទូតនៃសាធារណរដ្ឋឥណ្ឌា ប្រចាំកម្ពុជា និងមានការចូលរួមពីតំណាងក្រសួង-ស្ថាប័នរដ្ឋ សមាគម វិស័យឯកជននិងភាគីពាក់ព័ន្ធជាច្រើនរូបនាប្រទេសទាំង ២។
ជំនួបផ្គូផ្គងធុរកិច្ចនេះ ត្រូវបានរៀបចំឡើងក្នុងគោលបំណងលើកកម្ពស់កិច្ចសហប្រតិបត្តិការទ្វេភាគីរវាងកម្ពុជា និងឥណ្ឌា ក្នុងវិស័យឱសថដោយអ្នកចូលរួមក្នុងវេទិកានេះសុទ្ធសឹងជាជាធុរជន វិនិយោគិន និងភាគីពាក់ព័ន្ធអញ្ជើញមកពីវិស័យសុខាភិបាល វេជ្ជសាស្ត្រ និងឱសថ ដើម្បីកសាងបណ្ដាញទំនាក់ទំនងធុរកិច្ច និងស្វែងរកឱកាសក្នុងការចាប់ដៃគូគ្នាទៅវិញទៅមក៕
អត្ថបទ៖ ឆដា, រូបភាព៖ India in Cambodia និងសមាគមឧកញ៉ាកម្ពុជា