ទីភ្នាក់ងារអង្គការសហប្រជាជាតិបានឲ្យដឹងថា ប្រទេសចិនបានសន្យាផ្ដល់ជំនួយជាសាច់ប្រាក់ ចំនួន ៥០០លានដុល្លារទៅកាន់អង្គការសុខភាពពិភពលោក WHO ក្នុងរយៈពេល ៥ឆ្នាំខាងមុខ ចំពេលអ្នកបរិច្ចាគធំបំផុតរបស់ខ្លួនគឺ សហរដ្ឋអាមេរិកកំពុងដកខ្លួនពីកម្មវិធីសប្បុរធម៌នានា។

សារព័ត៌មាន Reuters បានរាយការណ៍កាលពីថ្ងៃទី២១ ខែឧសភាថា ឧបនាយករដ្ឋមន្ត្រីចិន Liu Guozhong បានធ្វើបទបង្ហាញនៅក្នុងមហាសន្និបាទសុខភាពពិភពលោក ក្នុងទីក្រុងហ្សឺណែវថា «ពិភពលោកបច្ចុប្បន្ន កំពុងប្រឈមនឹងផលប៉ះពាល់ឯកតោភាគីនិយម និងអំណាចនយោបាយ ដែលវាបង្កជាបញ្ហាប្រឈមយ៉ាងលំបាក សម្រាប់សន្តិសុខសុខភាពពិភពលោក»។

តាមរយៈសេចក្ដីប្រកាសនេះ ចិនបានក្លាយជាប្រទេសបរិច្ចាគទឹកប្រាក់ច្រើនបំផុតសម្រាប់អង្គការ WHO ក្នុងឆ្នាំនេះ បន្ទាប់ពីរដ្ឋបាលប្រធានាធិបតីអាមេរិក Donald Trump ប្រកាសផ្អាកការផ្គត់ផ្គង់ជំនួយទ្រង់ទ្រាយធំ៕

អត្ថបទ៖ Luffy រូបភាព៖ SB