ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ លើកទឹកចិត្តសហគ្រិនស្ត្រីកម្ពុជាឱ្យពង្រឹងតួនាទីក្នុងវិស័យផលិតកម្ម ស្របពេលសហគ្រិនស្ត្រី បាននិងកំពុងដើរតួនាទីកាន់តែសំខាន់ក្នុងការអភិវឌ្ឍសេដ្ឋកិច្ចកម្ពុជា។ 

ឯកឧត្តម ហែម វណ្ណឌី បានជំរុញ និងលើកទឹកចិត្តបែបនេះ នាឱកាសទទួលជួបគណៈប្រតិភូសមាគមសហគ្រិនស្ត្រីកម្ពុជា ដើម្បីពិនិត្យលទ្ធផលការងាររបស់សមាគម និងពិភាក្សាកិច្ចសហប្រតិបត្តិការ ក្នុងការពង្រឹងអាជីវកម្មដឹកនាំដោយស្ត្រី​នៅកម្ពុជា កាលពីថ្ងៃទី៤ ខែមីនា ឆ្នាំ២០២៦។

គណៈប្រតិភូបានបង្ហាញវឌ្ឍនភាពការងាររបស់ សមាគមសហគ្រិនស្ត្រីកម្ពុជា ក្នុងឆ្នាំ២០២៥ និងផែនការ​ឆ្នាំ២០២៦ ព្រមទាំងស្នើសុំការណែនាំ ដើម្បីសម្របគំនិតផ្តួចផ្តើមរបស់ខ្លួន ជាមួយនឹងបេសកកម្មរបស់​ក្រសួង។ បច្ចុប្បន្ន សមាគមដែលមានអាយុ១៤ឆ្នាំនេះ បានពង្រីកសមាជិករហូតដល់ជាង ១ពាន់នាក់ នៅ​ទូទាំងប្រទេស និងបន្តពង្រីកសាខាតាមបណ្តាខេត្តបន្ថែមទៀត។

លោកជំទាវ យូ បូរី បានលើកឡើងពីកម្មវិធីសំខាន់ៗរបស់សមាគមក្នុងឆ្នាំ២០២៥ រួមមាន WE Academy, WE Talk, WE Share, WE Market Hub និងការត្រៀមដាក់ឱ្យដំណើរការកម្មវិធី  WE Financial Hub ដើម្បីគាំទ្រសហគ្រិនស្ត្រីឱ្យទទួលបានហិរញ្ញប្បទាន និងទីផ្សារ។

ឯកឧត្តមរដ្ឋមន្ត្រី បានអបអរសហគ្រិនស្ត្រីក្នុងឱកាសនៃទិវានារីអន្តរជាតិដែលនឹងខិតជិតមកដល់ និងបាន​កោតសរសើរចំពោះការរួមចំណែកជាបន្តបន្ទាប់របស់សមាគម ក្នុងការកសាងប្រព័ន្ធអេកូឡូស៊ីសហគ្រិន​ភាពនៅកម្ពុជា។

ឯកឧត្តមបានលើកឡើងថា៖”សហគ្រិនស្ត្រីកំពុងដើរតួនាទីកាន់តែសំខាន់ក្នុងការអភិវឌ្ឍសេដ្ឋកិច្ចកម្ពុជា។ បេសកកម្មរបស់សមាគម ក្នុងការគាំទ្រកំណើនធុរកិច្ច និងពង្រីកទីផ្សារ មានសហថាមភាពជិតស្និទ្ធជាមួយនឹងការងាររបស់ក្រសួង និងស្ថាប័ន ដូចជាសហគ្រិនខ្មែរ។”

ឯកឧត្តមបានលើកទឹកចិត្តឱ្យ សមាគមសហគ្រិនស្ត្រីកម្ពុជា ស្វែងរកប្រភពធនធានផ្សេងៗ ដើម្បីធានានិរន្តរភាពប្រតិបត្តិការ ព្រមទាំងពង្រឹងសមត្ថភាពសមាជិក ដើម្បីភ្ជាប់អាជីវកម្មសក្តានុពលដឹកនាំដោយស្ត្រី ជាមួយក្រុមហ៊ុនចែកចាយធំៗ ដែលអាចគាំទ្រផ្នែកទីផ្សារ ការធ្វើប្រេនឌីង និងលទ្ធភាព ទទួលបានហិរញ្ញប្បទាន។

ឯកឧត្តមបានបន្ថែមថា សហគ្រិនស្ត្រីកម្ពុជាមានសក្តានុពលដឹកនាំក្នុងវិស័យផលិតកម្ម និងឧស្សាហកម្ម។ តាមរយៈការលើកកម្ពស់ផលិតភាព និងសមាហរ័ណកាន់តែជ្រៅទៅក្នុងខ្សែច្រវាក់ផ្គត់ផ្គង់នៃឧស្សាហកម្ម​ធំៗ សហគ្រាសដឹកនាំដោយស្ត្រីអាចពង្រីកវិសាលភាព និងប្រកួតប្រជែងបានកាន់តែមានប្រសិទ្ធភាព។

ឯកឧត្តមរដ្ឋមន្ត្រីក៏បានលើកទឹកចិត្តឱ្យសមាគម បង្កើនកម្រិតជាដៃគូសន្ទនាគោលនយោបាយ ជាមួយក្រសួង-ស្ថាប័ន ដើម្បីរួមចំណែកដល់ការរៀបចំគោលនយោបាយ និងបទប្បញ្ញត្តិ ដែលគាំទ្រដល់ការរីកចម្រើននៃអាជីវកម្ម៕

អត្ថបទ៖ ប៊ី