ក្រុម Super Junior និងសិល្បករល្បីៗរបស់ K-POP នៃសាធារណរដ្ឋកូរ៉េ នឹងចូលរួមសម្ដែងនៅកម្ពុជា ក្នុងព្រឹត្តិការណ៍ “ការប្រគំតន្ត្រីសប្បុរសធម៌ចែករំលែកសង្គ្រោះជីវិតសកល”។ នេះបើតាមការឲ្យដឹងពីខាងក្រសួងទេសចរណ៍។
Million Times 
យោងតាមជំនួបសម្ដែងការគួរសម និងពិភាក្សាការងារ រវាងរដ្ឋមន្ត្រីក្រសួងទេសចរណ៍ ហួត ហាក់,លោក ម៉ម ប៊ុននាង ប្រធានគណៈកម្មការអង្កេត បោសសម្អាត និងប្រឆាំងអំពើពុករលួយនៃព្រឹទ្ធសភា និងលោក KIM YONG HWAN នាយកមូលនិធិចែករំលែកសង្គ្រោះជីវិតសកល នៅទីស្តីការក្រសួងទេសចរណ៍ បានលើកឡើងពីគម្រោងការប្រគំតន្រ្តីធំមួយនាពេលប៉ុន្មានខែទៀត ដែលមានក្រុមតារាលំដាប់ពិភពលោកមកចូលរួម។
ជំនួបនោះ ធ្វើឡើងកាលពីព្រឹកថ្ងៃ ១៦ ខែមករា ឆ្នាំ២០២៥។ លោក ម៉ម ប៊ុននាង ប្រធានគណៈកម្មការអង្កេត បោសសម្អាត និងប្រឆាំងអំពើពុករលួយនៃព្រឹទ្ធសភា និងលោក KIM YONG HWAN នាយកមូលនិធិចែករំលែក សង្គ្រោះជីវិតសកល បានជម្រាបជូន រដ្ឋមន្ត្រីក្រសួងទេសចរណ៍ ពីគោលបំណងឲ្យក្រសួងទេសចរណ៍ជួយសម្របសម្រួល និងពិនិត្យលទ្ធភាពក្នុងការសហការរៀបចំ “ការប្រគំតន្រ្តីសប្បុរសធម៌ចែករំលែកសង្រ្គោះជីវិតសកល”។
សម្រាប់ការគ្រោងរៀបចំប្រព្រឹត្តឡើង នៅចន្លោះខែឧសភា-ខែតុលា ឆ្នាំ ២០២៥ នៅរាជធានីភ្នំពេញ ដោយនឹងបន្តផ្សព្វផ្សាយ ៥ ប្រទេសរួមមាន កម្ពុជា, កូរ៉េ, ជប៉ុន, ហ្វីលីពីន និងចិន ដែលមានការចូលរួមសម្ដែងពីសិល្បករ K-POP ដ៏ល្បីល្បាញរបស់សាធារណរដ្ឋកូរ៉េ ជាពិសេសក្រុមតារាចម្រៀងបុរសដ៏ល្បីប្រចាំវិស័យ K-POP Super Junior និង សិល្បករខ្មែរជាច្រើនរូបទៀត ក្នុងគោលដៅប្រមូលមូលនិធិសប្បុរសធម៌ជួយគាំទ្រដល់មន្ទីរពេទ្យ និងគ្រឹះស្ថានអប់រំនានានៅក្នុងប្រទេសកម្ពុជា៕
អត្ថបទ៖ មេរ៉ា, រូបភាព៖ ក្រសួងទេសចរណ៍