អ្នកឧកញ៉ា ម៉ុង ឬទ្ធី ដែលជាសេដ្ឋីផ្នែកកសិកម្មដ៏ល្បីនៅកម្ពុជា បានដឹកនាំក្រុមការងារបច្ចេកទេស ចុះមកពិនិត្យមើលសកម្មភាព សាងសង់រោងចក្រផលិតជីធម្មជាតិ ដើម្បីកាត់បន្ថយការនាំចូលពីប្រទេសក្រៅ។
Million Times 
ថ្ងៃ១៣ ខែមករា ឆ្នាំ ២០២៦ អគ្គនាយកក្រុមហ៊ុន ម៉ុង ឫទ្ធី គ្រុប បានដឹកនាំក្រុមការងារបច្ចេកទេស ចុះមកពិនិត្យមើលសកម្មភាព សាងសង់រោងចក្រផលិតជីធម្មជាតិ ដែលមានកម្លាំងផលិតបានប្រមាណជា ១០០ តោនក្នុងមួយថ្ងៃ នៅលើផ្ទៃដី ៦៥ ០០០ ម៉ែត្រការ៉េ។
រោងចក្រនេះមានទីតាំងស្ថិតនៅភូមិស្វាយដង្គុំ ឃុំស្គុះ ស្រុកសំរោងទង ខេត្តកំពង់ស្ពឺ រោងចក្រនេះចាប់ផ្ដើមសាងសង់កាលពីដើមខែធ្នូឆ្នាំ ២០២៥ និងអាចសាងសង់រួចរាល់និងចាប់ផ្ដើមដំណើរការសាកល្បងនៅដើមខែកក្កដា ឆ្នាំ ២០២៦ ខាងមុខនេះ។ រោងចក្រនេះអាចទទួលយក កម្លាំងពលកម្ម បុគ្គលិក-កម្មករ ដោយផ្ទាល់ ប្រមាណជា ១០០ នាក់ ។
មិនតែប៉ុណ្ណោះ ពេលនេះក្រុមហ៊ុនរបស់អ្នកឧកញ៉ា ម៉ុង ឫទ្ធី មានតម្រូវការចាំបាច់នូវបុគ្គលិកបច្ចេកទេស ២នាក់ ដូចខាងក្រោមនេះ៖
១. អនុប្រធានទទួលបន្ទុកផលិតកម្ម ផ្នែករូបមន្តផលិតជី (Production Manager & Formulator)
២. បុគ្គលិកផ្នែកមន្ទីរពិសោធន៍ (Lab Technician)
ការខិតខំប្រឹងប្រែងរកគ្រប់មធ្យោបាយដើម្បីសាងសង់រោងចក្រផលិតជីធម្មជាតិនេះឡើង គឺដើម្បីជួយចូលរួមចំណែកក្នុងការកាត់បន្ថយការនាំចូលជីមកពីបរទេស និងដើម្បីផលិតជីដែលមានគុណភាពខ្ពស់តម្លៃសមរម្យ៕
អត្ថបទ៖ ឆដា, រូបភាព៖ ឯកឧត្តមបណ្ឌិត ម៉ុង ឫទ្ធី