មហាសេដ្ឋីអចលនទ្រព្យ  ហុង ពីវ  បានប្រកាសនៅថ្ងៃនេះថា  ពេលនេះក្រុមហ៊ុន ពិភពថ្មី របស់លោកអស់លទ្ធភាពទិញផ្ទះចូលវិញទៀតហើយ ក្រោយពេលក្រុមហ៊ុនចំណាយលុយជាង ៣៨លានដុល្លារ ក្នុងរយៈពេល ៧ខែ ទិញផ្ទះពីអតិថិជនរបស់ខ្លួនកន្លងមក ដូច្នេះក្រុមហ៊ានធ្វើការកែប្រែលក្ខខណ្ឌជាថ្មី។

សេចក្តីប្រកាសព័ត៌មានបុរី ពិភពថ្មី បញ្ជាក់ថា ដោយសារស្ថានភាពសេដ្ឋកិច្ចជាសកលមិនទាន់ល្អនៅឡើយ ធ្វើឲ្យក្រុមហ៊ុនពុំមានលទ្ធភាពបន្តទៀត ដូច្នេះក្រុមហ៊ុនសម្រេចកែប្រែលក្ខខណ្ឌមានចំណុចពីរធំៗ ទី១ ក្រុមហ៊ុនទទួលទិញផ្ទះវិញ ទៅតាមលក្ខខណ្ឌដែលចែងក្នុងកិច្ចសន្យា និងត្រូវទូទាត់ជាក់ស្តែងជាមួយប្រាក់ជំពាក់បង់ប្រចាំខែ។ 

ទី២ ក្រុមហ៊ុនទទួលទិញវិញ តែប្រាក់ដើម បូកបន្ថែមជាមួយប្រាក់បានកក់ និងប្រាក់បានសង់ដើម ទូទាត់ជាក់ស្តែងជាមួយប្រាក់ជំពាក់បង់ប្រចាំខែ ប្រាក់នៅសល់ក្រោយទូទាត់មិនអាចលើសពី ៧ ០០០ដុល្លារ។ ករណីប្រាក់នៅសល់ក្រោយទូទាត់លើសពី ៧ ០០០ដុល្លារក្រុមហ៊ុនទទួលទិញវិញ ត្រឹម ៧ ០០០ដុល្លារ។ 

ក្រុមហ៊ុនរបស់អ្នកឧកញ៉ា ហុង ពីវ បានបញ្ជាក់ថា ការកែប្រែលក្ខខណ្ឌនេះ សម្រាប់តែអតិថិជនកំពុងបង់រំលស់មានផ្ទះតែមួយ និងបានទិញមុនថ្ងៃទី៣ ខែវិច្ឆិកា ឆ្នាំ២០២៣។

អត្ថបទ៖ សាងតេជៈ រូបភាព៖ បណ្តាញសង្គម