សម្ដេច ម៉ែន សំអន ឧត្ដមប្រឹក្សាផ្ទាល់ព្រះមហាក្សត្រ អមវត្តមានដោយលោក ហួត ហាក់ រដ្ឋមន្ត្រីក្រសួងទេសចរណ៍ និងក្រុមការងារជាច្រើនរូបទៀតបានទៅទស្សនាផ្ទះកំណើតរបស់សម្ដេច ហ៊ុន សែន ស្ថិតក្នុងភូមិពាមក្រៅ ឃុំពាមកោះស្នា ស្រុកស្ទឹងត្រង់ ខេត្តកំពង់ចាម កាលពីថ្ងៃ១១ ខែឧសភា ឆ្នាំ ២០២៥ កន្លងទៅ។
Million Times 
ដំណើរលើកដំបូងរបស់សម្ដេច ម៉ែន សំអន ដែលបានទៅទស្សនាដោយដោយផ្ទាល់នូវផ្ទះកំណើតសម្ដេច ហ៊ុន សែន ហើយលោក អ៊ុន ចាន់ដា អភិបាលខេត្តកំពង់ចាម ព្រមជាមួយប្រជាពលរដ្ឋរស់នៅម្ដុំនោះទទួលស្វាគមន៍ និងជួបសំណេះសំណាលគ្នា ព្រមជាមួយផ្លែឈើហូបផ្លែជាច្រើនមុខ។
រដ្ឋមន្ត្រីក្រសួងទេសចរណ៍ បង្ហើបឲ្យដឹងថា នឹងមានគម្រោងកែច្នៃ និងរៀបចំផ្ទះនោះ ទៅជារមណីយដ្ឋានប្រវត្តិសាស្ត្រតេជោសែន ដើម្បីទុកជាកេរ្តិ៍ដំណែលប្រវត្តិសាស្ត្ររបស់សម្ដេច ហ៊ុន សែន,ជាកំណប់ទ្រព្យរបស់អ្នកស្ទឹងត្រង់, ទុកជាការសិក្សាស្រាវជ្រាវរបស់យុវជនជំនាន់ក្រោយៗទៀត ក៏ដូចជា,ការបង្កើនចំណូលសេដ្ឋកិច្ចគ្រួសារពឹងផ្អែកទៅលើវិស័យទេសចរណ៍ និងស្ទួយមុខមាត់ខេត្តកំពង់ចាមឲ្យកាន់តែមានភាពរីកចម្រើនប្រកបដោយ សក្ដានុពល និងភាពទាក់ទាញ។
សម្ដេច ម៉ែន សំអន បានកោតសរសើរ ពេញចិត្ត និងគាំទ្រទាំងស្រុងចំពោះគំនិតផ្ដួចផ្ដើមប្រែក្លាយផ្ទះនៅស្រុកកំណើតសម្ដេច ហ៊ុន សែន ទៅជារមណីយដ្ឋានប្រវត្តិសាស្ត្រតេជោសែន និងជំរុញឲ្យរដ្ឋមន្ត្រីក្រសួងទេសចរណ៍ និងអភិបាលខេត្តកំពង់ចាមរួមសហការគ្នាសិក្សាពីនីតិវិធីក្នុងរៀបចំ។
តាមរយៈលោក ច្រឹង គឹមស្រ៊ាន ទីប្រឹក្សាសម្ដេច ហ៊ុន សែន បានបញ្ជាប់ថា កាលពីអំឡុង ខែមករា ឆ្នាំ ១៩៨៨ ដោយឃើញថាផ្ទះចាស់ មានសភាពទ្រុឌទ្រោមខ្លាំង ទើបសុំការឯកភាពពីឯកឧត្ដម ហ៊ុន នាង រុះរើផ្ទះចាស់នោះចេញ ជំនួសដោយផ្ទះថ្មី សង់ពីឈើប្រក់ក្បឿង ទំហំ ៦ម×១៤ម ដែលមានអ្នកស្រី សុន ជូ និងស្វាមី ជាអ្នកមើលថែទាំរហូតដល់សព្វថ្ងៃនេះ៕
អត្ថបទ៖ មេរ៉ា, រូបភាព៖ Men Sam An